មេធាវីការពារក្ដីឱ្យកុមារា កាក់ សុវណ្ណច្ឆ័យ ដែលជាកូនរបស់អតីតមន្ត្រីគណបក្សសង្រ្គោះជាតិ ស្នើតុលាការដោះលែងកូនក្តីរបស់ខ្លួនឱ្យបានក្រៅឃុំបណ្តោះអាសន្ន ដោយថា កុមាររូបនេះមានជំងឺអូទីហ្សឹម ឬមានស្មារតីមិនប្រក្រតីពីកំណើត និងមិនបានប្រព្រឹត្តដូចការចោទប្រកាន់។
ការស្នើនេះធ្វើឡើងបន្ទាប់ពីចៅក្រមសាលាដំបូងរាជធានីភ្នំពេញ កាលពីម្សិលមិញ បានសាកសួរកុមារ កាក់ សុវណ្ណច្ឆ័យ ក្រោមបទចោទប្រកាន់ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងបទចោទ «ជេរប្រមាថអ្នករាជការសាធារណៈ» ក្រោយពីសមត្ថកិច្ចបានបញ្ជូនកុមាររូបនេះទៅឃុំខ្លួននៅពន្ធនាគារព្រៃស (ម២) កាលពីថ្ងៃទី២៥ ខែមិថុនា។
មេធាវីការពារក្តីឱ្យកុមារា កាក់ សុវណ្ណច្ឆ័យ គឺលោក សំ សុគង់ ប្រាប់ វីអូឌី កាលពីថ្ងៃម្សិលមិញថា ចៅក្រមស៊ើបសួរ លោក សាន ប៊ុនធឿន បានចោទសួរកូនក្ដីរបស់លោកពាក់ព័ន្ធនឹងសារជាសំឡេងរវាងកុមារា កាក់ សុវណ្ណច្ឆ័យ ជាមួយមនុស្សមិនស្គាល់អត្តសញ្ញាណ ដែលជជែកគ្នាក្នុងបណ្ដាញសង្គមតេឡេក្រាម ដោយបានប្រើពាក្យសម្ដីអសុរោះប៉ះពាល់ថ្នាក់ដឹកនាំ។
មេធាវីរូបនេះបន្តថា កូនក្ដីរបស់លោកមានអាយុទើបតែ១៦ឆ្នាំ និងមានបញ្ហាខ្សោយសតិបញ្ញា ទើបគាត់មិនអាចគ្រប់គ្រងអារម្មណ៍ និងនិយាយស្ដីដោយប្រើពាក្យមិនសមរម្យ។
លើសពីនេះ លោកមេធាវី សំ សុគង់ ថាការសាកសួររបស់ចៅក្រមទៅកាន់កូនក្ដីរបស់លោក ហាក់មិនត្រឹមត្រូវតាមនីតិវិធីច្បាប់នោះទេ ដោយសារសំណួរខ្លះ កូនក្តីមិនសូវយល់និងមិនសូវចេះឆ្លើយ ខណៈ កាក់ សុវណ្ណច្ឆ័យ មានវ័យក្មេងនិងកំពុងមានជំងឺអូទីហ្សឹមតាំងពីកំណើតទៀតផង។
លោកថា៖ «បើយើងនិយាយពីលទ្ធផល ហាក់មិនសូវត្រឹមត្រូវតាមនីតិវីធីច្បាប់នៅឡើយ ដោយសារកូនក្ដីគឺជាកុមារ ហើយមានអាយុ១៦ឆ្នាំ។ ហើយប្រវត្តិជំងឺរបស់គាត់ គឺមានជំងឺអូទីហ្សឹម ហើយគាត់ក្ដាប់នូវសំណួរ ក៏ដូចជាការឆ្លើយរបស់គាត់ គឺមានការលំបាក! ហើយការឆ្លើយរបស់គាត់ហាក់ដូចមិនបានធ្វើ គឺគាត់ឆ្លើយទៅតាមអ្វីដែលគេសួរ។ អ៊ីចឹងទៅ វាធ្វើឱ្យប៉ះពាល់សិទ្ធិ ហើយឆ្លើយទៅដូចចង់ដាក់បន្ទុកលើខ្លួនឯង តាមពិតខ្លួនមិនបានធ្វើដូចការចោទប្រកាន់ទេ»។
បញ្ហានេះ លោក សំ សុគង់ ស្នើទៅតុលាការឱ្យចាត់គ្រូពេទ្យជំនាញពិនិត្យនិងវាយតម្លៃទៅលើសតិបញ្ញារបស់កុមារា កាក់ សុវណ្ណច្ឆ័យ និងដោះលែងឱ្យកូនក្ដីរបស់លោករូបនេះបាននៅក្រៅឃុំបណ្ដោះអាសន្ន ដើម្បីជួបជុំគ្រួសារវិញ។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ សុំមិនអត្ថាធិប្បាយលម្អិតលើបញ្ហានេះឡើយ ដោយសារលោកមិនទាន់ទទួលបានព័ត៌មាននេះទេ។
ក្មេងប្រុស កាក់ សុវណ្ណច្ឆ័យ គឺជាកូនបង្កើតរបស់អតីតមន្ត្រីគណបក្សសង្គ្រោះជាតិ លោក កាក់ កុម្ភារ ដែលបច្ចុប្បន្ន លោកក៏កំពុងជាប់ឃុំនៅពន្ធនាគារព្រៃស។
អ្នកនាំពាក្យក្រសួងយុត្តិធម៌ លោក ជិន ម៉ាលីន ចាត់ទុកការលើកឡើងរបស់មេធាវីការពារក្ដីថាគ្មានអ្វីចម្លែកឡើយ ដើម្បីការពារកូនក្ដីឱ្យរួចផុតពីបទចោទប្រកាន់របស់តុលាការ ប៉ុន្តែការសម្រេចបែបណានោះអាស្រ័យទៅលើតុលាការ។
លោកថា៖ «មេធាវីគាត់តែងលើកឡើងហើយ គ្រប់រឿងក្ដីទាំងអស់ថា កូនក្ដីគាត់មានស្មារតីមិនល្អជាដើម ដើម្បីរួចផុតពីការចោទប្រកាន់ ប៉ុន្តែតុលាការគេមិនមែនចេះតែជឿលើការលើកឡើងរបស់មេធាវីទេ គេមើលទៅលើសកម្មភាពជនជាប់ចោទ គេមើលទៅការប្រព្រឹត្តល្មើសជនជាប់ចោទ តើការប្រព្រឹត្តហ្នឹងដោយស្មារតីមិនប្រក្រតីឬយ៉ាងម៉េច»។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព សង្កេតឃើញថា ជាទូទៅ សកម្មជននយោបាយនិងសិទ្ធិមនុស្ស តែងតែត្រូវបានតុលាការឃុំខ្លួនបណ្ដោះអាសន្ននៅពន្ធនាគារ បើទោះបីជាកន្លងមក សង្គមស៊ីវិលបានស្នើទៅតុលាការឱ្យយកការឃុំខ្លួនបណ្តោះអាសន្ននេះជាជម្រើសចុងក្រោយក៏ដោយ។ លោកស្រីទទូចឱ្យតុលាការពិចារណាចំពោះការស្នើសុំរបស់មេធាវីការពារក្តីឱ្យកុមារ កាក់ សុវណ្ណច្ឆ័យ នេះ។
លោកស្រីថា៖ «អ៊ីចឹងកន្លែងនេះ តុលាការលោកគួរតែពិនិត្យមើលឡើងវិញ មិនមែនតែចំពោះករណីកុមារទេ ប៉ុន្តែចំពោះកុមារនេះ តុលាការគួរតែយកចិត្តទុកដាក់បន្ថែមទៀត។ ហើយចំពោះគាត់មានសតិស្មារតី[មិនប្រក្រតី] ដែលតុលាការគួរតែធ្វើការពិនិត្យ ចាំបាច់បំផុតដែលតុលាការត្រូវតែធ្វើ ដើម្បីធានាសិទ្ធិទទួលបានការជំនុំជម្រះដោយយុត្តិធម៌ ហើយផលប្រយោជន៍តុលាការគួរតែត្រូវបានការពារ»។
កុមារ កាក់ សុវណ្ណច្ឆ័យ ធ្លាប់ត្រូវបានសមត្ថកិច្ចរាជធានីភ្នំពេញចាប់ខ្លួនម្តងរួចមកហើយកាលពីខែតុលា ឆ្នាំ២០២០ ពីបទ «ចូលទីស្នាក់ការអតីតគណបក្សសង្គ្រោះជាតិ» នៅសង្កាត់ចាក់អង្រែលើ រាជធានីភ្នំពេញ ដោយបំពានលើបម្រាមតុលាការ។ ប៉ុន្តែកុមាររូបនោះត្រូវបានសមត្ថកិច្ចដោះលែងវិញ ក្រោយសាកសួរអស់រយៈពេល៤៨ម៉ោង។
ក្រោយពីសមត្ថកិច្ចដោះលែងរួច ប៉ុន្មានខែក្រោយមក កុមារ កាក់ សុវណ្ណច្ឆ័យ ត្រូវបានជនមិនស្គាល់មុខលួចវាយពីក្រោយ បណ្តាលឱ្យបែកក្បាយដេរ២០ថ្នេរ ប៉ុន្តែជាច្រើនខែមកនេះ សមត្ថកិច្ចនៅមិនទាន់រកឃើញជនដៃដល់ ដើម្បីយកមកផ្តន្ទាទោសនៅឡើយទ៕