សហជីពណាហ្គាវើលដ៍ បានធ្វើយុទ្ធនាការប្រមូលស្នាមម្រាមដៃ ដើម្បីដាក់ពាក្យប្តឹងទៅក្រសួងការងារទាមទារឱ្យក្រុមហ៊ុនបញ្ឈប់ការកាត់បុគ្គលិក រួមទាំងថ្នាក់ដឹកនាំសហជីព ចំនួនជាង១ពាន់នាក់។
ក្រុមហ៊ុន ណាហ្គាវើលដ៍ បានចាប់ដំណើរការបញ្ឈប់បុគ្គលិកចំនួន១ ៣២៩នាក់ ចាប់ពីថ្ងៃទី១៧ ខែឧសភា ឆ្នាំ២០២១ ដោយគ្រោងប្រើពេលពី៥ទៅ៦សប្តាហ៍ បន្ទាប់ពីប្រកាសកាលពីខែមេសា ក្រោមហេតុផលដើម្បីរក្សាស្ថិរភាពអាជីវកម្មដែលរងផលប៉ះពាល់ ដោយសារជំងឺកូវីដ-១៩។
អនុប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ អ្នកស្រី ឈុន សុខា លើកឡើងថា សហជីពកំពុងប្រមូលស្នាមមេដៃពីបុគ្គលិក-កម្មករ និងសមាជិកនៅក្នុងរាជធានីនិងតាមបណ្តាខេត្ត។ អ្នកស្រីថា ពួកគេប្រមូលបានស្នាមមេដៃសរុបប្រមាណ១ ៥០០នាក់ គិតមកទល់ព្រឹកថ្ងៃទី៣ ខែមិថុនា។
អ្នកស្រីបន្ថែមថា៖ «នៅមានបុគ្គលិកសមាជិកគាត់មួយចំនួនដែរ ដែលគាត់ស្នើសុំឱ្យលើកថ្ងៃ ដោយសារតែពួកគាត់នៅតាមខេត្ត គាត់មកអត់ទាន់កើត ហើយអ្នកខ្លះគាត់ផ្ញើឯកសារតាមឡានតាក់ស៊ី តាមឡានក្រុងអី ក៏អត់ទាន់មកដល់ដែរ។ អ៊ីចឹងវាអាចមានការពន្យារពេល»។
ប្រភពដដែលថ្លែងទៀតថា ការសម្រេចរបស់ក្រុមហ៊ុនល្បែងស៊ីសងនិងសណ្ឋាគារដែលមានថៅកែជាជនបរទេសនេះ ធ្វើឡើងដោយមិនបានឆ្លងកាត់ការធ្វើអធិការកិច្ចការងារ ដែលផ្ទុយនឹងច្បាប់ការងារជាធរមានរបស់កម្ពុជា និងថា បើការរំលោភបំពាននេះមិនត្រូវបានដោះស្រាយដោយយុត្តិធម៌ នោះផលប៉ះពាល់នឹងមានទំហំធំ។
អ្នកស្រី ឈុន សុខា បន្តថា៖ «ក្រុមហ៊ុនមានទឹកប្រាក់ហើយ ប៉ុន្តែបុគ្គលិកក៏មានអំណាចរបស់បុគ្គលិកដែរ គឺយើងមានអំណាចសាមគ្គី អ៊ីចឹងខ្ញុំជឿជាក់លើភាពសាមគ្គីដែលមិនអាចមានទឹកប្រាក់ឯណាយកមកបំបែកបានទេ។ អ៊ីចឹងយើងជឿជាក់លើកម្លាំងសាមគ្គី ហើយយើងសង្ឃឹមថា យើងនឹងទទួលបានជោគជ័យផងដែរ»។
បុគ្គលិកក្រុមហ៊ុន ណាហ្គាវើលដ៍ ផ្នែករៀបចំបន្ទប់មួយរូប លោក ប៊ុត មករា លើកឡើងថា លោកបានផ្តល់ស្នាមមេដៃរួចហើយ កាលពីថ្ងៃពុធ ដើម្បីចូលរួមគាំទ្រញតិ្តរបស់សហជីពប្តឹងទាមទារទៅក្រសួងការងារ។ លោកថា លោកត្រូវក្រុមហ៊ុនហៅឱ្យទទួលកញ្ចប់សំណងបញ្ចប់កិច្ចសន្យាការងារ ប៉ុន្តែលោកបដិសេធនិងសម្រេចរក្សាជំហរតវ៉ាជាមួយសហជីពរហូតដល់ដំណាក់កាលចុងក្រោយ។
លោក ប៊ុត មករា និយាយថា៖ «ហេតុផលសំខាន់គឺពួកខ្ញុំអត់ចង់។ និយាយទៅ ទម្លាក់ឈ្មោះមកហ្នឹង ភាគច្រើនគឺផ្តាច់សហជីពចោលតែម្តង ទាំងមេ ទាំងកូនក្រុម គឺទម្លាក់អស់ហើយ។ អ៊ីចឹងបើពួកខ្ញុំអត់ទាមទារចំណុចហ្នឹង [បញ្ឈប់ការកាត់បុគ្គលិក] ឱ្យបានទេ ទៅមុខទៅ នៅណាហ្គាវើលដ៍នឹងលែងមានសហជីពទៀតហើយ»។
បុគ្គលិកផ្នែកចែកបៀរម្នាក់នៅណាហ្គាវើលដ៍ទី២ អ្នកស្រី ហៃ សុភាព ប្រាប់មកខាង វីអូឌី ថា ទោះអ្នកស្រីមិនមានឈ្មោះក្នុងបញ្ជីកាត់បុគ្គលិក ក៏អ្នកស្រីបានចូលរួមផ្តល់ស្នាមមេដៃ ដើម្បីដាក់ពាក្យបណ្ដឹងទៅខាងក្រសួងការងារឱ្យជួយរកដំណោះស្រាយឱ្យបុគ្គលិកដទៃទៀតនិងក្រុមសហជីពដែលត្រូវបានក្រុមហ៊ុនបញ្ឈប់ដែរ។
អ្នកស្រីបន្តទៀតថា៖ «ខ្ញុំសង្ឃឹមថា យុទ្ធនាការដែលខ្ញុំដាក់ទៅខាងក្រសួងការងារ នឹងជំរុញឱ្យខាងក្រុមហ៊ុនគិតសារឡើងវិញពីការកាត់បុគ្គលិក»។
បុគ្គលិកផ្នែកសណ្ឋាគារម្នាក់នៅក្រុមហ៊ុន ណាហ្គាវើលដ៍ អ្នកនាង អ៊ី សុខឆេង លើកឡើងថា គាត់មិនទាន់សម្រេចចិត្តថានឹងចូលរួមផ្តិតមេដៃនៅឡើយ ដោយសារគាត់បានត្រឡប់មកស្រុកកំណើតនៅខេត្តកំពង់ចាម ហើយមិនទាន់ដឹងច្បាស់ពីការដាក់ញតិ្តទាមទាររបស់ខាងសហជីពនៅឡើយ។
អ្នកនាង អ៊ី សុខឆេង និយាយថា៖ «ហ្នឹងហើយ! ចាំមើលពួកម៉ាកខ្ញុំមក ខ្ញុំសួររឿងហ្នឹង ព្រោះខ្ញុំអត់សូវច្បាស់ដែរ ដោយថាយើងអត់មានឈ្មោះកាត់បុគ្គលិក អ៊ីចឹងយើងអាចទៅជួយផ្តិតឬក៏អីអត់»។
អ្នកនាងបន្ថែមថា៖ «បើសិនជាថាយើងអត់មានបញ្ហាអី យើងផ្តិត យើងជួយ ខ្ញុំនឹងទៅផ្តិតទៅអីអ៊ីចឹង»។
វីអូឌី មិនអាចទាក់ទងសុំការអធិប្បាយពីប្រធានប្រតិបត្តិបុគ្គលិករបស់ក្រុមហ៊ុន ណាហ្គាវើលដ៍ លោក Mike Ngai បានទេនៅថ្ងៃទី៣ ខែមិថុនា ឆ្នាំ២០២១។
ពាក់ព័ន្ធបញ្ហានេះ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ លើកឡើងថ្មីៗនេះថា ជាទូទៅ ក្រុមហ៊ុនមិនអាចបញ្ឈប់មេដឹកនាំសហជីពបានទេ ដរាបណាពួកគេមិនមានកំហុសធ្ងន់ ឬខុសទៅនឹងបទបញ្ជាផ្ទៃក្នុង ឬស្ថានភាពសេដ្ឋកិច្ចជាក់ស្តែងណាមួយរបស់ក្រុមហ៊ុន។
បើតាមប្រភពពីអនុប្រធានសហជីព ក្រៅពីប្តឹងឱ្យក្រុមហ៊ុន ណាហ្គា ទម្លាក់ចោលការបញ្ឈប់បុគ្គលិកជាបន្ទាន់ ពួកគេក៏ទាមទារឱ្យក្រុមហ៊ុនបញ្ឈប់ការបំផិតបំភ័យបុគ្គលិកតាមរយៈការកោះហៅឱ្យទៅជួបជាមួយថ្នាក់ដឹកនាំរបស់ក្រុមហ៊ុន អនុញ្ញាតឱ្យបុគ្គលិកដែលមិនស្ម័គ្រចិត្តលាឈប់អាចចូលធ្វើការឡើងវិញ។
ក្រៅពីនេះ ពួកគេក៏ទាមទារឱ្យក្រុមហ៊ុនផ្តល់ប្រាក់ដំណាច់បញ្ចប់កិច្ចសន្យាការងារឱ្យសមស្របតាមលក្ខខណ្ឌច្បាប់ និងរៀបចំលក្ខខណ្ឌសុវត្ថិភាពបង្ការជំងឺកូវីដ-១៩ នៅកន្លែងធ្វើការតាមវិធានសុខាភិបាល នៅពេលក្រុមហ៊ុនបើកទ្វារឡើងវិញ៕
