ប្រមុខរដ្ឋាភិបាលកម្ពុជា បានបញ្ជាក់ជំហរថា ខ្លួនប្តេជ្ញាចិត្តដ៏ម៉ឺងម៉ាត់មិនលម្អៀងទៅរកប្រទេសមហាអំណាចណាមួយ ដើម្បីការពារឯករាជ្យភាព អព្យាក្រឹត និងអធិបតេយ្យភាពរបស់ខ្លួន ដែលការបញ្ជាក់នេះជាការឆ្លើយតបទៅនឹងសហរដ្ឋអាមេរិកដែលសម្តែងកង្វល់ជាខ្លាំងលើវត្តមានយោធាចិននៅលើទឹកដីកម្ពុជា។
អនុរដ្ឋមន្ត្រីក្រសួងការបរទេសរបស់សហរដ្ឋអាមេរិក លោកស្រី Wendy Sherman កាលពីថ្ងៃទី១ ខែមិថុនា ឆ្នាំ២០២១នេះ បានដឹកនាំក្រុមការងារជួបជាមួយលោកនាយករដ្ឋមន្ត្រី ហ៊ុន សែន ប្រមុខរដ្ឋាភិបាលកម្ពុជា នៅរាជធានីភ្នំពេញ ដើម្បីពង្រឹងទំនាក់ទំនងកិច្ចការបរទេស។
ក្រោយបិទបញ្ចប់ជំនួបនេះ ក្រសួងការបរទេសសហរដ្ឋអាមេរិកបានលើកឡើងតាមរយៈសេចក្តីប្រកាសព័ត៌មានថា មន្ត្រីជាន់ខ្ពស់របស់ខ្លួនបានលើកឡើងថា អាមេរិកមានកង្វល់ជាខ្លាំងលើវត្តមានយោធារបស់សាធារណរដ្ឋប្រជាមានិតចិន និងការកសាងទីតាំងនៅមូលដ្ឋានជើងទឹករាមក្នុងប្រទេសកម្ពុជា។ សេចក្តីប្រកាសព័ត៌មានដដែល បន្តថា ក្នុងជំនួបនោះដែរ អាមេរិកក៏បានស្នើឱ្យរដ្ឋាភិបាលកម្ពុជាបំភ្លឺលើការវាយកម្ទេចអគារចំនួន២ដែលបានទទួលជំនួយថវិកាពីសហរដ្ឋអាមេរិក នៅរាម ដោយគ្មានការជូនដំណឹងឬការពន្យល់ជាមុន។
ក្រសួងការបរទេសអាមេរិក បានសង្កត់ធ្ងន់ថា៖ «មូលដ្ឋានយោធារបស់សាធារណរដ្ឋប្រជាមានិតចិនណាមួយនៅកម្ពុជា អាចនឹងបំផ្លាញអធិបតេយ្យភាពរបស់កម្ពុជា គំរាមកំហែងសន្តិសុខតំបន់ និងប៉ះពាល់ជាអវិជ្ជមានដល់ទំនាក់ទំនងរវាងសហរដ្ឋអាមេរិកនិងប្រទេសកម្ពុជា»។
អាមេរិកក៏បានអំពាវនាវឱ្យថ្នាក់ដឹកនាំកម្ពុជា រក្សាគោលនយោបាយការបរទេសដែលមានតុល្យភាពនិងឯករាជ្យ ដើម្បីជាឧត្តមប្រយោជន៍នៃប្រជាជនកម្ពុជា។
ជាការឆ្លើយតបទៅនឹងការប្រកាសរបស់ក្រសួងការបរទេសសហរដ្ឋអាមេរិកនេះ ក្រសួងការបរទេសកម្ពុជា តាមរយៈសេចក្តីប្រកាសព័ត៌មាន ចុះថ្ងៃទី២ ខែមិថុនា បានលើកឡើងថា ជាថ្មីម្តងទៀត «កម្ពុជាបានបញ្ជាក់ច្បាស់ពីស្ថានភាពនៅមូលដ្ឋានកងទ័ពជើងទឹករាម និងបានរំឭកពីការប្តេជ្ញាចិត្តដ៏ម៉ឺងម៉ាត់របស់រាជរដ្ឋាភិបាលកម្ពុជា ក្នុងការថែរក្សានិងការពារឯករាជ្យ អព្យាក្រឹត និងអធិបតេយ្យភាពរបស់ខ្លួន ទាំងនយោបាយផ្ទៃក្នុងប្រទេសនិងកិច្ចការបរទេស»។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា មើលឃើញថា ការបង្ហាញជំហររបស់រដ្ឋាភិបាលកម្ពុជានេះជារឿងល្អមួយ តែថា អ្វីជាការបង្កើនទំនុកចិត្តដល់ប្រទេសលោកសេរីនោះ គឺរដ្ឋាភិបាលត្រូវស្តារស្ថានភាពសិទ្ធិមនុស្សនិងប្រជាធិបតេយ្យឡើងវិញ ក្រោយពីបានរំលាយគណបក្សប្រឆាំងធំមួយចេញពីឆាកនយោបាយ បណ្តេញអង្គការអន្តរជាតិចេញពីកម្ពុជា និងបំបិទសំឡេងសារព័ត៌មានឯករាជ្យ ខណៈងាកទៅស្និទ្ធជាមួយមហាអំណាចចិន។
លោកថា៖ «រឿងដែលសំខាន់ គឺយើងគោរពធម្មនុញ្ញយើង ការធានានូវអព្យាក្រឹតភាពមិនចូលបក្សសម្ព័ន្ធ ការធានានូវប្រជាធិបតេយ្យសេរីពហុបក្ស ដែលកម្ពុជាត្រូវប្រកាន់យកយ៉ាងម៉ត់ចត់បំផុត។ បើមិនអ៊ីចឹងទេ កម្ពុជា ខ្ញុំបារម្ភថា យើងដើរចូលគន្លងចាស់ទៀត ហើយបើចូលគន្លងចាស់ កម្ពុជាយើងអត់លូតទៅណាទេ»។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា មើលឃើញថា ការប្រកាន់ជំហរអព្យាក្រឹតដែលអាចទុកចិត្ត កម្ពុជានឹងអាចរក្សាបាននូវអត្ថប្រយោជន៍ជាតិ មិនធ្លាក់ចូលក្នុងវិបត្តិដូចពីអតីតកាល ខណៈពេលនេះ ប្រទេសមហាអំណាចកំពុងប្រកួតគ្នានៅតំបន់អាស៊ី។
លោកថា៖ «អតីតកាលវាបានបង្ហាញហើយ រឿងជំហរកម្ពុជានៅចិន ជំហរកម្ពុជាទៅអាមេរិកផ្តាច់ ទៅសហភាពសូវៀតផ្តាច់ គឺកម្ពុជារងគ្រោះរហូតទេ! អ៊ីចឹង [កម្ពុជា] គួរតែចាប់យកប៉ូលនយោបាយទាំងអស់លើសកលលោក ទើបមានភាពប្រសើរ។ អ៊ីចឹងប្រសិនបើយើងឈរខុសលើគោលការណ៍ យើងអាចមានបញ្ហាច្រើន អ៊ីចឹងគួរពិចារណាបញ្ហានេះ ដើម្បីអត្ថប្រយោជន៍ជាតិ»។
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ មានប្រសាសន៍ថា ការលើកឡើងរបស់សហរដ្ឋអាមេរិកពីអធិបតេយ្យភាព ស្របតាមស្មារតីនៃកិច្ចព្រមព្រៀងសន្តិភាពទីក្រុងប៉ារីស ជាសញ្ញាវិជ្ជមានមួយជួយក្រើនរំឭកដល់ភាគីកម្ពុជាឱ្យពិចារណាឱ្យបានដិតដល់ ដើម្បីបញ្ចៀសកុំឱ្យមានអធម្មនុញ្ញ ឬការរំលោភរដ្ឋធម្មនុញ្ញ បង្កអសន្តិសុខសកល ក៏ដូចជាជះឥទ្ធិពលមិនល្អដល់សន្តិភាពរបស់កម្ពុជា។
តែយ៉ាងណា លោកផ្តល់ជាយោបល់ថា ដើម្បីបង្កើនទំនុកចិត្តគ្នា ក៏ដូចជាពង្រឹងទំនាក់ទំនងកិច្ចការបរទេស ភាគីទាំងពីរគួរបង្ហាញតម្លាភាពរៀងៗខ្លួន បង្កើតក្រុមការងារចម្រុះចុះសិក្សាស្រាវជ្រាវបែបវិទ្យាសាស្ត្រនៅតំបន់ដែលសង្ស័យ។
លោកថា៖ «ពីព្រោះមានតែការធ្វើឱ្យមានតម្លាភាពទេ រវាងភាគីអាមេរិកនិងភាគីកម្ពុជាទេ ដែលអាចធ្វើឱ្យប្រជាពលរដ្ឋកម្ពុជា ក៏ដូចជាសហគមន៍អន្តរជាតិអាចវាយតម្លៃបានថា សម្តីខាងណាពិត សម្តីខាងណាមិនពិត»។
យ៉ាងណា សហរដ្ឋអាមេរិក និយាយដែរថា ក្នុងជំនួបនោះ តំណាងរបស់ខ្លួនបានប្រាប់លោកនាយករដ្ឋមន្ត្រី ហ៊ុន សែន ថា ខ្លួនមានបំណងធ្វើការជាមួយប្រទេសកម្ពុជា នៅក្នុងតួនាទីរបស់ខ្លួនជាប្រធាននៃសមាគមអាស៊ាននៅឆ្នាំ២០២២ ហើយជួយធានាឱ្យកម្ពុជាអាចដើរតួនាទីប្រកបដោយន័យស្ថាបនា នៅក្នុងការដោះស្រាយបញ្ហាប្រឈមផ្នែកសន្តិសុខនិងនយោបាយសំខាន់ៗនៅក្នុងតំបន់ ដូចជា បញ្ហាប្រទេសកូរ៉េខាងជើង បញ្ហាសមុទ្រចិនខាងត្បូង និងបញ្ហាតំបន់ទន្លេមេគង្គ៕
អត្ថបទទាក់ទង
