វៀតណាមត្រូវបានមជ្ឈដ្ឋានអន្តរជាតិ រួមទាំងអង្គការសុខភាពពិភពលោក កោតសរសើរពីចំណាត់ការរបស់រដ្ឋាភិបាលនៃប្រទេសនេះ ក្នុងការទប់ស្កាត់ និងប្រយុទ្ធប្រឆាំងការរាតត្បាតរបស់មេរោគកូវីដ១៩ ដែលគួរតែបណ្តាប្រទេសក្រីក្រ ឬកំពុងអភិវឌ្ឍន៍យកគំរូតាម។
ប្រទេសអាស៊ានមួយនេះ ថ្វីត្បិតតែមានព្រំដែនគោកជាប់នឹងប្រទេសចិនដែលជាប្រភពចាប់ផ្តើមនៃការផ្ទុះការរាតត្បាត ប្រវែង១១០០គីឡូម៉ែត្រ និងមានប្រជាជនជិត ១០០លាននាក់ក្តី ប៉ុន្តែ ករណីឆ្លងក្នុងប្រទេសគិតត្រឹមថ្ងៃច័ន្ទ គឺមានត្រឹមជាង ១៩០ករណីប៉ុណ្ណោះ។
តួលេខនេះ ខុសគ្នាឆ្ងាយស្រឡះពីបណ្តាប្រទេសនៅអឺរ៉ុប និងអាមេរិក ដែលឃ្លាតឆ្ងាយពីចិនរាប់ពាន់គីឡូម៉ែត្រ ហើយជាប្រទេសជឿនលឿន តែកំពុងរងការឆ្លងរាតត្បាតពីមេរោគនេះយ៉ាងខ្លាំងក្លាទៅវិញ។
នាយករដ្ឋមន្ត្រីវៀតណាម លោក Nguyen Xuan Phuc បានប្រកាសក្នុងកិច្ចប្រជុំគណបក្សកម្មុយនីស្តវៀតណាម កាលពីថ្ងៃទី៣០ ខែមករា ពីហានិភ័យនៃការឆ្លងរាលដាលរបស់មេរោគពីប្រទេសចិនមកក្នុងប្រទេសខ្លួនក្នុងពេលដ៏ខ្លីខាងមុខ ហើយប្រកាសត្រៀមខ្លួនធ្វើសង្គ្រាមប្រយុទ្ធប្រឆាំង។
ចាប់តាំងពីពេលនោះមក អាជ្ញាធរវៀតណាមបានផ្តោតលើវិធានការដាក់នៅដាច់ដោយឡែក ហើយតាមដានអ្នកពាក់ព័ន្ធទាំងអស់ ដោយចាប់ពីអ្នកប៉ះពាល់ផ្ទាល់ និងដោយប្រយោល ជាជាងការតេស្តរកករណីឆ្លងលើមហាជនក្នុងទ្រង់ទ្រាយធំដូចប្រទេសកូរ៉េខាងត្បូង និងចិន ខណៈធនធានហិរញ្ញវត្ថុ និងវេជ្ជសាស្រ្តរបស់ប្រទេសនៅមានកម្រិត។
មន្រ្តីជាន់ខ្ពស់នៃមជ្ឈមណ្ឌលប្រតិបត្តិការអាសន្នវៀតណាម លោក Tran Dac Phu លើកឡើងថា វៀតណាមមិនអាចធ្វើតាមកូរ៉េខាងត្បូង ឬចិនបានទេ ប៉ុន្តែ វៀតណាមអាចតាមស្វែងរកអ្នកដែលបានប៉ះផ្ទាល់ជាមួយអ្នកជំងឺ និងអ្នកទើបត្រឡប់ពីតំបន់ផ្ទុះការចម្លងឱ្យអស់ ហើយធ្វើតេស្តរកករណីវិជ្ជមានលើពួកគេ ដោយលោកថា នេះជាកិច្ចការសំខាន់ចាំបាច់ត្រូវធ្វើចំពោះមុខ។
កាលពីថ្ងៃទី១៣ ខែកុម្ភៈ អាជ្ញាធរវៀតណាមបានប្រកាសបិទឃុំមួយឈ្មោះ Son Loi មានមនុស្សរស់នៅប្រមាណ ១ម៉ឺននាក់ រយៈពេល ២០ថ្ងៃ បន្ទាប់ពីរកឃើញករណីឆ្លង ៦ករណី លើកម្មករ ៨នាក់ដែលទើបត្រឡប់ពីក្រុងវូហាន ហើយស្វែងរកអ្នកប៉ះផ្ទាល់ និងប្រយោលជិត ៤០០នាក់ដើម្បីធ្វើតេស្ត និងត្រៀមគ្រែពេទ្យ ៥០០ សម្រាប់ដាក់ពួកគេ។
កាលពីពេលថ្មីៗនេះ វៀតណាមបានប្រកាសលុបចោលជើងហោះហើរមកពីក្រៅប្រទេសទាំងអស់ និងបិទព្រំដែនជាមួយប្រទេសជិតខាង ហើយតម្រូវឱ្យពលរដ្ឋខ្លួនដែលត្រឡប់ចូលប្រទេសត្រូវនៅដាច់ដោយឡែករយៈពេល ១៤ថ្ងៃ តាមព្រំដែន ក្រោមការផ្គត់ផ្គង់ការស្នាក់នៅ និងអាហារ។
នៅថ្ងៃម្សិលមិញ នាយករដ្ឋមន្រ្តីវៀតណាម បានប្រកាសឱ្យត្រូវតាមស្វែងរកមនុស្ស ៤ម៉ឺននាក់ដែលបានទៅមន្ទីរពេទ្យ Bach Mai ក្នុងក្រុងហាណូយ ចាប់ពីថ្ងៃ១២ ខែមីនា ឱ្យដាក់ខ្លួនឯងដាច់ដោយឡែក និងមកតេស្តរកមេរោគ ហើយពង្រឹងសមត្ថភាព និងវិធីធ្វើរោគវិនិច្ឆ័យ ព្រមទាំងបង្កើនការការពារលើបុគ្គលិកពេទ្យ និងគ្រូពេទ្យគ្រប់កម្រិត។ បទបញ្ជានេះ ធ្វើឡើងក្រោយផ្ទុះករណីឆ្លងថ្មី ១៦ករណីលើអ្នកដែលបានទៅមន្ទីរពេទ្យនោះ ក្នុងនោះមានគ្រូពេទ្យមើលថែអ្នកជំងឺ ២នាក់ និងបុគ្គលិកយកអាហារ ៥នាក់។
ប្រធានអង្គការសុខភាពពិភពលោក លោក Tedros Adhanom Ghebreyesus ធ្លាប់បានលើកសរសើររដ្ឋាភិបាលវៀតណាមកាលពីដើមមីនាថា បានចាត់វិធានការទប់ស្កាត់ការរីករាលដាលរបស់មេរោគក្នុងប្រទេសរបស់ខ្លួនបានទាន់ពេលវេលា និងមានប្រសិទ្ធភាព ជាពិសេស លើឆន្ទៈនយោបាយថ្នាក់ដឹកនាំ ការចូលរួមពីមន្រ្តីមូលដ្ឋាន និងប្រជាជនតាមតំបន់។
ប្រធានអង្គការដដែលបានជំរុញឱ្យប្រទេសនានាប្រញាប់ចាត់វិធានការបង្កើនការតេស្តរកករណីឆ្លងថ្មីៗ និងអ្នកជាប់សង្ស័យឱ្យអស់ ហើយឱ្យពួកគេនៅដោយឡែក បន្ថែមពីលើវិធានការបិទប្រទេស ឬតំបន់ផ្ទុះជំងឺ ដែលលោកថា បានត្រឹមតែពន្យឺតការចម្លង មិនអាចបញ្ឈប់មេរោគរាតត្បាតបានទាំងស្រុងឡើយ។
គិតត្រឹមថ្ងៃចន្ទនេះ ករណីឆ្លងមេរោគកូវីដ១៩ នៅលើពិភពលោកបានកើនដល់ជាង ៦សែនករណីហើយ ហើយក្នុងនោះ តួលេខស្លាប់បានកើនដល់ជាង ៣ម៉ឺន ៤ពាន់នាក់ ហើយប្រទេសក្នុងតំបន់អឺរ៉ុប និងអាមេរិកកំពុងរងការរាតត្បាតខ្លាំងជាងគេ ដោយសារតែរដ្ឋាភិបាលនៃប្រទេសទាំងនោះ ត្រូវបានគេមើលឃើញថា មានភាពយឺតយ៉ាវក្នុងការចាត់វិធានការទប់ស្កាត់ការរីករាលដាលរបស់មេរោគ៕
