អាជ្ញាធរខេត្តកណ្តាល បានបិទទីតាំងសិប្បកម្មផលិតស្រា-ស និងស្រាថ្នាំមួយកន្លែង នៅភូមិតាស្គរ ឃុំសារិកា ស្រុកល្វាឯម និងកំពុងរៀបចំឯកសារកសាងសំណុំរឿងបញ្ជូនទៅតុលាការ ក្រោយមនុស្សជាង១០នាក់បានស្លាប់ ដោយសារពុលស្រា។
ប្រធានមន្ទីរសុខាភិបាលខេត្តកណ្ដាល លោក គួយ ប៊ុនធឿន មានប្រសាសន៍នៅថ្ងៃទី១៩ ខែឧសភា ឆ្នាំ២០២១នេះថា ករណីមានមនុស្សស្លាប់ជាបន្តបន្ទាប់ក្រោយពីបានទទួលទានស្រាស នៅភូមិតាស្គរនេះ បានកើតឡើងចាប់តាំងពីថ្ងៃទី១០ ខែឧសភាមក ហើយគិតមកដល់ថ្ងៃម្សិលមិញ អ្នកស្លាប់បានកើនដល់១១នាក់ហើយ។
លោកបន្តថា ក្រោយកើតហេតុ អាជ្ញាធរនិងមន្ត្រីជំនាញបានយកសំណាកស្រានោះទៅវិភាគនៅមន្ទីរពិសោធន៍ ដោយលទ្ធផលបង្ហាញថា ស្រាដែលពលរដ្ឋទទួលទានមានជាតិមេតាណុលខ្ពស់ ទើបបណ្ដាលឱ្យអ្នកទទួលទានស្រាទាំងនោះស្លាប់។
លោកថា៖ «បានយកស្រាដែលគាត់ទទួលទាន យកទៅវិភាគនៅមន្ទីរពិសោធន៍វិទ្យាស្ថានសុខភាពសាធារណៈ ឥលូវលទ្ធផលបានបង្ហាញស្រាទាំងអស់នោះ មានស្រាថ្នាំ ស្រាស ដែលមានលក់នៅតាមផ្ទះប្រជាពលរដ្ឋនៅក្នុងភូមិ គឺមានកម្រិតមេតាណុលខ្ពស់។ កម្រិតខ្ពស់នេះអាចបណ្ដាលឱ្យមានគ្រោះថ្នាក់ដល់អាយុជីវិត ស្របពេលដែលគាត់បរិភោគក្នុងបរិមាណច្រើន»។
លោក គួយ ប៊ុនធឿន បន្តថា បច្ចុប្បន្ន មន្ត្រីសុខាភិបាលបានសហការជាមួយអាជ្ញាធរមូលដ្ឋាន ដើម្បីចុះទៅប្រមូលស្រា-សនិងស្រាថ្នាំដែលមានលាយជាតិមេតាណុលខ្ពស់នេះ នៅក្នុងភូមិតាស្គរ និងកំពុងស្រាវជ្រាវរកទីតាំងផ្សេងទៀត ដើម្បីយកមករក្សាទុក និងចាត់វិធានការតាមផ្លូវច្បាប់បន្តទៀត។
អធិការរងនគរបាលស្រុកល្វាឯម លោក ថន ស្រេង មានប្រសាសន៍ថា ក្រៅពីមានមនុស្សស្លាប់ ក៏មានមនុស្ស៣នាក់ទៀតបានពុលស្រានិងកំពុងសម្រាកព្យាបាលនៅមន្ទីរពេទ្យដែរ។
លោកបន្តថា មន្ត្រីជំនាញនិងអាជ្ញាធរបានសម្រេចបិទសិប្បកម្មផលិតស្រា-ស និងស្រាថ្នាំមួយកន្លែងនៅភូមិតាស្គរនេះជាបណ្តោះអាសន្ន ខណៈតូបលក់អីវ៉ាន់ដែលទទួលនិងចែកចាយបន្ត ក៏ត្រូវបានអាជ្ញាធរឱ្យពួកគាត់ផ្អាកលក់ ដើម្បីរង់ចាំការដោះស្រាយតាមនីតិវិធីច្បាប់។
លោកថា៖ «ការសម្រេចរបស់[តុលាការ]យ៉ាងម៉េច គឺរឿងរបស់តុលាការ! ក្នុងនាមកងកម្លាំងគ្រាន់តែស្រាវជ្រាវនិងធ្វើសំណុំរឿងបញ្ជូនទៅទេ»។
អភិបាលខេត្តកណ្ដាល លោក គង់ សោភ័ណ្ឌ មានប្រសាសន៍ថា សមត្ថកិច្ចកំពុងធ្វើរបាយការណ៍និងរៀបចំឯកសារ ដើម្បីកសាងសំណុំរឿងបញ្ជូនទៅតុលាការ។
ប៉ុន្តែពេលសួរថា បញ្ជូនពេលណា? ហើយមនុស្សប៉ុន្មាននាក់ដែលនឹងត្រូវបញ្ជូនខ្លួនទៅតុលាការនោះ? លោកថា មិនទាន់ដឹងនៅឡើយ ខណៈសមត្ថកិច្ចកំពុងធ្វើការ។
លោកបានថ្លែងថា៖ «អាជ្ញាធរស្រុកនិងខេត្តបានកសាងសំណុំរឿងទៅតាមនីតិវិធីច្បាប់ហើយ ចំពោះអ្នកលក់ អ្នកសង្ស័យ ដែលផលិតស្រាដែលមានសារធាតុមេតាណុលខ្ពស់នេះ។ មួយវិញទៀត អាជ្ញាធរស្រុកបានបញ្ឈប់ទាំងស្រុងហើយកន្លែងណាដែលមានពាក់ព័ន្ធ»។
កាលពីខែវិច្ឆិកា ឆ្នាំ២០២០ ពលរដ្ឋនៅខេត្តកំពង់ឆ្នាំង ជិត១០នាក់បានស្លាប់ និងជាង១០០នាក់បានធ្លាក់ខ្លួនឈឺព្យាបាលនៅមន្ទីរពេទ្យ ដោយសារពុលស្រា-សដូចគ្នានេះផងដែរ។
ដោយឡែក កាលពីចន្លោះថ្ងៃទី០៧ ដល់ថ្ងៃទី១៣ ខែមិថុនា ឆ្នាំ២០២០ កន្លងទៅនេះ នៅខេត្តបន្ទាយមានជ័យ ក៏មានមនុស្សចំនួន៧នាក់បានស្លាប់ និងជិត៤០នាក់ទៀតត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ក្រោយពីពួកគេបានទទួលទានស្រាថ្នាំយីហោម៉ាក «តាំងគួយ»៕