គណបក្សប្រជាជនកម្ពុជា ហាក់ឈានដល់ចំណុចកំពូលដាច់តែឯងនៅក្នុងសង្វៀនប្រកួត ក្រោយពេលដែលក្តោបយកអាសនៈទាំងអស់ចំនួន ១២៥ ក្នុងអាណត្តិទី៦ ហើយមេបក្សនេះប្រកាសត្រៀមដឹកនាំប្រទេសពី ៥០ទៅ ១០០ឆ្នាំទៀត។
នៅក្នុងឱកាសពិនិត្យការដ្ឋានសាងសង់ព្រលានយន្តហោះនៅក្នុងខេត្តកណ្តាល កាលពីថ្ងៃទី២២ ខែមិថុនា ឆ្នាំ២០២០ លោកនាយករដ្ឋមន្ត្រី ហ៊ុន សែន បានថ្លែងទៅកាន់គូប្រជែងនយោបាយរបស់លោកថា ការរៀបចំស្នាក់ការកណ្តាលនៅភ្នំពេញ និងស្នាក់ការសាខានៅតាមខេត្តផ្សេងៗទ្រង់ទ្រាយធំនោះ គឺបង្ហាញពីគោលបំណងត្រៀមខ្លួនគ្រប់គ្រងប្រទេសក្នុងរយៈពេលវែងឆ្ងាយ។
លោក ហ៊ុន សែន មានប្រសាសន៍ថា៖ «អ្នកឯងសម្លឹងមើល Headquarter របស់គណបក្សប្រជាជន មើលស្នាក់ការកណ្តាលរបស់គណបក្សប្រជាជន តាំងពីស្នាក់កណ្តាលដល់ស្នាក់ខេត្ត ធ្វើមិនមែនសម្រាប់ ២ឆ្នាំ ៣ឆ្នាំទេ ធ្វើសម្រាប់ ៥០ឆ្នាំ ១០០ឆ្នាំទៅមុខ អ្នកឯងត្រូវចាំ។ គេវិនិយោគទៅលើហេដ្ឋារចនាសម្ព័ន្ធ និងការបណ្តុះបណ្តាលធនធានមនុស្ស មិនមែនសំដៅដឹកនាំកញ្ឆក់កណ្តៀតដូចពួកអ្នកឯងទេ»។
វិមានស្នាក់ការកណ្តាលរបស់គណបក្សប្រជាជនកម្ពុជា ស្ថិតនៅតាមបណ្តោយមហាវិថីព្រះនរោត្តមក្នុងរាជធានីភ្នំពេញ មានលក្ខណៈធំស្កឹមស្កៃ មិនមានបក្សផ្សេងណាមានស្នាក់ការធំដូចឡើយ។ ស្នាក់ការកណ្តាលថ្មីរបស់គណបក្សប្រជាជនដែលចំណាយលុយសាងសង់អស់ជាង ៣០លានដុល្លារនោះ ត្រូវបានធ្វើពិធីសូត្រមន្តដើម្បីចូលប្រើប្រាស់ជាផ្លូវការនៅថ្ងៃទី២៨ ខែមិថុនា ឆ្នាំ២០២០។
បើទោះជាលោកនាយករដ្ឋមន្ត្រី ហ៊ុន សែន រៀបចំខ្លួនត្រៀមឱ្យគណបក្សរបស់លោកឈ្នះការប្រកួតប្រជែងដឹកនាំប្រទេសពី ៥០ទៅ ១០០ឆ្នាំទៀតក៏ដោយ ប៉ុន្តែ នេះគ្រាន់តែជាផែនការ ឬ សេចក្តីប្រាថ្នា ហើយបានសម្រេចឬអត់នោះគឺអាស្រ័យលើសមត្ថភាពដោះស្រាយបញ្ហាចំពោះមុខ។
ក្នុងចំណោមបញ្ហាចំពោះមុខជាច្រើននោះគឺ បញ្ហាចម្បងមួយចំនួនដែលមិនអាចមើលរំលងបានដូចជា បញ្ហាផ្ទៃក្នុងបក្ស បញ្ហាបក្សផ្សេងប្រកួតប្រជែង ឥទ្ធិពលមេរោគកូរ៉ូណា ការកាត់ផ្តាច់ប្រព័ន្ធអនុគ្រោះពន្ធ បញ្ហាសេដ្ឋកិច្ចជាតិ បញ្ហាជីវភាព និងបំណុលរបស់ពលរដ្ឋជាដើម។
បើទោះជាថ្នាក់ដឹកនាំគណបក្សប្រជាជនអះអាងបន្តបន្ទាប់ថា ផ្ទៃក្នុងបក្សនេះរឹងមាំល្អក៏ដោយ ប៉ុន្តែ ជាធម្មជាតិពិត នៅក្នុងគ្រួសារតូច ឬធំ មិនមែនមានតែសំឡេងសើចសប្បាយ ឬស្នាមញញឹមរហូតនោះទេ គឺតែងតែមានការទាស់ទែងខ្វែងគំនិតគ្នាចៀសមិនផុត ដូចគ្នាទៅនឹងដើមឈើតូច ឬធំ តែងតែមានមែកពុក គឺឈឺធំមែកពុកធំ ឈើតូចមែកពុកតូច។
នៅវេទិកាសាធារណៈនានា ថ្នាក់ដឹកនាំជាន់ខ្ពស់ផ្សេងទៀត ទោះមិនទាន់ក្លាហានដូចលោកនាយករដ្ឋមន្ត្រី ដែលហ៊ានប្រកាសគាំទ្រកូនខ្លួនឯងប្រកួតប្រជែងយកតំណែងនាយករដ្ឋមន្ត្រីក៏ដោយ ប៉ុន្តែ ក្នុងចិត្តរបស់ពួកគេក៏អាចចង់ឱ្យកូនកាន់តំណែងនេះដែរ។
នៅក្នុងបទសម្ភាសន៍មួយជាមួយផលិតករជនជាតិអាមេរិកកាលពីខែកញ្ញា ឆ្នាំ២០១៥ លោកនាយករដ្ឋមន្ត្រី ហ៊ុន សែន បង្ហាញពីក្តីកង្វល់នៅពេលលោកឈប់ដឹកនាំ ថាតើអ្នកណាដឹកនាំ និងមានអ្វីកើតឡើង។
បញ្ហាប្រព័ន្ធអនុគ្រោះ EBA ដែលអឺរ៉ុបនឹងចាប់ផ្តើមកាត់ចេញ ២០ភាគរយ នៅថ្ងៃទី១២ ខែសីហាខាងមុខនេះ កំពុងក្លាយជាក្តីកង្វល់ធំមួយរបស់អ្នកវិនិយោគនៅកម្ពុជា។
កាលពីថ្ងៃទី២ ខែមិថុនា សមាគមរោងចក្រកាត់ដេរនៅកម្ពុជា (GMAC) សមាគមស្បែកជើងកម្ពុជា (CFA) និងសភាពាណិជ្ជកម្មអឺរ៉ុបនៅកម្ពុជា បានចេញលិខិតរួមគ្នាមួយ ស្នើទៅអឺរ៉ុបពន្យារពេលដក EBA ដោយសារវិបត្តិកូវីដ១៩ កំពុងប៉ះទង្គិចធ្ងន់ធ្ងរដល់រោងចក្រផលិតទំនិញ។ ក្រុមអ្នកជំនួញទាំងនេះ ព្រមានថា បើអឺរ៉ុបនៅតែដាក់ទណ្ឌកម្មតាមការគ្រោងទុកនោះ នឹងធ្វើឱ្យជីវភាពពលរដ្ឋខ្មែររាប់លាននាក់ កាន់តែប៉ះពាល់ខ្លាំងថែមមួយកម្រិតទៀត។
ក្តីកង្វល់របស់សមាគមអ្នកជំនួញទាំងនេះ មិនទាន់មានការឆ្លើយតបយ៉ាងណាពីអឺរ៉ុបនៅឡើយទេ ខណៈថ្ងៃកំណត់ចាប់ផ្តើមកាត់ប្រព័ន្ធអនុគ្រោះពន្ធ ២០ភាគរយ កាន់តែខិតជិតមកដល់។
សម្រាប់លោកនាយករដ្ឋមន្ត្រី ហ៊ុន សែន បញ្ជាក់ថា បញ្ហានានាដែលកំពុងកើតឡើង លោកថា អាចគ្រប់គ្រងបានទាំងអស់។ លោកថ្លែងនៅថ្ងៃទី២២ ខែមិថុនា ថា លោកនៅតែកាន់តំណែងនាយករដ្ឋមន្ត្រី ដោយថា ទាំងនៅក្នុងបក្សរបស់លោក និងអ្នកនយោបាយក្រុមផ្សេងដែលចង់ប្រជែងនោះ មិនទាន់អាចយកឈ្នះរូបលោកបាននៅឡើយ។
លោក ហ៊ុន សែន លើកឡើងថា៖ «អញនៅធ្វើ! ឥលូវអ្នកណាមានសមត្ថភាពមកជំនួស ហ៊ុន សែន? និយាយឱ្យពិត ចេញមុខមក។ តួអង្គនៅក្នុងគណបក្សប្រជាជន អត់មានអ្នកណាទេ មានតែពួកអ្នកឯងទេចង់ធ្វើ។ ប៉ុន្តែ អ្នកឯងប្រហែលជាចាំជាតិក្រោយ នៅពេលដែលមានវត្តមាន ហ៊ុន សែន នៅទីនេះ គណបក្សប្រជាជនមានវត្តមាននៅទីនេះ អ្នកឯងចាំជាតិក្រោយ»។
លោកនាយករដ្ឋមន្ត្រី ហ៊ុន សែន ក្លាយជាមេដឹកនាំជាន់ខ្ពស់រយៈពេល ៤១ឆ្នាំ គិតចាប់ពីឆ្នាំ១៩៧៩ ក្រោយខ្មែរក្រហមដួលរលំ ហើយលោកកាន់តំណែងជានាយករដ្ឋមន្ត្រីបាន ៣៥ឆ្នាំ គិតចាប់ពីឆ្នាំ១៩៨៥មក។ ចំណែកគណបក្សប្រជាជនកម្ពុជាដែលបង្កើតតាំងពីថ្ងៃទី២៨ ខែមិថុនា ឆ្នាំ១៩៥១មក មានអាយុកាល ៦៩ឆ្នាំហើយ គិតត្រឹមថ្ងៃទី២៨ ខែមិថុនា ឆ្នាំ២០២០។
នៅក្នុងលិខិតរំឭកខួប ៦៩ឆ្នាំ លោកនាយករដ្ឋមន្ត្រី ហ៊ុន សែន សរសេរថា គណបក្សប្រជាជនកម្ពុជាប្រកាន់ភ្ជាប់គោលបំណងប្រមូលអ្នកស្នេហាជាតិ ប្រឆាំងការឈ្លានពាន និងកសាងជាតិ។
លិខិតសរសេរថា៖ «ប្រមូលកម្លាំងគ្រប់ជាតិកម្ពុជាដែលមានឧត្តមគតិស្នេហាជាតិមាតុភូមិ ស្រឡាញ់លទ្ធិប្រជាធិបតេយ្យ និងសន្តិភាព ដោយមិនប្រកាន់ឋានៈ ជីវភាព ដើមកំណើតជាតិ ជំនឿ សាសនា អតីតកាល ដើម្បីរួមកម្លាំងដើម្បីរំដោះជាតិឱ្យរួចផុតពីការឈ្លានពាន ត្រួតត្រា ជិះជាន់គ្រប់បែបយ៉ាង ការពារសមិទ្ធផលសង្គមជាតិ និងកសាងកម្ពុជាមួយឯករាជ្យ សន្តិភាព សេរីភាព ប្រជាធិបតេយ្យ អព្យាក្រឹត និងវឌ្ឍនភាព»។
អ្នកទស្សនវិជ្ជា និងអ្នកនិពន្ធបែបតស៊ូមតិជនជាតិអង់គ្លេស លោកស្រី Mary Wollstonecraft (១៧៥៩–១៧៩៧) លើកឡើងថា៖ «រាល់គោលនយោបាយល្អទាំងអស់ នឹងបានផលមកអាក្រក់មិនអាចពណ៌នាបាន បើសិនជាអ្នកអនុវត្តន៍ធ្វើឡើងដោយជ្រុលនិយមពេក»។
លទ្ធផលបោះឆ្នោតជ្រើសតាំងតំណាងរាស្ត្រអាណត្តិទី៥ ឆ្នាំ២០១៣ គឺគណបក្សប្រជាជនកម្ពុជាទទួលបានជាង ៣លាន ២សែនសំឡេង (៣ ២៣៥៦៩៦) ចំណែក គណបក្សសង្គ្រោះជាតិទទួលបានជាង ២លាន ៩សែនសំឡេង (២ ៩៤៥ ១៧៥)។
ចំណែក លទ្ធផលនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ ឆ្នាំ២០១៧ គណបក្សប្រជាជនកម្ពុជា ទទួលបានជាង ៣លាន ៥សែនសំឡេង (៣ ៥៤០ ០៥៦) ចំណែកគណបក្សសង្គ្រោះជាតិ ទទួលបានជាង ៣លាន ៥ម៉ឺនសំឡេង (៣ ០៥៦ ២៨៤)។
សំឡេងគាំទ្រគណបក្សប្រឆាំងចេះតែកើនឡើងប្រដេញគ្នាជាមួយបក្សកាន់អំណាច បង្ហាញថា ពលរដ្ឋដែលចង់បានមេដឹកនាំថ្មីក្រៅពីបក្សប្រជាជនកម្ពុជាក៏កើនឡើងដែរ។ ដូច្នេះ បើសិនជា បំណងរបស់លោកនាយករដ្ឋមន្ត្រី ហ៊ុន សែន ចង់ឱ្យបក្សលោកដឹកនាំប្រទេសពី ៥០ទៅ ១០០ឆ្នាំទៀត តាមការបោះឆ្នោតដោយត្រឹមត្រូវ និងយុត្តិធម៌មែន គឺត្រូវធ្វើការងារបន្ថែមទៀត ដោយស្តាប់ទុក្ខកង្វល់របស់ពលរដ្ឋ ហើយយកទៅដោះស្រាយឱ្យបានត្រឹមត្រូវ ដើម្បីរក្សាសំឡេងគាំទ្រ៕
