មេដឹកនាំអាស៊ានយល់ព្រមរួមគ្នាដោះស្រាយបញ្ហាផលប៉ះពាល់សេដ្ឋកិច្ចពីជំងឺកូវីដ១៩ និងទប់ស្កាត់រលកចម្លងថ្មីនៃជំងឺនេះ ហើយនឹងចាប់ផ្តើមពិភាក្សាលក្ខខណ្ឌមូលនិធិរួមគ្នានៅថ្ងៃស្អែក ដើម្បីប្រើប្រាស់សម្រាប់ស្រាវជ្រាវផលិតឱសថ និងវ៉ាក់សាំង។
តាមប្រភពពីគេហទំព័រព័ត៌មានផ្លូវការរបស់រដ្ឋាភិបាលវៀតណាមឈ្មោះ Chinh Phu បានឱ្យដឹងថា នាយករដ្ឋមន្រ្តីវៀតណាម លោក ង្វៀន សួនហ្វុក (Nguyen Xuan Phuc) នឹងដឹកនាំកិច្ចប្រជុំកំពូលអាស៊ានលើកទី៣៦ នៅថ្ងៃទី២៦ ខែមិថុនា ដោយមានការចូលរួមពីមេដឹកនាំប្រទេសជាសមាជិកដទៃ។
តាមសេចក្តីប្រកាសលទ្ធផលកិច្ចប្រជុំថ្នាក់រដ្ឋមន្រ្ដីអាស៊ានក្រៅផ្លូវការនៅថ្ងៃម្សិលមិញ រដ្ឋមន្រ្តីការបរទេសអាស៊ាន ១០ប្រទេស យល់ព្រមថា អាស៊ានមានកម្លាំងចលកររួមមួយដែលអាចទប់ស្កាត់ជំងឺឆ្លង និងស្រោចស្រង់សេដ្ឋកិច្ច និងសង្គមពីវិបត្តិមេរោគឆ្លង។
កិច្ចប្រជុំនោះ ដឹកនាំដោយឧបនាយករដ្ឋមន្រ្តី និងមន្រ្តីការបរទេសវៀតណាម លោក ប៊ិញ មិញ (Binh Minh) តាមប្រព័ន្ធអនឡាញ ក្នុងឋានៈវៀតណាមជាប្រធានផ្លាស់វេនសម្រាប់ឆ្នាំនេះ។
រដ្ឋអាស៊ានទាំង១០ រួមមាន ឥណ្ឌូនេស៊ី ម៉ាឡេស៊ី ថៃ សិង្ហបុរី ហ្វីលីពីន វៀតណាម ប៊្រុយណេ មីយ៉ាន់ម៉ា ឡាវ និងកម្ពុជា។
តាមប្រភពដដែល តំណាងប្រទេសទាំងអស់យល់ព្រមថា៖ «អាស៊ានបានក្លាយជាកម្លាំងរួមមួយទប់ស្កាត់ជំងឺឆ្លង និងរក្សាស្ថិរភាពនយោបាយ-សង្គមក្នុងតំបន់ ហើយគាំទ្រលើការបោះជំហានថ្មីៗ ដើម្បីពង្រឹងកិច្ចការពារ និងគ្រប់គ្រងរលកចម្លងថ្មីនៃមេរោគ និងការអភិវឌ្ឍផែនការស្តារសេដ្ឋកិច្ច និងសង្គមក្រោយវិបត្តិជំងឺរាតត្បាតសកល។»
មន្រ្តីការទូតទាំងអស់ក៏យល់ព្រមផងដែរថា៖ «ក្នុងដំណើរការនេះ កិច្ចសន្ទនា និងកិច្ចសហប្រតិបត្តិការ នៅតែត្រូវការជាចាំបាច់»។
ក្នុងសេចក្តីប្រកាសព័ត៌មានបង្ហោះលើទំព័រ Facebook ក្រសួងការបរទេសកម្ពុជាថ្ងៃម្សិលមិញ ឱ្យដឹងបន្ថែមថា កិច្ចប្រជុំនេះដែរ ក៏បានពិភាក្សាលើការអនុម័តលើលក្ខខណ្ឌប្រតិបត្តិនៃមូលនិធិអាស៊ាន ដើម្បីឆ្លើយតបជំងឺកូវីដ១៩ ដែលបានយល់ព្រមបង្កើតឡើងក្នុងកិច្ចប្រជុំកាលពីពាក់កណ្តាលខែមេសា។
តាមការចុះផ្សាយពីក្រសួងព័ត៌មានកម្ពុជានៅថ្ងៃទី១៦ ខែមេសា មូលនិធិតំបន់នោះ នឹងប្រើដើម្បីដោះស្រាយកង្វះខាតសម្ភារវេជ្ជសាស្រ្ដ គាំទ្រលើការស្រាវជ្រាវ និងអភិវឌ្ឍន៍ឱសថ និងវ៉ាក់សាំងប្រឆាំងជំងឺកូវីដ១៩ ព្រមទាំងប្រើសម្រាប់វិធានការបន្ទាន់នាពេលអនាគត។
តាមរបាយការណ៍ព្យាករណ៍ពីធនាគារអភិវឌ្ឍន៍អាស៊ី ADB ចេញផ្សាយនៅថ្ងៃទី១៨ ខែមិថុនា ឱ្យដឹងថា វិបត្តិកូវីដ១៩ បានទាញទម្លាក់កំណើនសេដ្ឋកិច្ចតំបន់អាស៊ាន ពីជាង ៤ភាគរយ (៤.៤) នៅឆ្នាំ២០១៩ រហូតដល់ជិត -៣ភាគរយ (-២.៧) នៅឆ្នាំ២០២០។
តាមប្រភពដដែលឱ្យដឹងបន្ថែមថា សេដ្ឋកិច្ចថៃរងគ្រោះធ្ងន់ធ្ងរជាងគេក្នុងតំបន់ ដោយដាំក្បាលចុះពីជាង ២ភាគរយ (២,៤) នៅឆ្នាំ២០១៩ ដល់ជាង -៦ភាគរយ (-៦.៥) នៅឆ្នាំ២០២០ បន្ទាប់មក សិង្ហបុរីធ្លាក់ពីជិត ១ភាគរយ (០.៧) ដល់ -៦ភាគរយ និងកម្ពុជាធ្លាក់ចុះពីជាង ៧ភាគរយ (៧,១) ដល់ជាង -៥ភាគរយ (-៥,៥) ខណៈវៀតណាម រងផលប៉ះពាល់តិចជាងគេ ដោយធ្លាក់ពី ៧ភាគរយមកនៅជាង ៤ភាគរយ (៤,១)។
យ៉ាងណាក្តី ស្ថាប័នហិរញ្ញវត្ថុអន្តរជាតិមួយនេះ រំពឹងថា សេដ្ឋកិច្ចសហគមន៍តំបន់ដែលមានប្រជាជនជាង ៦រយលាននាក់នេះ នឹងស្ទុះងើបឡើងវិញនៅឆ្នាំ២០២១ ជាមួយកំណើនជាង ៥ភាគរយ។
គិតត្រឹមថ្ងៃព្រហស្បតិ៍នេះ ករណីឆ្លងកូវីដ១៩ សរុបនៅអាស៊ានបានកើនដល់ជាង ១៣ម៉ឺនករណីហើយ ក្នុងនោះ ស្លាប់មានជិត ៤ពាន់ករណី។ ឥណ្ឌូនេស៊ី ជាប្រទេសរងគ្រោះធ្ងន់ធ្ងរជាងគេ ដោយមានអ្នកឆ្លងជិត ៥ម៉ឺនករណី និងស្លាប់ជាង ២ពាន់ករណី បន្ទាប់មកគឺសិង្ហបុរី មានអ្នកឆ្លងជាង ៤ម៉ឺន ២ពាន់ករណី និងស្លាប់ ២៦នាក់។
ក្រោមការគំរាមកំហែងនៃជំងឺរាតត្បាតសកលនេះ ប្រទេសសមាជិកអាស៊ានទាំងអស់ បានបិទផ្ទប់ព្រំដែនប្រទេសរបស់ខ្លួនរៀងៗខ្លួន ដើម្បីទប់ស្កាត់ការរីកសាយភាយមេរោគចូលប្រទេសខ្លួន៕