ជនជាតិដើមភាគតិចនៅខេត្តព្រះវិហារ បារម្ភពីការបាត់បង់ដែនជម្រកសត្វព្រៃព្រះរការ ក្រោយពីពួកគេរកឃើញបទល្មើសព្រៃឈើជិត១០០ករណីថ្មីបន្ថែមទៀតនៅក្នុងដែនជម្រកសត្វព្រៃមួយនេះ។
សហគមន៍ជនជាតិដើមភាគតិចកួយភូមិប្រមេរុ ឱ្យដឹងនៅក្នុងសេចក្តីប្រកាសព័ត៌មានរបស់ខ្លួននៅថ្ងៃអង្គារនេះថា ចាប់ពីថ្ងៃទី២២ ដល់ថ្ងៃទី២៣ ខែឧសភា ឆ្នាំ២០២១ ពួកគេបានរកឃើញបទល្មើសកាប់បំផ្លាញព្រៃឈើនៅក្នុងដែនជម្រកសត្វព្រៃមួយនេះចំនួន៩០ករណីថ្មីទៀត លើប្រភេទឈើងាយរងគ្រោះដែលមានទំហំធំៗនិងមានមុខកាត់ចាប់ពី៣៣សង់ទីម៉ែត្រ ដល់១៥៨សង់ទីម៉ែត្រ។
ការរកឃើញនេះ សហគមន៍ថា បន្ទាប់ពីពួកគេចុះអង្កេតក្នុងរយៈចម្ងាយផ្លូវប្រវែងប្រមាណ៥០គីឡូម៉ែត្រ ចាប់ពីចំណុចភូមិបុស្សធំ ឃុំប្រមេរុ (និយាមកា X:504739 Y:1531490) រហូតដល់ចំណុចបញ្ចប់នៅភូមិបុស្សធំ (ពង្រ) ឃុំប្រមេរុ ស្រុកត្បែងមានជ័យ (និយាមកា X:514382 Y:1527250) ក្នុងនោះ ប្រភេទឈើងាយរងគ្រោះដែលត្រូវទទួលរងការកាប់បំផ្លាញភាគច្រើនជាប្រភេទឈើទាល កកោះ គគីរ ស្ទៀង ផ្តៀក ពពេល ផ្ទឹក ត្រាច ត្រសេក សុក្រំ និង ខ្វាវ ជាដើម។
បើតាមសេចក្ដីប្រកាសព័ត៌មានរបស់សហគមន៍ជនជាតិដើមភាគតិចកួយភូមិប្រមេរុ ការលួចកាប់បំផ្លាញព្រៃឈើនេះ ដោយសារក្រសួងបរិស្ថានហាក់ពុំបានលើកទឹកចិត្តនិងបើកចំហដល់អង្គការសង្គមស៊ីវិល ក្រុមយុវជន សកម្មជន និងសហគមន៍មូលដ្ឋាន ចូលរួមការពារព្រៃឈើនោះទេ ប៉ុន្តែអាជ្ញាធរជំនាញបានរឹតត្បិតនិងហាមឃាត់សកម្មភាពស្របច្បាប់របស់ពួកគេទៅវិញ។
ប្រភពដដែលថា ករណីនេះជាមូលហេតុមួយធ្វើឱ្យក្រុមអ្នកលួចកាប់ឈើមានឱកាសក្នុងការលួចកាប់ឈើជាបន្តបន្ទាប់ ខណៈមន្ត្រីឧទ្យានុរក្សពុំទាន់មានមនុស្សគ្រប់គ្រាន់ ដើម្បីការពារដែនជម្រកសត្វព្រៃដែលជាមរតកដ៏មានតម្លៃមួយនេះបានឡើយ។
ប្រធានសហគមន៍ជនជាតិដើមភាគតិចកួយនៅភូមិប្រមេរុ លោក ស៊ុត សាវុន មានប្រសាសន៍ថា រាល់ថ្ងៃមានគោយន្តចន្លោះពី៨ ទៅ២០គ្រឿង ដឹកឈើចេញពីព្រៃព្រះរការ កាត់តាមភូមិរបស់គាត់និងតាមច្រកផ្សេងៗទៀត ដោយមិនមានអាជ្ញាធរណាមួយទប់ស្កាត់ឡើយ។
លោកយល់ថា ក្រុមឈ្មួញនិងពលរដ្ឋដទៃទៀតកាប់បំផ្លាញនិងដឹកជញ្ជូនឈើចេញពីព្រៃព្រះរការបាន ដោយសារមានការបើកដៃពីអាជ្ញាធរពាក់ព័ន្ធ។
ករណីនេះ លោកបង្ហាញក្ដីបារម្ភចំពោះការបាត់បង់ព្រៃឈើ ក្នុងដែនជម្រកសត្វព្រៃព្រះរការ ដែលធ្វើប៉ះពាល់មុខរបរនិងជីវភាពរបស់ពលរដ្ឋ រួមទាំងជម្រកសត្វ ខណៈការកាប់បំផ្លាញនិងដឹកជញ្ជូនឈើមិនមានការថយចុះទេ។
លោកថា៖ «មន្ត្រីជំនាញបរិស្ថានហ្នឹង គាត់អត់ធ្វើការ ដូចជាការចុះល្បាតឬក៏ហាមឃាត់បិទ អ៊ីចឹងនៅតែមានការបើក។ តាមការពិតដែលខ្ញុំដឹង គេដែលរកស៊ីឈើខ្លះៗ គេថា មានការបង់ [ប្រាក់] ឱ្យខាងមន្ត្រីខ្លះ ដូចជាថៅកែរកស៊ីអារឈើអ៊ីចឹងទៅ គេមានការបង់អីអ៊ីចឹងទៅ នៅតែមានការបើកឱ្យមានការកាប់បំផ្លាញព្រៃឈើ»។
រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា បានប្រាប់ វីអូឌី តាមប្រព័ន្ធតេឡេក្រាមថា ក្រសួងបាននិងបន្តការពង្រឹងកិច្ចការពារនិងអភិរក្ស ដោយបន្តពង្រឹងការអនុវត្តច្បាប់និងបង្កើនជីវភាពប្រជាពលរដ្ឋនៅតាមសហគមន៍ទាំងក្នុងនិងក្រៅតំបន់ការពារធម្មជាតិ។
លោកបន្តថា៖ «ក្រសួងបរិស្ថានក៏បានដាក់ចុះនូវគោលនយោបាយពង្រឹងតួនាទីសហគមន៍តំបន់ការពារធម្មជាតិ ចូលរួមទទួលខុសត្រូវលើកិច្ចការគ្រប់គ្រងធនធានធម្មជាតិនិងអភិរក្សចម្រុះ និងបានផ្តល់ជម្រើសមុខរបរថ្មីដល់សហគមន៍ បង្កើនជីវភាពប្រជាសហគមន៍ ក្រៅពីមុខរបរប្រពៃណីពីមុនរបស់គាត់ចូលព្រៃកាប់ឈើនិងចូលព្រៃបរបាញ់សត្វជាដើម តាមរយៈការជំរុញការអភិវឌ្ឍវិស័យទេសចរណ៍ធម្មជាតិ»។
ក្នុងជំនួបជាមួយគណៈកម្មាធិការបណ្តាញសហគមន៍អភិរក្សធនធានធម្មជាតិថ្នាក់តំបន់ នាទីស្តីការក្រសួងបរិស្ថាន កាលពីថ្ងៃម្សិលមិញ រដ្ឋមន្រ្តីក្រសួងបរិស្ថាន លោក សាយ សំអាល់ បានលើកឡើងថា សហគមន៍ជាដៃគូសន្ទនាជាមួយរាជរដ្ឋាភិបាលក្នុងការធានានិរន្តរភាពនៃការគ្រប់គ្រងធនធានធម្មជាតិ។
លោកបន្តថា ការបង្កើតបណ្តាញសហគមន៍នៅតាមតំបន់ការពារធម្មជាតិ ជាដៃគូសន្ទនារវាងប្រជាសហគមន៍និងរាជរដ្ឋាភិបាល ផ្លាស់ប្តូរយោបល់ ស្វែងរកដំណោះស្រាយរួមគ្នា ផ្តល់ការទទួលខុសត្រូវក្នុងការគ្រប់គ្រង និងចូលរួមក្នុងការការពារនិងអភិរក្សធនធានធម្មជាតិឱ្យមាននិរន្តរភាព។
មន្ត្រីផ្នែកតស៊ូមតិនៃគម្រោងការពារព្រៃឈើរបស់សមាគមបណ្តាញយុវជនកម្ពុជា លោក សាន់ ម៉ាឡា លើកឡើងថា វិធានការទប់ស្កាត់និងសមត្ថភាពរបស់មន្ត្រីក្រសួងបរិស្ថាននៅមានភាពខ្វះខាតច្រើន ទើបមិនអាចទប់ស្កាត់បទល្មើសព្រៃឈើបាន។
លោកបន្ថែមថា ការបន្តឱ្យមានបទល្មើសព្រៃឈើក្នុងដែនជម្រកសត្វព្រៃព្រះរការកើតឡើង បណ្ដាលពីការគប់គិតគ្នាជាប្រព័ន្ធពីសំណាក់មន្ត្រីនិងអ្នកកាប់ឈើផងដែរ។ លោកចាត់ទុកការលើកឡើងរបស់រដ្ឋមន្ត្រីក្រសួងបរិស្ថានដែលថា សហគមន៍ជាដៃគូសន្ទនាជាមួយរាជរដ្ឋាភិបាលនោះ ផ្ទុយពីការពិត។
លោក សាន់ ម៉ាឡា បន្តថា កន្លងមក សហគមន៍ដែលសកម្មក្នុងកិច្ចការពារព្រៃឈើ ត្រូវបានហាមឃាត់មិនឱ្យចុះល្បាត និងរងការគំរាមកំហែងពីអាជ្ញាធរថែមទៀតផង។
លោកថា៖ «ការប្ដេជ្ញាចិត្ត ការលើកទឹកចិត្តពីសំណាក់មន្ត្រីរដ្ឋាភិបាលកន្លងមក ទាំងក្នុងកម្រិតមូលដ្ឋាន ទាំងថ្នាក់ជាតិ ហាក់បីប្រាសចាកពីការពិត ដោយសារក្រសួងបរិស្ថានតែងតែទាមទារឱ្យសហគមន៍មូលដ្ឋានដែលគាត់សកម្មការពារព្រៃឈើហ្នឹង ត្រូវទៅចុះបញ្ជីនៅជាមួយក្រសួងដើម្បីបង្កើតជាសហគមន៍ ដែលនេះវាផ្ទុយអំពីច្បាប់ស្ដីពីតំបន់ការពារធម្មជាតិ ក៏ដូចជាច្បាប់ព្រៃឈើរបស់យើង»។
ព្រៃព្រះរការ មានទំហំជិត១០ម៉ឺនហិកតា លាតសន្ធឹងជាប់ស្រុកចំនួនបីក្នុងខេត្តព្រះវិហារ រួមមាន ស្រុកជាំក្សាន្ត ស្រុកត្បែងមានជ័យ និងស្រុកឆែប។ តំបន់ព្រៃអភិរក្សមួយនេះត្រូវបានរដ្ឋាភិបាលចេញអនុក្រឹត្យកំណត់ជាដែនជម្រកសត្វព្រៃព្រះរការ កាលពីឆ្នាំ២០១៦៕
អត្ថបទទាក់ទង