តុលាការសាលាដំបូងខេត្តកំពត បានសម្រេចឃុំខ្លួនម្ចាស់សិប្បកម្មបិតស្រា-សម្នាក់ជាបណ្តោះអាសន្ន ក្រោយមានហេតុការណ៍ពលរដ្ឋ១០នាក់ស្លាប់និងជិត៦០នាក់ទៀតបញ្ជូនទៅមន្ទីរពេទ្យ ដោយសារពុលស្រា ដែលសង្ស័យពាក់ព័ន្ធការផលិតរបស់ពួកគេ។
ស្នងការនគរបាលខេត្តកំពត លោក ម៉ៅ ច័ន្ទមធុរិទ្ធ មានប្រសាសន៍ថា កាលពីថ្ងៃទី២៥ ខែឧសភានេះ ក្រោយរកឃើញពលរដ្ឋ១០នាក់ស្លាប់និងជិត៦០នាក់ទៀតឈឺដោយសារពុលស្រា-ស នៅភូមិធ្នង់ ឃុំឫស្សីស្រុកខាងកើត ស្រុកកំពង់ត្រាច សមត្ថកិច្ចបានឃាត់ខ្លួនម្ចាស់សិប្បកម្មបិតស្រា-សចំនួន៣នាក់ទៅសួរនាំជាបន្តបន្ទាប់។
លោកបន្តថា រហូតមកដល់ព្រឹកថ្ងៃទី២៧ ខែឧសភានេះ សមត្ថកិច្ចបានសម្រេចបញ្ជូនពួកគេទៅតុលាការ ដើម្បីចាត់វិធានការច្បាប់តែម្តង។
លោកមានប្រសាសន៍ថា៖ «ខ្ញុំបញ្ជូនទៅតុលាការអស់ហើយ ខ្ញុំបញ្ជូនទៅព្រឹកមិញ ពាក់ព័ន្ធទៅនឹងការផលិតស្រាខុសលក្ខណៈបច្ចេកទេសធ្វើឱ្យប៉ះពាល់ដល់អាយុជីវិត»។
លោក ម៉ៅ ច័ន្ទមធុរិទ្ធ មានប្រសាសន៍បន្តទៀតថា បច្ចុប្បន្ននេះ អាជ្ញាធរពាក់ព័ន្ធ ពិសេសអាជ្ញាធរមូលដ្ឋាន បានអនុវត្តតាមវិធានការរបស់រដ្ឋមន្ត្រីក្រសួងសុខាភិបាល ដោយដាក់កម្លាំងសមត្ថកិច្ចឃ្លាំមើល និងទប់ស្កាត់ការលក់ស្រាបិតឬស្រាលាយដែលគ្មានបច្ចេកទេសត្រឹមត្រូវទូទាំងខេត្ត ដើម្បីទប់ស្កាត់កុំឱ្យមានពលរដ្ឋរងគ្រោះដោយសារការពុលស្រាបន្តទៀត។
តែយ៉ាងណា ព្រះរាជអាជ្ញារងអមសាលាដំបូងខេត្តកំពត លោក ខា ដែនណា មានប្រសាសន៍ថា សាលាដំបូងបានសាកសួរតែម្ចាស់សិប្បកម្មផលិតស្រាចំនួន២នាក់ប៉ុណ្ណោះដែលជាប់ពាក់ព័ន្ធក្នុងហេតុការណ៍នោះ ក្នុងនោះមានម្ចាស់សិប្បកម្មជាបុរសម្នាក់ត្រូវបានតុលាការសម្រេចឃុំខ្លួននៅពន្ធនាគារជាបណ្តោះអាសន្ន ខណៈម្នាក់ទៀតជាស្ត្រីត្រូវបានដោះលែងឱ្យនៅក្រៅឃុំ ក្រោយពីមិនមានភស្តុតាងដាក់បន្ទុកគ្រប់គ្រាន់។
លោកមានប្រសាសន៍ថា៖ «យើងបញ្ជូនម្នាក់ទេ ព្រោះម្នាក់ទៀតដែលបើកសិប្បកម្ម [ជា] ស្ត្រីហ្នឹង គឺស្រា-សគាត់អត់មានជាតិមេតាណុល អ៊ីចឹងរបាយការណ៍ប៉ូលិស របាយការណ៍កាំកុងត្រូលដាក់[ថា]អត់មានជាតិមេតាណុលទេ គេឱ្យគាត់ទៅផ្ទះសិន រង់ចាំការស៊ើបអង្កេតបន្តទៀត»។
ក្រោយពីទទួលបានសំណុំរឿង ព្រះរាជអាជ្ញារងរូបនោះបានសម្រេចចោទប្រកាន់ម្ចាស់សិប្បកម្មស្រា-សម្នាក់ ក្រោមបទចោទ «អំពើមិនសុចរិតទាក់ទងនឹងទំនិញ សេវា ឬការអះអាងដោយបំភ័ន្ត ដោយសារពិការភាពឬមរណភាព»។
មាត្រា៤៣ នៃច្បាប់ស្តីពី «កិច្ចការពារអ្នកប្រើប្រាស់» ចែងថា អំពើសុចរិតទាក់ទងនឹងទំនិញ សេវា ឬការអះអាងដោយបំភ័ន្ត ដោយសារពិការភាពឬមរណភាព ត្រូវផ្តន្ទាទោសដាក់ពន្ធនាគារពី២ឆ្នាំ ទៅ៥ឆ្នាំ និងពិន័យជាប្រាក់ពី៤ ០០០ ០០០ (បួនលាន) រៀល ទៅ១០ ០០០ ០០០ (ដប់លាន) រៀល ចំពោះអំពើល្មើសនឹងកថាខណ្ឌទី១ នៃមាត្រាដែលបណ្តាលឱ្យមានការពិការអចិន្ត្រៃយ៍ឬបណ្តាលឱ្យបាត់បង់ជីវិត។
ក្នុងសេចក្តីប្រកាសព័ត៌មានរបស់ក្រសួងសុខាភិបាល កាលពីថ្ងៃអង្គារ បានឱ្យដឹងថា ក្រសួងបានចាត់មន្ត្រីជំនាញចុះយកសំណាកស្រាថ្នាំនិងស្រា-សពីទីតាំងសិប្បកម្មផលិតចែកចាយស្រា២កន្លែង និងទីតាំងលក់រាយតូចៗចំនួន៧កន្លែងនៅក្នុងខេត្តកំពត សម្រាប់យកទៅវិភាគនៅមជ្ឈមណ្ឌលជាតិមន្ទីរពិសោធន៍សុខាភិបាល កាលពីថ្ងៃទី២៥ ខែឧសភា ឆ្នាំ២០២១។
លទ្ធផលពីការពិនិត្យសំណាកស្រា១១សំណាក ក្នុងនោះមាន៦សំណាក បង្ហាញថា មានសារធាតុមេតាណុលលើសកម្រិត ធំជាង០,២ភាគរយ ដល់ទៅ១១,៩ភាគរយ ដែលធ្វើឱ្យពុល ខណៈកម្រិតមិនពុលនោះ មិនត្រូវលើសពី០,១%ឡើយ។
មន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តកំពត លោក យន់ ផល្លី មានប្រសាសន៍ថា លោកគាំទ្រនឹងវិធានការរបស់សមត្ថកិច្ចដែលបញ្ជូនសំណុំរឿងនិងម្ចាស់សិប្បកម្មបិតស្រា-សនោះទៅកាន់តុលាការនៅថ្ងៃនេះ ដើម្បីចាត់វិធានការទៅតាមផ្លូវច្បាប់។ ករណីនេះ លោកស្នើទៅកាន់តុលាការធ្វើការជម្រះក្ដីដោយឈរលើគោលការណ៍ឯករាជ្យ ដើម្បីផ្ដល់យុត្តិធម៌ដល់ជនរងគ្រោះ។
លោកមានប្រសាសន៍ថា៖ «ក្នុងករណីនេះ តុលាការរកឃើញ [ផលិតស្រា-សមានជាតិពុល] គឺអនុវត្តតាមច្បាប់នៅក្នុងមាត្រាណាមួយដែលតុលាការធ្វើការចោទប្រកាន់ ហើយតុលាការធ្វើការផ្តន្ទាទោសជននោះទៅតាមច្បាប់ទៅ។ ហើយអ្វីដែលភាគីជនរងគ្រោះអាចទាមទារសំណងជួសជុលផ្លូវចិត្តឬក៏ការបាត់បង់ជីវិតរបស់គាត់ គឺអ្នកតំណាងរបស់ក្រុមគ្រួសារនៃអ្នកស្លាប់នោះចំពោះម្ចាស់សិប្បកម្ម»។
ហេតុការណ៍ពុលស្រា-សនិងស្រាថ្នាំដែលកើតឡើងក្នុងខែឧសភា ឆ្នាំ២០២១នេះ នៅស្រុកល្វាឯម ខេត្តកណ្តាល និងនៅស្រុកកំពង់ត្រាច ខេត្តកំពត បណ្តាលឱ្យមានមនុស្សយ៉ាងហោចណាស់ចំនួន២៣នាក់បានស្លាប់ និងជិត១០០នាក់ទៀត ត្រូវបានបញ្ជូនទៅសម្រាកព្យាបាលនៅមន្ទីរពេទ្យ។
ក្រោយហេតុការណ៍ពុលស្រាទាំងពីរលើកនេះ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង តាមរយៈសេចក្តីប្រកាសព័ត៌មានរបស់ខ្លួនកាលពីម្សិលមិញ បានអំពាវនាវទៅកាន់ប្រជាពលរដ្ឋឱ្យបញ្ឈប់ការពិសាស្រា-សឬស្រាថ្នាំដែលផលិតគ្មានបច្ចេកទេសត្រឹមត្រូវនិងគ្មានការត្រួតពិនិត្យ។
បន្ថែមពីនេះ លោកក៏ហាមអាជីវករទាំងអស់មិនត្រូវយកសារធាតុមេតាណុលមកលាយធ្វើស្រា-សជាដាច់ខាត ព្រោះវាបង្កឱ្យពុលនិងស្លាប់បាត់បង់ជីវិត។
ជាមួយគ្នានេះ លោក ម៉ម ប៊ុនហេង ជំរុញទៅអាជ្ញាធរមូលដ្ឋានទាំងអស់ត្រូវចាត់តាំងកម្លាំងគ្រប់គ្រង ឃ្លាំមើល និងទប់ស្កាត់ការលក់ស្រាបិទឬលាយគ្មានបច្ចេកទេសត្រឹមត្រូវ និងណែនាំប្រជាពលរដ្ឋចៀសវាងយកសារធាតុមេតាណុលលាយធ្វើស្រា-សដែលបង្កឱ្យពុលនិងស្លាប់ផងដែរ៕