តាមរបាយការណ៍ថ្មីរបស់អង្គការអន្តរជាតិមួយបានឱ្យដឹងថា ម៉ាឡេស៊ីបានបន្តនាំមុខគេក្នុងចំណោមប្រទេសអាស៊ានលើសេរីភាពសារព័ត៌មាន បន្ទាប់ពីប្រព័ន្ធផ្សព្វផ្សាយ និងក្រុមអ្នកកាសែតឯករាជ្យក្នុងប្រទេស អាចបំពេញកិច្ចការឡើងវិញដោយគ្មានការភ័យខ្លាច។
អង្គការអ្នកសារព័ត៌មានគ្មានព្រំដែន បានផ្តល់ពិន្ទុសេរីភាពសារព័ត៌មានដល់ម៉ាឡេស៊ី ២២ពិន្ទុ សម្រាប់ឆ្នាំ២០២០នេះ ដែលនាំឱ្យប្រទេសអាស៊ានមួយនេះ កើនចំណាត់ថ្នាក់សេរីភាពសារព័ត៌មានពីលេខរៀងទី ១២៣ ដល់ ១០១ ក្នុងចំណោមប្រទេស ១៨០ ដែលអង្គការបានវាយតម្លៃ។
តាមរបាយការណ៍អង្គការអន្តរជាតិខាងលើ ដែលចេញផ្សាយនៅថ្ងៃម្សិលមិញ បានឱ្យដឹងថា ម៉ាឡេស៊ីបានពិន្ទុខ្ពស់ដូច្នេះ គឺដោយសាររបបដឹកនាំរបស់លោក Najib Razak ត្រូវបានបញ្ចប់តាមរយៈការបោះឆ្នោត ខែមិថុនា ឆ្នាំ២០១៩។
របាយការណ៍ដដែលបន្ថែមថា រដ្ឋាភិបាលថ្មីបានគោរពសន្យាលុបចោលបទប្បញ្ញត្តិច្បាប់ប្រឆាំងព័ត៌មានក្លែងក្លាយថ្មី អនុម័តដោយរដ្ឋាភិបាលមុន ហើយបានលុបឈ្មោះប្រព័ន្ធផ្សព្វផ្សាយ និងអ្នកសារព័ត៌មានឯករាជ្យចេញពីបញ្ជីខ្មៅ ដែលឱ្យពួកគេអាចផលិតព័ត៌មានបានដោយសេរី និងគ្មានការភ័យខ្លាចការរំលោភបំពាន។
របាយការណ៍នោះរៀបរាប់ថា៖ «បរិយាកាសទូទៅសម្រាប់អ្នកកាសែត គឺមានភាពធូរស្រាលខ្លាំងជាងមុន ផ្តល់ភាពឯករាជ្យកាន់តែល្អប្រសើរគួរឱ្យកត់សម្គាល់ ហើយប្រព័ន្ធបោះពុម្ពផ្សាយ [កាសែត និងទស្សនវដ្តី] មានតុល្យភាពបានកាន់តែខ្ពស់ និងពេញលេញ រាប់ទាំងការផ្តល់ការគាំទ្រលើសម្ព័ន្ធបក្សកាន់អំណាចថ្មី និងលើសម្ព័ន្ធបក្សកាន់អំណាចចាស់ ដែលបច្ចុប្បន្នជាបក្សប្រឆាំង»។
ដោយឡែក ឥណ្ឌូនេស៊ី នៅរក្សានៅលំដាប់ទី២ក្នុងតំបន់ដដែលជាមួយលេខរៀងទី ១១៩ កើនបាន ៥ពិន្ទុ ដោយសារប្រព័ន្ធផ្សព្វផ្សាយក្នុងស្រុកអាចដើរតួនាទីសំខាន់ក្នុងការធ្វើឱ្យប្រាកដថា គោលការណ៍លទ្ធិប្រជាធិបតេយ្យក្នុងប្រទេសត្រូវបានគោរព ជាពិសេសអំឡុងបោះឆ្នោត។
តាមរបាយការណ៍ប្រចាំឆ្នាំដដែលលើកឡើងថា ការប្តេជ្ញាលើកស្ទួយសេរីភាពសារព័ត៌មានរបស់លោកប្រធានាធិបតីឥណ្ឌូនេស៊ី Jokowi ក្នុងអាណត្តិទី២របស់លោក ក៏ជាមូលហេតុនាំឱ្យប្រទេសនេះទទួលបានពិន្ទុល្អពីអង្គការអ្នកសារព័ត៌មានគ្មានព្រំដែនដែរ។
ទន្ទឹមគ្នានេះ វៀតណាមនៅមានការរឹតត្បិតសេរីភាពរបស់អ្នកកាសែតអាក្រក់ជាងគេក្នុងតំបន់ដដែល បើទោះជាកើនបាន ១ពិន្ទុមកវិញ ដោយឈរនៅលេខរៀងទី ១៧៥ តាមពីក្រោយដោយឡាវ ឈរលេខរៀងទី ១៧១ ដោយថយ ១ពិន្ទុ ធៀបនឹងឆ្នាំ២០១៩។
តាមការវិភាគក្នុងរបាយការណ៍ វៀតណាមនៅតែបំបិទសិទ្ធិសេរីភាពប្រព័ន្ធផ្សព្វផ្សាយឯករាជ្យ ដោយឱ្យមានតែស្ថាប័នព័ត៌មានគាំទ្ររដ្ឋាភិបាល ឯឡាវធ្លាក់ចុះមួយពិន្ទុដោយសាររដ្ឋាភិបាលបានចាត់វិធានការលើក្រុមសរសេរប្លុកព័ត៌មានបង្ហោះតាមប្រព័ន្ធអ៊ីនធឺណិតថ្មីៗ។
ដោយឡែក យោងតាមរបាយការណ៍ដដែល ហ្វីលីពីនកើនបាន ២ពិន្ទុ ឡើងលេខរៀងទី ១៣២ ដោយសារការបើកឱ្យមានយុទ្ធនាការតទល់គ្នាលើអនឡាញ ចំណែក មីយ៉ាន់ម៉ា ថយ ១ពិន្ទុ ចុះមកលេខរៀងទី ១៣៩ ដោយសារប្រព័ន្ធផ្សព្វផ្សាយឯកជនបន្តស្ថិតក្នុងភាពផុយស្រួយខ្លាំង។
ថៃថយ ៤ពិន្ទុ ចុះមកលេខរៀងទី ១៤០ ចំណែក ឯកម្ពុជាថយ ១ពិន្ទុ ចុះមកលេខរៀងទី ១៤៤ ដោយសាររដ្ឋាភិបាលប្រទេសទាំង ២ បង្កើនប្រព័ន្ធចាត់វិធានការបំបិទសំឡេងប្រឆាំង ឯសិង្ហបុរីថយ ៧ពិន្ទុ ចុះមកលេខរៀងទី ១៥៨ ដោយសារការបង្កើតច្បាប់ប្រឆាំងព័ត៌មានក្លែងក្លាយ ហើយប៊្រុយណេ នៅរក្សាលេខលំដាប់ទី ១៥២ ដដែល៕