មន្ត្រីនគរបាលរាជធានីភ្នំពេញ អះអាងថា សមត្ថកិច្ចបានសម្រេចដោះលែងវិញហើយនៅព្រឹកនេះនូវក្មេងប្រុសអាយុ ១៥ឆ្នាំដែលជាកូនរបស់សកម្មជនបក្សប្រឆាំងកំពុងជាប់ឃុំ បន្ទាប់ពីឃាត់ខ្លួនអស់រយៈពេល ៤៨ម៉ោង។
អ្នកនាំពាក្យស្នងការនគរបាលរាជធានីភ្នំពេញ លោក សាន សុខសីហា ប្រាប់វីអូឌីនៅថ្ងៃនេះថា សមត្ថកិច្ចគ្រាន់តែធ្វើការសាកសួរក្មេងប្រុស កាក់ សុវណ្ណច្ឆ័យ ពាក់ព័ន្ធនឹងការចូលទៅស្នាក់ការគណបក្សសង្គ្រោះជាតិដែលត្រូវបានហាមឃាត់តែប៉ុណ្ណោះ។
លោក សាន សុខសីហា ប្រាប់ថា៖ «ព្រឹកហ្នឹង សមត្ថកិច្ចធ្វើការដោះលែងវិញហើយ ព្រោះគេធ្វើការចាប់ខ្លួន ដើម្បីសួរនាំទេ។ សមត្ថកិច្ចចាប់ខ្លួនដោយសារគាត់ធ្វើការផ្លោះចូលក្នុងទីកន្លែងដែលតុលាការធ្វើការមហាឃាត់ កន្លែងទីស្នាក់ការចាស់ហ្នឹង ដល់អ៊ីចឹងយើងក៏ធ្វើការហៅសួរនាំក្រែងមានការបាត់បង់ ឬការខូចខាតអីនៅទីកន្លែងនោះ។ ដល់ពេលយើងឆែកទៅអត់មានបញ្ហាអី យើងក៏បានដោះលែងវិញ»។
ក្មេងប្រុសអាយុ ១៥ឆ្នាំរូបនេះ គឺជាកូនប្រុសរបស់លោក កាក់ កុម្ភារ អតីតសមាជិកជាប់ឆ្នោតនៃក្រុមប្រឹក្សារាជធានីភ្នំពេញរបស់គណបក្សសង្គ្រោះជាតិ មុនគណបក្សប្រឆាំងដ៏ធំមួយនេះត្រូវបានរំលាយចោលដោយតុលាការកំពូលកាលពីចុងឆ្នាំ២០១៧កន្លងមក។
អ្នកស្រី ព្រំ ចន្ថា ដែលជាម្តាយរបស់ក្មេងប្រុស កាក់ សុវណ្ណច្ឆ័យ ប្រាប់ថា សមត្ថកិច្ចបានដោះលែងកូនប្រុសគាត់នៅម៉ោង ៩កន្លះព្រឹកថ្ងៃនេះ ដោយថា សមត្ថកិច្ចមិនបានតម្រូវឲ្យធ្វើកិច្ចសន្យាអ្វីឡើយ។
អ្នកស្រី ព្រំ ចន្ថា ប្រាប់ថា៖ «គេដោះលែងកូនគាត់វិញហើយ គេមិនបានឱ្យធ្វើកិច្ចសន្យាអ្វីទេ»។
ប៉ុន្តែ ការដោះលែងនេះ បន្ទាប់ពីក្មេងប្រុស កាក់ សុវណ្ណច្ឆ័យ បានធ្វើកិច្ចសន្យាជាមួយសមត្ចកិច្ចកាលពីថ្ងៃទី៣ ខែតុលា ឆ្នាំ២០២០ ដោយឈប់លួចចូលទៅក្នុងបរិវេនទីស្នាក់ការគណបក្សសង្គ្រោះជាតិ និងឈប់បង្ហោះសកម្មភាពឬរូបភាពផ្សេងៗទៀត ដែលមានខ្លឹមសារមិនពិត និងមានការភាន់ច្រឡំខុសច្បាប់។
យោងតាមកិច្ចសន្យាបញ្ជាក់ថា៖ «ខ្ញុំបាទសូមធ្វើការសន្យាចំពោះមុខសមត្ថកិច្ចថា ឈប់ធ្វើសកម្មភាពលួចចូលទីតាំងទីស្នាក់ការអតីតគណបក្សសង្គ្រោះជាតិនិងទីកន្លែងមហាឃាត់នានា ព្រមទាំងបញ្ឈប់សកម្មភាពបង្ហោះឬ រូបភាព ដែលមានខ្លឹមសារមិនពិត ឬ ខ្លឹមសារដទៃទៀតដែលជាអំពើខុសច្បាប់នៃព្រះរាជណាចក្រកម្ពុជា»។
ក្មេងប្រុស កាក់ សុវណ្ណច្ឆ័យ ដែលកំពុងសិក្សានៅថ្នាក់ទី៩នៃសាលារៀនមួយក្នុងរាជធានីភ្នំពេញ ត្រូវអាជ្ញាធរចាប់ឃាត់ខ្លួនកាលពីម៉ោងប្រហែល ៣រសៀលកាលពីថ្ងៃអាទិត្យចុងសប្ដាហ៍កន្លងមកនេះ ខណៈក្មេងប្រុសរូបនេះ បានចូលទៅស្នាក់ការគណបក្សសង្គ្រោះជាតិ ដែលស្នាក់ការនោះត្រូវបានតុលាការចេញសេចក្តីសម្រេចឱ្យបិទតាំងពីខែវិច្ឆិកា ឆ្នាំ២០១៩។
ឪពុកក្មេងប្រុសរូបនេះ គឺលោក កាក់ កុម្ភារ ដែលត្រូវបានសមត្ថកិច្ចចាប់ខ្លួនឃុំខ្លួននៅពន្ធនាគារព្រៃសកាលពីចុងខែមិថុនា ឆ្នាំ២០២០ តាមសាលក្រមរបស់ចុះថ្ងៃទី១៨ ខែតុលាកាលពីឆ្នាំមុន ក្រោមការចោទពីបទ«ប្រមាថ និងញុះញង់ឱ្យប្រព្រឹត្តបទឧក្រិដ្ឋជាអាទិ៍ បង្កឱមានភាពវឹកវរធ្ងន់ធ្ងរដល់សន្តិសុខជាតិ» ផ្តន្ទាទោសឱ្យជាប់ពន្ធនាគារ១ឆ្នាំ៨ខែ៕