អាជ្ញាធរវៀតណាមសម្រេចបិទឃុំ Son Loi ក្បែរក្រុងហាណូយរយៈពេល២០ថ្ងៃ បន្ទាប់ពីខ្លួនរកឃើញផ្ទុះករណីឆ្លងមេរោគកូរ៉ូណាថ្មី Covid-19 កាលពីថ្ងៃម្សិលមិញ។
បើតាមអាជ្ញាធរខេត្ត ឃុំនេះមានពលរដ្ឋរស់នៅជាង១ម៉ឺននាក់ ស្ថិតនៅខេត្ត Vinh Phuc ចម្ងាយ៤០គីឡូម៉ែត្រ ពីរដ្ឋធានីហាណូយ ប្រទេសវៀតណាម។
គិតចាប់តាំងពីចុងខែធ្នូ ឆ្នាំ២០១៩មក នេះគឺជាលើកទីមួយហើយដែលមានការបិទតំបន់ក្នុងទ្រង់ទ្រាយធំឋិតនៅក្រៅទឹកដីប្រទេសចិន ដើម្បីទប់ស្កាត់ការរាលដាលមេរោគឆ្លង។ អាជ្ញាធរតំបន់ប្រាប់សារព័ត៌មានក្នុងស្រុកថា សមត្ថកិច្ចបានដាក់ប៉ារាស់បិទផ្លូវចេញចូលភូមិចំនួន៦ ក្នុងឃុំ Son Loi ហាមមិនឱ្យពលរដ្ឋចាកចេញ ក្រោយកម្មករ៦នាក់ ក្នុងចំណោម៨នាក់ ដែលធ្លាប់ទៅក្រុងវូហានកាលពីខែវិច្ឆិកា មានផ្ទុកមេរោគ Covid-19។
ក្រសួងសុខាភិបាលវៀតណាមថ្លែងប្រាប់សារព័ត៌មាន Vietnam Express នៅថ្ងៃម្សិលមិញ ថាកម្មករទាំង៨នាក់នោះ ត្រូវបានថៅកែបញ្ជូនពួកគេទៅក្រុងវូហានកាលពីខែវិច្ឆិកា ដើម្បីចូលរួមវគ្គបណ្តុះបណ្តាលមួយ មុនពេលពួកគេត្រឡប់មកស្រុកវិញនៅថ្ងៃទី១៧ ខែមករា។
តាមប្រភពដដែល សាច់ញាតិរបស់កម្មករឈ្មោះ Nguyen Thi Du ៥នាក់ រួមមានឪពុក ម្តាយ ប្អូនស្រី ជីដូនមួយ និងក្មួយអាយុ៣ខែម្នាក់ រួមទាំងអ្នកជិតខាងម្នាក់ទៀតរបស់នាង ត្រូវបានរកឃើញជាបន្តបន្ទាប់ថា បានឆ្លងមេរោគ។ ករណីនេះ ត្រូវគេជឿថា ឆ្លងមកពី Thi Du។
ដោយឡែក តាមមន្រ្តីសុខាភិបាល ពលរដ្ឋក្នុងឃុំ៣៧៣នាក់ ដែលធ្លាប់ប៉ះផ្ទាល់ជាមួយអ្នកជំងឺ ត្រូវបានដាក់ឱ្យឋិតនៅដាច់ដោយឡែក ក្នុងនោះ១០៤នាក់រកឃើញលទ្ធផលអវិជ្ជមាន ឯ២៥៨នាក់នៅសល់កំពុងឋិតក្រោមការដាននៅមន្ទីរពេទ្យបង្អែក។
ប្រភពដដែលបញ្ជាក់ថា មន្ទីរពេទ្យខេត្តក៏បានត្រៀមគ្រែចំនួន៥០០រយ នៅក្បែរមូលដ្ឋានឃុំ២ ទីតាំងសម្រាប់បម្រុងទុក ប្រសិនបើមានករណីផ្ទុះការរាតត្បាតធ្ងន់ធ្ងរ។
បើតាមតួលេខចុងក្រោយ វៀតណាមរកឃើញអ្នកឆ្លងមេរោគ Covid-19 ចំនួន១៦ករណី ក្នុងនោះ ១១ករណី រកឃើញនៅខេត្ត Vinh Phuc ហើយ៥ករណីទៀតត្រូវបានរកឃើញនៅក្រុងហូជីមីញ ៣ករណី នៅខេត្ត Khanh Hoa ១ករណី និងនៅក្រុង Thanh Hoa ១ករណី។
ចាប់ពីអង្គការសុខភាពពិភពលោកប្រកាសដាក់ពិភពលោកក្នុងភាពអាសន្ននៃការគំរាមកំហែងមេរោគឆ្លងថ្មីនៅចុងខែមករាមក រដ្ឋាភិបាលក្រុងហាណូយបានផ្អាកជើងហោះហើរមកពីខេត្តហ៊ើប៉ី ហើយបិទព្រំដែនជាមួយប្រទេសចិន ដើម្បីបង្ការការរីករាល។
គិតត្រឹមព្រឹកថ្ងៃទី១៤ ខែកុម្ភៈនេះ អ្នកស្លាប់ដោយមេរោគ Covid-19 បានកើនដល់១ ៤៩១នាក់ និង៦៤ ៤១៣នាក់ ត្រូវបានរកឃើញឆ្លង និងបានជាសះស្បើយ ៧០៦៣នាក់។ នេះបើយោងតាមតួលេខដែលសកលវិទ្យាល័យ Jonh Hopkins ប្រមូលបាននៅរសៀលម៉ោង២ និង៤៨នាទីថ្ងៃនេះ៕
