ហ្វីលីពីនបញ្ចេញប្រាក់មូលនិធិចំនួន ៥១ពាន់លានប៉េសូ ស្មើនឹងប្រមាណ ១ពាន់លានដុល្លារបន្ថែមទៀត ដើម្បីជួយកម្មករ ៣លាន ៤សែននាក់ បម្រើការក្នុងវិស័យអាជីវកម្មខ្នាតតូច ដែលរងផលប៉ះពាល់ពីការបិទតំបន់ផ្ទុះការឆ្លងរាលដាលជំងឺកូវីដ១៩។
តាមប្រភពពីកាសែត Bloomberg ចុះផ្សាយនៅថ្ងៃអង្គារនេះ បានឱ្យដឹងថា នេះជាដំណោះស្រាយសេដ្ឋកិច្ចមួយជំហានទៀតរបស់រដ្ឋាភិបាលក្រុងម៉ានីល សម្រាប់ដោះស្រាយបញ្ហាពលរដ្ឋរងគ្រោះបំផុត អំឡុងពេលខ្លួនអនុវត្តវិធានការបិទការធ្វើដំណើរចេញចូលកោះ Luzon ដើម្បីទប់ស្កាត់ការរីករាលដាលរបស់មេរោគ។
កោះ Luzon មានទីតាំងឋិតនៅភាគខាងជើងបំផុតនៃប្រទេសហ្វីលីពីន ដែលមានប្រជាជនរស់នៅប្រមាណ ៥៨លាននាក់ ឬស្មើនឹងពាក់កណ្តាលនៃចំនួនពលរដ្ឋហ្វីលីពីនសរុប ហើយកោះនេះ ផ្តល់ប្រភពចំណូលសេដ្ឋកិច្ចរបស់ប្រទេស ៧០ភាគរយ។
អនុរដ្ឋលេខាធិការក្រសួងហិរញ្ញវត្ថុហ្វីលីពីន លោក Karl Kendrick Chua ត្រូវបានប្រភពដដែលស្រង់សម្តីរបស់លោកថ្លែងអំឡុងសន្និសីទកាសែតជាមួយប្រធានាធិបតីហ្វីលីពីន នៅថ្ងៃម្សិលមិញថា រដ្ឋាភិបាលនឹងផ្តល់អាទិភាពដល់កម្មករ ២លាន ៦សែននាក់ ដែលថៅកែពួកគេបានបង់ពន្ធ និងប្រាក់មូលនិធិសោធនិវត្តន៍ជូនរដ្ឋ។
តាមប្រភពដដែល រដ្ឋាភិបាលហ្វីលីពីនបានប្រកាសនៅក្នុងសេចក្តីថ្លែងការណ៍ដាច់ដោយឡែកមួយថា កញ្ចប់មូលនិធិប្រាក់ឈ្នួលថ្មីនេះ នឹងបែងចែកទៅដល់កម្មករដែលរកឃើញថារងគ្រោះពិតប្រាកដ ដោយក្នុងម្នាក់នឹងទទួលបាន ៨ពាន់ប៉េសូ ឬ ១៨០ដុល្លារ សម្រាប់រយៈពេល ២ខែ។
កាលពីចុងខែមីនា ប្រធានាធិបតីហ្វីលីពីន លោក រ៉ូឌ្រីហ្គោ ឌូទែរតេ បានបញ្ចេញថវិកា ២០០ពាន់លានប៉េសូ ស្មើជិត ៤ពាន់លានដុល្លារ ជួយដល់ក្រុមគ្រួសារក្រីក្រដែលងាយរងគ្រោះបំផុត នៅលើកោះ Luzon ដែលលោកបានបញ្ជាឱ្យបិទការធ្វើដំណើរចេញចូលចាប់ពីពាក់កណ្តាលខែរហូតដល់ដំណាច់ខែ។
យ៉ាងនេះក្តី លោក ឌូទែរតេ លើកឡើងនៅថ្ងៃម្សិលមិញថា លោកនឹងបន្តវិធានការបិទកោះ Luzon ដែលជា មជ្ឈមណ្ឌលសេដ្ឋកិច្ចសំខាន់បំផុតរបស់ប្រទេស រហូតដល់ខែឧសភា ប្រសិនគ្មានវិធីព្យាបាលជាក់លាក់ណាមួយដើម្បីប្រឆាំងនឹងវីរុសកូរ៉ូណាថ្មីដែលត្រូវបានរកឃើញទេនោះ។
មន្រ្តីជាន់ខ្ពស់ហិរញ្ញវត្ថុ លោក Chua បន្ថែមថា ក្នុងចំណោមអាជីវកម្មខ្នាតតូច ១.៦លានកន្លែង អាជ្ញាធរហ្វីលីពីនបានបង្ខំឱ្យម្ចាស់អាជីវកម្មជាង ៤សែនកន្លែង (៤៣៦ ០០០) បិទទ្វារ ខណៈ ១លានកន្លែងដំណើរការដោយប្រើប្រាស់កម្លាំងពលកម្មតិចបំផុត។
លោក Chua បញ្ជាក់ថា មកទល់ពេលនេះ មានតែអាជីវកម្មជាង ២សែនកន្លែង (១១៧ ០០០) ប៉ុណ្ណោះ ដែលអាជ្ញាធរអនុញ្ញាតឱ្យដំណើរការ ដើម្បីលក់ទំនិញ និងផ្តល់សេវាចាំបាច់ផ្សេងៗ។ លោកថា រដ្ឋាភិបាលកំពុងសិក្សាលើសំណើចេញកាតឥណទានដល់អាជីវករទាំងអស់នោះ ដើម្បីឱ្យពួកគេងាយស្រួលដកលុយពីធនាគារ។
កាលពីថ្ងៃពុធសប្តាហ៍មុន រដ្ឋលេខាធិការហិរញ្ញវត្ថុហ្វីលីពីន លោក Carlos Dominguez បានប្រាប់ទូរទស្សន៍ CNBC ក្នុងកម្មវិធីមួយថា រដ្ឋាភិបាលបានត្រៀមកញ្ចប់ថវិកា ២៣ពាន់លានដុល្លារ សម្រាប់គាំទ្រក្រសួងសុខាភិបាល ក្នុងការប្រយុទ្ធប្រឆាំងនឹងការរាតត្បាតកូវីដ១៩ និងជួយទប់ការប៉ះទង្គិចសេដ្ឋកិច្ចដោយជំងឺនេះ។
លោក Dominguez បញ្ជាក់ថា កញ្ចប់ថវិកាដែលស្មើនឹង ៥ទៅ៦ភាគរយនៃផលិតផលក្នុងស្រុកសរុបនេះ គឺរដ្ឋាភិបាលគ្រោងសម្រាប់ជួយជំរុញកំណើនសេដ្ឋកិច្ចជាតិដែលកំពុងដាំក្បាលចុះ រហូតដល់ដំណាច់ខែឧសភា ហើយនឹងបង្កើនថែមទៀត បើស្ថានការតម្រូវ។
គិតត្រឹមថ្ងៃចន្ទម្សិលមិញ ចំនួនករណីឆ្លងជំងឺកូវីដ១៩ នៅប្រទេសហ្វីលីពីន បានកើនដល់ជិត ៥ពាន់ករណី (៤៩៣២) ដែលតួលេខនេះ គឺខ្ពស់បំផុតក្នុងចំណោមប្រទេសក្នុងតំបន់អាស៊ាន ក្នុងនោះ មានករណីស្លាប់បានកើនដល់ជាង ៣រយករណី (៣១៥)៕
