លោកនាយករដ្ឋមន្ត្រី ហ៊ុន សែន បានថ្លែងថា លោកធុញទ្រាន់ទៅនឹងការចោទថា កម្ពុជាបានអនុញ្ញាតឱ្យមានមូលដ្ឋានកងទ័ពចិននៅលើទឹកដីរបស់ខ្លួន ហើយលោកក៏ជំរុញឱ្យបញ្ចេញភស្តុតាងដែលបង្ហាញថា កម្ពុជានិងចិនមានកិច្ចព្រមព្រៀងសម្ងាត់លើបញ្ហានេះ។
ក្នុងពិធីបើកការដ្ឋានសាងសង់ស្ពានតភ្ជាប់ពីតំបន់កោះនរា ស្ថិតក្នុងខណ្ឌច្បារអំពៅ មកកាន់តំបន់កោះពេជ្រ នៅព្រឹកថ្ងៃនេះ លោកនាយករដ្ឋមន្ត្រី ហ៊ុន សែន បានចោទសួរទៅវិញថា តើកម្ពុជាបានអនុញ្ញាតឱ្យមានមូលដ្ឋានកងទ័ពចិនតាំងពីពេលណា។
លោក ហ៊ុន សែន ថ្លែងថា៖ «តើចិនមានកងទ័ពនៅកម្ពុជាទេ? កម្ពុជាឱ្យសិទ្ធិចិនបោះទ័ពនៅកម្ពុជាពីកាលណា? ខ្ញុំបញ្ជាក់ឡើងវិញ ខ្ញុំធុញទ្រាន់ជាមួយជនបរទេសមួយចំនួន បូកជាមួយខ្មែរយើងរុញសភាពការណ៍ហ្នឹង»។
សារព័ត៌មានអាមេរិក Wall Street Journal បានចុះផ្សាយអត្ថបទមួយកាលពីខែកក្កដាឆ្នាំមុន ដែលរាយការណ៍ថា កម្ពុជាបានចុះកិច្ចព្រមព្រៀងសម្ងាត់ជាមួយចិន ដើម្បីអនុញ្ញាតឱ្យមានកងទ័ពចិនរយៈពេល៣០ឆ្នាំ នៅមូលដ្ឋានកងទ័ពជើងទឹករាម ស្ថិតនៅខេត្តព្រះសីហនុ។
សារព័ត៌មានមួយនេះ បានចុះផ្សាយបែបនេះដោយបានដកស្រង់សម្ដីមន្ត្រីអាមេរិកដែលមិនបានបញ្ជាក់ឈ្មោះ ហើយអ្នកសារព័ត៌មានដែលរាយការណ៍អំពីរឿងនេះមិនបានបញ្ជាក់ទេថា តើគេបានមើលឃើញកិច្ចព្រមព្រៀងនោះដោយខ្លួនឯងផ្ទាល់ឬក៏យ៉ាងណានោះទេ។
ប៉ុន្តែកម្ពុជាបានច្រានចោលការចុះផ្សាយនេះ ដោយចាត់ទុកថា សេចក្ដីរាយការណ៍របស់សារព័ត៌មានមួយនេះ គឺជា«ព័ត៌មានមិនពិត»។
នៅថ្ងៃនេះដែរ លោក ហ៊ុន សែន ក៏បានជំរុញឱ្យបញ្ចេញនូវភស្តុតាងដែលបញ្ជាក់ពីកិច្ចព្រមព្រៀងសម្ងាត់រវាងកម្ពុជានិងចិន ហើយលោកថា បើមិនដូច្នេះទេ ការចោទប្រកាន់មកលើកម្ពុជា គឺជាការ«ភូតកុហក»។
លោក ហ៊ុន សែន ថ្លែងថា៖ «លោកឯងមានភស្តុតាងឯណា បញ្ចេញមកថា កម្ពុជាមានកិច្ចព្រមព្រៀងសម្ងាត់ជាមួយចិនប្រើប្រាស់ផ្ដាច់មុខនូវកំពង់ផែរាមរយៈពេល៣០ឆ្នាំ? ចេញមក បញ្ចេញភស្តុតាងហ្នឹងមក! បើអ្នកឯងមិនបញ្ចេញភស្តុតាងហ្នឹង មានន័យថា អ្នកឯងភូតកុហក»។
មេដឹកនាំកម្ពុជារូបនេះក៏បានចោទសួរផងដែរពីចេតនាពិតប្រាកដនៅពីក្រោយនៃការលើកឡើងម្ដងហើយម្ដងទៀតនូវបញ្ហានេះ។
លោក ហ៊ុន សែន ថ្លែងបន្តថា៖ «ឥលូវ អ្នកឯងប៉ុនប៉ងធ្វើអីចំពោះខ្ញុំ បានជាអ្នកឯងលើកម្ដងហើយម្ដងទៀត វត្តមានចិន វត្តមានចិន»។
មន្ទិលសង្ស័យជុំវិញវត្តមានមូលដ្ឋានកងទ័ពចិននៅកម្ពុជា បានផ្ទុះឡើងកាលពីពាក់កណ្ដាលឆ្នាំមុន ក្រោយពីការចុះផ្សាយរបស់សារព័ត៌មាន Wall Street Journal ហើយបញ្ហានេះត្រូវបានអគ្គរដ្ឋទូតអាមេរិក លោក Patrick Murphy ចោទសួរជាថ្មីទៀតទៅកាន់ប្រមុខការពារជាតិកម្ពុជា លោក ទៀ បាញ់ នៅក្នុងជំនួបកាលពីថ្ងៃទី២១ ខែកញ្ញាកន្លងមកនេះ៕