អាជីវករនិងប្រជាពលរដ្ឋមួយចំនួននៅរាជធានីភ្នំពេញ នៅថ្ងៃនេះ បង្ហាញក្ដីរីករាយនៅពេលដែលរដ្ឋាភិបាលបានបង្រួមតំបន់បិទខ្ទប់តូចជាងមុន ដែលធ្វើឱ្យពួកគាត់ធ្វើដំណើរទៅប្រកបរបររកទទួលទានក្នុងតំបន់មួយចំនួននៅរាជធានីភ្នំពេញ និងអាចធ្វើដំណើរឆ្លងខេត្តទូទាំងប្រទេសឡើងវិញបាន។
ការលើកឡើងនេះ ធ្វើឡើងបន្ទាប់ពីរដ្ឋាភិបាលសម្រេចឱ្យបើកការធ្វើចរាចរណ៍ឡើងវិញនៅទូទាំងប្រទេស ពីខេត្តមួយទៅខេត្តមួយ និងការធ្វើដំណើរនៅតំបន់លឿងក្នុងរាជធានីភ្នំពេញ និងក្រុងតាខ្មៅ ខេត្តកណ្តាល នៅថ្ងៃទី៦ ខែឧសភានេះ លើកលែងតែតំបន់មួយចំនួនដែលជាតំបន់ក្រហម និងតំបន់លឿងទុំ ដែលនៅមានការរឹតត្បិតមួយចំនួន ដើម្បីទប់ស្កាត់ការឆ្លងរាលដាលជំងឺកូវីដ-១៩។
អាជីវករលក់បន្លែនៅលើចិញ្ចើមផ្លូវ ម្តុំផ្សារអូឡាំពិក រាជធានីភ្នំពេញ អ្នកស្រី ប៊ិន ណារិន ដែលមានកូន៥នាក់ក្នុងបន្ទុក និយាយថា កាលពីរដ្ឋាភិបាលសម្រេចបិទក្រុងជិត១ខែមុន ធ្វើឱ្យគ្រួសាររបស់គាត់ជួបបញ្ហាប្រឈមច្រើនក្នុងជីវភាព ដូចជា ខ្វះលុយបង់ផ្ទះ ទឹក ភ្លើង និងធនាគារ ជាដើម។
ប៉ុន្តែអាជីវកររូបនេះបញ្ជាក់ថា នៅពេលរដ្ឋាភិបាលបើកឱ្យមានការធ្វើចរាចរណ៍ និងដំណើរការមុខរបរមួយចំនួននៅតំបន់លឿងក្នុងរាជធានីភ្នំពេញ និងក្រុងតាខ្មៅ និងតាមបណ្តាខេត្តនានាឡើងវិញនេះ ធ្វើឱ្យគាត់សប្បាយរីករាយ ដោយសារអាចរកប្រាក់បានខ្លះ ដើម្បីទ្រទ្រង់ជីវភាពគ្រួសារ។
អ្នកស្រីនិយាយថា៖ «ខ្ញុំកូនខ្ចី ទើបកើតបាន២ខែ ខ្ញុំចេញលក់! ចំណែកកូនធំៗផ្សេងទៀតគាត់អត់មានរកអីទេ គាត់អត់ធ្វើការផង កន្លែងក្រុមហ៊ុនគេបិទគ្រប់កន្លែង កូននៅដេកផ្ទះទាំងអស់គ្នា។ អញ្ចឹងខ្ញុំលក់ទៅ បានជួយខ្លះ ជួយបង់លុយផ្ទះ ទឹកភ្លើងខ្លះ តែលុយធនាគារទប់មិនឈ្នះ មិនទាន់បានទេ»។
ដើរចេញពីកន្លែងលក់បន្លែសាច់នៅក្បែរផ្សារអូឡាំពិក អ្នកស្រី ស៊ុំ ពៅ ជាស្ត្រីមេផ្ទះ រស់នៅខណ្ឌបឹងកេងកង រាជធានីភ្នំពេញ និយាយថា កាលពីរដ្ឋាភិបាលបិទខ្ទប់រាជធានីភ្នំពេញនោះ ធ្វើឱ្យគាត់ពិបាករកស្បៀងទទួលទាន និងទទួលទានតែសាច់ក្លាហ្សេជិត១ខែមកហើយ។ តែយ៉ាងណា អ្នកស្រីសម្តែងភាពរីករាយ ដោយសារនៅថ្ងៃនេះ រដ្ឋាភិបាលសម្រេចឱ្យពលរដ្ឋធ្វើចរាចរណ៍នៅតាមតំបន់មួយចំនួនឡើងវិញ។
អ្នកស្រីនិយាយថា៖ «សប្បាយចិត្ត យើងបានទិញម្ហូប បានទិញបន្លែហូបស្រស់ៗ យើងហូបតែក្រៀមៗ សុខភាពវាមិនល្អ ចង់ឱ្យបើករហូត បើសិនជាស្ងប់ស្ងាត់ទៅ បើក [លក់គ្រឿងឧបភោគបរិភោគ] វាល្អទាំងអស់គ្នា»។
ឈរទិញបន្លែនិងសាច់នៅក្បែរផ្សារទួលទំពូង អ្នកស្រី សេង ផល្លី ជាស្ត្រីមេផ្ទះមួយរូបទៀត ក៏មានក្តីរីករាយពេលដែលរដ្ឋាភិបាលបើកចរាចរណ៍ឡើងវិញនៅក្នុងរាជធានីភ្នំពេញ ជាពិសេសនៅតំបន់ដែលមិនប្រឈមនឹងការឆ្លងរាលដាលនៃជំងឺកូវីដ-១៩នេះ ដើម្បីឱ្យពលរដ្ឋមួយចំនួនមានឱកាសចេញមកទិញបន្លែនិងសាច់ស្រស់បរិភោគឱ្យមានសុខភាពល្អជាដើម។
អ្នកស្រីនិយាយថា៖ «បានមានត្រី មានសាច់ល្អស្រស់ៗអញ្ចឹង យើងសប្បាយចិត្តដែរ ជួយឱ្យយើងសុខភាពល្អដែរ បានម្ហូបស្រស់ៗអញ្ចឹង»។
លោក សូ សម្បត្តិ អាជីវករម្នាក់ទៀតដែលបើកលក់ត្រីសាច់នៅក្បែរចិញ្ចើមផ្លូវម្តុំផ្សារទួលទំពូងឡើងវិញ នៅថ្ងៃនេះ បានសម្តែងការសាទរនៅពេលដែលរដ្ឋាភិបាលបើកឱ្យប្រជាពលរដ្ឋអាចធ្វើដំណើរនិងប្រកបរបរទទួលទានបានទូលំទូលាយជាងមុន។ លោកបន្តថា ក្នុងអំឡុងពេលបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល រូបគាត់បានផ្អាកការលក់ដូរមួយរយៈដែរ ដោយសារជួបការលំបាកក្នុងការធ្វើដំណើរ ហើយអំឡុងពេលនោះបានធ្វើឱ្យគ្រួសាររបស់គាត់ជួបការលំបាកក្នុងជីវភាព។
បើទោះជាវិធានការបិទខ្ទប់បានបន្ធូរបន្ថយ ប៉ុន្តែលោកក៏មិនភ្លេចនូវការរក្សាអនាម័យ គម្លាតសុវត្ថិភាព ក្នុងអំឡុងពេលលក់ដូរនេះឡើងវិញដែរ ដើម្បីអនុវត្តតាមការណែនាំរបស់ក្រសួងសុខាភិបាល ដើម្បីរួមគ្នាទប់ស្កាត់ការឆ្លងរាលដាលនៃជំងឺកូវីដ-១៩។
លោកមានប្រសាសន៍ថា៖ «លក់តម្លៃធម្មតា មិនឡើងថ្លៃអ្វីទេ យើងរក្សាអនាម័យ មានទឹកអាល់កុល ចងខ្សែ ឃ្លាតគម្លាតអ្នកចូលទិញ ហើយឱ្យឃ្លាតគ្នា១ម៉ែត្រទៅ១ម៉ែត្រកន្លះពីគ្នា ដើម្បីសុវត្ថិភាពពួកគាត់។ ជំងឺកូវីដ វាកំពុងរាលដាលខ្លាំង អញ្ចឹងហើយបានយើងមានអនាម័យល្អ ដើម្បីសុខភាពប្រជាពលរដ្ឋទាំងអស់គ្នា»។
លោក ឆាន់ គឹមលី ដែលអះអាងថាជាប្រជាការពារនៅសង្កាត់ទួលទំពូងទី១ និយាយថា ស្របពេលដែលមានការបើកឱ្យពលរដ្ឋអាចធ្វើចរាចរណ៍ និងប្រកបរបរមួយចំនួនឡើងវិញបាន ប៉ុន្តែថ្នាក់លើបានបញ្ជាឱ្យពួកគាត់ប្រមាណជា១០នាក់ ចុះរៀបចំសណ្តាប់ធ្នាប់នៅតាមដងផ្លូវ ជាពិសេសនៅតំបន់អាជីវករលក់ដូរនៅក្បែរចិញ្ចើមផ្លូវ ដើម្បីឱ្យពលរដ្ឋនិងអាជីវករនៅតំបន់នោះគោរពតាមការណែនាំរបស់ក្រសួងសុខាភិបាល។
លោកនិយាយថា៖ «ជួយណែនាំគាត់ឱ្យរក្សាគម្លាតសុវត្ថិភាព ដើម្បីចៀសផុតពីជំងឺកូវីដ-១៩នេះ ដើម្បីឱ្យគាត់មានរបៀបរៀបរយ រក្សាគម្លាត ឱ្យមានពាក់ម៉ាស ដូចជាមានអាល់កុលលាងដៃដាក់នៅកន្លែងដែលគាត់លក់ ឬក៏គាត់សម្រាប់លាងដៃរបស់ខ្លួនគាត់»។
អ្នករត់ម៉ូតូកង់បី នៅម្តុំចោមចៅ រាជធានីភ្នំពេញ អ្នកស្រី ឃួន ម៉ូលីកា និយាយថា គាត់សប្បាយចិត្តក្រោយពីរដ្ឋាភិបាលសម្រេចបើកឱ្យពលរដ្ឋធ្វើដំណើរនៅក្នុងតំបន់មួយចំនួនឡើងវិញ ខណៈរូបគាត់ខានប្រកបមុខរបរនេះជិត១ខែមកហើយ។
ប៉ុន្តែអ្នកស្រីថា អ្វីដែលគាត់ជួបបញ្ហាប្រឈមនៅពេលចេញរកប្រាក់នៅព្រឹកនេះ គឺមិនមានភ្ញៀវដឹក បែរជាមានការកកស្ទះចរាចរណ៍ខ្លាំងនៅម្តុំរង្វង់មូលចោមចៅទៅវិញ ដោយសារតំបន់ខ្លះ ពលរដ្ឋមិនអាចធ្វើដំណើរបាន ក៏នាំគ្នាសម្រុកចេញពីភ្នំពេញទៅខេត្ត ចេញពីខេត្តមកភ្នំពេញ ជាពិសេសតាមផ្លូវជាតិលេខ៣និងលេខ៤នេះ។
អ្នកស្រីនិយាយថា៖ «ដំបូង ព្រឹកឡើងអរណាស់ ឃើញចេញមកគេលែងបិទប៉ារ៉ាស់ នឹកស្មានថាអាចរកប្រាក់វិញបាន ដូចថាធូរចិត្តជាងនៅផ្ទះសុទ្ធ ដល់ពេលឥលូវរកអត់បានដដែល។ ព្រឹកមិញស្ទះល្មមទេ ខ្ញុំងើបពីព្រឹកទៅ ដល់ពេលរកមួយព្រឹកអត់មានម៉ូយជិះ ខ្ញុំក៏ត្រឡប់មកញ៉ាំបាយថ្ងៃម៉ោង១២ មកដល់ជាប់ជុចនៅហ្នឹងតែម្តង មកដល់ម៉ោង៤ល្ងាច និយាយទៅ [ស្ទះ] ៣ម៉ោងកន្លះ សាច់ស្ទះ បើនៅភ្នំពេញមិនអីទេ មកត្រឹមរង្វង់មូលចោមចៅហ្នឹង [ស្ទះ]ខ្លាំង»។
អភិបាលរងរដ្ឋបាលរាជធានីភ្នំពេញ លោក កើត ឆែ បានថ្លែងក្នុងសន្និសីទសារព័ត៌មានផ្សព្វផ្សាយស្តីពីការដាក់ចេញវិធានការរដ្ឋបាលសម្រាប់ភូមិសាស្ត្ររាជធានីភ្នំពេញ ដេីម្បីទប់ស្កាត់ការឆ្លងរាលដាលជំងឺកូវីដ-១៩ នៅព្រឹកនេះថា ដើមចមដែលនាំឱ្យរដ្ឋាភិបាលសម្រេចបើកការធ្វើចរាចរណ៍តំបន់លឿង ហើយបង្រួមតំបន់លឿងទុំ និងតំបន់ក្រហម ដោយសារក្រុមការងារជំនាញបានចុះស្រង់ស្ថិតិអ្នកដែលឆ្លងជំងឺកូវីដ-១៩ និងអ្នកពាក់ព័ន្ធផ្ទាល់ឬដោយប្រយោលបានច្បាស់លាស់ ខណៈអ្នកឆ្លងរាប់រយនាក់ក្នុងមួយថ្ងៃៗសុទ្ធតែចេញពីតំបន់ទាំងពីរនោះ មិនមែនចេញពីតំបន់លឿងនោះទេ។
ទោះជាបែបនេះក្តី លោកបានអំពាវនាវទៅពលរដ្ឋទាំងអស់ត្រូវពង្រឹងអនុវត្តវិធានការសុខាភិបាលឱ្យបានម៉ឺងម៉ាត់ ទើបរួមគ្នាទប់ស្កាត់ការឆ្លងរាលដាលនៃជំងឺកូវីដ-១៩ បានប្រសិទ្ធភាពខ្ពស់។
លោកអំពាវនាវដូច្នេះថា៖ «តំបន់លឿង បងប្អូនអាចប្រកបអាជីវកម្មបានទាំងអស់ ទី១ ភោជនីយដ្ឋានទាំងអស់ត្រូវបន្តលក់វេចខ្ចប់ដដែល បើកាលណាជុំគ្នា វាក្លាយទៅជាប្រភពចម្លងថ្មីទៀតហើយ។ ទី២ បម្រាមគោរចរនៅតែមាន ម៉ោង៨យប់ដល់ម៉ោង៥ភ្លឺ គឺបងប្អូនប្រជាពលរដ្ឋទាំងអស់ត្រូវតែចូលផ្ទះ ហើយអ្នកដែលមានភារកិច្ចធ្វើការពេលយប់ ត្រូវសុំលិខិតអនុញ្ញាត ត្រូវអនុលោមទៅតាមសេចក្តីសម្រេចរបស់រដ្ឋបាលរាជធានីភ្នំពេញ។ ពណ៌លឿងនេះ បងប្អូនប្រជាពលរដ្ឋចាំបាច់ទៅណាក៏ដោយ ៣កុំ ៣ការពារ របស់សម្តេចតេជោនាយករដ្ឋមន្ត្រី គឺមិនអាចភ្លេចបានឡើយ»។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ មានប្រសាសន៍គាំទ្រនឹងរដ្ឋាភិបាលដែលបើកដំណើរការតំបន់មួយចំនួនធំនៅក្នុងរាជធានីភ្នំពេញ និងក្រុងតាខ្មៅ ខេត្តកណ្តាល រួមទាំងអនុញ្ញាតឱ្យពលរដ្ឋធ្វើដំណើរចេញចូលពីខេត្តមួយទៅខេត្តមួយ ដើម្បីឱ្យពលរដ្ឋមានឱកាសប្រកបមុខរបរ អាជីវកម្ម និងធ្វើការងាររកប្រាក់ទ្រទ្រង់ជីវភាពឡើងវិញ។
ប៉ុន្តែលោកអំពាវនាវទៅរដ្ឋាភិបាលនិងប្រជាពលរដ្ឋត្រូវពង្រឹងការអនុវត្តវិធានការសុខាភិបាល ដើម្បីរួមគ្នាទប់ស្កាត់កុំឱ្យមានការឆ្លងរាលដាលនៃជំងឺកូវីដ-១៩ បន្តទៀត។
លោកអំពាវនាវដូច្នេះថា៖ «ខ្ញុំគិតថា ទាំងពលរដ្ឋ ទាំងអាជ្ញាធររដ្ឋ ត្រូវពិនិត្យឱ្យបានមែនទែន ការពារសុវត្ថិភាព [៣ការពារ ៣កុំ] យោងតាមការណែនាំរបស់ក្រសួងសុខាភិបាល ដើម្បីកុំឱ្យមានការផ្ទុះកូវីដនេះខ្លាំងបន្ថែមទៀតសម្រាប់ប្រជាពលរដ្ឋ។»
កាលពីថ្ងៃម្សិលមិញ អភិបាលរាជធានីភ្នំពេញ លោក ឃួង ស្រេង បានឱ្យដឹងថា បើទោះជារដ្ឋាភិបាលនឹងបើកឱ្យធ្វើចរាចរណ៍ឡើងវិញពីតំបន់មួយទៅតំបន់មួយ ពីខេត្តមួយទៅខេត្តមួយ នៅថ្ងៃទី៦ ខែឧសភានេះ ប៉ុន្តែនៅរាជធានីភ្នំពេញ នៅតែរក្សាតំបន់៣ដដែល គឺតំបន់លឿង លឿងទុំ និងតំបន់ក្រហម ហើយត្រូវពង្រឹងឱ្យបានហ្មត់ចត់ទៅលើទីតាំងដែលបានកំណត់ ចៀសវាងការបន្តឆ្លងរីករាលដាលជំងឺកូវីដ-១៩ ទៅតំបន់ផ្សេងទៀត។
អភិបាលរូបនោះបញ្ជាក់ថា ចំពោះតំបន់លឿង និងលឿងទុំ នៅរក្សាការអនុវត្តវិធានការដដែល ប៉ុន្តែសម្រាប់តំបន់ក្រហម គឺជាតំបន់ដែលត្រូវបិទខ្ទប់ឱ្យបានម៉ឺងម៉ាត់បំផុត ប៉ុន្តែគ្រាន់តែបង្រួមការបិទខ្ទប់តំបន់ប្រឈមនោះឱ្យមកនៅទ្រង់ទ្រាយតូចជាងមុនតែប៉ុណ្ណោះ៕