សេដ្ឋកិច្ចវៀតណាមរងការប៉ះទង្គិចពីជំងឺកូវីដ១៩តិចបំផុតធៀបទៅនឹងប្រទេសដទៃក្នុងតំបន់អាស៊ាន ដោយសារមេដឹកនាំប្រទេសនេះ បានចាត់វិធានការបង្ការ និងទប់ស្កាត់ការចម្លងមេរោគបានទាន់ពេលល្អ។
តាមរបាយការណ៍ពីក្រសួងសុខាភិបាលវៀតណាម គិតត្រឹមថ្ងៃសុក្រនេះ ក្នុងចំណោមពលរដ្ឋវៀតណាមជិត ១រយលាននាក់ មានករណីឆ្លងតែជាង ៣រយ (៣៥២)ករណីប៉ុណ្ណោះ ត្រូវបានរកឃើញចាប់តាំងពីករណីដំបូងរាយការណ៍នៅចុងខែមករា។
ធនាគារអភិវឌ្ឍន៍អាស៊ី (ADB) ព្យាករថា សេដ្ឋកិច្ចវៀតណាមនៅតែមានកំណើនល្អក្នុងអំឡុងវិបត្តិសុខភាពសកលកើតចេញពីការឆ្លងរាតត្បាតនៃមេរោគកូវីដ១៩ ដែលបានឆ្លងដល់មនុស្សជាង ៩លាន ៥សែននាក់នៅជុំវិញពិភពលោក និងស្លាប់មនុស្សជិតកន្លះលាននាក់ក្នុងរយៈពេល ៦ខែដើមឆ្នាំ។
ធនាគារ ADB បានព្យាករនៅក្នុងរបាយការណ៍ចក្ខុវិស័យអភិវឌ្ឍន៍អាស៊ី ចេញផ្សាយនៅខែមិថុនាថា កំណើនសេដ្ឋកិច្ចវៀតណាមបានធ្លាក់ចុះពី ៧ភាគរយ នៅឆ្នាំ២០១៩ មកនៅជាង ៤ភាគរយ (៤.១) នៅឆ្នាំ២០២០ ខណៈមីយ៉ាន់ម៉ាប៉ះពាល់តិចបំផុតលំដាប់ទី២ ធ្លាក់ចុះពីជិត ៧ភាគរយ (៦.៨) មកជិត ២ភាគរយ (១.៨)។
ដោយឡែក សេដ្ឋកិច្ចថៃរងគ្រោះធ្ងន់ធ្ងរជាងគេ ដោយដាំក្បាលចុះពីជាង ២ភាគរយ (២,៤) ដល់ជាង -៦ភាគរយ (-៦.៥) បន្ទាប់មក សិង្ហបុរីធ្លាក់ពីជិត ១ភាគរយ (០.៧) ដល់ -៦ភាគរយ ឯកម្ពុជាធ្លាក់ចុះពីជាង ៧ភាគរយ (៧,១) ដល់ជាង -៥ភាគរយ (-៥,៥) ខណៈម៉ាឡេស៊ីធ្លាក់ចុះពីជាង ៤ភាគរយ (៤.៣) ដល់ -៤ភាគរយ ហ្វីលីពីនពី ៦ភាគរយ ដល់ជិត -៤ភាគរយ (៣.៨) ឥណ្ឌូនេស៊ីពី ៥ភាគរយ ដល់ -១ភាគរយ ឡាវពី ៥ភាគរយ ដល់ -០.៥ភាគរយ និងប្រ៊ុយណេធ្លាក់ចុះពីជិត ៤ភាគរយ (៣.៩) មកជាង ១ភាគរយ (១.៤)។
ប្រភពដដែលបញ្ជាក់ថា មូលហេតុដែលវៀតណាមប៉ះពាល់សេដ្ឋកិច្ចតិចបំផុត គឺដោយសាររដ្ឋាភិបាលប្រទេសនេះ បានចាត់វិធានការទប់ស្កាត់ការរីកសាយភាយរបស់មេរោគឆ្លងពីក្រៅប្រទេស និងក្នុងស្រុកទាន់ពេលវេលា ដោយចាប់ផ្តើមបើកឱ្យអាជីវកម្ម សេវាកម្ម និងសកម្មភាពសង្គមផ្សេងៗឡើងវិញនៅពាក់កណ្តាលខែមេសា បន្ទាប់ពីរឹតបន្តឹងចាប់ពីចុងខែមករា។
ការបន្ធូរការរឹតបន្តឹង ដើម្បីផ្តល់ដង្ហើមសេដ្ឋកិច្ចឡើងវិញនេះ ធ្វើឡើងខណៈប្រទេសក្នុងតំបន់អាស៊ានមួយចំនួន ដូចជា សិង្ហបុរី ឥណ្ឌូនេស៊ី និងថៃ ជាដើម កំពុងបង្កើនវិធានការទប់ស្កាត់ការរីករាលដាលនៃរលកចម្លងរបស់មេរោគក្នុងប្រទេសរបស់ខ្លួន។
បើតាម ADB ប្រទេសដែលពឹងផ្អែកខ្លាំងលើពាណិជ្ជកម្មនាំចេញ និងទេសចរណ៍ពីក្រៅប្រទេសមួយនេះ បានធ្លាក់កំណើនសេដ្ឋកិច្ចយ៉ាងគំហុក ក្រោមវិធានការបិទផ្ទប់ប្រទេស នាំឱ្យផលិតផលក្នុងស្រុកសរុប GDP ដែលមានកំណើនជិត ៧ភាគរយ នៅឆ្នាំ២០១៩ ធ្លាក់ចុះមកនៅត្រឹម ៤.៨ភាគរយ នៅ៦ខែដំបូង ឆ្នាំ២០២០។
យ៉ាងណា ក្រោមវិធានការសង្គ្រោះអាជីវកម្មរងផលប៉ះពាល់ដោយសារវិបត្តិជំងឺកូវីដ១៩ និងការជំរុញសកម្មភាពទេសចរណ៍ និងការចាយវាយរបស់ពលរដ្ឋ ដើម្បីបង្កើនតម្រូវការក្នុងស្រុករបស់រដ្ឋាភិបាលក្រុងហាណូយ ក្រោយស្ថានការណ៍ចម្លងរបស់មេរោគធូរស្បើយ បានជួយទប់ស្កាត់ការធ្លាក់ចុះនេះ។
ធនាគារប្រចាំតំបន់មួយនេះព្យាករទៀតថា សេដ្ឋកិច្ចវៀតណាមនឹងកើនខ្ពស់បំផុតក្នុងចំណោមប្រទេសអាស៊ានទាំង១០ នៅឆ្នាំ២០២១ ជាមួយកំណើន ៦.៨ភាគរយ។ កំណើននេះ ត្រូវបានរំពឹងថា ដោយសារការងើបឡើងវិញនូវលំហូរភ្ញៀវទេសចរពីប្រទេសចិន និងតម្រូវការទំនិញរបស់ប្រទេសនេះ។
តាមទិន្នន័យពីអង្គការសុខភាពពិភពលោក WHO គិតត្រឹមថ្ងៃសុក្រនេះ ករណីឆ្លងជំងឺកូវីដ១៩ សរុបនៅអាស៊ាន បានកើនដល់ជាង ១៣ម៉ឺនករណី (១៣៨ ៦៨៩) ក្នុងនោះ ស្លាប់មានជាង ៤ពាន់ករណី (៤០៤៦) និងជាសះស្បើយមានជាង ៧ម៉ឺនករណី (៧៧ ៧៨៨)។
ឥណ្ឌូនេស៊ី សិង្ហបុរី និងហ្វីលីពីន កំពុងបន្តកើនឡើងករណីឆ្លងថ្មីក្នុងអាត្រាខ្ពស់នៅឡើយ ខណៈម៉ាឡេស៊ី ថៃ និងមីយ៉ាន់ម៉ា ការចម្លងថ្មីធ្លាក់ចុះក្រោម ១០ករណី ឯវៀតណាម ប៊្រុយណេ កម្ពុជា និងឡាវ រកមិនករណីឆ្លងក្នុងស្រុកចាប់ពីខែមេសា និងឧសភា៕