ឯកអគ្គរដ្ឋទូតបារាំងប្រចាំកម្ពុជា បានលើកយកបញ្ហានៃការចាប់ខ្លួនសកម្មជនបរិស្ថាននាពេលថ្មីៗនេះ និងបញ្ហាស្ថានភាពអ្នកជាប់ឃុំ ស្របពេលនៅក្នុងពន្ធនាគារកំពុងឆ្លងជំងឺកូវីដ-១៩ ទៅជជែកជាមួយរដ្ឋមន្ត្រីក្រសួងមហាផ្ទៃ លោក ស ខេង។
ក្នុងទំព័រហ្វេសប៊ុកផ្លូវការរបស់ស្ថានទូតបារាំង បានសរសេរនៅថ្ងៃពុធទី២៣ ខែមិថុនានេះថា ឯកអគ្គរដ្ឋទូតបារាំងប្រចាំកម្ពុជា លោកស្រី អេវ៉ា ង្វៀនប៊ិញ បានជួបពិភាក្សាការងារជាមួយឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង នៅថ្ងៃពុធនេះ។
ប្រភពដដែលថា ក្នុងជំនួបនោះ លោកស្រីបានលើកយកបញ្ហាស្ថានភាពពន្ធនាគារពាក់ព័ន្ធនឹងជំងឺកូវីដ-១៩ និងការចាប់ខ្លួនសកម្មជនបរិស្ថាន ទៅជជែកជាមួយរដ្ឋមន្ត្រីក្រសួងមហាផ្ទៃ។
ទំព័រហ្វេសប៊ុកស្ថានទូតបារាំងប្រចាំកម្ពុជា សរសេរថា៖ «លោកជំទាវក៏បានជម្រាបទាញចំណាប់អារម្មណ៍សម្តេចក្រឡាហោម អំពីស្ថានភាពពន្ធនាគារពាក់ព័ន្ធនឹងជំងឺកូវីដ-១៩ និងការចាប់ខ្លួនសកម្មជនបរិស្ថានផងដែរ។ លោកជំទាវ និងសម្តេចក្រឡាហោមឧបនាយករដ្ឋមន្ត្រី បានពិភាក្សាផ្លាស់ប្តូរយោបល់គ្នាយ៉ាងច្រើនអំពីបញ្ហាទាំងនេះ»។
ការលើកយកបញ្ហាចាប់ខ្លួនសកម្មជនបរិស្ថានទៅជជែកជាមួយរដ្ឋមន្ត្រីក្រសួងមហាផ្ទៃ លោក ស ខេង បានធ្វើឡើងបន្ទាប់ពីចៅក្រមសាលាដំបូងរាជធានីភ្នំពេញ សម្រេចចោទប្រកាន់និងឃុំខ្លួនសកម្មជនបរិស្ថាននៃចលនាមាតាធម្មជាតិចំនួន៣នាក់ដាក់ពន្ធនាគារបណ្ដោះអាសន្ន។
ពួកគេទាំង៣នាក់ រួមមាន យុវជន លី ចាន់ដារ៉ាវុទ្ធ យុវជន យឹម លាងហ៊ី និងកញ្ញា ស៊ុន រដ្ឋា ព្រមទាំងស្ថាបនិកចលនាមាតាធម្មជាតិ លោក អាឡិច ហ្គន់សាឡេស ដេវីតសុន (Alejandro Gonzalez Davidson) ត្រូវបានតុលាការចោទប្រកាន់ពីបទ «រួមគំនិតក្បត់» និង «ប្រមាថអង្គព្រះមហាក្សត្រ»។
ការចោទប្រកាន់និងឃុំខ្លួនយុវជនទាំង៣នាក់នេះ បន្ទាប់ពីសមត្ថកិច្ច កាលពីថ្ងៃទី១៦ ខែមិថុនា ឆ្នាំ២០២១ បានចាប់ខ្លួនយុវជនបរិស្ថានមាតាធម្មជាតិ ចំនួន៤នាក់ ប៉ុន្តែយុវជនម្នាក់ត្រូវបានដោះលែងវិញ។
វីអូឌី មិនអាចទាក់ទងអ្នកនាំពាក្យក្រសួងមហាផ្ទៃ លោក ផាត សុផានិត បានទេ នៅថ្ងៃនេះ។
ចំណែកទំព័រហ្វេសប៊ុករបស់រដ្ឋមន្ត្រីក្រសួងមហាផ្ទៃ លោក ស ខេង នៅថ្ងៃពុធនេះ បញ្ជាក់ថា រដ្ឋមន្ត្រីក្រសួងមហាផ្ទៃ ពិតជាបានអនុញ្ញាតឱ្យឯកអគ្គរដ្ឋទូតបារាំងប្រចាំកម្ពុជា លោកស្រី អេវ៉ា ង្វៀនប៊ិញ ចូលជួបសម្ដែងការគួរសមនិងជម្រាបលានាឱកាសលោកស្រីនឹងត្រូវបញ្ចប់អាណត្តិការទូតនៅកម្ពុជា ប៉ុន្តែប្រភពដដែលនេះមិនបានបញ្ជាក់លម្អិតពីការជជែកគ្នាលើបញ្ហាចាប់ខ្លួនសកម្មជនបរិស្ថាននិងស្ថានភាពក្នុងពន្ធនាគារនោះឡើយ។
យ៉ាងនេះក្តី ក្រោយពីមានការចោទប្រកាន់និងឃុំខ្លួនសកម្មជនបរិស្ថានទាំង៣នាក់នោះ មានប្រតិកម្មជាច្រើនពីសាធារណជន អង្គការសង្គមស៊ីវិលជាតិនិងអន្តរជាតិ រួមទាំងស្ថានទូតធំៗប្រចាំនៅកម្ពុជា ក្នុងនោះ ស្ថានទូតអាមេរិក ស្ថានទូតស៊ុយអ៊ែត និងអូស្រ្តាលី ជាដើម ដោយពួកគេទាមទារឱ្យរដ្ឋាភិបាលដោះលែងនិងទម្លាក់ចោលបទចោទប្រកាន់ទៅលើយុវជនបរិស្ថានទាំងនោះឱ្យមានសេរីភាពឡើងវិញ។
Sweden is concerned about recent legal actions against young environmental activists in Cambodia. Civil engagement, access to information, transparency and dialogue key components for sustainable development. Engaged youth is part of the future and should be encouraged.
— Sweden in Cambodia (@SwedeninKH) June 21, 2021
Very troubled to hear of the arrests of more environmental youth activists. Documenting pollution is a public service, not terrorism. We urge authorities to be responsive to its citizens, not to silence them. pic.twitter.com/bAWtPUwknH— Ambassador W. Patrick Murphy (@USAmbCambodia) June 21, 2021
(ភាសាខ្មែរនៅខាងក្រោម) The Australian Embassy is concerned by the recent arrests of three more young Cambodians – Sun…
Posted by Australian Embassy, Cambodia on Tuesday, June 22, 2021
កាលពីថ្ងៃទី៥ ខែឧសភា ឆ្នាំ២០២១ យុវជនមាតាធម្មជាតិ ៣នាក់ រួមមាន លោក ថុន រដ្ឋា កញ្ញា ឡុង គន្ធា និងកញ្ញា ភួន កែវរស្មី ត្រូវបានសាលាដំបូងរាជធានីភ្នំពេញ សម្រេចផ្តន្ទាទោសចន្លោះពី១៨ខែ ទៅ២០ខែ និងពិន័យជាប្រាក់ម្នាក់ៗចំនួន៤លានរៀល ក្រោមបទចោទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
ការចាប់ខ្លួនសកម្មជនទាំង៣នាក់ ក្រោយពីកញ្ញា ឡុង គន្ធា ប្រកាសធ្វើយុទ្ធនាការដើរថ្មើរជើងពីរមណីយដ្ឋានវត្តភ្នំ ទៅកាន់ផ្ទះលោកនាយករដ្ឋមន្ត្រី ហ៊ុន សែន ក្បែរវិមានឯករាជ្យ ដើម្បីស្វែងរកកិច្ចអន្តរាគមន៍ឱ្យបញ្ឈប់ការចាក់ដីលុបបឹងទំនប់កប់ស្រូវ ឬបឹងតាមោក ដែលជាបឹងធម្មជាតិនៅសេសសល់ចុងក្រោយគេនៅរាជធានីភ្នំពេញ ខណៈបឹងនេះកំពុងរងការចាក់ដីលុបក្រោមគម្រោងអភិវឌ្ឍន៍ឥតឈប់ឈរ៕
អត្ថបទទាក់ទង
ទស្សនៈពលរដ្ឋមួយចំនួនជុំវិញការចាប់ខ្លួនយុវជនការពារបរិស្ថាន
កាលពីពេលថ្មីៗនេះ សាលាដំបូងរាជធានីភ្នំពេញបានសម្រេចឃុំខ្លួនយុវជនការពារបរិស្ថានចំនួន៣នាក់ជាបណ្តោះអាសន្ននៅពន្ធនាគារ និងចោទប្រកាន់ពួកគេ រួមទាំងស្ថាបនិកចលនាមាតាធម្មជាតិ លោក អាឡិច ហ្គន់សាឡេស ដេវីតសុន (Alejandro Gonzalez Davidson) ពីបទ «រួមគំនិតក្បត់ប្រឆាំងនឹងរដ្ឋ» និង «ប្រមាថអង្គព្រះមហាក្សត្រ»។