សាច់ញាតិអតីតមន្រ្តីនិងសកម្មជនអតីតគណបក្សសង្រ្គោះជាតិ បន្តបារម្ភពីសុវត្ថិភាពផ្ទាល់ខ្លួននិងគ្រួសារ និងមិនរំពឹងបានទទួលយុត្តិធម៌ ខណៈជនដៃដល់នៅមិនទាន់វែកមុខយកទៅផ្តន្ទាទោសតាមច្បាប់នៅឡើយ តែមន្ត្រីសមត្ថកិច្ចថាកំពុងស្រាវជ្រាវលើករណីទាំងនោះ។
កាលពីថ្ងៃទី២៧ ខែមេសា ឆ្នាំ២០២១ កូនប្រុសរបស់លោក កាក់ កុម្ភារ អតីតមន្រ្តីបក្សប្រឆាំងដែលកំពុងជាប់ឃុំនៅពន្ធនាគារ គឺយុវជន កាក់ សុវណ្ណច្ឆ័យ វ័យ១៥ឆ្នាំ ត្រូវជនមិនស្គាល់មុខជិះម៉ូតូយកដុំឥដ្ឋគប់លើបណ្តាលឱ្យរងរបួសក្បាល ពេលកំពុងជិះម៉ូតូដឹកម្តាយត្រឡប់ពីទិញដំឡូងក្បែរផ្ទះ ក្នុងសង្កាត់បឹងទំពុនទី១ ខណ្ឌមានជ័យ រាជធានីភ្នំពេញ។
អ្នកស្រី ព្រុំ ចាន់ថា ដែលជាម្តាយជនរងគ្រោះ ចាត់ទុកការប្រើហិង្សានេះថាជារឿងនយោបាយ ហើយអ្នកស្រីអំពាវនាវដល់សាច់ញាតិអតីតសកម្មជននិងមន្រ្តីអតីតបក្សប្រឆាំងទាំងអស់ ឱ្យបង្កើនការប្រុងប្រយ័ត្នពីសុវត្ថិភាពរបស់ខ្លួន។ សកម្មជនស្រ្តីថ្ងៃសុក្ររូបនេះ ប្រាប់ វីអូឌី នៅថ្ងៃអង្គារថា ជនដៃដល់អាចលបវាយពួកគេគ្រប់ពេលនិងគ្រប់កាលៈទេសៈ ហើយសមត្ថកិច្ចនឹងមិនអាចស្រាវជ្រាវរកជនទាំងនោះឃើញទេ។
អ្នកស្រី ចាន់ថា និយាយថា៖ «សូមឱ្យបងៗប្រយ័ត្នប្រយែងអ្នកដទៃៗ ទៅណាមកណាពាក់មួកការពារឱ្យបានជាប់លាប់ ទោះជាទៅណាមួយជំហាន ក៏ត្រូវពាក់មួកការពារដែរ ឱ្យតែចេញក្រៅផ្ទះ។ កុំប្រហែសឱ្យសោះ ហើយមុននឹងចេញ ត្រូវមើលឆ្វេងមើលស្តាំសិន ព្រោះការធ្វេសប្រហែសរបស់ខ្ញុំហ្នឹងហើយ ព្រោះខ្ញុំគិតថាវាស្ងាត់ ខ្ទប់ជាប់ហ្នឹង បានជាខ្ញុំប្រហែសអត់បានពាក់មួកការពារ»។
បន្ទាប់ពីដាក់ពាក្យបណ្តឹងក្រោយពេលកើតហេតុ អ្នកស្រីថា មិនទាន់មានសមត្ថកិច្ចណាមកសួរនាំឱ្យទៅបំភ្លឺនៅឡើយ ខណៈសមត្ថកិច្ចមូលដ្ឋានថា ករណីកូនរបស់គាត់ពិបាករកមុខសញ្ញាជនល្មើស ដោយសារកាមេរ៉ាសុវត្ថិភាពបំពាក់តាមផ្ទះ ក្បែរចំណុចកើតហេតុ ចាប់តម្រុយមិនបាន។
នាយនគរបាលប៉ុស្តិ៍រដ្ឋបាលសង្កាត់បឹងទំពុនទី១ លោក ឈឹម ចំរើន មានប្រសាសន៍កាលពីថ្ងៃម្សិលមិញថា លោកបានបញ្ជូនពាក្យបណ្តឹងរបស់ជនរងគ្រោះនិងសំណុំរឿងនេះទៅអធិការដ្ឋានខណ្ឌ ដើម្បីស៊ើបអង្កេតបន្តហើយ បន្ទាប់ពីការស៊ើបបឋមរួចក្នុងរយៈពេល១សប្តាហ៍កន្លងមក។
វីអូឌី មិនអាចទាក់ទងសាកសួរជុំវិញការស៊ើបអង្កេតបន្តលើករណីជនរងគ្រោះឈ្មោះ កាក់ សុវណ្ណច្ឆ័យ ពីអធិការខណ្ឌមានជ័យ លោក ម៉េង វិមានតារា បានទេ។
អ្នកនាង ហេង បូរី កូនស្រីរបស់លោក ហេង ចាន់ សុធី អតីតមន្ត្រីគណបក្សសង្គ្រោះជាតិមួយរូបទៀតដែលកំពុងឃុំខ្លួននៅពន្ធនាគារ លើកឡើងថា អ្នកនាងមិនទាន់ទទួលបានព័ត៌មានពីតម្រុយជនសង្ស័យដែលបានវាយឪពុករបស់គាត់ឱ្យរងរបួសក្បាលកាលពីចុងឆ្នាំ២០១៩ ពីសមត្ថកិច្ចនៅឡើយ បើទោះជានៅក្បែរកន្លែងកើតហេតុនិងតាមដងផ្លូវមានបំពាក់កាមេរ៉ាសុវត្ថិភាពក៏ដោយ។
ប្រភពដដែលបន្ថែមថា ខ្លួនអស់ជំនឿលើសមត្ថកិច្ចក្នុងការស្វែងរកយុត្តិធម៌ជូនគ្រួសារ ដោយសារអ្នកនាងចាត់ទុកថា រឿងនោះជាករណីហិង្សាគំរាមកំហែងផ្នែកនយោបាយ ដោយសារឪពុករបស់អ្នកនាងនៅតែផ្ទះមើលថែចៅ មិនធ្លាប់មានជម្លោះជាមួយអ្នកដទៃឡើយ។
អ្នកនាង បូរី និយាយថា៖ «ខ្ញុំមានការបារម្ភខ្លាំងពីបញ្ហាហ្នឹង ខ្លាចវាកើតឡើងម្តងហើយម្តងទៀត អ៊ីចឹងវាអាចប៉ះពាល់ដល់សុវត្ថិភាពក្រុមគ្រួសារខ្ញុំទាំងអស់គ្នា។ […] មុនខ្ញុំចេញទៅណាទៅណី ខ្ញុំតែងតែប្រយ័ត្នប្រយែង ព្រោះខ្ញុំបារម្ភខ្លាចយើងអាចមានហានិភ័យគ្រប់ពេល។ ណាមួយឥលូវវាស្របពេលគេចាប់ឪពុកខ្ញុំទៀត ខ្ញុំកាន់តែមានការបារម្ភហើយ»។
អតីតប្រធានកងអង្គរក្សរបស់លោក សម រង្ស៊ី ប្រធានអតីតគណបក្សសង្គ្រោះជាតិ ដែលត្រូវជនមិនស្គាល់អត្តសញ្ញាណលបវាយឱ្យរងរបួសក្បាល កាលពីខែកញ្ញា ឆ្នាំ២០១៩ និងកំពុងឋិតនៅក្រៅឃុំក្រោមបណ្តឹងតុលាការ មិនរំពឹងថាលោកនឹងទទួលបានយុត្តិធម៌នោះទេ ព្រោះសូម្បីករណីស្រដៀងគ្នានឹងលោក ដែលកើតលើអតីតចៅសង្កាត់កោះដាច់ នៃអតីតគណបក្សសង្គ្រោះជាតិ ដែលមានកាមេរ៉ាថតជាប់ជនដៃដល់ ក៏សមត្ថកិច្ចនៅមិនទាន់រកឃើញជនសង្ស័យនៅឡើយ។
លោក ពួក ចិន្តា និយាយថា៖ «គ្មានទៅរកយុត្តិធម៌ឱ្យយើងទេ វាយតគ្នាតែរហូតដូចតែគ្នាហ្នឹង ឃើញទេ? វាយគ្រប់គ្នាអ៊ីចឹង គ្មានរកឃើញអាណាមួយទេ កុំទៅនេះនោះ […] ចេះតែប្រយ័ត្នៗខ្លួនឯងដែរហ្នឹង ស្ថានការអ៊ីចឹងយើងមាននេះឯណា គ្រាន់តែឥលូវយើងមានដែលទៅធ្វើស្អីឯណាផង»។
អ្នកនាំពាក្យស្នងការនគរបាលរាជធានីភ្នំពេញ លោក សាន សុខសីហា លើកឡើងថា សមត្ថកិច្ចតែងតែខិតខំបើកការស៊ើបអង្កេតនិងបន្តការស្រាវជ្រាវលើគ្រប់សំណុំរឿងដែលប្រជាពលរដ្ឋបានប្តឹង ដោយស្មើភាពគ្នានិងមិនមានការបែងចែកនិន្នាការនយោបាយឬពណ៌សម្បុរឡើយ។
អ្នកនាំពាក្យរូបនេះបន្ថែមថា ពលរដ្ឋត្រូវចូលរួមសហការគ្នាផ្តល់ព័ត៌មាននិងបំភ្លឺទៅសមត្ថកិច្ច ដោយការជឿទុកចិត្តគ្នា និងមិនគួរលាបពណ៌លើសមត្ថកិច្ចនោះទេ។ លោកថា ករណីហិង្សាលើពួកគេ អាចផ្តើមពីបញ្ហាផ្សេងៗ ដូចជា ទំនាស់បុគ្គល ឬបំណុល ជាដើម។
លោក សាន សុខសីហា មានប្រសាសន៍ថា៖ «យើងតែងតែប្រឹងប្រែងជានិច្ច មិនថាជាករណីអីឬករណីអីទេ! តែគ្រាន់តែថាករណីហ្នឹង យើងឈានទៅដល់ការសម្រេចបានជោគជ័យក្នុងពេលឆាប់រហ័សឬក៏យឺតយ៉ាវ វាតាមករណីជាក់ស្តែង ហើយតាមរបៀបរបបការស្រាវជ្រាវជាក់ស្តែង។ វាមិនអាចដូចអ្វីដែលគាត់គិតថា ដាក់ភ្លាមឃាត់បានភ្លាមទេ»។
អ្នកនាំពាក្យសមាគមការពារសិទ្ធិមនុស្សអាដហុក លោក សឹង សែនករុណា មើលឃើញថា ការបាត់ទំនុកចិត្ត និងចាត់ទុកករណីហិង្សាលើសាច់ញាតិអតីតសកម្មជននិងមន្រ្តីបក្សប្រឆាំងជាប់ពាក់ព័ន្ធរឿងនយោបាយ គឺដោយសារករណីទាំងនោះកើតឡើងស្រដៀងគ្នា ហើយមិនទាន់មានជនដៃដល់ឬអ្នកពាក់ព័ន្ធណាម្នាក់ត្រូវបានចាប់ខ្លួនមកផ្តន្ទាទោសនៅឡើយ។
បើតាមមន្រ្តីឃ្លាំមើលការរំលោភសិទ្ធិមនុស្សរូបនេះ ចាប់តាំងពីអតីតគណបក្សសង្រ្គោះជាតិ ត្រូវបានរំលាយដោយសាលក្រមតុលាការកំពូលក្នុងឆ្នាំ២០១៧មក អតីតមនុស្សស្និទ្ធជាមួយបក្សនេះនិងក្រុមគ្រួសាររបស់ពួកគេជិត៣០នាក់ហើយ ត្រូវបានរងគ្រោះដោយអំពើហិង្សាពីជនមិនស្គាល់អត្តសញ្ញាណ។
លោក សឹង សែនករុណា មានប្រសាសន៍ថា៖ «ដើម្បីកុំឱ្យមានបញ្ហា [ចោទប្រកាន់] ហ្នឹងកើតឡើង វាលុះត្រាតែសមត្ថកិច្ចហ្នឹងបានចាត់វិធានការទៅរកឃើញថា វាអត់មែនជារឿងនយោបាយទេ។ ហើយធ្វើការបំភ្លឺសាធារណជនថា រឿងនេះវាកើតឡើងដោយសារអី មូលហេតុអីអ៊ីចឹង! ហើយការបំភ្លឺហ្នឹងវាទាល់តែធ្វើឱ្យសាធារណជនហ្នឹងមានការជឿទុកចិត្តបានទៀត មិនមែនគ្រាន់តែជាធ្វើឱ្យតែបាន»៕
