ប្រធានក្រុមមេធាវីការពារក្តីស្ម័គ្រចិត្តរបស់លោកនាយករដ្ឋមន្រ្តី ហ៊ុន សែន បានបញ្ជាក់ថា ក្រុមការងាររបស់ខ្លួនកំពុងសិក្សាពីអង្គហេតុនៃសំណុំរឿងរបស់កញ្ញា មាន ពេជ្ររីតា ពិធីការិនីទូរទស្សន៍ My TV ដែលមានបណ្តឹងចម្រូងចម្រាសជាមួយឧកញ៉ាមួយរូបនៅតុលាការ។
កាលពីថ្ងៃទី១១ ខែឧសភា កញ្ញា មាន ពេជ្ររីតា បានដាក់ពាក្យបណ្តឹងទៅសាលាដំបូងរាជធានីភ្នំពេញ ដោយប្តឹងលោកឧកញ៉ា ហេង សៀ ពីបទ «ប៉ុនប៉ងរំលោភសេពសន្ថវៈមានស្ថានទម្ងន់ទោស» ដែលបានប្រព្រឹត្តនៅក្នុងរថយន្ត កាលពីអំឡុងថ្ងៃទី៤ ខែឧសភា ឆ្នាំ២០២១។ បណ្តឹងប្រឆាំងលោកឧកញ៉ា ហេង សៀ នេះកើតឡើងក្រោយពេលនាងត្រូវបាននគរបាលខណ្ឌទួលគោកចាប់ខ្លួនកាលពីថ្ងៃទី៨ ខែឧសភា។
ក្រោយមក នៅថ្ងៃទី១១ ខែឧសភា សាលាដំបូងរាជធានីភ្នំពេញ ក៏បានសម្រេចឱ្យឃុំខ្លួនតារាបង្ហាញម៉ូត និងជាពិធីការិនីទូរទស្សន៍ My TV រូបនេះ ក្រោយពីមានបណ្តឹងរបស់លោកឧកញ៉ា ហេង សៀ ក្រោមបទចោទថា «លួចមានស្ថានទម្ងន់ទោស»។
តែយ៉ាងណា លោក គី តិច ប្រធានក្រុមមេធាវីស្ម័គ្រចិត្តរបស់លោកនាយករដ្ឋមន្ត្រី ឱ្យដឹងនៅថ្ងៃទី១២ ខែឧសភានេះថា ទាក់ទងរឿងក្តីមួយនេះ លោកកំពុងតែពិនិត្យលើបណ្តឹងរបស់តារាបង្ហាញម៉ូត និងជាពិធីការិនីទូរទស្សន៍ My TV រូបនេះ។ ប៉ុន្តែលោកអះអាងថា ជាលទ្ធផលយ៉ាងនោះនៅមិនទាន់ដឹងនៅឡើយទេ ព្រោះស្ថិតក្នុងដំណាក់កាលស្រាវជ្រាវនិងអង្កេតនៅឡើយ។
លោកបន្ថែមថា ក្រោយពីទទួលបានដំណឹងនេះភ្លាម ក្រុមការងាររបស់ខ្លួនក៏ចាប់ផ្តើមពិនិត្យ ហើយក្នុងពេលជាមួយគ្នានេះ រូបលោកក៏បានជួបជាមួយម្តាយរបស់កញ្ញា មាន ពេជ្ររីតា ដើម្បីស្វែងរកព័ត៌មានបន្ថែមទាក់ទិនអង្គហេតុនៃសំណុំរឿងនេះ។
លោកបន្ថែមថា៖ «សូមបញ្ជាក់ខ្លី ខ្ញុំស្ថិតក្នុងដំណាក់កាលស្រាវជ្រាវទេ! ដោយបានឃើញព័ត៌មាននេះភ្លាម ក្រុមខ្ញុំកំពុងតែធ្វើការស្រាវជ្រាវរកការពិត អ៊ីចឹងក្រៅពីហ្នឹងទៀត អត់មានអីទេ»។
លោក គី តិច ដែលជាប្រធានក្រុមមេធាវីស្ម័គ្រចិត្តរបស់លោកនាយករដ្ឋមន្រ្តី ឱ្យដឹងថា ដោយសារពេលនេះ កញ្ញា មាន ពេជ្ររីតា មើលទៅហាក់មានសភាពតក់ស្លុត និងមិនបានផ្តល់ចម្លើយ ទើបតុលាការសម្រេចឃុំខ្លួននាងបណ្តោះអាសន្នសិន។ ហើយនៅថ្ងៃទី១២ ខែឧសភានេះ តុលាការបន្តសាកសួរបន្ថែមទៀត ស្របពេលនាងបានដាក់បណ្តឹងប្រឆាំងលោកឧកញ៉ា ហេង សៀ វិញ។
វីអូឌី ពុំអាចសុំការបំភ្លឺពីលោកឧកញ៉ា ហេង សៀ បានទេ នៅថ្ងៃនេះ។
ចំណែកកញ្ញា មាន ពេជ្ររីតា ក៏ពុំអាចទាក់ទងបានដែរ ដោយអ្នកទទួលទូរសព្ទដែលមាននៅលើបណ្តឹងរបស់កញ្ញា បានឆ្លើយតបយ៉ាងខ្លីថា គេមិនអាចផ្តល់ព័ត៌មានឱ្យបានទេ។
យ៉ាងនេះក្តី ចៅក្រមស៊ើបសួរនៃសាលាដំបូងរាជធានីភ្នំពេញ លោក កូយ សៅ នៅថ្ងៃទី១១ ខែឧសភា បានចេញដីកាបង្គាប់ឱ្យឃុំខ្លួនកញ្ញា មាន ពេជ្ររីតា បណ្តោះអាសន្ននៅមណ្ឌលកែប្រែ«ម២» រហូតដល់មានសេចក្តីសម្រេចថ្មីផ្សេងពីនេះ។
លោក កូយ សៅ បានសរសេរនៅក្នុងដីកានេះទៀតថា ជនត្រូវចោទត្រូវបានដាក់ឱ្យស្ថិតនៅក្រោមការពិនិត្យពីបទចោទ «លួចមានស្ថានទម្ងន់ទោស» ។ ដីកាបង្គាប់នេះបន្ថែមថា ជនសង្ស័យក្នុងសំណុំរឿងនេះបានយកកាំបិតចុងស្រួចចាក់លើជនរងគ្រោះជាឧកញ៉ា ចំនួន២កាំបិត រួចយកទូរសព្ទដៃ១គ្រឿងម៉ាក IPhone 12 Pro។
វីអូឌី ពុំអាចសុំការបំភ្លឺបន្ថែមពាក់ព័ន្ធរឿងក្តីនេះពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានទេ នៅថ្ងៃទី១២ ខែឧសភា ដោយលោកអះអាងថា សំណុំរឿងនេះបានបញ្ជូនដល់ដៃតំណាងអយ្យការរួចហើយ។ ចំណែក លោក គុជ គឹមឡុង អ្នកនាំពាក្យតំណាងអយ្យការ ទទួលទូរសព្ទហើយបញ្ជាក់យ៉ាងខ្លីថាជាប់ប្រជុំ។
ចំណែកលោក អំ សំអាត នាយករងអង្គការលីកាដូ មានប្រសាសន៍ថា បើគេពិនិត្យទៅលើខ្លឹមសារច្បាប់ដែលបានកំណត់រួចហើយពីភាពល្អឥតខ្ចោះហើយ ពិតជាអាចជួយផ្តល់យុត្តិធម៌សម្រាប់ជនរងគ្រោះ។ ប៉ុន្តែផ្ទុយទៅវិញ លោកថា ដោយសារការអនុវត្តដែលមិនឈរលើគោលការណ៍តម្លាភាពនិងសុចរិត ជាពិសេសអ្នកប្រព្រឹត្តបទល្មើសមានខ្នងបង្អែក ឬជាមនុស្សដែលមានឥទ្ធិពល ធ្វើឱ្យអ្នកដែលត្រូវទទួលបានយុត្តិធម៌តាមផ្លូវច្បាប់ ក្លាយទៅជាជនរងគ្រោះទៅវិញ។
លោក អំ សំអាត បញ្ជាក់ថា កត្តានេះហើយបានជាកើតមានអំពើនិទណ្ឌភាពបន្តចាក់ស្រេះកើតឡើង ហើយក្លាយជាបន្ទុកសម្រាប់សង្គម។
លោកបន្តថា៖ «អាហ្នឹងហើយដែលវាតែងមានការរិះគន់ថា ការអនុវត្តច្បាប់ផ្នែកខ្លះមានស្តង់ដារពីរនោះ ការអនុវត្តដោយមិនស្មើភាពគ្នាចំពោះមុខច្បាប់ ហើយក៏បង្កឱ្យមានអំពើនិទណ្ឌភាព។ អានេះដូចខ្ញុំលើកអ៊ីចឹង គឺច្បាប់អត់ចែងពីចរិតវណ្ណៈបែបហ្នឹងទេ តែអ្នកអនុវត្តទេ[ដែលតែងតែធ្វើឱ្យកើតមានអំពើនិទណ្ឌភាព]»។
ពាក់ព័ន្ធនឹងករណីហិង្សានិងការបៀតបៀនផ្លូវភេទទៅលើស្ត្រីនេះ កន្លងមក ក៏ធ្លាប់មានករណីអតីតឧកញ៉ា លោក ដួង ឆាយ បានរងការចោទថាបានប្រើហិង្សាលើប្រពន្ធខ្លួន និងករណីលោកឧកញ៉ា លាង ឃុន ជាអគ្គនាយកក្រុមហ៊ុន ជីព ម៉ុង ត្រូវបានស្រ្តីឈ្មោះ ឃុន ស្រីស្រស់ ចោទថា បង្ខំរូបគេរហូតអស់ផ្លូវដើរ ក្រោយរស់នៅជាមួយគ្នាមួយរយៈ ហើយស្ត្រីរូបនោះក៏បានសម្រេចចិត្តសម្លាប់ខ្លួនដោយលោតពីលើអាគារ ជាដើម។
