មន្ត្រីសុខាភិបាលខេត្តកំពង់ឆ្នាំង ឱ្យដឹងថា គិតមកដល់ព្រឹកថ្ងៃចន្ទនេះ ករណីអ្នកស្លាប់ដោយសង្ស័យពុលស្រាស បានកើនដល់ចំនួន ៦នាក់ និងជាង១០០នាក់ បានធ្លាក់ខ្លួនឈឺព្យាបាលនៅមន្ទីរពេទ្យ។
ករណីសង្ស័យពុលស្រា-ស នេះ បានកើតឡើងកាលពីថ្ងៃ២៨ ខែវិច្ឆិកាឆ្នាំ២០២០ អំឡុងពេលអ្នកភូមិជាច្រើននាក់ចូលរួមកំដរបុណ្យសពមួយកន្លែងស្ថិតក្នុងឃុំខ្លុងពពក ស្រុកទឹកផុស ខេត្តកំពង់ឆ្នាំង។
ប្រធានមន្ទីរសុខាភិបាលខេត្តកំពង់ឆ្នាំង លោក ប្រាក់ វ៉ុន ប្រាប់វីអូឌីថា គិតត្រឹមម៉ោង១១កន្លះថ្ងៃទី៣០ ខែវិច្ឆិកា ឆ្នាំ២០២០នេះ គឺមានអ្នករងគ្រោះដោយសង្ស័យពុលស្រាស សរុបចំនួន ១២៣នាក់ ក្នុងនោះ ស្រី៦នាក់ និងបានស្លាប់ចំនួន ៦នាក់។
បើតាមប្រធានមន្ទីរសុខាភិបាលរូបនេះ ក្នុងចំណោមជនរងគ្រោះដែលស្លាប់ទាំង៦នាក់នោះ មាន ២នាក់បានស្លាប់ នៅផ្ទះ ២នាក់ស្លាប់ ពេលបញ្ជូនមកដល់មន្ទីរពេទ្យ និង២នាក់ទៀត ស្លាប់តាមផ្លូវ ខណៈបញ្ជូនទៅព្យាបាលនៅភ្នំពេញ។
លោក ប្រាក់ វ៉ុន បញ្ជាក់ដែរថា គិតមកដល់ព្រឹកនេះដែរ មានមនុស្ស៩០នាក់ បានធូរស្បើយ និងបានត្រឡប់ទៅផ្ទះវិញ ខណៈ២៧នាក់ កំពុងបន្តសម្រាកព្យាបាលនៅមន្ទីរពេទ្យខេត្ត ក្នុងនោះ ១ម្នាក់កំពុងមានស្ថានភាពធ្ងន់ធ្ងរ។
លោកបន្ថែមថា៖ «ឥលូវមន្ត្រីជំនាញបានយកស្រាហ្នឹង ទៅពិនិត្យនៅវិទ្យាស្ថានជាតិហើយ»។
អភិបាលខេត្តកំពង់ឆ្នាំង លោក ឈួរ ច័ន្ទឌឿន មានប្រសាសន៍ថា ក្រោយមានពលរដ្ឋស្លាប់ដោយសង្ស័យពុលស្រានេះ អាជ្ញាធរបានកំណត់មុខសញ្ញាទីតាំងផលិតស្រា-ស បានចំនួន៥កន្លែង។ លោកថា ក្រោយមន្ត្រីជំនាញយកស្រាយទៅពិនិត្យ គឺរកឃើញស្រាខ្លះមានជាតិម៉េតាណុលខ្ពស់ ដែលអាចធ្វើឱ្យមនុស្សពុល និងស្លាប់។
អភិបាលខេត្តរូបនេះ បន្តថា ករណីនេះ អាជ្ញាធរកំពុងសិក្សាផ្លូវច្បាប់ ដើម្បីចាត់វិធានការចំពោះអ្នកផលិត ដែលលោកថា ធ្វើឱ្យធ្វេសប្រហែសបណ្តាលឱ្យមនុស្សស្លាប់។
លោកបន្ថែមថា៖ «ឥលូវយើងបានយកស្រាទៅធ្វើតេស្ត ហើយមន្ត្រីបានឆ្លើយវិញថា ស្រាខ្លះវាមានជាតិមេតាណុល១៤.៧ មេតាណុលហ្នឹងវាច្រើនហួស។ ឥលូវយើងកំពុងរកមុខសញ្ញាដើម្បីចាត់វិធានការតាមផ្លូវច្បាប់»។
អ្នកនាំពាក្យក្រសួងសុខាភិបាលអ្នកនាំពាក្យក្រសួងសុខាភិបាលលោកស្រី ឱ វណ្ណឌីន ប្រាប់អ្នកសារព័ត៌មានតាមប្រព័ន្ធ Telegramថា ក្រោយទទួលបានព័ត៌មានពាក់ព័ន្ធករណីសង្ស័យពុលស្រានេះ ថ្នាក់ដឹកនាំក្រសួងសុខាភិបាលចាត់មន្ត្រីជាន់ខ្ពស់ ៣នាក់ ចុះទៅខេត្តកំពង់ឆ្នាំ ដើម្បីជួយដល់មន្ទីរសុខាភិបាលខេត្តកំពង់ឆ្នាំង។
លោកស្រី ឱ វណ្ណឌីន បានឱ្យដឹងថា ក្រសួងសុខាភិបាល បានចាត់វិធានការណ៍ហាមការផឹកស្រាស និងបញ្ឈប់ការធ្វើចរាចរលក់ដូរស្រាសជាបន្ទាន់ ហើយក្រុមការងារក្រសួងសុខាភិបាល បានបន្តអប់រំសុខភាពប្រជាពលរដ្ឋជាបន្តទៀត ជាពិសេស មិនត្រូវពិសាស្រា ស ដែលផលិតគ្មានបច្ចេកទេសត្រឹមត្រូវ។
មន្ត្រីកម្មវិធីនៅមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្ដិភាព លោក ហេង គីមហុង មានប្រសាសន៍ថា ករណីពលរដ្ឋពុលស្រានេះ វាបានកើតឡើងដោយសារអាជ្ញាធរពាក់ព័ន្ធ បណ្តែតបណ្តោយឱ្យមានការផលិតស្រា-ស តាមសហគមន៍ ឬតាមមូលដ្ឋានដោយពុំមានការត្រួតពិនិត្យត្រឹមត្រូវ និងគ្មានគុណភាព។
លោក ស្នើរដ្ឋាភិបាលបង្កើតច្បាប់ត្រួតពិនិត្យចំពោះការផលិតនិងការចែកចាយគ្រឿងស្រវឹង ខណៈលោកថា ការអនុញ្ញាតឱ្យផលិត និងចែកចាយគ្រឿងស្រវឹងដែលគ្មានការត្រួតពិនិត្យ បានបណ្តាលឱ្យប្រជាពលរដ្ឋពុលស្ទើរតែរៀងរាល់ឆ្នាំ។
លោកបន្ថែមថា៖«អាជ្ញាធរត្រូវចាត់វិធានការឱ្យបានតឹងរឹង មិនគួរបង្កើតឱ្យមានសហគ្រាសផលិតស្រានៅក្នុងមូលដ្ឋានទេ។ ចំពោះសហគ្រាស ឬការផលិតស្រាបែបលក្ខណៈគ្រួសារហ្នឹងគួរតែមានការត្រួតពិនិត្យឡើងវិញអំពីគុណភាព និងរូបមន្ត។ ការផលិតស្រា-សដែលចេះតៗគ្នាដោយគ្មានរូបមន្តច្បាស់លាស់ បានបង្កឱ្យមានជាតិម៉េតាណុលខ្ពស់នៅក្នុងស្រា វាបានជះឥទ្ធិពលអាក្រក់នៅក្នុងសហគមន៍ និងជីវភាពប្រជាជន ជាពិសេសបញ្ហាសុខភាព»។
ដោយឡែក កាលពីថ្ងៃទី២៧ខែវិច្ឆកាឆ្នាំ២០២០ ក៏មានស្ត្រី២នាក់បានស្លាប់ និងអ្នកភូមិ១២នាក់ទៀត ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្តដែរ បន្ទាប់ពីពួកគេនាំគ្នាផឹកទឹកអណ្ដូងនៅក្នុងចម្ការឪឡឹកមួយកន្លែងនៅឯវាលស្រែស្ថិតក្នុងស្រុកទឹកផុសខេត្តកំពង់ឆ្នាំង។
កាលពីចន្លោះថ្ងៃទី០៧ ដល់ថ្ងៃទី១៣ ខែមិថុនា ឆ្នាំ២០២០ កន្លងទៅនេះ នៅខេត្តបន្ទាយមានជ័យ ក៏មានមនុស្សចំនួន ៧នាក់ បានស្លាប់ និងជិត ៤០នាក់ទៀត ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ក្រោយពីពួកគេបានទទួលទានស្រាថ្នាំ យីហោម៉ាក «តាំងគួយ»៕