អាជីវករមួយចំនួននៅរាជធានីភ្នំពេញ បានបង្ហាញការព្រួយបារម្ភពីបញ្ហាជីវភាពនិងបំណុលធនាគារ ស្របពេលផ្សារមួយចំនួននៅបន្តបិទបន្ថែមមួយសប្តាហ៍ទៀត ដោយអាជ្ញាធរអះអាងថា ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ពាក់ព័ន្ធព្រឹត្តិការណ៍សហគមន៍២០កុម្ភៈ។
កាលពីថ្ងៃម្សិលមិញ រដ្ឋបាលរាជធានីភ្នំពេញ បានចេញសេចក្តីសម្រេចមួយដោយតម្រូវឱ្យបន្តផ្អាកដំណើរការផ្សាររដ្ឋនិងផ្សារឯកជនមិនរៀបរយទាំងអស់ក្នុងរាជធានីភ្នំពេញ ជាបណ្តោះអាសន្នរយៈពេល៧ថ្ងៃទៀត ដោយគិតចាប់ពីថ្ងៃទី៨ ដល់ថ្ងៃទី១៤ ខែឧសភា ឆ្នាំ២០២១នេះ ក្រោមហេតុផលថា ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
វិធានការនេះ ស្របគ្នានឹងវិធានការបន្តបិទខ្ទប់តំបន់មួយចំនួនដែលរដ្ឋបាលរាជធានីភ្នំពេញ កំណត់ថាជាតំបន់ក្រហមនិងលឿងទុំ រយៈពេល៧ថ្ងៃបន្ថែមទៀតដូចគ្នា ខណៈតំបន់ទាំងពីរនេះនៅមានហានិភ័យនៃការចម្លងជំងឺកូវីដ-១៩នៅឡើយ។
អ្នកលក់បន្លែនៅផ្សារដើមគរ និងជាអ្នករស់នៅបន្ទប់ជួលនៅក្នុងតំបន់ក្រហម ក្នុងសង្កាត់ស្ទឹងមានជ័យ២ អ្នកសី្រ ស៊ីម អាត ឱ្យដឹងថា ក្រោយពីអាជ្ញាធរប្រកាសឱ្យបិទផ្សារជាបណ្តោះអាសន្នក្នុងរយៈពេលជិត១ខែមកនេះ បានធ្វើឱ្យគាត់គ្មានប្រាក់ចំណូលទេ ហើយថា ពេលនេះកំពុងជួបបញ្ហាប្រឈមក្នុងជីវភាពផងនិងបំណុលធនាគារផង។
អ្នកស្រីថា៖ «ធនាគារអី ខ្ញុំសុំគេផ្អាកបង់៣ខែ គេគិតការប្រាក់ម៉េចៗខ្ញុំអត់ដឹងទេ កុំឱ្យគេគិតពេញ! ព្រោះខ្ញុំអត់បានរកអីទេ និយាយចំទៅ ២ថ្ងៃហើយ ដូចព្រឹកមិញអី ខ្ញុំទៅអើតមើលក្រែងចេញទៅរកស៊ីបានបន្តិចបន្តួចអ៊ីចឹង ប៉ុន្តែអត់មានផ្លូវចេញសោះ»។
អាជីវករវ័យ៣៧ឆ្នាំ ដែលមានកូន៣នាក់ក្នុងបន្ទុករូបនេះ បានបន្ថែមថា៖ «រាល់ថ្ងៃនេះ ឧទាហរណ៍ថាមានកូនឈឺឬនរណាគ្រោះថ្នាក់អី គ្មាន១រៀលទៅពេទ្យទេ»។
កាលពីថ្ងៃទី១៧ ខែមេសា ឆ្នាំ២០២១ រដ្ឋបាលរាជធានីភ្នំពេញ បានជូនដំណឹងឱ្យបិទផ្សារដើមគរជាបណ្តោះអាសន្នក្រោយពីក្រសួងសុខាភិបាល រកឃើញថា អាជីវករមួយចំនួនដែលលក់ដូរនៅផ្សារនេះមានវិជ្ជមានវីរុសកូវីដ-១៩។
អ្នកលក់ដូរនៅតាមចញ្ចើមផ្លូវក្នុងរាជធានីភ្នំពេញ អ្នកស្រី លី ដានី បាននិយាយប្រហាក់ប្រហែលគ្នាដែរថា ពេលនេះគាត់កំពុងប្រឈមអត់ប្រាក់បង់ថ្លៃផ្ទះជួលនិងធនាគារ។
អ្នកស្រីថា៖ «លុយថ្លៃផ្ទះផង លុយថ្លៃកង់បីផង គ្រាន់តែបើកផ្លូវភ្លាម ធនាគារតេមកបាត់ហើយម្សិលមិញ ទារថ្លៃកង់បី ហើយកំពុងដាក់ស្នើសុំគេពន្យារ៦ខែ គេព្រមឱ្យបង់ត្រឹមការប្រាក់ ប៉ុន្តែអាការប្រាក់ហ្នឹងយើងមិនដឹងបានចំណូលពីណាទៅឱ្យគេអ៊ីចឹងណា»។
ស្តី្រវ័យ៤០ឆ្នាំ រស់នៅភូមិរាដា សង្កាត់ភ្នំពេញថ្មី និយាយទៀតថា គាត់ព្រួយបារម្ភ បើវិធានការបិទខ្ទប់នេះនៅបន្តអូសបន្លាយ ខណៈឈ្នួលផ្ទះនិងថ្លែទឹកថ្លៃភ្លើងមិនត្រូវបានបន្ធូរបន្ថយ។
អាជីវករលក់គ្រឿងទេសនៅផ្សារផលិតផលជ្រោយចង្វារ ខណ្ឌជ្រោយចង្វារ ដែលសុំមិនបញ្ចេញឈ្មោះ និយាយថា ក្រោយពីមានព្រឹត្តិការណ៍ឆ្លងក្នុងសហគមន៍២០កុម្ភៈ ការលក់ដូររបស់គាត់បានធ្លាក់ចុះជាបន្តបន្ទាប់ ដោយសារតែពុំមានអតិថិជនច្រើនដូចមុន។
អ្នកស្រីបន្តថា បញ្ហាជីវភាពរបស់គាត់កាន់តែប្រឈមខ្លាំងថែមទៀត នៅពេលអាជ្ញាធរប្រកាសឱ្យបិទផ្សារជាបណ្តោះអាសន្នកាលពីចុងខែមុន។ ករណីនេះ អ្នកស្រីបានស្នើឱ្យម្ចាស់ផ្សារកុំយកថ្លៃតូបអំឡុងពេលបិទខ្ទប់ និងបញ្ចុះថ្លៃតូប៥០ភាគរយក្រោយអាជ្ញាធរបើកឱ្យដំណើរការផ្សារនេះឡើងវិញ ដើម្បីទុកពេលឱ្យអាជីវករស្តារជីវភាពឡើងវិញ។
អ្នកស្រីថា៖ «តាមយោបល់ខ្ញុំ ក៏ដូចអាជីវករទាំងអស់ សុំឱ្យគាត់ផ្អាកយកតម្លៃថ្លៃផ្សារសិន ព្រោះអាជីវករខ្ញុំអត់មានចំណូលទេ ហើយទី២ នៅពេលចប់កូវីដ ពួកខ្ញុំសុំឱ្យគាត់បញ្ចុះតម្លៃ៥០ភាគរយទៅ ព្រោះកូវីដនេះវាប៉ះច្រើនខែណាស់»។
វីអូឌី មិនអាចសុំការបញ្ជាក់ជុំវិញករណីនេះពីម្ចាស់ផ្សារកសិផលជ្រោយចង្វារ លោក តាំង ប៊ុនតិច បានទេ។
ប៉ុន្តែប្អូនប្រុសរបស់ម្ចាស់ផ្សាររូបនេះ បាននិយាយក្នុងលក្ខខណ្ឌមិនបញ្ចេញឈ្មោះថា លោកនឹងពាំនាំការស្នើសុំនេះទៅបងប្រុសរបស់លោក ហើយថា ការបញ្ចុះតម្លៃតូបបាន វាទាល់តែម្ចាស់ដីដែលបងប្រុសរបស់លោកជួលធ្វើផ្សារនោះ ចុះតម្លៃឱ្យផងដែរ។
យ៉ាងណា អភិបាលរាជធានីភ្នំពេញ លោក ឃួង ស្រេង ធ្លាប់ប្រាប់ VOD ថា លោកនឹងជួបភាគីពាក់ព័ន្ធ រួមនឹងអាជីវករ ដែលរងផលប៉ះពាល់អំឡុងពេលបិទខ្ទប់នេះ ដើម្បីស្វែងរកដំណោះស្រាយ។ លោកក៏បានបញ្ជាក់ដែរថា ក្នុងអំឡុងនៃការបិទខ្ទប់នេះ អាជីវករអាចផ្អាកបង់ឈ្នួលតូបសិនក៏បាន។
ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ មានប្រសាសន៍ថា រដ្ឋគួរប្រើប្រាស់ថវិកាជាតិ ដើម្បីជួយដោះស្រាយថ្លៃទឹកថ្លៃភ្លើង រួមទាំងការចំណាយប្រចាំថ្ងៃ ឬក៏អាចរកលទ្ធភាពឱ្យពលរដ្ឋទាំងនោះអាចលក់ដូរឡើងវិញ ដោយរក្សាគម្លាតសុវត្ថិភាពសង្គម។
លោកថា៖ «ខ្ញុំគិតថា បើសិនរដ្ឋបិទ១សប្តាហ៍ទៀត រដ្ឋត្រូវគិតការចំណាយចាយវាយរបស់បងប្អូនអាជីវករ ថាតើគាត់ចំណាយលើអ្វីខ្លះ ឧទាហរណ៍ដូចជាថ្លៃទឹកភ្លើង ការដែលគាត់ជំពាក់បំណុលធនាគារ ថ្លៃផ្ទះជួល និងការចំណាយលើការហូបរបស់ពលរដ្ឋហ្នឹង ដែលរដ្ឋត្រូវអន្តរាគមន៍ចំណុចទាំងអស់ហ្នឹង ជួយគាត់មួយរយៈ មួយខែឬពីរខែសិនទៅ»។
កាលពីថ្ងៃទី៦ ខែឧសភានេះ រដ្ឋាភិបាលបានសម្រេចបញ្ចប់ការបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល ដោយអនុញ្ញាតឱ្យពលរដ្ឋធ្វើដំណើរនិងប្រកបរបរមួយចំនួនជាប្រក្រតីឡើងវិញ ក្រោយពីបានបិទខ្ទប់ជាង៣សប្តាហ៍មកនេះ លើកលែងតំបន់ក្រហម និងលឿងទុំ រួមនឹងផ្សាររដ្ឋ និងផ្សារឯកជនដែលមិនរៀបរយ ដែលនៅបន្តវិធានការបិទខ្ទប់ដដែល ដើម្បីទប់ស្កាត់ការឆ្លងរាលដាលជំងឺកូវីដ-១៩។
គួរបញ្ជាក់ដែរថា កម្ពុជាបានរកឃើញករណីឆ្លងជំងឺកូវីដ-១៩ លើមនុស្ស៥៥៧នាក់បន្ថែមទៀតនៅថ្ងៃសុក្រនេះ ដែលធ្វើឱ្យចំនួនអ្នកឆ្លងសរុបកើនដល់១៨ ១៧៩នាក់ និងស្លាប់១១៤នាក់៕
