ក្រសួងសុខាភិបាល បានស្នើទៅកាន់ពលរដ្ឋទាំងអស់ឱ្យបញ្ឈប់ជាបន្ទាន់នូវការទទួលទានស្រា-សឬស្រាថ្នាំដែលផលិតដោយមិនមានបច្ចេកទេសត្រឹមត្រូវ ស្របពេលអ្នកស្លាប់ដោយសារពុលស្រា-ស នៅខេត្តកណ្តាល បានកើនដល់១៣នាក់។
សេចក្តីប្រកាសព័ត៌មានរបស់ក្រសួងសុខាភិបាល ស្តីពី ករណីស្លាប់បណ្តាលមកពីការពុលស្រានៅស្រុកល្វាឯម ខេត្តកណ្តាល នៅថ្ងៃទី២០ ខែឧសភានេះ បានឱ្យដឹងថា បើតាមលទ្ធផលទទួលបានមកពីមជ្ឈមណ្ឌលជាតិមន្ទីរពិសោធន៍សុខាភិបាល កាលពីថ្ងៃម្សិលមិញ ទៅលើសំណាកស្រាចំនួន២៨ ក្នុងនោះ ស្រាថ្នាំ១៥សំណាក ស្រា-ស១៣សំណាក ឃើញថា ស្រាចំនួន២០សំណាកមានសារធាតុមេតាណុល (Methanol) លើសកម្រិត ដែលធំជាង០,៥ភាគរយ (>0,៥%) ដែលធ្វើឱ្យពុល ខណៈកម្រិតមិនពុលនោះមិនត្រូវលើសពី០,១%ឡើយ។
ក្រសួងសន្និដ្ឋានថា ករណីស្លាប់ពលរដ្ឋជាង១០នាក់នៅភូមិចំនួន២ នៅស្រុកល្វាឯមនោះ បណ្តាលមកពីពលរដ្ឋទាំងនោះ ពិសាស្រា-សនិងស្រាថ្នាំដែលមានសារជាតិមេតាណុលខ្ពស់។
ក្រសួងបន្តថា៖ «ដូច្នេះ សូមបងប្អូនប្រជាពលរដ្ឋបញ្ឈប់ជាបន្ទាន់នូវការពិសាស្រា-សនិងស្រាថ្នាំដែលផលិតដោយមិនមានបច្ចេកទេសត្រឹមត្រូវ ជាពិសេសស្រាដែលយកមេតាណុលមកលាយ [ហាមដាច់ខាត]។ បើនៅតែបន្តពិសាស្រា-សឬស្រាថ្នាំទាំងនេះទៀតនោះ នឹងបណ្តាលឱ្យប៉ះពាល់ដល់សុខភាព ទៅជាឈឺ ឬអាចបាត់បង់ជីវិត»។
អធិការនគរបាលស្រុកល្វាឯម លោក ឃេង សុផល ប្រាប់ វីអូឌី ថា គិតចាប់តាំងពីថ្ងៃទី១០ ខែឧសភា មកដល់ថ្ងៃនេះ ពលរដ្ឋដែលពុលស្រាស្លាប់បានកើនឡើងដល់១៣នាក់ ខណៈអ្នកកំពុងសម្រាកព្យាបាលនៅមណ្ឌលសុខភាពមានចំនួន៤នាក់ និងមនុស្ស២នាក់ត្រូវបានបញ្ជូនមកសម្រាកព្យាលនៅមន្ទីរពេទ្យរាជធានីភ្នំពេញ ដោយសារពួកគាត់មានអាការធ្ងន់ធ្ងរ។
លោកបន្តថា សិប្បកម្មផលិតស្រាសដែលសង្ស័យបណ្តាលឱ្យប្រជាពលរដ្ឋពុលស្លាប់នោះ មិនមានស្លាកយីហោនិងច្បាប់អនុញ្ញាតទេ ដោយសារពួកគាត់ផលិតលក្ខណៈគ្រួសាររយៈពេលជាង៣០ឆ្នាំមកហើយ។
អធិការរូបនេះបន្តថា ក្រោយពីមានហេតុការណ៍នេះ សមត្ថកិច្ចបានហៅអ្នកដែលទទួលយកស្រាមកធ្វើការសាកសួរ ខណៈម្ចាស់អាជីវកម្មដែលផលិតស្រាសនោះនៅមិនទាន់បានសាកសួរនៅឡើយ។
លោកថា៖ «ម្សិលមិញ យើងបានហៅពួកគាត់មកសាកសួរបន្ថែមថា គាត់យកស្រាចេញពីប្រភពណា។ [ចំណែក] ម្ចាស់ទីតាំង យើងអត់មានឃុំគាត់ទេ ដោយសារគាត់មានភាពវ័យចាស់ គាត់បានចាកចេញពីផ្ទះ ថាទៅព្យាបាលនៅមន្ទីរពេទ្យ។ យើងមិនទាន់បានធ្វើរឿងហ្នឹងបន្តទេ។ ខ្ញុំមិនដឹងថាគាត់ទៅព្យាបាលនៅណាទេ បើដឹង ខ្ញុំនាំខ្លួនគាត់មកសួរហើយ»។
ប្រធានមន្ទីរសុខាភិបាលខេត្តកណ្តាល លោក គួយ ប៊ុនធឿន មានប្រសាសន៍ថា មន្ត្រីជំនាញបានចុះទៅពិនិត្យយកស្រាពីទីតាំងដែលផលិតនិងអ្នកទទួលយកមកលក់បន្ត សរុប២៨កន្លែង។ លោកបន្តថា ក្នុងការពិនិត្យនោះបានរកឃើញស្រាទាំងអស់នោះ ពិតជាមានជាតិមេតាណុលខ្ពស់ពិតប្រាកដមែន។
ដោយឡែក ប្រធានមន្ទីរឧស្សាហកម្ម វិទ្យាសាស្រ្ដ បច្ចេកវិទ្យា និងនវានុវត្ដន៍ ខេត្តកណ្ដាល លោក ហួត វណ្ណថូ មានប្រសាសន៍ថា សិប្បកម្មផលិតស្រានៅភូមិតាស្គរនោះ មិនបានចុះបញ្ជីទេ ដោយពួកគាត់ផលិតជាលក្ខណៈគ្រួសារតែប៉ុណ្ណោះ។
លោកបន្តថា កន្លងមក ខាងមន្ទីរបានចុះទៅប្រាប់អាជ្ញាធរស្រុកឱ្យណែនាំទៅប្រជាពលរដ្ឋដែលប្រកបអាជីវកម្មបិទស្រា-សទាំងនោះឱ្យប្រុងប្រយ័ត្ន បន្ទាប់ពីមានករណីពុលនៅខេត្តកំពង់ឆ្នាំង បន្ទាយមានជ័យ និងក្រចេះ ជាដើម។
នៅពេលសួរថា តើមន្ទីរឧស្សាហកម្មនឹងមានវិធានការអ្វីបន្ថែមទៀត? លោកថា ខាងមន្ទីរមិនមានវិធានការអ្វីទេ ដោយសារកន្លងមក ក្រសួងនិងមន្ទីរសិប្បកម្មមិនដែលអនុញ្ញាតឱ្យប្រជាពលរដ្ឋបើកអាជីវកម្មផលិតស្រាឡើយ។
លោកថា៖ «អត់មានវិធានការអីទេ សំខាន់អាជ្ញាធរដែនដី ហើយនិងឯកឧត្ដមអភិបាលខេត្តគាត់ចេញគោលការណ៍វិធានការទៅបិទការផលិតស្រា-ស គ្រប់ស្រុកក្នុងខេត្តគាត់នៅ វាចប់ហើយ! មានស្អីទៀត! ឈប់ឱ្យមានលក់ទៅ ព្រោះក្រសួងឧស្សាហកម្មមិនដែលចេញច្បាប់ឱ្យធ្វើស្រា-ស ស្រាអីទេ តាំងពីប៉ុន្មានជិត២០ឆ្នាំហើយ»។
ចំណែកអភិបាលខេត្តកណ្ដាល លោក គង់ សោភ័ណ្ឌ មានប្រសាសន៍ថា ទីតាំងបិទស្រាមិនមានច្បាប់អនុញ្ញាតនោះទេ ហើយអាជ្ញាធរបានធ្វើរបាយការណ៍ពាក់ព័ន្ធករណីនេះទៅកាន់តុលាការរួចហើយ។
លោកថា៖ «ខ្ញុំឆ្លើយមិញហើយ មានច្បាប់ទើបមានការអនុញ្ញាត មានច្បាប់ហើយធ្វើខុស មានទោសទៀត! ទី១ បិទអាជីវកម្ម ទី២ អ្នកប្រព្រឹត្តមានបទល្មើសធ្វើអ្វីខុសច្បាប់។ អ៊ីចឹងអត់មានបញ្ហាអីក្រៅពីកសាងសំណុំរឿងតាមនីតិវិធីច្បាប់ហើយ ព្រោះអានេះវាស្ថិតនៅក្នុងសមត្ថកិច្ចរបស់តុលាការ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង សង្កេតឃើញថា រដ្ឋាភិបាលនៅមានភាពខ្វះចន្លោះក្នុងការបង្ការនិងគ្រប់គ្រងស្រាឱ្យមានប្រសិទ្ធភាព ទើបបណ្ដាលឱ្យមានពលរដ្ឋពុលស្រាស្លាប់កើតឡើងដដែលៗ ខណៈច្បាប់គ្រប់គ្រងគ្រឿងស្រវឹងត្រូវលុបចោលថែមទៀត។
លោកថា៖ «កម្ពុជាយើងមិនទាន់បានធ្វើឱ្យមានច្បាប់និងវិធានការ ដើម្បីគ្រប់គ្រងគ្រឿងស្រវឹងទេ។ អ៊ីចឹងហើយ បញ្ហាដែលកើតឡើងដោយសារគ្រឿងស្រវឹង វាកើតជាញឹកញាប់។ អ៊ីចឹងបញ្ហាទាំងអស់ហ្នឹង បើសិនជាយើងមានច្បាប់ហើយ ក្រុមប្រឹក្សាឃុំអនុវត្តទៅតាមការណែនាំរបស់ក្រសួង ក៏អាចជួយទប់ស្កាត់បានដែរ។ អ៊ីចឹងថ្នាក់ជាតិនិងក្រោមជាតិ ត្រូវមានឆន្ទៈគិតគូរឱ្យបានបន្ថែមទៀត ក្នុងការគ្រប់គ្រងគ្រឿងស្រវឹង ដើម្បីសុខភាពសាធារណៈ»។
លោកបន្តថា ច្បាប់គ្រប់គ្រងគ្រឿងស្រវឹងអាចចេញទៅរួច លុះត្រាតែរដ្ឋាភិបាលប្តេជ្ញាចិត្តខ្ពស់ចង់បង្កើតច្បាប់មួយនេះ ដើម្បីបម្រើប្រយោជន៍សាធារណៈ ហើយចាត់វិធានការឱ្យមានប្រសិទ្ធភាពកុំឱ្យមានមន្ត្រីរបស់ខ្លួនធ្វើជាខ្នងបង្អែកកាងនៅពីក្រោយឧស្សាហកម្មផលិតគ្រឿងស្រវឹងនេះ។
កាលពីខែវិច្ឆិកា ឆ្នាំ២០២០ ពលរដ្ឋនៅខេត្តកំពង់ឆ្នាំង ជិត១០នាក់បានស្លាប់ និងជាង១០០នាក់បានធ្លាក់ខ្លួនឈឺ ហើយត្រូវព្យាបាលនៅមន្ទីរពេទ្យ ដោយសារពុលស្រា-សដូចគ្នានេះផងដែរ។
ដោយឡែក កាលពីចន្លោះថ្ងៃទី០៧ ដល់ថ្ងៃទី១៣ ខែមិថុនា ឆ្នាំ២០២០ កន្លងទៅ នៅខេត្តបន្ទាយមានជ័យ ក៏មានមនុស្សចំនួន៧នាក់បានស្លាប់ និងជិត៤០នាក់ទៀតត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ក្រោយពីពួកគេបានទទួលទានស្រាថ្នាំយីហោម៉ាក «តាំងគួយ»ផងដែរ៕