អាជ្ញាធរជំនាញបានសម្រេចបញ្ជូនជនសង្ស័យជាជនជាតិចិនចំនួន២នាក់ពាក់ព័ន្ធសំណុំរឿងគ្រឿងញៀនចំនួនជាង៧០គីឡូក្រាម ទៅតុលាការ នៅព្រឹកថ្ងៃទី១៦ ខែឧសភានេះ ដើម្បីចាត់វិធានការច្បាប់។
អគ្គស្នងការរងនគរបាលជាតិ ទទួលផែនប្រឆាំងបទល្មើសគ្រឿងញៀន លោក ម៉ក់ ជីតូ មានប្រសាសន៍ប្រាប់ វីអូឌី នៅថ្ងៃទី១៦ ខែឧសភានេះថា សមត្ថកិច្ចជំនាញនិងសមត្ថកិច្ចពាក់ព័ន្ធមួយចំនួន ដឹកនាំដោយព្រះរាជអាជ្ញារងសាលាដំបូងរាជធានីភ្នំពេញ លោក សឿន មុនីរ័ត្ន បានបង្រ្កាបករណីរក្សាទុកជួញដូរគ្រឿងញៀនឆ្លងដែននៅក្រុងភ្នំពេញ។
លោកបន្តថា ក្នុងប្រតិបត្តិការនោះ សមត្ថកិច្ចជំនាញចាប់ខ្លួនជនសង្ស័យជាជនជាតិចិនចំនួន២នាក់ រួមមាន ឈ្មោះ LIU JIC ភេទប្រុស អាយុ៤០ឆ្នាំ និងឈ្មោះ CHAN HUNG FAI ភេទប្រុស អាយុ៥៨ឆ្នាំ អមដោយវត្ថុតាងគ្រឿងញៀនសរុបជាង៧០គីឡូក្រាម ដែលមានទំហំទឹកប្រាក់ប្រហែលជាង១លានដុល្លារអាមេរិក។
វត្ថុតាងទាំងនោះ លោកថាមានដូចជា សារធាតុញៀនប្រភេទ អ៊ិចស្តាស៊ី (MDMA) ទម្ងន់ជាង៥២គីឡូក្រាម (៥២គីឡូក្រាម និង ៧៦៨,៥០ក្រាម) ហេរ៉ូអ៊ីន ចំនួន៤៩ដុំ ស្មើនឹងទម្ងន់ជាង១៧គីឡូក្រាម (១៧គីឡូក្រាម និង២៩២,៥៩ក្រាម) មេតំហ្វេតាមីន (ICE) ជាង១១ក្រាម (១១,៧៩ក្រាម) និងភស្តុតាងមួយចំនួនទៀត ខណៈគ្រឿងញៀនទាំងនេះមានប្រភពពីប្រទេសឡាវ ដែលគ្រោងនាំចេញទៅកាន់ប្រទេសវៀតណាម។
លោកមានប្រសាសន៍ថា៖ «យើងចោទគាត់ពីបទជួញដូរ និងរក្សាសារធាតុញៀនដោយខុសច្បាប់។ គាត់យកមកពីឡាវ ឆ្លងកាត់កម្ពុជា ត្រៀមយកទៅជួញដូរទៅវៀតណាម ប៉ុន្តែយើងដឹងមុន យើងឃាត់ខ្លួន ហើយរឹបអូសបានវត្ថុតាងគ្រឿងញៀនប្រហែល៧០គីឡូក្រាម ប៉ុន្តែក្រុមការងារជំនាញបានបញ្ជូនពួកគេទាំង២នាក់ទៅតុលាការហើយ»។
លោក ម៉ក់ ជីតូ បន្ថែមថា សមត្ថកិច្ចជំនាញកំពុងបន្តស្រាវជ្រាវរកមុខសញ្ញាឬអ្នកពាក់ព័ន្ធបន្ថែមទៀត ដើម្បីចាប់ខ្លួនយកទៅផ្តន្ទាទោសច្បាប់។
វីអូឌី មិនអាចសុំការបំភ្លឺពីលោក សឿន មុនីរ័ត្ន ព្រះរាជអាជ្ញារងសាលាដំបូងរាជធានីភ្នំពេញដែលជាអ្នកដឹកនាំការងារបង្ក្រាបនេះបានទេ នៅថ្ងៃអាទិត្យនេះ។
ប្រធានសមាគមសង្គ្រោះជនរងគ្រោះដោយគ្រឿងញៀនកម្ពុជា ហៅកាត់ថា DARAC លោក មាស សុវណ្ណ លើកទឹកចិត្តដល់អាជ្ញាធរពាក់ព័ន្ធ ជាពិសេសមន្ត្រីប្រយុទ្ធប្រឆាំងគ្រឿងញៀន ត្រូវស្រាវជ្រាវរកអ្នកពាក់ព័ន្ធដែលជាមេខ្លោងធំៗបន្ថែមទៀត ហើយត្រូវពង្រឹងការអនុវត្តច្បាប់ឱ្យបានតឹងរ៉ឹង ដោយមិនប្រកាន់បក្ខពួក ទើបទប់ស្កាត់ការជួញដូរឬចែកចាយគ្រឿងញៀននៅកម្ពុជាកាន់តែមានប្រសិទ្ធភាពខ្ពស់។
លោកមានប្រសាសន៍ថា៖ «ជាយោបល់ខ្ញុំ ត្រូវអនុវត្តច្បាប់ឱ្យតឹងរ៉ឹង ហើយស្រាវជ្រាវរកដៃគូពាក់ព័ន្ធ។ បើយើងចាប់តែប៉ុណ្ណឹង ហើយមិនស្រាវជ្រាវរកមេខ្លោងធំៗបន្តទេ វានៅដៃជើងទៀត ចេះតែមានការជួញដូរទៀតហើយ។ បើយើងស្រាវជ្រាវរកដៃគូវា គឺអាចទប់ស្កាត់បានខ្លះៗ ជោគជ័យរបស់យើងកាន់តែមានសង្ឃឹមច្រើន»។
អគ្គស្នងការរងនគរបាលជាតិ ទទួលផែនប្រឆាំងបទល្មើសគ្រឿងញៀន លោក ម៉ក់ ជីតូ អះអាងថា សម្រាប់ឆ្នាំ២០២០ កម្ពុជាបង្ក្រាបបានគ្រឿងញៀនប្រហែល៣តោន។ ដោយឡែក សម្រាប់ឆ្នាំ២០២១ គិតត្រឹមថ្ងៃទី១៦ ខែឧសភានេះ លោកថា កម្ពុជាបង្ក្រាបគ្រឿងញៀនបានប្រហែលជិត១តោន ហើយចំនួននេះមានការថយចុះប្រហែលជា៣០ភាគរយ បើបៀបធៀបនឹងឆ្នាំមុន។
អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វីរិទ្ធ ថ្លែងកាលពីចុងឆ្នាំមុនថា គិតត្រឹមខែវិច្ឆិកា ឆ្នាំ២០២០ អ្នកជាប់ពាក់ព័ន្ធគ្រឿងញៀនដែលត្រូវបានចាប់ឃាត់ខ្លួនកើនឡើងដល់ជិត២ម៉ឺនាក់ (១៩ ៣៩៤នាក់) គឺកើនឡើងប្រហែល២០ភាគរយ បើធៀបធៀបនឹងឆ្នាំមុន ក្នុងរយៈពេលដូចគ្នា។ លោកថា ការកើនឡើងនេះមកពីតម្រូវការប្រើប្រាស់របស់យុវជនមានការកើនឡើង។
រដ្ឋមន្ត្រីក្រសួងមហាផ្ទៃ លោក ស ខេង ថ្លែងក្នុងកិច្ចប្រជុំថ្នាក់រដ្ឋមន្ត្រីអាស៊ាន កាលពីថ្ងៃទី២៦ ខែវិច្ឆិកា ឆ្នាំ២០២០ ថាគ្រឿងញៀននៅតែជាបញ្ហាក្កៅ បង្កផលប៉ះពាល់ដល់សន្តិសុខ សង្គម និងជីវភាពប្រជាពលរដ្ឋ។ លោកក៏បានអំពាវនាវដល់ប្រទេសនៅក្នុងតំបន់សហការគ្នាទប់ស្កាត់ការចរាចរគ្រឿងញៀនឱ្យមានប្រសិទ្ធភាពបន្ថែមទៀត។
អង្គការសហប្រជាជាតិលើកឡើងក្នុងរបាយការណ៍មួយកាលពីខែឧសភា ឆ្នាំ២០២០ ថាកម្ពុជាឋិតក្នុងចំណោមប្រទេសអាស៊ានចំនួន៤ ដែលរកឃើញមានករណីជួញដូរថ្នាំញៀនខុសច្បាប់ច្រើនជាងគេបំផុតក្នុងតំបន់ ខណៈតម្លៃធ្លាក់ចុះកាន់តែទាប តែគុណភាពថ្នាំកាន់តែខ្ពស់៕
