ប្រមុខរដ្ឋាភិបាលហុងកុង បានព្រមានថាអន្តរាគមន៍យោធារបស់ចិនអាចនឹងកើតមាន ប្រសិនបើបាតុកម្មនៅក្នុងទីក្រុងនេះកាន់តែអាក្រក់ខ្លាំងជាងនេះ។
ប្រមុខរដ្ឋាភិបាលហុងកុងលោកស្រី Carrie Lam បានថ្លែងក្នុងសន្និសីទសារព័ត៌មានកាលពីថ្ងៃទី៨ ខែតុលា ម្សិលមិញថា បាតុកម្មដែលអូសបន្លាយរយៈពេលជាង៤ខែមកនេះមិនមែនជាចលនាសន្តិភាពដើម្បីប្រជាធិបតេយ្យទៀតនោះឡើយ តែវាបានប្រែក្លាយជាអំពើហិង្សារួចទៅហើយ។ មេដឹកនាំហុងកុងរូបនេះ បានលើកឡើងបន្តថាហុងកុងនឹងខិតខំដោះស្រាយបញ្ហាដោយគ្មានឯង ប៉ុន្តែប្រសិនបើស្ថានការណ៍កាន់តែអាក្រក់ខ្លាំង រដ្ឋាភិបាលមិនមែនជម្រើសណាក្រៅតែពីពឹងចិនដើម្បីរក្សាសន្តិភាពក្នុងក្រុងស្វយ័តមូយនេះទេ។ លោកស្រី បានបន្ថែមថាការស្នើសុំកិច្ចអន្តរាគមន៍ពីរដ្ឋាភិបាលក្រុងប៉េកាំងក៏មានចែងក្នុងរដ្ឋធម្មនុញ្ញហុងកុងដែរ តែលោកស្រីមិនបានបញ្ជាក់នោះទេថាតើក្នុងស្ថានភាពធ្ងន់ធ្ងរកម្រិតណាដែលចិនអាចធ្វើអន្តរាគមន៍យោធាបាន។
ទោះយ៉ាងណាក៏ដោយ លោកស្រី Carrie Lam បានអះអាងថាហុងកុងត្រូវតែខិតខំដោះស្រាយបញ្ហាដែលកំពុងប្រឈមដោយខ្លួន ហើយនេះក៏ជាអ្វីដែលរដ្ឋាភិបាលក្រុងប៉េកាំងចង់ឃើញផងដែរ។
បាតុកម្មក្នុងក្រុងហុងកុង បានចាប់ផ្តើមឡើងនៅខែមិថុនាដោយសារតែរដ្ឋាភិបាលហុងកុងគ្រោងបង្កើតច្បាប់បត្យាប័នដែលច្បាប់នេះចែងពីការបញ្ជូនអ្នកទោសពីហុងកុងទៅកាត់ក្តីនៅចិនដីគោក។ ក្រុមបាតុករហុងកុង ហៅសេចក្តីព្រាងច្បាប់នេះ ថាជាចេតនារបស់រដ្ឋាភិបាលក្រុងប៉េកាំងក្នុងការបង្កើនឥទ្ធិពលរបស់ចិនលើអតីតដែនដីដែលស្ថិតក្រោមអាណានិគមអង់គ្លេសមួយនេះ។ លោកស្រី Carrie Lam បានទទួលយកសំណើរបស់ក្រុមបាតុករដោយប្រកាសលុបចោលច្បាប់ធ្វើបត្យាប័នជាផ្លូវការ កាលពីថ្ងៃទី៤ ខែកញ្ញា។
បើទោះបីជាមានការយល់ព្រមពីមេដឹកនាំរបស់ខ្លួនក្នុងការបញ្ចប់ច្បាប់បត្យាប័នយ៉ាងណាក្តី ពលរដ្ឋហុងកុងនៅតែធ្វើការតវ៉ាទាមទារឲ្យលោកស្រីCarrie Lam ចុះចេញពីដំណែង ស៊ើបអង្កេតការប្រើប្រាស់ហិង្សារបស់សមត្ថកិច្ចលើក្រុមបាតុករ ដោះលែងអ្នកដែលត្រូវបានចាប់ខ្លួននាពេលកន្លងមក និងបើកទូលាយលំហរប្រជាធិបតេយ្យដោយឈប់ហៅក្រុមអ្នកតវ៉ាថាជាកុបករ។ ការតវ៉ា បានបណ្តាលឲ្យមានការប៉ះពាល់ទង្គិចគ្នាជាមួយបន្តបន្ទាប់រវាងសមត្ថកិច្ចនិងក្រុមបាតុករ។
បញ្ហានេះ បានធ្វើឲ្យក្រុមសមាជិកសភាក្រុងហុងកុងដែលមាននិន្នាការគាំទ្ររដ្ឋាភិបាលក្រុងប៉េកាំងមួយចំនួនជំរុញរដ្ឋាភិបាលរបស់ពួកគេបង្កើតច្បាប់គ្រាអាសន្នដើម្បីបញ្ចប់នូវការតវ៉ាដែលពួកគេហៅថាជាកុបកម្មដ៏ហិង្សាកាលពីថ្ងៃទី១ ខែតុលាក្នុងពេលដែលពួកគេចូលរួមខួបទី៧០នៃការបង្កើតសាធារណរដ្ឋចិន។
ក្រោយការអំពាវនាវមិនបានប៉ុន្មានថ្ងៃផងពោលគឺនៅថ្ងៃទី៤ ខែតុលា មេដឹកនាំហុងកុងបានចេញសេចក្តីប្រកាសដ៏កម្រមួយដោយហាមពលរដ្ឋពាក់ម៉ាសពេលជួបជុំគ្នាជាសាធារណៈក្រោមច្បាប់គ្រាអាសន្ន។ ច្បាប់នេះនឹងដាក់ទោសទណ្ឌលើពលរដ្ឋណាដែលល្មើស ដោយពិន័យជាប្រាក់ប្រហែល៣២០០ដុល្លា និងប្រឈមមុខនឹងការជាប់ពន្ធនាការរហូតដល់មួយឆ្នាំ។ នៅពេលច្បាប់នេះដាក់ចេញឲ្យអនុវត្តន៍ភ្លាមៗនៅថ្ងៃទី៥ ខែតុលា ពលរដ្ឋហុងកុងជាច្រើនម៉ឺននាក់បានចេញតវ៉ាប្រឆាំង ដោយពួកគេថាច្បាប់នេះបានបើកដៃឲ្យក្រុមសមត្ថកិច្ចធ្វើការបង្រ្កាបទៅលើពួកគេកាន់តែខ្លាំងថែមទៀត៕