សមត្ថកិច្ចខេត្តកំពត បានឃាត់ខ្លួនសន្តិសុខម្នាក់របស់ក្រុមហ៊ុនឯកជនមួយ ក្រោយបុរសរូបនោះ បានប្រើអំពើហិង្សាទៅលើប្រជាពលរដ្ឋពាក់ព័ន្ធរឿងជម្លោះដីធ្លី។
លោក ហែម គ្នី មេប៉ុស្តិ៍នគរបាលឃុំត្រពាំងភ្លាំង ក្នុងខេត្តកំពត ប្រាប់ វីអូឌី នៅថ្ងៃអង្គារម្សិលមិញថា កាលពីថ្ងៃចន្ទ មានហេតុការណ៍ប៉ះទង្គិចគ្នាមួយរវាងសន្តិសុខរបស់ក្រុមហ៊ុនរបស់ឧកញ៉ា សូ ងួន ជាមួយប្រជាពលរដ្ឋ បណ្តាលឱ្យពលរដ្ឋមួយចំនួនរងរបួសស្រាល ខណៈក្រុមហ៊ុនមួយនេះបានដាក់គ្រឿងចក្រចុះកាយក្រវាត់ព្រំដី ប៉ះពាល់ដីធ្លី និងផលដំណាំប្រជាពលរដ្ឋស្ថិតក្នុងភូមិដុំផ្តៅ ឃុំត្រពាំងភ្លាំង ស្រុកឈូក ខេត្តកំពត ។
មន្ត្រីប៉ូលិសរូបនេះអះអាងថា ក្រោយកើតហេតុនោះ សមត្ថកិច្ចបានឃាត់ខ្លួនសន្តិសុខម្នាក់របស់ក្រុមហ៊ុននោះបញ្ជូនទៅស្នងការដ្ឋាននគរបាលខេត្តកំពត ដើម្បីសាកសួរនិងចាត់វិធានការតាមនីតិវិធីច្បាប់។
លោកថា៖ «យើងបញ្ជូនទៅ [ស្នងការដ្ឋាននគរបាល] ខេត្ត តាំងពីម្សិលមិញម៉្លេះ ដោយសារគាត់ប្រើហិង្សាលើពលរដ្ឋ។ ព័ត៌មានលម្អិត បងសួរទៅខាងខេត្ត»។
ស្នងការនគរបាលខេត្តកំពត លោក ម៉ៅ ច័ន្ទមធុរិទ្ធ ប្រាប់ វីអូឌី យ៉ាងខ្លីថា សមត្ថកិច្ចកំពុងកសាងសំណុំរឿងនិងបញ្ជូនជនសង្ស័យជាសន្តិសុខរូបនោះទៅតុលាការ ដើម្បីចាត់វិធានការតាមនីតិវិធីច្បាប់។
ក្រុមប្រឹក្សាឃុំត្រពាំងភ្លាំង លោក ប៊ុន សារិក ដែលអះអាងថា បានរងផលប៉ះពាល់ដីចម្ការដំណាំប្រហែល៦ហិកតាដែរនោះ បាននិយាយថា កាលពីថ្ងៃចន្ទ ទី១៥ខែនេះ ក្រុមហ៊ុនរបស់ឧកញ៉ា សូ ងួន បានដាក់គ្រឿងចក្រ អមដោយកម្លាំងសន្តិសុខជាង១០០នាក់ដែលប្រដាប់ដោយដំបងឆក់ ដំបងឈើ កាំបិតស្នៀត និងចម្ពាមកៅស៊ូផងនោះ បានចុះទៅកាយប្រវាត់ព្រំដី ដែលក្រុមហ៊ុនអះអាងថាជាដីរបស់ខ្លួន មានបណ្ណកម្មសិទ្ធិឆ្នាំ២០១៥ ដោយប៉ះពាល់លើដីប្រជាពលរដ្ឋជាច្រើនគ្រួសារ។
ក្រុមប្រឹក្សាឃុំរូបនេះបន្តថា ក្រុមហ៊ុនបានកាយផ្តាច់ផ្លូវនិងឈូសឆាយផលដំណាំ រួមទាំងខ្ទមចាំចម្ការរបស់ប្រជាពលរដ្ឋជាច្រើនកន្លែង ដែលធ្វើឱ្យប្រជាពលរដ្ឋខឹងសម្បារ រហូតមានការប៉ះទង្គិចគ្នាបណ្តាលឱ្យពលរដ្ឋ៥នាក់រងរបួសស្រាលត្រង់ដៃ។
លោកបន្ថែមថា៖ «គេវាយក្បាល មិនយកដៃការពារក្បាល! អញ្ចឹងផុតក្បាល មិនត្រូវដៃ អត់បាក់ទេ គ្រាន់តែហើម សន្តិសុខក្រុមហ៊ុនហ្នឹងមានដំបងឆក់ ដំបងឫស្សី មានដំបងឈើ កាំបិតស្នៀត ហើយប្រជាពលរដ្ឋប្រមាណ២០ទៅ៣០នាក់ ដៃទទេហ្នឹង»។
លោក កែន សំអាន អាយុ៦០ឆ្នាំ អះអាងថាជាមន្ត្រីយោធាកងអន្តរាគមន៍លេខ២ នៃបញ្ជាការដ្ឋានការពារកោះឆ្នេរ និយាយថា ក្រុមគ្រួសារលោកមានដីប្រហែល១០ហិកតាដែលបានដាំពេញដោយដំណាំហូបផ្លែ ត្រូវបានគ្រឿងចក្ររបស់ក្រុមហ៊ុនឧកញ៉ា សូ ងួន កាយព្រំដីក្រវាត់យកអស់ពាក់កណ្តាល។
មន្ត្រីយោធារូបនេះអះអាងថា ដីប្រហែល១០ហិកតានោះ គឺលោកនិងភរិយាទទួលបានចំណែកពីប្រមុខរដ្ឋាភិបាលដែលបានចែកឱ្យពួកគាត់ក្រោយសម័យសមាហរណកម្ម ដើម្បីឱ្យគ្រួសារកងទ័ពរស់នៅនិងអាស្រ័យផល។ លោកថា គ្រួសារលោកបានចូលទៅអាស្រ័យផលលើដីនេះ តាំងពីពេលនោះរហូតមកដល់បច្ចុប្បន្ន ហើយទើបតែនៅដើមឆ្នាំ២០២១នេះទេដែលក្រុមហ៊ុន អះអាងថា ដីតំបន់នោះជាដីរបស់ខ្លួនមានបណ្ណសិទ្ធិទៅវិញ។
បើតាមលោក កែន សំអាន កន្លងមក ក្រុមនិស្សិតបានចុះវាស់វែងដីនោះឱ្យគ្រួសាលោកបានប្រហែលជា២ហិកតាដែរ ប៉ុន្តែមិនបានផ្តល់បណ្ណកម្មសិទ្ធិជូនលោកនៅឡើយរហូតមដល់ពេលនេះ។
លោកបន្ថែមថា៖ «ខ្ញុំសុំឱ្យសម្តេច [ហ៊ុន សែន] ជួយដល់កូនចៅផង ព្រោះដីនេះមិនមែនពួកខ្ញុំរំលោភយកដីរបស់ក្រុមហ៊ុនទេ។ ដីខ្ញុំទទួលបានក្រោយសម័យសមាហរណកម្ម ជាដីគោលនយោបាយរបស់សម្តេច ឱ្យបែងចែកជូនអង្គភាព បែងចែកតាមបុគ្គល ដើម្បីអាស្រ័យផលទេ»។
វីអូឌី មិនអាចសុំការបញ្ជាក់ពីឧកញ៉ា សូ ងួន បានទេ ពាក់ព័ន្ធការចោទប្រកាន់លើក្រុមហ៊ុនរបស់លោកនេះ។
មន្ត្រីមន្ទីរកសិកម្ម រុក្ខាប្រមាញ់ និងនេសាទ លោក អៀន ង៉ុន ធ្លាប់ប្រាប់ វីអូឌី ថា ក្រុមហ៊ុន សូ ងួន ទទួលបានសម្បទានសេដ្ឋកិច្ចពីរដ្ឋាភិបាលនៅឆ្នាំ២០០៥ ក្នុងទំហំដីសរុប៩ ៨០០ហិកតា ប៉ុន្តែក្រោយមកបានអនុវត្តសារាចរលេខ០១ របស់រដ្ឋាភិបាល ដោយក្រុមហ៊ុននេះបានកាត់ដីសម្បទានមួយផ្នែកធំបែងចែកទៅឱ្យប្រជាពលរដ្ឋរស់នៅនិងអាស្រ័យផលជាក់ស្តែង ដោយបច្ចុប្បន្ននៅសស់តែ៦ ០០៧ហិកតាប៉ុណ្ណោះ។
លោក អៀន ង៉ុន អះអាងថា កាលពីឆ្នាំ២០២០ មានប្រជាពលរដ្ឋប្រហែល៣០០គ្រួសារបានចូលទៅរុករាននិងចាប់យកដីរបស់ក្រុមហ៊ុន ដោយបានសង់ខ្ទមនិងបោះបង្គោលព្រំ ដែលបណ្តាលឱ្យមានជម្លោះរវាងសន្តិសុខនិងប្រជាពលរដ្ឋ។
កាលពីថ្ងៃទី១៨ ខែវិច្ឆិកា ឆ្នាំ២០២០ សន្តិសុខក្រុមហ៊ុនរបស់ឧកញ៉ា សូ ងួន ម្នាក់បានស្លាប់ និងម្នាក់ទៀតបានរងរបួស ដោយសារជនមិនស្គាល់មុខបានប្រើប្រាស់កាំភ្លើងកែច្នៃលួចបាញ់ ខណៈសន្តិសុខជាច្រើននាក់របស់ក្រុមហ៊ុនេះជិះឡានចុះល្បាតដីរបស់ក្រុមហ៊ុន ស្ថិតក្នុងឃុំត្រពាំងភ្លាំង ស្រុកឈូក ខេត្តកំពត។
បើតាមក្រុមប្រឹក្សាឃុំត្រពាំងភ្លាំង លោក ប៊ុន សារិក នៅក្នុងឃុំត្រពាំងភ្លាំង មានភូមិចំនួន៣ដែលរងផលប៉ះពាល់ដីធ្លីជាមួយក្រុមហ៊ុនរបស់ឧកញ៉ា សូ ងួន ក្នុងនោះ «ភូមិដុំផ្តៅ»មានពលរដ្ឋជាង១០០គ្រួសារបានរងផលប៉ះពាល់ ដោយមួយគ្រួសារប៉ះពាល់ដីប្រមាណ៣ទៅ១០ហិកតា៕
