អង្គការ-សមាគមចំនួន២៦ស្ថាប័នស្នើទៅស្ថាប័នរដ្ឋចំនួន៣ ចាត់វិធានការច្បាប់លើឧកញ៉ា ហេង សៀ អតីតឧកញ៉ា ឌួង ឆាយ និងអតីតស្នងការនគរបាលខេត្តកំពង់ធំ ដែលប្រើហិង្សាក្នុងគ្រួសារនិងបៀតបៀនផ្លូវភេទលើស្ត្រី ដើម្បីលុបបំបាត់វប្បធម៌និទណ្ឌភាពនៅកម្ពុជា។
សំណើរបស់ក្រុមអង្គការ-សមាគមទាំងនេះ ធ្វើឡើងបន្ទាប់ពីឧកញ៉ា ហេង សៀ ប្តឹងកញ្ញា មាន ពេជ្ររីតា ពិធីការិនីទូរទស្សន៍ My TV និងជាអតីតបេក្ខនារី Miss Grand Cambodia ថាបានយកកូនកាំបិតចាក់ និងលួចយកទូរសព្ទដៃរបស់ខ្លួនតម្លៃជាង១ ០០០ដុល្លារ ប៉ុន្តែកញ្ញារូបនោះច្រានចោល និងប្តឹងតបវិញថា ឧកញ៉ាបានបៀតបៀនផ្លូវភេទនិងប៉ុនប៉ងរំលោភទៅវិញ។
អង្គការសង្គមស៊ីវិលនិងសមាគមទាំងនោះ រួមមាន គណៈកម្មាធិការនៃអង្គការមិនមែនរដ្ឋាភិបាលកម្ពុជា ដើម្បីអនុសញ្ញា លុបបំបាត់រាល់ទម្រង់នៃការរើសអើងលើស្ត្រី, មជ្ឈមណ្ឌលសិទ្ធិមនុស្សកម្ពុជា, បណ្តាញយេនឌ័រ និងអភិវឌ្ឍន៍កម្ពុជា, អង្គការលីកាដូ, អង្គការបន្ទាយស្រី, សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ, សមាគមអ្នកបម្រើការងារតាមផ្ទះ, សម្ព័ន្ធសហជីពកម្ពុជា និងសមាគមគាំពារស្ត្រីងាយរងគ្រោះ ជាដើម។
ក្នុងលិខិតចំហរបស់អង្គការ-សមាគមទាំងនោះ ចុះថ្ងៃទី១២ ខែឧសភា ឆ្នា២០២១ បានលើកឡើងថា ពេលនេះ ពលរដ្ឋ បានសម្តែងចេញនូវការស្អប់ខ្ពើមចំពោះអំពើហិង្សាលើស្ត្រី និងកំពុងតាមដានចំណាត់ការរបស់រដ្ឋាភិបាល ជាពិសេសស្ថាប័នមានសមត្ថកិច្ច ទៅលើករណីរបស់ឧកញ៉ា ហេង សៀ ក៏ដូចជាករណីអតីតឧកញ៉ា ឌួង ឆាយ និងអតីតស្នងការនគរបាលខេត្តកំពង់ធំ លោក អ៊ុក កុសល ដែលបានប្រើប្រាស់អំពើហិង្សានិងបៀតបៀនផ្លូវភេទលើស្ត្រី ខណៈករណីផ្សេងទៀតមិនសូវទទួលបានការចាប់អារម្មណ៍ពីសាធារណជន ដោយសារជនរងគ្រោះជាច្រើនមិនអាចទម្លាយរឿងរ៉ាវដែលបានកើតឡើងចំពោះពួកគេ ដោយសារកត្តាជាច្រើន រួមទាំងកត្តាសង្គមវប្បធម៌ផងដែរ។
លិខិតចំហដដែលនោះបន្តថា ក្នុងករណីដែលជនរងគ្រោះមិនបានទទួលនូវយុត្តិធម៌ពេញលេញ ជាហេតុនាំឱ្យប៉ះពាល់យ៉ាងខ្លាំងដល់ប្រសិទ្ធភាពនៃការអនុវត្តច្បាប់ និងជំរុញឱ្យមានការកើនឡើងនូវអំពើហិង្សានិងការបៀតបៀនផ្លូវភេទលើស្ត្រីនិងកុមារី។
អង្គការ-សមាគមទាំងនោះបញ្ជាក់ថា៖ «ចំណាត់ការកន្លងមកក្នុងការបញ្ឈប់តំណែង បន្ថយឋានន្តរសក្តិ ឬការស្ងៀមស្ងាត់ចំពោះមន្ត្រីដែលមានអំណាច មិនបានផ្តល់នូវយុត្តិធម៌សម្រាប់ស្ត្រីរងគ្រោះឡើយ ហើយនេះបន្តឱ្យមានវប្បធម៌និទណ្ឌភាពផងដែរ»។
ករណីនេះ អង្គការ-សមាគមទាំងនោះស្នើទៅរដ្ឋមន្ត្រីក្រសួងមហាផ្ទៃ លោក ស ខេង រដ្ឋមន្ត្រីក្រសួងកិច្ចការនារី លោកស្រី អឹុង កន្ថាផាវី និងលោក កើត រិទ្ធ រដ្ឋមន្ត្រីក្រសួងយុត្តិធម៌ ចាត់វិធានការច្បាប់លើឧកញ៉ា ហេង សៀ អតីតឧកញ៉ា ឌួង ឆាយ និងលោក អ៊ុក កុសល ដើម្បីលុបបំបាត់វប្បធម៌និទណ្ឌភាពនៅកម្ពុជា។
អង្គការ-សមាគមទាំងនោះបង្ហាញជំនឿថា ស្ថាប័នរដ្ឋនឹងចាត់វិធានការច្បាប់លើជនទាំង៣រូបនេះ ដើម្បីបង្ហាញសារទៅស្ត្រីជាច្រើនទៀតដែលកំពុងរងគ្រោះឱ្យមានទំនុកចិត្ត ហើយជឿជាក់ឡើងវិញលើប្រព័ន្ធយុត្តិធម៌នៅកម្ពុជា និងជាសារទៅដល់សង្គមទាំងមូលថា កម្ពុជាពិតជាមិនអត់ឱនជាដាច់ខាតលើអ្នកប្រើហិង្សា បៀតបៀនផ្លូវភេទលើស្ត្រីនិងក្មេងស្រី ដូចដែលរដ្ឋាភិបាលប្តេជ្ញាទទួលស្គាល់លិខិតតូបករណ៍ស្របតាមច្បាប់ជាតិនិងអន្តរជាតិ។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព សង្កេតឃើញថា កន្លងមកនេះ ការប្រើអំពើហិង្សាផ្លូវកាយ ផ្លូវចិត្ត និងផ្លូវភេទ លើស្ត្រីនិងក្មេងស្រីនៅតែបន្តកើតមាន ដោយសារតែការអនុវត្តច្បាប់របស់ស្ថាប័នមានសមត្ថកិច្ចមួយចំនួនលម្អៀងទៅអ្នកមានលុយនិងមានអំណាច។
លោកស្រីបន្តថា៖ «ដើម្បីលុបបំបាត់វប្បធម៌និទណ្ឌភាព ការដែលរុញករណីទាំងអស់នេះឱ្យមានចំណាត់ការទៅតាមនីតិវិធីច្បាប់ វាចាំបាច់មែនទែន ដើម្បីធានាថា ជនរងគ្រោះហើយនិងក្រុមគ្រួសាររបស់ពួកគេនឹងទទួលបាននូវយុត្តិធម៌។ ហើយក៏ជាសារមួយដែលបង្ហាញថា កម្ពុជាយើងមិនអត់ឱនចំពោះអំពើនៃការប្រើប្រាស់ហិង្សានិងការបៀតបៀន ហើយនិងបំពានផ្លូវភេទទៅលើស្ត្រីនិងក្មេងស្រីនោះទេ»។
អគ្គនាយករងទទួលបន្ទុកវិស័យកិច្ចការពារផ្លូវច្បាប់ នៃក្រសួងកិច្ចការនារី លោកស្រី ស ស៊ីណែត មានប្រសាសន៍ថា ថ្នាក់ដឹកនាំក្រសួងបានយកចិត្តទុកដាក់និងជួយជ្រោមជ្រែងស្វែងរកយុត្តិធម៌ដល់កញ្ញា មាន ពេជ្ររីតា និងស្ត្រីផ្សេងទៀតជាច្រើនករណី ដែលរងគ្រោះដោយអំពើហិង្សា និងការបៀតបៀនឬរំលោភផ្លូវភេទ។
លោស្រីបញ្ជាក់ថា៖ «យើងធ្វើមិនមែនតែមួយករណីហ្នឹងទេ យើងធ្វើសឹងតែគ្រប់ករណីទាំងអស់ហើយ យើងមានកិច្ចសហការទាំងថ្នាក់ជាតិនិងថ្នាក់ក្រោមជាតិ ដើម្បីជួយស្វែងរកអន្តរាគមន៍ ក៏ដូចជានីតិវិធីមួយចំនួនផងដែរ។ ពេលដែលយើងស្វែងរកភស្តុតាង ឬស្វែងយល់ពីអង្គហេតុមួយៗទៅ យើងនឹងធ្វើការស្វែងរកយុត្តិធម៌ឱ្យភាគីដែលរងគ្រោះ»។
នៅថ្ងៃទី១៣ ខែឧសភានេះ ចៅក្រមស៊ើបសួរ លោក កូយ សៅ បានចេញដីកាសម្រេចដាក់ឱ្យកញ្ញា មាន ពេជ្ររីតា (ជនត្រូវចោទ) បាននៅក្រៅឃុំបណ្តោះអាសន្ន តាមបណ្តឹងស្នើសុំនៅក្រៅឃុំរបស់មេធាវីរដ្ឋាភិបាលដែលការពារក្តីឱ្យពិធីការិនីរូបនេះ។ ប៉ុន្តែកញ្ញាត្រូវស្ថិតនៅក្រោមការត្រួតពិនិត្យតាមផ្លូវតុលាការ និងត្រូវមានវត្តមានចំពោះមុខតុលាការ ដើម្បីកុំឱ្យរាំងស្ទះដល់ដំណើរការនីតិវិធី ហាមមិនឱ្យប្តូរទីលំនៅបច្ចុប្បន្ន និងហាមចេញពីព្រំប្រទល់ដែនដីនៃប្រទេសកម្ពុជាជាដើម។
វីអូឌី មិនអាចសុំការអត្ថាធិប្បាយជុំវិញករណីនេះពីអ្នកនាំពាក្យក្រសួងមហាផ្ទៃ លោក ខៀវ សុភ័គ រួមទាំងឧកញ៉ា ហេង សៀ លោក ឌួង ឆាយ និងលោក អ៊ុក កុសល និងកញ្ញា មាន ពេជ្ររីតា បានទេ។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានលើកឡើងក្នុងបណ្តាញសង្គមហ្វេសប៊ុករបស់លោកកាលពីម្សិលមិញថា អ្នកប្រើប្រាស់បណ្តាញសង្គម អ្នកសារព័ត៌មាន រួមទាំងសង្គមស៊ីវិលមួយចំនួនបានបញ្ចេញអារម្មណ៍តាមបណ្តាញសង្គម ដោយដើរតួនាទីជំនួសសមត្ថកិច្ចនិងតុលាការ ហើយធ្វើការវិនិច្ឆ័យកាត់សេចក្តីក្នុងសំណុំរឿងវិវាទរវាងឧកញ៉ានិងពិធីការិនី ទាំងមិនបានដឹងច្បាស់ពីអង្គហេតុពិតប្រាកដនៃសំណុំរឿងនេះនោះទេ ។
លោកបញ្ជាក់ក្នុងសារដូច្នេះថា៖ «ផ្អែកលើគោលការណ៍ច្បាប់ ជាពិសេសការសន្មតជាមុនថាគ្មានទោសមុនតុលាការសម្រេច យើងគួរទុកការងារនេះជូនសមត្ថកិច្ចនិងតុលាការធ្វើការស៊ើបអង្កេតនិងសម្រេចសេចក្តីក្នុងសំណុំរឿងនេះ ដោយផ្អែកលើអង្គហេតុនិងអង្គច្បាប់ពិតប្រាកដ ដើម្បីធានាបាននូវយុត្តិធម៌តាមផ្លូវច្បាប់សម្រាប់ភាគីវិវាទទាំងពីរ។ ហើយភាគីទាំងពីរនេះក៏បានប្តឹងទៅតុលាការរៀងៗខ្លួនរួចហើយដែរ ដើម្បីការពារសិទ្ធិរបស់ខ្លួនតាមផ្លូវច្បាប់ ដោយមានជំនួយផ្នែកច្បាប់ពីមេធាវីទាំងសងខាងផងដែរ»។
អ្នកនាំពាក្យក្រសួងយុត្តិធម៌ម្នាក់ទៀត លោក គឹម សន្តិភាព អះអាងដែរថា ក្រសួងយុត្តិធម៌បានស្នើទៅស្ថាប័នតុលាការ យកចិត្តទុកដាក់ក្នុងការស្រាវជ្រាវសំណុំរឿងទាំងពីរនេះឱ្យបានច្បាស់លាស់ ដើម្បីស្វែងរកការពិតនៃអង្គហេតុទំនាស់និងផ្តល់យុត្តិធម៌ដល់ភាគីពាក់ព័ន្ធ។
គួររំឭកថា ជម្លោះរវាងឧកញ៉ា ហេង សៀ និងពិធីការិនី មាន ពេជ្ររីតា បានធ្វើឱ្យអ្នកប្រើប្រាស់បណ្តាញសង្គមជាច្រើន មានការចាប់អារម្មណ៍យ៉ាងខ្លាំង ក្រោយពីឃើញវីដេអូរបស់កញ្ញា មាន ពេជ្ររីតា យំត្អូញត្អែររៀបរាប់ពីការបៀតបៀនរាងកាយនាងពីសំណាក់ឧកញ៉ា ហេង សៀ កាលពីថ្ងៃ៤ ខែឧសភា។
ពាក់ព័ន្ធនឹងករណីនេះ ឧកញ៉ា ហេង សៀ ក៏បានប្តឹងកញ្ញា មាន ពេជ្ររីតា វិញផងដែរ ពីបទ «លួចមានស្ថានទម្ងន់ទោស» ដោយចោទពិធីការិនីរូបនេះថាបានលួចទូរសព្ទ និងយកកាំបិតចុងស្រួចចាក់រូបលោកចំនួន២កាំបិត។ ក្រោយមក កញ្ញា មាន ពេជ្ររីតា ក៏បានប្តឹងតបវិញ ដោយចោទឧកញ៉ានោះថា បានបៀតបៀនផ្លូវភេទកញ្ញានៅក្នុងរថយន្ត។
រីឯអតីតស្នងការនគរបាលខេត្តកំពង់ធំ លោក អ៊ុក កុសល ក៏ត្រូវបានរងការចោទកាលពីអំឡុងខែសីហា ឆ្នាំ២០២០ ថា បានបៀតបៀនកេរ្តិ៍ខ្មាសមន្ត្រីនគរបាលជាស្ត្រីដែលស្ថិតនៅក្រោមការគ្រប់គ្រងរបស់ខ្លួន។ ករណីនេះ ក្រសួងមហាផ្ទៃ បានសម្រេចដកតួនាទីនិងបន្ថយឋានន្តរសក្តិរបស់លោកពីថ្នាក់ឧត្តមសេនីយ៍ទោ (ផ្កាយ២) មកត្រឹមវរសេនីយ៍ឯក (សក្តិ៥) វិញ ក្រោយពីរកឃើញថា មន្ត្រីរូបនេះពិតជាបានបៀតបៀនកេរ្តិ៍ខ្មាសនគរបាលជាស្ត្រីនោះមែន។
ចំណែករឿងរបស់អតីតឧកញ៉ា ឌួង ឆាយ វិញ ត្រូវបានអតីតភរិយារបស់លោក គឺអ្នកស្រី ដេត ម៉ាលីណា បង្ហោះវីដេអូលើបណ្តាញសង្គមហ្វេសប៊ុកកាលពីថ្ងៃទី១៦ ខែមីនា ឆ្នាំ២០២១ បានបង្ហាញពីសកម្មភាពលោក ឌួង ឆាយ ប្រើហិង្សាលើរូបគាត់បណ្តាលឱ្យជាំជើង ជាំមុខ ជាំរង្វង់ភ្នែក និងរហែកអាវ ជាដើម។ តែយ៉ាងណា លោក ឌួង ឆាយ ក៏បានបកស្រាយនិងទទួលកំហុស ដោយលោកថា រឿងនោះជារឿងចាស់កាលពីចុងឆ្នាំ២០២០។
ក្រោយមក យោងតាមព្រះរាជក្រឹត្យព្រះមហាក្សត្រ ដែលមានចុះហត្ថលេខាដោយប្រមុខរដ្ឋស្តីទី លោក សាយ ឈុំ នៅថ្ងៃទី១៨ ខែមីនា ឆ្នាំ២០២១ បានត្រាស់បង្គាប់បញ្ចប់គោរមងារ «ឧកញ៉ា» ពីលោក ឌួង ឆាយ ប៉ុន្តែមិនទាន់ឃើញមានចំណាត់ការច្បាប់លើបុគ្គលនោះនៅឡើយ ៕
