រដ្ឋបាលខេត្តកំពត បានតម្រូវឱ្យក្រុមហ៊ុនរបស់ឧកញ៉ា សូ ងួន ផ្អាកការឈូសឆាយកាយព្រំដីជាបណ្តោះអាសន្ន ដោយរង់ចាំការដោះស្រាយទំនាស់ដីធ្លីជាមួយប្រជាពលរដ្ឋឱ្យបានចប់សិន។
ការស្នើនេះបានធ្វើឡើងក្រោយពីមានហេតុការណ៍ប៉ះទង្គិចគ្នាមួយរវាងសន្តិសុខក្រុមហ៊ុននេះ ជាមួយប្រជាពលរដ្ឋ នៅចំណុចឃុំត្រពាំងភ្លាំង ស្រុកឈូក ខេត្តកំពត កាលពីថ្ងៃទី១៥ ខែមីនា ឆ្នាំ២០២១ ដែលឈានទៅដល់ការចាប់ខ្លួនសន្តិសុខក្រុមហ៊ុនម្នាក់បញ្ជូនទៅតុលាការផងដែរ។
ក្នុងលិខិតមួយច្បាប់របស់រដ្ឋបាលខេត្តកំពត ផ្ញើទៅកាន់ឧកញ៉្ញា សូ ងួន អគ្គនាយកក្រុមហ៊ុន វើលដ៏ទ្រីស្តារ អ៊ិនធើថិនមេន បានលើកឡើងថា ក្រុមហ៊ុនរបស់ឧកញ៉ា សូ ងួន បានយកគ្រឿងចក្រ២គ្រឿង អមដោយសន្តិសុខជាង១០០នាក់ ធ្វើសកម្មភាពឈូសឆាយកាយព្រំដីទំនាស់ទំហំ២៣៨ហិកតាដែលកំពុងកាន់កាប់ដោយអតីតកងកម្លាំងសមាហរណកម្មការពារកោះឆ្នេរ។
រដ្ឋបាលខេត្តកំពត បានចាត់ទុកសកម្មភាពឈូសឆាយរបស់ក្រុមហ៊ុននេះថា ជាទង្វើមិនអនុវត្តតាមស្មារតីនៃកិច្ចប្រជុំនាពេលកន្លងមក រវាងតំណាងក្រសួងការពារជាតិ តំណាងបញ្ជាការដ្ឋានការពារកោះឆ្នេរ និងតំណាងក្រុមហ៊ុន។
រដ្ឋបាលខេត្ត បញ្ជាក់ថា៖ «សូមឱ្យលោកឧកញ៉ា សូ ងួន អគ្គនាយកក្រុមហ៊ុន វើលដ៏ទ្រីស្តារ អ៊ិនធើថិនមេន ត្រូវផ្អាកសកម្មភាពឈូសឆាយកាយព្រំដីជាបណ្តោះអាសន្ន ដោយរង់ចាំការដោះស្រាយទំនាស់ឱ្យបានចប់សព្វគ្រប់សិន»។
វីអូឌី មិនអាចសុំការឆ្លើយតបពីលោក ជាវ តាយ អភិបាលខេត្តកំពត និងលោក ភូ លិក អ្នកនាំពាក្យរដ្ឋបាលខេត្ត និងលោក យិន វុឌ្ឍ ប្រធានមន្ទីររៀបចំដែនដីខេត្តកំពត បានទេ នៅថ្ងៃពុធនេះ។
ចំណែកអនុប្រធានមន្ត្រីមន្ទីរកសិកម្ម រុក្ខាប្រមាញ់ និងនេសាទខេត្តកំពត លោក អៀន ង៉ុន មានប្រសាសន៍ថា នៅព្រឹកមិញនេះ ថ្នាក់ដឹកនាំ តំណាងក្រសួងកសិកម្ម និងតំណាងកងទ័ព បានជួបប្រជុំគ្នារកដំណោះស្រាយជុំវិញជម្លោះដីធ្លីនេះ។ លោកថា រហូតមកដល់ពេលនេះ គឺពុំទាន់ចេញជាលទ្ធផលយ៉ាងណានៅឡើយទេ ដោយកំពុងបន្តរកដំណោះស្រាយទៀត។
លោកបន្ថែមថា៖ «យើងបានឱ្យខាងក្រុមហ៊ុនហ្នឹងផ្អាកសកម្មភាពឈូសឆាយសិន ហើយយើងឱ្យខាងប្រជាពលរដ្ឋនៅស្ងៀមស្ងាត់សិន រង់ចាំការដោះស្រាយរបស់អាជ្ញាធរពាក់ព័ន្ធ។ យើងមិនអាចសម្រេចកាត់ដីនេះទៅឱ្យភាគីណាមួយភ្លាមៗបានទេ ព្រោះរឿងដីមានបែបការចុះនៅក្រសួងកសិកម្ម ប៉ុន្តែរដ្ឋបាលខេត្តនឹងខិតខំដោះស្រាយវិវាទដីធ្លីនេះឱ្យបានឆាប់បំផុតជូនភាគីទាំងពីរ»។
ពាក់ព័ន្ធនឹងទំនាស់ដីធ្លីនេះដែរ នៅថ្ងៃពុធនេះ សមត្ថកិច្ចខេត្តកំពត បានបញ្ជូនសន្តិសុខម្នាក់របស់ក្រុមហ៊ុនឧកញ៉ា សូ ងួន ទៅសាលាដំបូងខេត្ត ក្រោយសន្តិសុខរូបនោះប្រើហិង្សាលើប្រជាពលរដ្ឋដែលជាភាគីទំនាស់។
ស្នងការនគរបាលខេត្តកំពត លោក ម៉ៅ ច័ន្ទមធុរិទ្ធ ប្រាប់ វីអូឌី ថាសមត្ថកិច្ចបានបញ្ជូនសន្តិសុខរបស់ក្រុមហ៊ុននោះទៅតុលាការហើយកាលពីព្រឹកមិញនេះ ពាក់ព័ន្ធការប្រើប្រាស់ហិង្សានិងប្រព្រឹត្តបទឧក្រិដ្ឋជាអាទិ៍។
អ្នកនាំពាក្យសាលាដំបូងខេត្តកំពត លោក ខាន់ សុផល ប្រាប់ វីអូឌី ថា គិតមកដល់ម៉ោងជាង៥រសៀលថ្ងៃពុធនេះ ចៅក្រមស៊ើបសួរ កំពុងដំណើរសាកសួរទៅលើជនសង្ស័យរូបនោះនៅឡើយ ដោយមិនទាន់ដឹងថានឹងសម្រេចយ៉ាងណានៅឡើយទេ។
ក្រុមប្រឹក្សាឃុំត្រពាំងភ្លាំង លោក ប៊ុន សារិក មានប្រសាសន៍ថា ពលរដ្ឋដែលរងផលប៉ះពាល់នៅក្នុងភូមិដុំផ្តៅ ភាគច្រើនជាគ្រួសារអតីត និងកងទ័ព។ លោកបន្តថា ដំណោះស្រាយដែលអ្នកភូមិចង់បាននោះគឺសុំឱ្យផ្តល់ដីអាស្រ័យផលជាក់ស្តែង និងចេញបណ្ណកម្មសិទ្ធិជូនពលរដ្ឋ។
លោកបន្ថែមថា៖ «អញ្ចឹងយើងបានដាំដុះបន្តតាំងពីពេលនោះមករហូតឆ្នាំ២០២១នេះ វាច្រើនណាស់ហើយ។ ឥលូវដំណាំដែលយើងដាំដុះហ្នឹង ត្រូវក្រុមហ៊ុនមកកាយត្រង់ដីដែលយើងមិនទាន់មានបណ្ណហ្នឹង។ អញ្ចឹងយើងទាមទារយកដីដែលសេសសល់ពីការវាស់វែង០១។ សុំឱ្យចេញបណ្ណកម្មសិទ្ធិនៅហ្នឹងតែម្តង ដើម្បីបញ្ចប់ជម្លោះ»។
បើតាមមន្ត្រីមន្ទីរកសិកម្មខេត្ត ក្រុមហ៊ុនរបស់ឧកញ៉ា សូ ងួន ទទួលបានសម្បទានសេដ្ឋកិច្ចពីរដ្ឋាភិបាលនៅឆ្នាំ២០០៥ ក្នុងទំហំដីសរុប៩ ៨០០ហិកតា ប៉ុន្តែក្រោយមក ដោយមានសារាចរលេខ០១ របស់រដ្ឋាភិបាល ក្រុមហ៊ុននេះបានកាត់ដីសម្បទានមួយផ្នែកធំបែងចែកទៅឱ្យប្រជាពលរដ្ឋរស់នៅនិងអាស្រ័យផលជាក់ស្តែង ដោយបច្ចុប្បន្ននៅសល់ដីតែ៦ ០០៧ហិកតាប៉ុណ្ណោះ។
កាលពីថ្ងៃទី១៨ ខែវិច្ឆិកា ឆ្នាំ២០២០ សន្តិសុខក្រុមហ៊ុនរបស់ឧកញ៉ា សូ ងួន ម្នាក់បានស្លាប់ និងម្នាក់ទៀតបានរងរបួស ដោយសារជនមិនស្គាល់មុខបានប្រើប្រាស់កាំភ្លើងកែច្នៃលួចបាញ់ ខណៈសន្តិសុខជាច្រើននាក់របស់ក្រុមហ៊ុនជិះឡានចុះល្បាតដីរបស់ក្រុមហ៊ុន ស្ថិតក្នុងឃុំត្រពាំងភ្លាំង ស្រុកឈូក ខេត្តកំពត៕
