សហរដ្ឋអាមេរិកនឹងផ្តល់ជំនួយចំនួន៨៧៥ ០០០ដុល្លារដល់រដ្ឋាភិបាកម្ពុជា ដើម្បីពង្រឹងលទ្ធភាពត្រៀមបង្ការនិងឆ្លើយតបចំពោះគ្រោះមហន្តរាយធម្មជាតិនានានៅកម្ពុជា។
ក្នុងសេចក្តីប្រកាសព័ត៌មានរបស់ទីភ្នាក់ងារអភិវឌ្ឍន៍អន្តរជាតិរបស់ខ្លួន ដែលហៅកាត់ថា USAID បានឱ្យដឹងនៅថ្ងៃនេះថា សហរដ្ឋអាមេរិកនឹងផ្តល់ជំនួយចំនួន៨៧៥ ០០០ដុល្លារបន្ថែមទៅលើជំនួយមនុស្សធម៌របស់ខ្លួន ដើម្បីពង្រឹងលទ្ធភាពត្រៀមបង្ការនិងឆ្លើយតបចំពោះគ្រោះមហន្តរាយធម្មជាតិ រួមទាំងវិបត្ដិនានានៅកម្ពុជា ដូចជា ទឹកជំនន់ និងគ្រោះរាំងស្ងួត ជាដើម។
ឯកអគ្គរដ្ឋទូតសហរដ្ឋអាមេរិកប្រចាំនៅប្រទេសកម្ពុជា លោក Patrick Murphy មានប្រសាសន៍ដូច្នេះថា៖ «ការបំផ្លិចបំផ្លាញបង្កឡើងដោយទឹកជំនន់ឆ្នាំមុន បានបង្ហាញពីភាពចាំបាច់ក្នុងការត្រៀមខ្លួនដោះស្រាយទៅលើផលប៉ះពាល់នៃគ្រោះមហន្តរាយធម្មជាតិ។ យើងមានមោទកភាពក្នុងការចូលរួមចំណែកកែលម្អប្រព័ន្ធឆ្លើយតបនឹងវិបត្តិទាំងនេះនៅកម្ពុជា»។
លោក Patrick Murphy ឱ្យដឹងទៀតថា ថវិកាដែលទទួលបានពីការិយាល័យជំនួយមនុស្សធម៌របស់ទីភ្នាក់ងារ USAID នេះ នឹងផ្ដល់លទ្ធភាពឱ្យកម្មវិធីស្បៀងអាហារពិភពលោករបស់អង្គការសហប្រជាជាតិ (WFP) ពង្រឹងបន្ថែមទៅលើគម្រោងស្ដីពី “ការច្នៃប្រឌិតថ្មីដើម្បីត្រៀមបង្ការនិងឆ្លើយតបទៅនឹងគ្រោះអាសន្ន ដោយទទួលបានព័ត៌មានគ្រប់ជ្រុងជ្រោយ” ដែលទីភ្នាក់ងារ USAID បានគាំទ្រតាំងពីឆ្នាំ២០១៩ រហូតដល់ខែមីនា ឆ្នាំ២០២២។
កាលពីឆ្នាំមុន សហរដ្ឋអាមេរិកបានផ្តល់ថវិកាចំនួន៧០០ ០០០ដុល្លារ ដល់កម្មវិធីស្បៀងអាហារពិភពលោក ដើម្បីជួយដល់សហគមន៍រងគ្រោះដោយទឹកជំនន់នៅកម្ពុជាផងដែរ។
កម្មវិធីស្បៀងអាហារពិភពលោក នឹងប្រើជំនួយបន្ថែមនេះ ដើម្បីពង្រឹងសមត្ថភាពដៃគូរដ្ឋាភិបាលនិងភាគីអនុវត្តកិច្ចការមនុស្សធម៌ តាមរយៈវិធីសាស្រ្ត ការសម្របសម្រួល បច្ចេកវិទ្យា និងឧបករណ៍នានា ពាក់ព័ន្ធនឹងការគ្រប់គ្រងហានិភ័យនៃគ្រោះមហន្តរាយ។
លោកស្រី Claire CONAN តំណាងកម្មវិធីស្បៀងអាហារពិភពលោក បានថ្លែងអំណរគុណដល់ទីភ្នាក់ងារ USAID ចំពោះការគាំទ្របន្ថែមដល់ប្រទេសកម្ពុជា ដែលប្រឈមនឹងវិបត្តិអាកាសធាតុ ដូចជា ទឹកជំនន់ និងគ្រោះរាំងស្ងួតនេះ។
ក្រោមកិច្ចសហការជាមួយគណៈកម្មាធិការជាតិគ្រប់គ្រងគ្រោះមហន្តរាយ ដៃគូអង្គការមិនមែនរដ្ឋាភិបាល និងដៃគូស្រាវជ្រាវនិងវិទ្យាសាស្ត្រ កម្មវិធីស្បៀងអាហារពិភពលោក នឹងពង្រឹងប្រព័ន្ធព័ត៌មានសម្រាប់គ្រប់គ្រងគ្រោះមហន្តរាយជាតិដែលមានស្រាប់ ដែលមានឈ្មោះថា «ប្រព័ន្ធព័ត៌មានទាន់ហេតុការណ៍ និងអង្កេតតាមដានស្ថានការណ៍គ្រោះមហន្តរាយ» (ឬហៅកាត់ថា PRISM) ដោយកែលម្អសមត្ថភាពតាមដានគ្រោះវិបត្តិអាកាសធាតុ ប៉ាន់ស្មានផលប៉ះពាល់ទៅលើប្រជាជន និងកំណត់គោលដៅផ្ដល់ជំនួយបន្ទាន់ដល់កន្លែងដែលត្រូវការជំនួយបំផុត។
ក្រៅពីនេះ កម្មវិធីស្បៀងអាហារពិភពលោក នឹងគាំទ្រដល់ប្រព័ន្ធប្រកាសអាសន្នជាមុន អំពីទឹកជំនន់ គឺប្រព័ន្ធ EWS1294 ដើម្បីជួយពង្រីកវិសាលភាព និងពង្រឹងសមត្ថភាពមន្រ្តីមូលដ្ឋាន និងសហគមន៍ដែលរងហានិភ័យ ដោយប្រើប្រាស់ព័ត៌មាន ដើម្បីសង្គ្រោះអាយុជីវិតប្រជាពលរដ្ឋ៕
