វៀតណាម បានចាប់ផ្តើមបន្ធូរវិធានការរឹតបន្ដឹងការធ្វើដំណើរ និងគម្លាតសុវត្ថិភាព ដើម្បីបើកខ្យល់ដង្ហើមសេដ្ឋកិច្ចឡើងវិញជាបណ្តើរៗ ខណៈប្រទេសក្នុងតំបន់ដទៃដូចជា សិង្ហបុរី ឥណ្ឌូនេស៊ី និងថៃ កំពុងបង្កើនការប្រយុទ្ធប្រឆាំងការរាតត្បាតនៃជំងឺកូវីដ១៩។
វៀតណាម បានប្រកាសបិទប្រទេសនៅដើមខែមេសា បន្ទាប់ពីផ្ទុះករណីឆ្លងជំងឺកូវីដ១៩ ចេញពីមន្ទីរពេទ្យ Back Mai ក្នុងក្រុងហាណូយ និងភោជនីយដ្ឋានមួយនៅក្រុងហូជីមិញ ហើយក្រុងមនុស្សរាប់ម៉ឺននាក់រយៈពេល ១៤ថ្ងៃ និងបង្កើនការតេស្តរកករណីឆ្លងក្នុងទ្រង់ទ្រាយធំ។
តាមប្រភពសារព័ត៌មានក្នុងស្រុកបានឱ្យដឹងថា នៅចុងសប្តាហ៍មុននេះ អាជ្ញាធរបានចាប់ផ្តើមបើកឱ្យមានសកម្មភាពទេសចរណ៍នៅតាមគោលដៅទេសចរណ៍សំខាន់ៗ ភោជនីយដ្ឋាន ហាងកាហ្វេ និងក្លឹបហាត់ប្រាណនៃតំបន់មួយចំនួន បន្ទាប់ពីករណីឆ្លងសរុបទើរត្រឹម ២៧០ករណី (ជាសះស្បើយ ២២៥ករណី) នៅរយៈពេល ៤ថ្ងៃចុងក្រោយ។
បើតាមសេចក្តីរាយការណ៍ពី VNExpress អាជ្ញាធរក៏គ្រោងបើកឱ្យសិស្សថ្នាក់មេតយ្យ មធ្យម និងវិទ្យាល័យ នៅទូទាំងប្រទេសចូលរៀនឡើងវិញ ចាប់ពីថ្ងៃទី៤ ខែឧសភា និងកំពុងពិចារណាបើកដំណើរការជើងហោះហើរក្នុងស្រុកផងដែរ បន្ទាប់ពីតម្រូវការកំពុងកើនឡើង។
ផ្ទុយពីវៀតណាម សិង្ហបុរីកំពុងបង្កើនវិធានការទប់ស្កាត់រលកចម្លងក្នុងចង្កោមទ្រង់ទ្រាយធំលើពលករបរទេសប្រមាណ ៣សែននាក់ ហើយកំពុងពន្លឿនការសាងសង់ទីកន្លែងបន្ថែមសម្រាប់ដាក់អ្នកជំងឺកូវីដ១៩ និងអ្នកជាប់សង្ស័យឆ្លងនៅតាមទីកន្លែង និងមជ្ឈមណ្ឌលផ្សេងៗ ខណៈតួលេខឆ្លងកើនដល់ជាង ១ម៉ឺន ៤ពាន់នាក់ គិតត្រឹមថ្ងៃទី២៨ ខែមេសា។
ឥណ្ឌូនេស៊ី ហ្វីលីពីន និងម៉ាឡេស៊ី គឺជារដ្ឋអាស៊ានដែលរងការវាយប្រហារពីមេរោគកូវីដ១៩ ធ្ងន់ធ្ងរបំផុតក្នុងតំបន់ បន្ទាប់ពីសិង្ហបុរី ជាមួយករណីឆ្លងកើនដល់ ៩៥១១ករណី (ស្លាប់ ៧៦៥ករណី) ៧៩៥៨ករណី (ស្លាប់ ៥១១ករណី) និង ៥៨៥១ករណី (ស្លាប់ ៩៩ករណី)។
អាជ្ញាធរឥណ្ឌូនេស៊ី កាលពីថ្ងៃព្រហស្បតិ៍មុននេះ បានប្រកាសបិទចរាចរណ៍តាមផ្លូវអាកាស និងផ្លូវទឹកនៅទូទាំងប្រទេស រហូតដល់ដំណាច់ខែឧសភា ដើម្បីបញ្ចៀសហានិភ័យនៃការឆ្លងរាតត្បាតកើតចេញពីការប្រមូលផ្តុំគ្នារបស់ពលរដ្ឋអំឡុងរដូវស្រាយបួសក្នុងសាសនាឥស្លាមក្នុងខែនេះ។
ទន្ទឹមគ្នាដែរ នាយករដ្ឋមន្រ្តីម៉ាឡេស៊ី បានប្រកាសលើកពេលដកបម្រាមប្រតិបត្តិការអាជីវកម្មផ្សេងៗ និងលើការធ្វើដំណើរជាលើកទី៣ ដោយត្រូវបន្តរហូតដល់ថ្ងៃទី១២ ខែឧសភា ឬរហូតដល់ការឆ្លងរាលដាលរបស់មេរោគអាចគ្រប់គ្រងបានទាំងស្រុង។
ឯប្រធានាធិបតីហ្វីលីពីន លោក Rodrigo Duterte វិញ បានបញ្ជាឱ្យបន្តបិទកោះ Luzon រួមទាំងក្រុងម៉ានីល រហូតដល់ពាក់កណ្តាលខែក្រោយ ហើយជនបរទេសណាដែលល្មើសនឹងបទបញ្ជាដាក់នៅដាច់ដោយឡែក នឹងប្រឈមការជាប់ទោស និងបណ្តេញចេញពីប្រទេស។
នៅថ្ងៃម្សិលមិញនេះដែរ អាជ្ញាធរថៃសម្រេចបន្តផ្អាកជើងហោះហើរពីក្រៅប្រទេសដល់ដំណាច់ខែឧសភា ខណៈអាជ្ញាធរប្រឆាំងជំងឺកូវីដ១៩ ស្នើឱ្យរដ្ឋាភិបាលពន្យារចំណាត់ការដាក់ប្រទេសក្នុងគ្រាអាសន្នដល់ដំណាច់ខែឧសភា បើទោះជាករណីឆ្លងថ្មីធ្លាក់ចុះទាបបំផុតក្រោម ១០ករណីនៅថ្ងៃម្សិលមិញ ហើយករណីជាកើនដល់ ២៦៥២ករណី ក្នុងចំណោមករណីឆ្លង ២៩៣៨ករណី។
មីយ៉ាន់ម៉ា បានបិទព្រំដែនគោកជាមួយប្រទេសថៃ ដោយទុកតែមួយច្រកដើម្បីងាយគ្រប់គ្រងចរន្តវិលត្រឡប់របស់ពលករចំណាក់ស្រុកខ្លួនពីប្រទេសនេះ ដែលអាចនឹងមាន ២ម៉ឺននាក់នៅដំណាច់ខែឧសភា ក្រោយពួកគេបាត់បង់ការងារធ្វើដោយសារវិបត្តិកូវីដ១៩។
តាមកាសែតក្នុងស្រុក The Irrawaddy អាជ្ញាធរប្រទេសនេះ កំពុងរៀបចំកន្លែងស្នាក់នៅជាប់ច្រកព្រំដែនជាមួយថៃក្នុងរដ្ឋ Myawaddy សម្រាប់ដាក់ពលករទាំងនោះឱ្យស្នាក់នៅដាច់ដោយឡែក ១៤ថ្ងៃសិន មុនឱ្យពួកគេចូលស្រុកកំណើតវិញ។
នៅកម្ពុជា គិតត្រឹមថ្ងៃអង្គារនេះ មានឆ្លងចំនួន ១១៩ករណី ក្នុងចំណោម ១២២ករណី បានជាសះស្បើយ ខណៈអាជ្ញាធររកមិនឃើញករណីឆ្លងថ្មីចាប់តាំងពីថ្ងៃទី១២ ខែមេសាមក។
យ៉ាងណា អាជ្ញាធរនៅតែប្រកាសព្រមានពីហានិភ័យនៃរលកឆ្លងថ្មីក្នុងប្រទេស ហើយអំពាវនាវឱ្យពលរដ្ឋបន្តវិធានការបង្ការ និងប្រុងប្រយ័ត្នតទៅទៀត។
ឡាវ បានបង្កើនវិធានការរឹតបន្តឹងការធ្វើដំណើរឆ្លងចូលក្នុងប្រទេស ខណៈរដ្ឋាភិបាលមើលឃើញពីភាពស្មុគស្មាញ និងការមិនទាន់ថមថយនៃការរាតត្បាតរបស់ជំងឺកូវីដក្នុងតំបន់ និងនៅជុំវិញពិភពលោក បើទោះជាខ្លួនរកមិនឃើញករណីឆ្លងថ្មី ១៥ថ្ងៃជាប់គ្នាក្តី។
តាមប្រភពពីកាសែត Vietnam Plus អាជ្ញាធរឡាវនៅតែបន្តស្ទង់កម្តៅ តេស្តរកករណីឆ្លង និងដាក់នៅដាច់ដោយឡែក ១៤ថ្ងៃ លើអ្នកដំណើរដែលឆ្លងចូលប្រទេស រាប់ទាំងពលរដ្ឋខ្លួន ហើយអ្នកដែលរកឃើញមានផ្ទុកជំងឺ នឹងបញ្ជូនទៅព្យាបាលជាបន្ទាន់នៅមន្ទីរពេទ្យ៕
