សមត្ថកិច្ចរាជធានីភ្នំពេញ អះអាងថា កំពុងធ្វើតេស្តសុខភាពរកមេរោគកូវីដ-១៩លើមនុស្សចំនួន៤៥នាក់ ក្រោយឃាត់ខ្លួនពួកគេទាំងនេះពាក់ព័ន្ធបញ្ហាគ្រឿងញៀន។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា ប្រាប់ វីអូឌី នៅថ្ងៃពុធនេះថា កម្លាំងសមត្ថកិច្ច កាលពីម៉ោង១២យប់ ថ្ងៃទី១៨ ខែឧសភា ឆ្នាំ២០២១ បានចុះបង្រ្កាបទីតាំងខុនដូមួយកន្លែង ស្ថិតនៅសង្កាត់បឹងកេងកងទី២ ខណ្ឌបឹងកេងកង ពាក់ព័ន្ធនឹងករណីជួញដូរនិងប្រើប្រាស់គ្រឿងញៀន។
លោកបន្តថា ការបង្រ្កាបនេះ សមត្ថកិច្ចបានឃាត់ខ្លួនមនុស្សចំនួន៦០នាក់ ប៉ុន្តែបានដោះលែងទៅវិញចំនួន១៥នាក់ ក្រោយពីរកឃើញថា ពួកគេទាំងនោះមិនជាប់ពាក់ព័ន្ធ។
ដោយឡែក មនុស្ស៤៥នាក់ផ្សេងទៀត លោកថា បច្ចុប្បន្ន ក្រុមគ្រូពេទ្យកំពុងយកសំណាកអ្នកទាំងនោះទៅធ្វើតេស្តរកមេរោគកូវីដ-១៩ មុននឹងធ្វើតេស្តរកសារធាតុញៀន ដើម្បីបន្តនីតិវិធីបន្ថែមទៀត។
លោកបានគូសបញ្ជាក់ថា៖ «ជាក់ស្ដែង យើងឃាត់ខ្លួនអ្នកដែលពាក់ព័ន្ធ៤៥នាក់ ក្រៅពីហ្នឹងជាកម្មករនិងចុងភៅអីផ្សេងទៀត។ ឥលូវសមត្ថកិច្ចយើងកំពុងធ្វើការបន្ថែមទៀត ថាតើអ្នកណាជាម្ចាស់ទីតាំង អ្នកណាជាមេការ ហើយឥលូវយើងមិនទាន់ធ្វើអីកើតទេ ដោយសារយើងរង់ចាំក្រុមគ្រូពេទ្យគាត់ធ្វើសំណាកសិន។ ទី២ ត្រូវឆែកមើលសារធាតុញៀនពេលធ្វើការងារហ្នឹងរួច បានយើងបន្តនីតិវិធីសួរនាំបន្តទៀត»។
លោក សាន សុខសីហា បន្តថា ក្នុងចំណោមមនុស្សទាំង៤៥នាក់ដែលសមត្ថកិច្ចឃាត់ខ្លួនបាននោះ គឺមានជនជាតិខ្មែរចំនួន១០នាក់ ហើយក្រៅពីនោះជាជនជាតិចិននិងវៀតណាមជាដើម។ លោកបន្តថា បច្ចុប្បន្ន មនុស្សទាំង៤៥នាក់កំពុងស្ថិតនៅស្នងការដ្ឋាននគរបាលរាជធានីភ្នំពេញនៅឡើយ ដោយសមត្ថកិច្ចមិនទាន់ធ្វើតេស្តរកសារធាតុញៀន និងធ្វើការសាកសួរនៅឡើយ ដោយសារការធ្វើតេស្តរកមេរោគកូវីដ-១៩នៅមិនទាន់ដឹងលទ្ធផល។
កាលពីថ្ងៃទី១៦ ខែឧសភានេះ សមត្ថកិច្ចរាជធានីភ្នំពេញ ក៏បានចាប់និងបញ្ជូនខ្លួនជនជាតិចិនចំនួន២នាក់ទៅតុលាការ ពាក់ព័ន្ធករណីរក្សាទុកនិងជួញដូរគ្រឿងញៀនជាង៧០គីឡូក្រាមផងដែរ។
កាលពីថ្ងៃទី២ ខែកុម្ភៈ ឆ្នាំ២០២១ រដ្ឋមន្ត្រីក្រសួងមហាផ្ទៃ លោក ស ខេង បង្ហាញការព្រួយបារម្ភចំពោះការចរាចរគ្រឿងញៀន ដោយលោកថា បើមិនស្រុះគ្នាធ្វើទេ ថ្ងៃណាមួយគ្រឿងញៀននឹងត្រួតត្រាកម្ពុជា។ ការបង្ហាញក្ដីបារម្ភនេះ ក្រោយពីលោកទទួលបានរបាយការណ៍ថា ក្នុងមួយថ្ងៃ មានខេត្តចំនួន៦ទៅ១០ខេត្ត បានរកឃើញនូវករណីបទល្មើសគ្រឿងញៀនចន្លោះពីមួយទៅពីរករណី។
អង្គការសហប្រជាជាតិ លើកឡើងក្នុងរបាយការណ៍មួយកាលពីខែឧសភា ឆ្នាំ២០២០ ថាកម្ពុជាឋិតក្នុងចំណោមប្រទេសអាស៊ានចំនួន៤ដែលរកឃើញមានករណីជួញដូរថ្នាំញៀនខុសច្បាប់ច្រើនជាងគេបំផុតក្នុងតំបន់ ខណៈតម្លៃធ្លាក់ចុះកាន់តែទាប តែគុណភាពថ្នាំកាន់តែខ្ពស់៕
អត្ថបទទាក់ទង
សមត្ថកិច្ចបញ្ជូនជនជាតិចិន២នាក់ទៅតុលាការពាក់ព័ន្ធសំណុំរឿងគ្រឿងញៀនជាង៧០គីឡូក្រាម
អាជ្ញាធរជំនាញបានសម្រេចបញ្ជូនជនសង្ស័យជាជនជាតិចិនចំនួន២នាក់ពាក់ព័ន្ធសំណុំរឿងគ្រឿងញៀនចំនួនជាង៧០គីឡូក្រាម ទៅតុលាការ នៅព្រឹកថ្ងៃទី១៦ ខែឧសភានេះ ដើម្បីចាត់វិធានការច្បាប់។