ប្រមុខរដ្ឋាភិបាលដាក់ចេញនូវផែនការជាយុទ្ធសាស្រ្តបន្ថែមមួយចំនួនក្នុងការបង្ការ ទប់ស្កាត់ និងកាត់ផ្តាច់ខ្សែចង្វាក់នៃការឆ្លងរាលដាលជំងឺកូវីដ-១៩ ក្រោយបម្រាមនៃការបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល ត្រូវបានបិទបញ្ចប់ទៅ។
ផែនការដែលរដ្ឋាភិបាលដាក់ចេញកាលពីថ្ងៃទី៤ ខែឧសភា មាន១៤ចំណុច បន្ទាប់ពីបម្រាមបិទខ្ទប់ដែលប្រើពេលអស់២២ថ្ងៃ ត្រូវបានបើកចំហឡើងវិញ។ ក្នុងចំណោមវិធានទាំង១៤ចំណុច នៃការការពារនិងទប់ស្កាត់ការរីករាលដាលបន្តជំងឺកូវីដ-១៩នេះ គឺវិធានទី២ដែលលោកនាយករដ្ឋមន្ត្រី ហ៊ុន សែន យល់ឃើញថា ទាំងថ្នាក់រដ្ឋបាលរាជធានី ខេត្ត និងក្រុង ត្រូវអនុវត្តបន្ត។
នៅក្នុងខ្លឹមសារនៃបទបញ្ជាដែលលោកនាយករដ្ឋមន្រ្តី ហ៊ុន សែន បានដាក់ចេញក្នុងលក្ខខណ្ឌទី២នេះ លើកឡើងថា អភិបាលរាជធានីភ្នំពេញ និងខេត្តកណ្តាល នៅតែអាចចេញវិធានការរដ្ឋបាលរបស់ខ្លួនបានដដែល ហើយចំណាត់ការនេះ ត្រូវធ្វើឡើងឱ្យបានឆាប់រហ័សនិងទាន់ពេលវេលា ដោយផ្អែកទៅតាមកម្រិតនៃការឆ្លងរីករាលដាលជំងឺនេះក្នុងភូមិសាស្រ្តបិទខ្ទប់នីមួយៗ។
ក្រោយអនុវត្តវិធានការបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល ដែលប្រើពេលប្រមាណ៣សប្តាហ៍មកនេះ លោកនាយករដ្ឋមន្ត្រី ហ៊ុន សែន កាលពីថ្ងៃទី៣ ខែឧសភា បានសម្រេចបញ្ចប់ការបិទខ្ទប់កម្រិតថ្នាក់រដ្ឋាភិបាល ដែលធ្វើឡើងដើម្បីកាត់ផ្តាច់នៃការចម្លងប្រភេទវីរុសថ្មីនេះ។
រដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក គឹម សន្តិភាព ឱ្យដឹងនៅថ្ងៃទី៥ ខែឧសភាថា ការសម្រេចចិត្តរបស់ប្រមុខរដ្ឋាភិបាល ដោយបញ្ចប់ការបិទខ្ទប់តំបន់ហាមឃាត់នេះ ក៏ព្រោះតែយុទ្ធនាការនេះអាចធ្វើឱ្យការរីករាលដាលនៃជំងឺកូវីដ-១៩ ត្រូវបានកាត់បន្ថយក្នុងកម្រិតមួយដែលខ្ពស់។ លោកបន្ថែមថា នៅថ្ងៃទី៦ ខែឧសភានេះ ក៏ជាពេលវេលាមួយដែលវិធានការស្ថិតក្នុងកម្រិតរដ្ឋាភិបាល ដល់ពេលដែលត្រូវបិទបញ្ចប់ហើយដែរ។
យ៉ាងណា លោក គឹម សន្តិភាព យល់ឃើញថា នេះជាជោគជ័យមួយដែលកម្ពុជាសម្រេចបាន។ លើសពីនេះ លោកថា ចំនួនអ្នកឆ្លងស្ថិតនៅក្នុងកម្រិតមួយមិនជាធ្ងន់ធ្ងរពេកនោះដែរ បើប្រៀបធៀបនឹងបណ្តាប្រទេសនៅក្នុងតំបន់និងពិភពលោក។
លោកមានប្រសាសន៍ថា៖ «យើងមើលឃើញនូវលទ្ធផលមួយចំនួនដែលកើតពីការអនុវត្តក្នុងរយៈពេល២២ថ្ងៃកន្លងមកនេះ ហើយលទ្ធផលដែលគួរឱ្យយើងកត់សម្គាល់នោះ គឺយើងអាចគ្រប់គ្រងបាននៅតំបន់រាជធានីភ្នំពេញ និងក្រុងតាខ្មៅ គឺយើងគ្រប់គ្រងនៅតំបន់ដែលមានហានិភ័យខ្ពស់ ហានិភ័យមធ្យម និងហានិភ័យទាប»។
កាលពីថ្ងៃទី១៥ ខែមេសា ដោយមើលឃើញពីទំហំនៃការឆ្លងជំងឺកូវីដ-១៩ កាន់តែរីកសាយភាយ រដ្ឋាភិបាលសម្រេចបិទខ្ទប់តំបន់មួយចំនួននៅរាជធានីភ្នំពេញ និងក្រុងតាខ្មៅ។ នៅពេលឱសានវាទត្រូវបញ្ចប់ក្នុងជំហានទី១ ហើយលទ្ធផលនៃការកាត់ផ្តាច់ការឆ្លងនៅតែស្ថិតក្នុងហានិភ័យខ្ពស់ដដែល ទើបនៅថ្ងៃទី១៩ ខែមេសា រដ្ឋាភិបាលត្រូវបង្ខំចិត្តដាក់ចេញវិធានបិទខ្ទប់រយៈពេល៧ថ្ងៃ ក្នុងដំណាក់កាលទី២បន្តទៀត។ ការប្រើពេលក្នុងការប្រយុទ្ធប្រឆាំងវីរុសនេះ រដ្ឋាភិបាលត្រូវប្រើពេលប្រមាណ២២ថ្ងៃ ដែលទើបបិទបញ្ចប់នៅថ្ងៃទី៦ ខែឧសភានេះ។
បើទោះជាបែបណា ក្រុមអ្នជំនាញផ្នែកសុខភាពនៅតែបង្ហាញកង្វល់របស់ខ្លួន ក្រោយព្រឹត្តិការណ៍បិទខ្ទប់ដែលរដ្ឋាភិបាលដាក់ចេញនេះត្រូវបានបញ្ចប់។
អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន មានប្រសាសន៍កាលពីថ្ងៃទី៤ ខែឧសភា ថាថ្វីត្បិតការបើកចំហនៃការដើរហើរ និងការប្រកបការងារអាជីវកម្មឡើងវិញនៅពេលនេះក្តី អ្នកស្រីនៅតែបង្ហាញការព្រួយបារម្ភថា លទ្ធភាពនៃការឆ្លងអាចនឹងកើតឡើងជាថ្មី ប្រសិនបើប្រជាពលរដ្ឋធ្វេសប្រហែសមើលស្រាលស្ថានការណ៍និងភ្លេចខ្លួន។
អ្នកស្រីមានប្រសាសន៍ថា៖ «យើងកុំភ្លេចណា! នៅក្នុងបរិបទនេះ ភាសាអង់គ្លេសគេហៅថា Virus Regulation ដែលមានន័យថា ចរាចរណ៍នៃវីរុសកូវីដ-១៩ បច្ចុប្បន្ននេះ គឺពេញធឹងហើយ។ យើងអត់ដឹងថាវាទៅណាខ្លះទេ ហ៊ានតែយើងទៅមិនស្រួល ប៉ះវាហើយ! ខ្ញុំតែងតែនិយាយហើយ វីរុសកូវីដ-១៩នេះឆ្លាតជាងយើងឆ្ងាយណាស់ វាអង្គុយចាំតែមើលយើងហ្នឹង»។
លោកវេជ្ជបណ្ឌិត នុត សម្បត្តិ ប្រធានវិទ្យាស្ថានជីវសាស្រ្ត វេជ្ជសាស្រ្ត និងកសិកម្ម នៃរាជបណ្ឌិត្យសភាកម្ពុជា មានប្រសាសន៍ថា កម្ពុជានៅតែស្ថិតក្នុងការប្រុងប្រយ័ត្នខ្ពស់នៅឡើយ បើទោះបីការបិទខ្ទប់ត្រូវបានបិទបញ្ចប់ក៏ដោយ។ លោកមើលឃើញថា ក្នុងករណីមជ្ឈដ្ឋានទូទៅមិនបានអនុវត្តឱ្យបានត្រឹមត្រូវ ចំពោះវិធានការសុខាភិបាលនិងបម្រាមរបស់អាជ្ញាធរទេ នោះការកាត់ផ្តាច់នៃការចម្លងមិនអាចជោគជ័យបានឡើយ ហើយការវិលវិញនៃជំងឺកូវីដ-១៩នេះអាចនឹងមានទំហំធំជាងបច្ចុប្បន្ននេះក៏ថាបានដែរ។
លោកមានប្រសាសន៍ថា៖ «ប្រសិនជាយើងគ្រប់គ្រងវាអត់បានទេ អារលកក្រោយនេះវាអាចធំជាងរលកមុនទៅទៀត។ តាមដែលយើងសង្កេតមើលទៅ ដូចព្រឹត្តិការណ៍សហគមន៍លើកទី១ លើកទី២ ហើយមកដល់លើកទី៣នេះ ចំនួនវាចេះតែកើនឡើង ប្រសិនបើយើងគ្រប់គ្រងអត់បានទៀតទេ ចំនួននេះវាចេះតែគុណនឹង២ គុណនឹង៣ហើយ ដោយសារហេតុវាឆ្លងជាចង្កោមទៅតាមសហគមន៍»។
ភ្លាមៗ ក្រោយពីយុទ្ធសាស្រ្តតំបន់បិទខ្ទប់ដែលដាក់ចេញដោយរដ្ឋាភិបាលត្រូវបើកឱ្យដំណើរជាធម្មតាវិញ រដ្ឋបាលរាជធានីភ្នំពេញចាប់អនុវត្តវិធានការរបស់ខ្លួនភ្លាមដែរ ដោយចាត់អាទិភាពតំបន់បិទខ្ទប់បន្ត មានតំបន់ក្រហម លឿងទុំ និងលឿង សម្រាប់ភូមិសាស្រ្តរាជធានីភ្នំពេញ។ វិធានការរដ្ឋបាលដែលដាក់ចេញដោយរដ្ឋបាលរាជធានីភ្នំពេញកាលពីថ្ងៃទី៥ ខែឧសភានេះ គឺត្រូវអនុវត្តចាប់ពីម៉ោងសូន្យ ថ្ងៃទី៦ រហូតដល់ថ្ងៃទី១២ ខែឧសភា។
សេចក្តីប្រកាសព័ត៌មានរបស់រដ្ឋបាលរាជធានីភ្នំពេញ បានបញ្ជាក់ថា ការបិទខ្ទប់កម្រិតរាជធានីនេះ មិនមែនបិទខ្ទប់ក្នុងទំហំធំដូចការកំណត់ដោយរដ្ឋាភិបាលទេ ពោលគឺជាការបង្រួមតំបន់ក្រហម លឿងទុំ និងលឿង ឱ្យចេញជាចំណែកតូចៗប៉ុណ្ណោះ។
ទោះជាយ៉ាងណា មុនមួយថ្ងៃនៃសេចក្តីសម្រេចបញ្ចប់បិទខ្ទប់ ដែលលោកនាយករដ្ឋមន្រ្តី ហ៊ុន សែន បានដាក់ចេញនេះ សមាជិកសភាអាស៊ានដើម្បីសិទ្ធិមនុស្ស បានចេញសេចក្តីថ្លែងការណ៍របស់ខ្លួនកាលពីថ្ងៃទី៣ ខែឧសភា ដោយអំពាវនាវឱ្យរដ្ឋាភិបាលកម្ពុជា ផ្តាស់ប្តូរជាចាំបាច់ពីវិធីសាស្រ្តក្នុងការគ្រប់គ្រងជំងឺកូវីដ-១៩។
សេចក្តីថ្លែងការណ៍នេះបានចាត់ទុកវិធានការបិទខ្ទប់ដោយរដ្ឋាភិបាលកម្ពុជា ថាជាការប្រកាសអាសន្ននិងជាវិធានការមិនសមាមាត្រ ហើយច្រើនហួសប្រមាណរបស់រដ្ឋាភិបាល ក្នុងការឆ្លើយតបទៅនឹងជំងឺកូវីដ-១៩នេះ។
យ៉ាងនេះក្តី សមាជិកសភារបស់គណបក្សកាន់អំណាច លោក ឈាង វុន បានហៅក្រុមសមាជិកសភានេះថា ជាក្រុមមិនប្រាកដនិយម ហើយចេះតែបង្កើតនិងតាំងខ្លួនជាសមាជិកសភា។
លោកបន្តថា នៅក្នុងតំបន់អាស៊ាន មិនទាន់បានបង្កើតសមាជិកសភាសម្រាប់អាស៊ាននៅឡើយទេ។ ហេតុដូច្នេះ លោកថា ការចេញសេចក្តីថ្លែងការណ៍ណាមួយប្រឆាំងនឹងរដ្ឋាភិបាលកម្ពុជា គឺជាក្រុមមនុស្សដែលពុំគួរលើកយកមកនិយាយឡើយ និងនាំឱ្យប៉ះពាល់ដល់សេចក្តីថ្លៃថ្នូររបស់កម្ពុជាថែមទៀតផង។
លោកបន្ថែមថា៖ «ប្រទេសនីមួយៗ គេមានសភារបស់គេមួយ ហើយគេធ្វើការជាមួយគ្នា។ ចំណែកសភាអាស៊ានអីនិងសិទ្ធិមនុស្សអីនេះ អត់មានទេ វាចេះតែបង្កើតទេ។ ដូច្នេះហើយ ក្មួយមិនត្រូវយកពាក្យសម្ដីមនុស្សអស់នេះមកសួរពូ មិនកើតទេ! វាអត់ផ្លូវការហើយ! វាអត់មានទៀតអាហ្នឹង! មានអ្នកណាទទួលស្គាល់វា! ក្មួយពិនិត្យវាបន្តិចទៅ ពិនិត្យវានៅក្នុងហ្នឹងបន្តិចទៅ»។
លោក ឈាន វុន មានសុទិដ្ឋិនិយមថា វិធានការបិទខ្ទប់ដែលចេញដោយរដ្ឋាភិបាលនេះ គឺជាឧបករណ៍មួយដ៏មានប្រសិទ្ធភាពបំផុតក្នុងការប្រយុទ្ធប្រឆាំងនឹងកូវីដ-១៩។ លោកថា វាមិនចម្លែកទេ ប្រទេសនៅលើពិភពលោកនេះ គេអនុវត្តក្នុងវិធានប្រហាក់ប្រហែលគ្នា ដោយថា ការអនុវត្តដូច្នេះ ដើម្បីសេចក្តីសុខនិងសុវត្ថិភាពរបស់ប្រជាជនប៉ុណ្ណោះ។
អ្នកនាំពាក្យក្រសួងយុត្តិធម៌ លោក គឹម សន្តិភាព អះអាងថា ក្នុងអំឡុងពេលបិទបញ្ចប់ការបិទខ្ទប់នេះ ប្រសិនបើមានអ្នកដែលល្មើសនឹងវិធានសុខាភិបាលនិងបម្រាមដែលចេញដោយអាជ្ញាធរ បុគ្គលនោះនឹងត្រូវទទួលទោសទណ្ឌដូចមានកំណត់នៅក្នុងច្បាប់ស្តីពីការប្រយុទ្ធប្រឆាំងកូវីដ-១៩។
លោកបន្ថែមថា បើទោះបីជានៅពេលនេះមើលទៅសភាពការណ៍ហាក់ធូរស្រាលបន្តិចមែន តែនេះមិនមែនមានន័យថា ច្បាប់ដែលបានកំណត់រួចហើយ រួមទាំងគោលការណ៍នានាដែលបានដាក់ចេញហើយ មិនអនុវត្តនោះទេ។ ផ្ទុយទៅវិញ លោកថា វិធានទាំងនោះនឹងត្រូវប្រើប្រាស់ជាចាំបាច់ក្នុងអំឡុងពេលនេះបន្ត។
លោកបន្តថា៖ «រាល់ការបំពារបំពាននូវវិធានការណាមួយដែលយើងបានដាក់ចេញនេះ គឺនឹងទទួលបាននូវទណ្ឌកម្មដូចយើងបានកំណត់ក្នុងច្បាប់ បានកំណត់រួចហើយនៅក្នុងអនុក្រឹត្យលេខ៣៧ និងអនុក្រឹត្យលេខ៥៧ កន្លងមកនេះ»។
លោកវេជ្ជបណ្ឌិត នុត សម្បត្តិ អ្នកជំនាញផ្នែកសុខភាព នៅរាជបណ្ឌិត្យសភាកម្ពុជា យល់ឃើញថា ដើម្បីកាត់ផ្តាច់វីរុសកូវីដ-១៩បាន លុះណាសាធារណជនយល់ឱ្យបានស៊ីជម្រៅចំពោះខ្លឹមសារ «៣កុំ និង៣ពាការ» ដែលដាក់ចេញដោយរដ្ឋាភិបាល។
បន្ថែមពីលើនេះ លោកថា សាធារណជនក៏ត្រូវអនុវត្តឱ្យបានខ្ជាប់ខ្ជួននូវវិធានសុខាភិបាល តាមរយៈការពាក់ម៉ាស់ រក្សាគម្លាតសង្គម និងលាងដៃជាប្រចាំ។ លោកបន្តថា បើមិនដូច្នេះទេ ហានិភ័យដែលកើតចេញពីរលកថ្មីនេះ វានឹងរឹតតែធំជាងមុន និងពិបាកកំណត់មុខសញ្ញានៃការឆ្លងជាងមុនថែមទៀត។
លោក នុត សម្បត្តិ បន្តថា៖ «បើសិនមានការចូលរួមទាំងអស់គ្នា តាំងពីប្រជាជន និងថ្នាក់ដឹកនាំនៅថ្នាក់មូលដ្ឋាន រួមទាំងមន្រ្តីនៅថ្នាក់ក្រោមជាតិ ហើយនិងប្រជាជនយើង អនុវត្តតាមវិធានសុខាភិបាលខ្ជាប់ខ្ជួននូវអ្វីដែលសម្តេចលោកបានលើកឡើងហ្នឹងគឺ “៣កុំ ៣ការពារ” ហ្នឹង។ រឿងទី២ គឺយើងប្រកាន់ការរស់នៅបែបថ្មី ហើយទី៣ យើងចាក់វ៉ាក់សាំងឱ្យបានគ្រប់គ្នា និងទី៤ យើងចូលរួមគោរពច្បាប់ស្តីពីការគ្រប់គ្រងកូវីដនិងជំងឺធ្ងន់ធ្ងរផ្សេងទៀតនោះ ហើយកាលណាយើងធ្វើទាំងអស់ហ្នឹងបានល្អ ទើបយើងអាចកាត់បន្ថយការឆ្លងនេះ បាទ» ៕
