សិង្ហបុរី ក្លាយជាប្រទេសមានអ្នកឆ្លងជំងឺកូវីដ១៩ ច្រើនជាងគេបំផុតនៅតំបន់អាស៊ី បន្ទាប់ពីចិន និងឥណ្ឌា ក្រោយកើនករណីថ្មី ៩៧១ករណីនៅថ្ងៃម្សិលមិញ ដែលភាគច្រើនកើតលើពលករបរទេសប្រាក់ខែទាបរស់នៅផ្តុំគ្នា។ នេះបើតាមប្រភពពីក្រសួងសុខាភិបាលសិង្ហបុរី និងតួលេខបច្ចុប្បន្នភាពពីអង្គការសុខភាពពិភពលោក។
តាមប្រភពដដែល គិតត្រឹមរសៀលថ្ងៃចន្ទ ទី២៧ ខែមេសា ករណីឆ្លងក្នុងប្រទេសដែលមានពលរដ្ឋ ៥លាន ៧សែននាក់នេះ បានកើនដល់ជាង ១ម៉ឺន ៣ពាន់ករណី (១៣៦២៤) ឈរលេខរៀងទី៣ នៃករណីឆ្លងនៅអាស៊ី និងទី១ នៅអាស៊ាន នាំមុខជប៉ុនដែលមាន ១៣៤៤១ករណី និងប៉ាគីស្ថាន ១៣២២៨ករណី។
តួលេខនេះ បានហក់ឡើងក្នុងពេល២សប្តាហ៍ចុងក្រោយ ដោយកើនជាង ៨ពាន់ករណី ក្នុងនោះជាង ៩០ភាគរយជាពលករអន្តោប្រវេសន៍រស់នៅតាមអន្តេវាសិកដ្ឋាន ហើយពួកគេភាគច្រើនមកពីប្រទេសអាស៊ីខាងត្បូងដូចជា ឥណ្ឌា និងស្រីលង្កា ធ្វើការក្នុងវិស័យសំណង់។
ចាប់តាំងពីផ្ទុះករណីឆ្លងលើពលករបរទេសមក អាជ្ញាធរសិង្ហបុរីកំពុងប្រញាប់ប្រញាល់រៀបចំ និងសាងសង់កន្លែងសម្រាប់ដាក់នៅដោយឡែក ដោយជ្រើសយកអាគារ មជ្ឈមណ្ឌល ឬទីកន្លែងទំនេរផ្សេងៗ រាប់ទាំងកំពង់ផែដឹកជញ្ជូនទំនិញជាដើម សម្រាប់អ្នកជំងឺកូវីដ១៩។
កាលពីចុងសប្តាហ៍មុន សាលពេទ្យចំនួន៦ ត្រូវបានតម្លើងរួច និងកំពុងដំឡើងថែមទៀត នៅកំពង់ផែ Tanjong Pagar Terminal ដើម្បីត្រៀមដាក់អ្នកជំងឺកូវីដ ចំនួន ១ម៉ឺន ៥ពាន់នាក់ ខណៈអ្នកជំងឺដំបូងត្រូវបានបញ្ជូនមកមជ្ឈមណ្ឌលតាំងពិព័រណ៍ Changi ដែលត្រៀមសម្រាប់មនុស្ស ៤ពាន់នាក់។
តាមប្រភពពីកាសែត Bangkok Post ចុះផ្សាយនៅថ្ងៃនេះ បានឱ្យដឹងថា អាជ្ញាធរបានប្រើពេល ៦ថ្ងៃ រៀបចំដំឡើងតង់ គ្រែ បរិក្ខារពេទ្យ និងសម្ភារអនាម័យចាំបាច់មួយចំនួននៅមជ្ឈមណ្ឌល Changi Exhibition Center សម្រាប់ដាក់អ្នកជំងឺកូវីដដែលគ្មានរោគសញ្ញា និងលេចអាការជំងឺតិចតួច។
សិង្ហបុរី កំពុងប្រឈមមុខនឹងរលកទី៣ នៃការឆ្លងរាលដាលជំងឺកូរ៉ូណាថ្មី ក្នុងចំណោមពលករបរទេសប្រមាណ ៣សែននាក់ ស្នាក់នៅតាមអន្តេវាសិកដ្ឋាន ៤៣កន្លែង រីឯរលកទី២ ឆ្លងពីនិសិ្សត និងពលរដ្ឋត្រឡប់ពីសហរដ្ឋអាមេរិក និងប្រទេសអឺរ៉ុប ហើយរលកទី១ ជាករណីនាំចូល។
លោកនាយករដ្ឋមន្រ្តី លី ស៊ានឡុង បានបង្ហាញអំពីក្តីបារម្ភចំពោះករណីឆ្លងក្នុងចំណោមពលករបរទេសទាំងនោះ ហើយលោកអំពាវនាវឱ្យគ្រប់គ្នាពុះពារអនុវត្តវិធានការផ្តាច់ខ្សែចម្លងជំងឺរបស់រដ្ឋាភិបាល ដោយត្រូវរក្សាខ្លួននៅផ្ទះ និងគម្លាតសុវត្ថិភាព ជាដើម។
លោក លី សរសេរលើ Facebook ផ្ទាល់ខ្លួននៅសប្ដាហ៍មុនថា៖ «នេះគឺជាពេលព្រួយបារម្ភ និងមិនប្រាកដប្រជាមួយសម្រាប់ពួកយើងជាច្រើន ជាមួយករណីឆ្លងជាចង្កោមធំនៅក្នុងអន្តេវាសិកដ្ឋាន។ ក្រុមការងាររបស់យើងបាន និងកំពុងខំប្រឹងធ្វើការ ដើម្បីទប់ស្កាត់ការរាតត្បាតនៃជំងឺកូវីដ១៩ នៅទីនោះ ហើយនិងមើលថែពលករបរទេសរបស់យើងឱ្យបានល្អ»៕
