ព្រះមហាក្សត្រត្រាស់បង្គាប់បញ្ចប់គោរមងារ «ឧកញ៉ា» ពីលោក ឌួង ឆាយ តាមសំណើរបស់នាយករដ្ឋមន្ត្រី ក្រោយពីអតីតភរិយារបស់លោក ឌួង ឆាយ បង្ហោះវីដេអូដែលស្វាមីខ្លួនប្រើហិង្សាទៅលើរូបនាងនាពេលកន្លងមក។
កាលពីថ្ងៃម្សិលមិញ ប្រមុខរដ្ឋស្តីទី លោក សាយ ឈុំ បានទូលថ្វាយសំណើទៅព្រះមហាក្សត្រ ដើម្បីសុំបញ្ចប់គោរមងារ «ឧកញ៉ា» ពីលោក ឌួង ឆាយ តាមសំណើរបស់លោកនាយករដ្ឋមន្ត្រី ហ៊ុន សែន ។
យោងតាមព្រះរាជក្រឹត្យព្រះមហាក្សត្រ ដែលមានចុះហត្ថលេខាដោយប្រមុខរដ្ឋស្តីទី លោក សាយ ឈុំ នៅថ្ងៃទី១៨ ខែមីនា ឆ្នាំ២០២១ បានត្រាស់បង្គាប់បញ្ចប់គោរមងារ «ឧកញ៉ា» ពីលោក ឌួង ឆាយ។
នៅក្នុងវីដេអូដែលអ្នកស្រី ដេត ម៉ាលីណា អតីតភរិយាលោក ឌួង ឆាយ បង្ហោះលើបណ្តាញសង្គមហ្វេសប៊ុកកាលពីថ្ងៃ១៦ ខែមីនា ឆ្នាំ២០២១ បានបង្ហាញពីសកម្មភាពលោក ឌួង ឆាយ បានប្រើហិង្សាលើរូបគាត់ បណ្តាលឱ្យជាំជើង ជាំមុខ ជំារង្វង់ភ្នែក និងរហែកអាវ ជាដើម។
តែយ៉ាងណា លោក ឌួង ឆាយ បានបកស្រាយតាមរយៈការឡាយ (Live) នៅលើទំព័រហ្វេសប៊ុករបស់លោក កាលពីថ្ងៃ១៦ ខែមីនា ថារូបលោកទទួលស្គាល់កំហុសថា ពិតជាបានប្រើអំពើហិង្សាលើអតីតភរិយារបស់លោកពិតមែន ប៉ុន្តែរឿងនោះជារឿងចាស់កាលពីចុងឆ្នាំ២០២០ ពីព្រោះក្រោយពីបង្កហិង្សា ពួកគេបានសម្រេចចិត្តលែងលះគ្នា។
លោក ឌួង ឆាយ ថ្លែងទៀតថា ដើមចមដែលនាំឱ្យរូបលោកប្រើអំពើហិង្សាលើអតីតភរិយាកន្លងមកនោះ ដោយសារតែរឿងជម្លោះផ្ទៃក្នុងគ្រួសារ ហើយអតីតភរិយាបានរឹតត្បិតសេរីភាពរបស់លោក និងចង់ឱ្យលោកក្រៀវជាដើម។
ពាក់ព័ន្ធនឹងករណីហិង្សាលើស្ត្រីនេះដែរ ក្រសួងកិច្ចការនារី ក៏បានចេញសេចក្តីថ្លែងការណ៍មួយ កាលពីថ្ងៃម្សិលមិញ ដោយថ្កោលទោសចំពោះទង្វើរបស់លោក ឌួង ឆាយ ដែលប្រើអំពើហិង្សាក្នុងគ្រួសារលើអតីតភរិយារបស់ខ្លួន គឺអ្នកស្រី ដេត ម៉ាលីណា ដែលវីដេអូនោះត្រូវបានអ្នកស្រីបង្ហោះលើបណ្តាញសង្គមហ្វេសប៊ុកកាលពីយប់ថ្ងៃ១៥ ខែមីនា ឆ្នាំ២០២១។
ក្រសួងបានចាត់ទុកអំពើហិង្សាគ្រប់ទម្រង់និងគ្រប់រូបភាព ជាអំពើមិនអាចទទួលយកបាន និងមិនអាចអត់ឱនឱ្យបានទេ។ រីឯជនរងគ្រោះ កូន និងអ្នកពាក់ព័ន្ធ ត្រូវទទួលបានកិច្ចការពារដោយច្បាប់និងសង្គម ហើយអ្នកដែលប្រព្រឹត្ត ត្រូវទទួលខុសត្រូវចំពោះមុខច្បាប់៕