អាជ្ញាធររាជធានីភ្នំពេញ អះអាងថា នឹងជួយសម្របសម្រួលរឿងថ្លៃឈ្នួលតូបរបស់អាជីវករលក់ដូរនៅផ្សារ ក្រោយចប់ការឆ្លងរាលដាលជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ ខណៈអាជីវករបានត្អូញត្អែរពីផលប៉ះពាល់ប្រាក់ចំណូលរបស់ពួកគាត់ អំឡុងពេលអាជ្ញាធរបិទផ្សាររដ្ឋនិងផ្សារមិនរៀបរយទាំងអស់ក្នុងរាជធានីភ្នំពេញ។
អភិបាលរាជធានីភ្នំពេញ លោក ឃួង ស្រេង ប្រាប់ វីអូឌី តាមទូរសព្ទកាលពីថ្ងៃ២៧ ខែមេសា ឆ្នាំ២០២១ ថា បច្ចុប្បន្ន អាជ្ញាធរកំពុងជាប់ដៃអនុវត្តវិធានការកាត់ផ្តាច់រលកចម្លងជំងឺកូវីដ-១៩ មិនទាន់អាចមានពេលដោះស្រាយបញ្ហាខ្វែងគំនិតគ្នារវាងអាជីវករនិងម្ចាស់ទីតាំងផ្សារចំពោះថ្លៃជួលតូបបាននៅឡើយ។
លោកបន្តថា៖ «ចាំមើលយើងនឹងទូទាត់នៅពេលដែលយើងចប់កូវីដ ចាំពិភាក្សាគ្នាជាមួយគាត់។ ឥលូវនេះ យើងកំពុងប្រយុទ្ធប្រឆាំងជាមួយកូវីដ យើងអត់បានគិតដល់ចំណុចហ្នឹងទេ សូមឱ្យអាជីវករទាំងអស់លោកកុំអាលបង់ ឬក៏លោកធ្វើការជាមួយគាត់ [ម្ចាស់ផ្សារ] ឱ្យគ្រប់គ្រាន់សិនទៅ។ ហើយគាត់សុំឱ្យអាជ្ញាធរយើងជួយ ពេលណាដល់ចប់កូវីដ យើងនឹងពិភាក្សាជាមួយម្ចាស់ទីតាំង»។
ម្ចាស់ហាងអ៊ុតសក់ដែលជួលតូបនៅផ្សារកសិផលជ្រោយចង្វារមួយរូប ឈ្មោះ ស្រីនាថ លើកឡើងនៅថ្ងៃនេះថា អ្នកស្រីបានស្នើសុំម្ចាស់ផ្សារចុះថ្លៃឈ្នួលតូបពាក់កណ្តាលចាប់ពីអំឡុងខែមីនាមក ប៉ុន្តែម្ចាស់ផ្សារបដិសេធ និងយល់ព្រមចុះត្រឹម៥ដុល្លារ ក្រោមការសម្របសម្រួលពីរដ្ឋបាលសង្កាត់។ អ្នកស្រីបន្តថា គាត់បានស្នើសុំអន្តរាគមន៍ពីរដ្ឋបាលខណ្ឌជ្រោយចង្វារបន្ថែមទៀតជុំវិញបញ្ហានេះ ប៉ុន្តែនៅមិនទាន់ទទួលបានចម្លើយនៅឡើយ។
អ្នកស្រី ស្រីនាថ និយាយថា៖ «បារម្ភខ្លាំងតែម្តង ព្រោះអីវាអត់មានចំណូលអីទាំងអស់ មានតែការចំណាយ ហើយពួកខ្ញុំអត់មានស្តុកទុកទៀត ដល់ពេលអ៊ីចឹងពិបាកចិត្តខ្លាំង។ ទៅណាឬចង់ធ្វើអីក៏មិនកើត។ ហើយអ៊ីចឹងចង់ដឹងថា គាត់ឱ្យឬមិនឱ្យ ស្រណុកយើងគិតថាលៃលកលុយកាក់អីចាយខ្លះអ៊ីចឹង»។
អាជីវករលក់កាហ្វេក្នុងផ្សារមួយនេះ អ្នកស្រី ម៉ា ឃីម វ័យ៦០ឆ្នាំ មានប្រសាសន៍ថា អ្នកស្រីនិងអាជីវករមួយចំនួនទៀត បានបិទទ្វារតូបតាំងពីដើមខែមេសាមកម៉្លេះ ដោយសារបញ្ហាខ្សត់ភ្ញៀវចាប់ពីផ្ទុះព្រឹត្តិការណ៍សហគមន៍២០កុម្ភៈ និងការបារម្ភឆ្លងជំងឺ ដែលធ្វើឱ្យចំណូលរបស់ពួកគាត់ត្រូវបាត់បង់ទាំងស្រុង។ អ្នកស្រីថា ពួកគាត់នឹងមិនយល់ព្រមបង់ថ្លៃឈ្នួលតូបនោះទេ បើសិនម្ចាស់ផ្សារមិនបញ្ចុះថ្លៃជួលឱ្យតាមការទាមទារ។
អ្នកស្រី ឃីម និយាយថា៖ «ប្រសិនជាគាត់ព្រមចុះ៥០ភាគរយ ពួកខ្ញុំនឹងមូលមតិគ្នាទាំងអស់នឹងបង់ជូនគាត់ ដោយអត់មានថាអី ហើយក៏អរគុណគាត់ដែរដែលមានចិត្តសណ្តោសដល់អ្នកក្រ អ្នកអត់អ៊ីចឹង»។
អភិបាលខណ្ឌជ្រោយចង្វារ លោក ឃ្លាំង ហួត ឱ្យដឹងថា បច្ចុប្បន្ន ខាងអាជ្ញាធរកំពុងមមាញឹកក្នុងការគ្រប់គ្រងនិងដោះស្រាយបញ្ហាកើតចេញពីការបិទខ្ទប់ក្នុងភូមិសាស្ត្ររបស់ខ្លួនគ្រប់គ្រង មិនទាន់មានពេលជួយសម្របសម្រួលបញ្ហាជូនអាជីវករនៅឡើយ។ លោកថា ម្ចាស់ផ្សារត្រូវតែយោគយល់ចំពោះបញ្ហាបាត់បង់ចំណូលរបស់អាជីវករក្នុងកាលៈទេសៈដែលអាជ្ញាធរកំពុងអនុវត្តវិធានការប្រយុទ្ធប្រឆាំងជំងឺឆ្លង។
លោកថា៖ «កាលណាអត់បានលក់ ហើយទៅបង់ម៉េចកើត! បើគាត់រឹងទទឹង ទៅធ្វើបាបអាជីវករ អាហ្នឹងគាត់មិនត្រឹមមានបញ្ហាជាមួយអាជីវករទេ តែក៏មានបញ្ហាជាមួយខណ្ឌដែរ»។
វីអូឌី មិនអាចសុំការឆ្លើយតបពីម្ចាស់ផ្សារកសិផលជ្រោយចង្វារ លោក តាំង ប៊ុនតិច បានទេ នៅថ្ងៃទី២៩ ខែមេសាឆ្នាំ២០២១។
ក្រៅពីផ្សារកសិផលជ្រោយចង្វារ កាលពីពេលថ្មីៗនេះ អាជីវករលក់ដូរនៅផ្សារអូរឫស្សីមួយចំនួនក៏បានស្នើរដ្ឋាភិបាលឱ្យជួយអន្តរាគមន៍ទៅម្ចាស់ផ្សារបញ្ចុះតម្លៃជួលតូបលក់ដូររបស់ពួកគាត់ ដោយថា ពួកគេបានបាត់បង់ប្រាក់ចំណូលទាំងស្រុង ក្រោយពេលផ្សារមួយនេះត្រូវបានអាជ្ញាធរសម្រេចបិទជាបណ្តោះអាសន្ន បន្ទាប់ពីរកឃើញអាជីវករ បុគ្គលិក សន្តិសុខ និងអ្នកពាក់ព័ន្ធផ្សារអូរឫស្សីជាច្រើននាក់វិជ្ជមានកូវីដ-១៩។
ប្រធានគ្រប់គ្រងផ្សារអូរឫស្សី លោក ហត វ៉ាន់ធី លើកឡើងថា លោកនឹងជួយសម្របសម្រួលជាមួយនឹងម្ចាស់តូបដែលមិនព្រមបញ្ចុះថ្លៃឈ្នួលតូបតាមការស្នើសុំពីអាជីវករ បន្ទាប់ពីផ្សារអាចបើកដំណើរឡើងវិញ។ លោកថា លោកនឹងប្រឹងប្រែងដោះស្រាយទៅតាមគោលការណ៍ ប៉ុន្តែលោកមិនធានាថានឹងបានជោគជ័យនោះទេ ដោយសារកម្មសិទ្ធិតូបជារបស់ឯកជន។
លោក ហត វ៉ាន់ធី និយាយថា៖ «ទាល់តែជួបគ្នា ព្រោះបើគាត់អត់បានលក់ គេក៏យល់ដែរ គេមិនមែនចេះតែនេះ[រឹងទទឹង]ទេ។ អត់អាចនិយាយបានទេ បង! អត់អាចនិយាយជំនួសគាត់បានទេ ជួបគ្នា! ដល់ដោះស្រាយអត់ចេញ យើងសម្របសម្រួលជូនគាត់។ យើងអត់អាចឆ្លើយជំនួសគេម្ចាស់តូបបានទេ ព្រោះមិនមែនតូបរបស់យើងឯណា»។
នៅថ្ងៃទី២៣ ខែមេសា រដ្ឋបាលសាលារាជធានីភ្នំពេញ បានប្រកាសបិទផ្សាររដ្ឋនិងផ្សារមិនរៀបរយទាំងអស់ក្នុងទីក្រុង បន្ទាប់ពីផ្សារធំៗមួយចំនួនដូចជា ផ្សារអូរឫស្សី ផ្សារចាស់ ផ្សារកណ្តាល ផ្សារដើមគរ ជាដើម ផ្ទុះការឆ្លងរាលដាលជំងឺកូវីដ-១៩ ជាបន្តបន្ទាប់៕
