តុលាការខេត្តកំពត បានសម្រេចឃុំខ្លួនសន្តិសុខម្នាក់ធ្វើការនៅក្រុមហ៊ុនរបស់ឧកញ៉ា សូ ងួន ក្រោយពីបុរសរូបនោះបានប្រើអំពើហិង្សាទៅលើប្រជាពលរដ្ឋ ពាក់ព័ន្ធជម្លោះដីធ្លី។
សមត្ថកិច្ចបានឃាត់ខ្លួនសន្តិសុខរូបនោះកាលពីថ្ងៃទី១៥ ខែមីនា ឆ្នាំ២០២១ និងបានបញ្ជូនទៅសាលាដំបូងខេត្តកំពតនៅថ្ងៃបន្ទាប់ ក្រោយពីសន្តិសុខរូបនោះបានប្រើអំពើហិង្សាទៅប្រជាពលរដ្ឋក្នុងជម្លោះដីធ្លីមួយកន្លែងស្ថិតនៅភូមិត្រពាំងភ្លាំង ស្រុកឈូក ខេត្តកំពត។
អ្នកនាំពាក្យសាលាដំបូងខេត្តកំពត លោក ខាន់ សុផល ប្រាប់ វីអូឌី នៅថ្ងៃសុក្រនេះថា សន្តិសុខក្រុមហ៊ុនរបស់ឧកញ៉ា សូ ងួន ដែលប្រើហិង្សាលើពលរដ្ឋនោះ ត្រូវបានចៅក្រមស៊ើបសួរ សម្រេចឃុំខ្លួនបណ្តោះអាសន្នហើយកាលពីថ្ងៃម្សិលមិញនេះ ក្រោមបទចោទ «ហិង្សាដោយចេតនា មានស្ថានទម្ងន់ទោស»។
គួរំឭកថា កាលពីថ្ងៃទី១៥ ខែមីនា ឆ្នាំ២០២១ មានហេតុការណ៍ប៉ះទង្គិចគ្នាមួយរវាងសន្តិសុខរបស់ក្រុមហ៊ុនរបស់ឧកញ៉ា សូ ងួន ជាមួយប្រជាពលរដ្ឋ ដោយបណ្តាលឱ្យពលរដ្ឋមួយចំនួនរងរបួសស្រាល ខណៈក្រុមហ៊ុនមួយនេះដាក់គ្រឿងចក្រអមដោយកម្លាំងសន្តិសុខជាង១០០នាក់ ចុះកាយក្រវាត់ព្រំដីប៉ះពាល់ដីធ្លី និងផលដំណាំប្រជាពលរដ្ឋជាច្រើនគ្រួសារ។
ពាក់ព័ន្ធនឹងបញ្ហាជម្លោះដីធ្លីនេះដែរ រដ្ឋបាលខេត្តកំពត បានតម្រូវឱ្យក្រុមហ៊ុនរបស់ឧកញ៉ា សូ ងួន ផ្អាកការឈូសឆាយកាយព្រំដីជាបណ្តោះអាសន្ន ដោយរង់ចាំការដោះស្រាយទំនាស់ដីធ្លីជាមួយប្រជាពលរដ្ឋឱ្យបានចប់សព្វគ្រប់សិន៕
