អ្នកជំនាញសិទ្ធិមនុស្ស៥០រូប ស្នើដល់អង្គការសហប្រជាជាតិ (UN) ដាក់សម្ពាធលើរដ្ឋាភិបាលចិនឱ្យគោរពកាតព្វកិច្ចសិទ្ធិមនុស្សក្នុងនាមជារដ្ឋសមាជិកមួយ ដោយសារចិនតែងច្រានចោលមតិរិះគន់លើការបំបិទសិទ្ធិមនុស្សដែលកំពុងកើនឡើងគួរឱ្យបារម្ភ រួមទាំងបង្ក្រាបលើអ្នករិះគន់បញ្ហាមេរោគកូវីដ១៩ផងដែរ។
ក្រុមសិទ្ធិមនុស្សអន្តរជាតិ លើកឡើងថា ក្រុងប៉េកាំងបានបង្កើតច្បាប់សន្តិសុខហុងកុងដើម្បីរឹតបន្តឹងសេរីភាពពលរដ្ឋក្នុងដែនដីស្វយ័តពិសេសនេះ បានបង្ក្រាបលើអ្នកតវ៉ា និងដាក់ទោសក្រុមអ្នកកាសែត បុគ្គលិកពេទ្យ និងជនណាហ៊ាននិយាយពីបញ្ហាមេរោគកូវីដ១៩ជាដើម។ ក្រុមជំនាញឯករាជ្យទាំងនេះបន្ថែមថា យ៉ាងណា រដ្ឋអំណាចបក្សកម្មុយនីស្តចិនបដិសេធស្ទើរតែទាំងស្រុងរាល់ការរិះគន់លើការរំលោភបំពានសិទ្ធិមនុស្សជាមូលដ្ឋានក្នុងប្រទេសរបស់ខ្លួន។
ក្នុងសេចក្តីថ្លែងការណ៍កាលពីថ្ងៃសុក្រ ក្រុមអ្នកជំនាញដដែល បានអំពាវនាវដល់ភ្នាក់ងារ និងក្រុមប្រឹក្សាសិទ្ធិមនុស្ស UN ចាត់វិធានការដាច់ខាតលើក្រុងប៉េកាំងឱ្យអនុវត្តការគោរពសិទ្ធិមនុស្សតាមច្បាប់អន្តរជាតិ កតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ និងសេចក្តីប្រកាសរួមស៊ីណូ-អង់គ្លេសឆ្នាំ១៩៨៤។
តាមប្រភពដដែល ពួកគេក៏ស្នើឱ្យ UN លើកយកបញ្ហាសិទ្ធិមនុស្សនៅចិនជាបញ្ហាអាទិភាពក្នុងកិច្ចប្រជុំក្រុមប្រឹក្សាសិទ្ធិមនុស្ស UN លើកទី៤៤ ដែលចាប់ផ្តើមនៅថ្ងៃមិ្សលមិញ ដើម្បីជំរុញឱ្យប៉េកាំងទម្លាក់ចោលច្បាប់សន្តិសុខហុងកុង និងបើកឱ្យក្រុមជំនាញចុះវាយតម្លៃវិសាលភាពនៃការរំលោភសិទ្ធិមនុស្សនៅចិន។
នៅក្នុងសេចក្តីប្រកាសព័ត៌មាននៅថ្ងៃម្សិលមិញរបស់អង្គការឃ្លាំមើលសិទ្ធិមនុស្ស HRW ឱ្យដឹងបន្ថែមថា ក្រោមការដឹកនាំរបស់ប្រធានាធិបតីចិន លោក ស៊ី ជីងពីង អ្នកការពារសិទ្ធិមនុស្ស និងអ្នកតស៊ូនយោបាយនៅចិន ត្រូវបានបាត់ខ្លួន ជាប់ឃុំឃាំង និងឋិតក្រោមការតាមដាន។
ក្នុងសេចក្តីប្រកាសនោះ នាយក HRW ប្រចាំទីក្រុងហ្សឺណែវ លោក John Fisher លើកឡើងថា ក្រុមប្រឹក្សាសិទ្ធិមនុស្ស មិនគួរខ្ជះខ្ជាយឱកាសក្នុងការចាប់ផ្តើមទាមទារឱ្យចិនទទួលខុសត្រូវលើការរំលោភបំពានដែលកាន់តែធ្ងន់ធ្ងរឡើងៗរបស់ខ្លួននោះទេ។
នាយក HRW ប្រចាំនៅចិន លោកស្រី Sophie Richardson បន្ថែមថា ក្រុមអ្នកការពារសិទ្ធិមនុស្សជាច្រើននៅចិន ត្រូវរងពិន័យធ្ងន់ធ្ងរ ដោយគ្រាន់តែនិយាយអ្វីដែលក្រុមជំនាញសិទ្ធិមនុស្សបានលើកឡើង។ លោកស្រីថា រដ្ឋសមាជិកនានា គួរបង្ហាញការប្តេជ្ញាចិត្តចំពោះសិទ្ធិមនុស្ស ហើយដាក់សម្ពាធលើក្រុងប៉េកាំង ឱ្យទទួលខុសត្រូវចំពោះទង្វើរបស់ខ្លួន។
យ៉ាងណាក្តី ច្បាប់សន្តិសុខហុងកុង ត្រូវបានលោក ស៊ី ជីងពីង ចុះហត្ថលេខាដាក់ឱ្យប្រើប្រាស់ហើយនៅថ្ងៃម្សិលមិញ នៅចំពោះមុខការរិះគន់ពីប្រទេសលោកខាងលិច ពិសេស អាមេរិក ចក្រភពអង់គ្លេស សហភាពអឺរ៉ុប និងអង្គការណាតូ អំពីការព្យាយាមក្តាប់ដែនដីស្វយ័តហុងកុងពីចិនដីគោក។
បើតាមទូរទស្សន៍ BBC ច្បាប់ថ្មីនេះ បានផ្តល់អំណាចដល់រដ្ឋបាលចិនដីគោកដាក់ទោសជាប់ពន្ធនាគារដល់១ជីវិត ចំពោះពលរដ្ឋហុងកុងណាដែលត្រូវបានចាត់ជាភេវរករ ឬផ្សំគំនិតជាមួយកម្លាំងបរទេសដើម្បីបង្កចលាចលនៅហុងកុង។
តាមប្រភពដដែល មេដឹកនាំក្រុងហុងកុង លោកស្រី ខារី ឡាំ បានថ្លែងការពារច្បាប់ដ៏ចម្រូងចម្រាសនេះ ដោយថា វាបានបំពេញចន្លោះប្រហោងមួយក្នុងច្បាប់សន្តិសុខជាតិចិន។
ច្បាប់សន្តិសុខហុងកុង ចាប់លេចរូបរាងឡើងក្រោយអាមេរិកផ្តើមបង្កើតច្បាប់ដាក់ទណ្ឌកម្មលើចិន បើហ៊ានប្រើកម្លាំងទ័ពបង្រ្កាបបាតុកម្មទាមទារទម្លាក់លោកស្រី ខារី ឡាំ ចេញពីតំណែង ក្រោយលោកស្រីស្នើច្បាប់បញ្ជូនពលរដ្ឋហុងកុងទៅកាត់ទោសនៅចិនដីគោក។
អាមេរិកចោទការអន្តរាគមន៍របស់ចិននៅហុងកុង ថាជាការរំលោភសេចក្តីប្រកាសរួមរវាងចិនដីគោក និងចក្រភពអង់គ្លេសនៅឆ្នាំ១៩៨៤។ សេចក្តីប្រកាសនោះ កំណត់កោះហុងកុងជាដែនរដ្ឋបាលស្វយ័តពិសេស ដែលប្រើប្រព័ន្ធដឹកនាំតាមបែបលទ្ធិប្រជាធិបតេយ្យ ដាច់ដោយឡែកពីចិនដីគោក។
ដោយឡែក ក្រុងប៉េកាំងតែងប្រកាសចាត់ទុកបញ្ហាហុងកុងគឺជាកិច្ចការផ្ទៃក្នុងរបស់ចិន ដែលគ្មានរដ្ឋបរទេសណាមានសិទ្ធិជ្រៀតជ្រែក ហើយថា ច្បាប់ថ្មីនេះ គឺបង្កើតឡើងដើម្បីពង្រឹងសន្តិសុខ និងសុវត្ថិភាពសម្រាប់ពលរដ្ឋនៅហុងកុងប៉ុណ្ណោះ៕