ពលរដ្ឋ៣នាក់ដែលអះអាងថាជាតំណាងឱ្យពលរដ្ឋ២៥៨គ្រួសារ នៅឃុំបិតត្រាំង ស្រុកព្រៃនប់ ខេត្តព្រះសីហនុ រកកិច្ចអន្តរាគមន៍ពីក្រសួងយុត្តិធម៌ ឱ្យជួយដោះស្រាយវិវាទដីធ្លីជាមួយក្រុមហ៊ុនឯកជនមួយនៅក្នុងខេត្តនេះ។
ក្នុងលិខិតមួយដាក់ទៅក្រសួងយុត្តិធម៌ នៅថ្ងៃទី២៤ ខែកុម្ភៈ ឆ្នាំ២០២១ តំណាងពលរដ្ឋបានស្នើទៅរដ្ឋមន្ត្រីក្រសួងយុត្តិធម៌ លោក កើត រិទ្ធ អន្តរាគមន៍ទៅសាលាដំបូងខេត្តព្រះសីហនុ ដោយមោឃភាពដីកាសម្រេចចាត់ចែងបណ្តោះអាសន្នលើដីកំពុងមានជម្លោះ រវាងប្រជាពលរដ្ឋ២៥៨គ្រួសារ និងក្រុមហ៊ុន ហ្វូហាយ។
កាលពីខែកញ្ញា ឆ្នាំ២០២០ ចៅក្រមនៃសាលាដំបូងខេត្តព្រះសីហនុ លោក កោ វណ្ឌី បានចេញដីកាសម្រេចចាត់ចែងបណ្តោះអាសន្នលើដីទំហំ ២០០,១២ហិកតា នៅភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ ដោយមិនឱ្យពលរដ្ឋណាធ្វើសកម្មភាពនានាឬទិញលក់លើដីនោះឡើយ ដោយរង់ចាំការដោះស្រាយសិន។
លោក ឌួង ស៊ីបុណ្ណថុល អះអាងជាតំណាងឱ្យពលរដ្ឋ២៥៨គ្រួសារ ប្រាប់ វីអូឌី កាលពីថ្ងៃពុធថា ក្នុងចំណោមដីទំហំជាង២០០ហិកតានោះ មានដីជាង៣៥ហិកតា របស់ពលរដ្ឋ២៥៨គ្រួសារ។
លោកបន្តថា តុលាការចេញដីកាហាមមិនឱ្យពលរដ្ឋធ្វើសកម្មភាពលើដីនោះ ប៉ុន្តែបែរជាក្រុមហ៊ុនអាចធ្វើសកម្មភាពបានដោយពុំមានវិធានការអ្វីឡើយ ហើយក្រុមហ៊ុនមួយនេះក៏កំពុងគំរាមកំហែងពលរដ្ឋឱ្យលក់ដីក្នុងតម្លៃថោកឱ្យខ្លួនផងដែរ។
លោកបន្ថែមថា៖ «ខ្ញុំគិតថា រឿងនេះ វាពាក់ព័ន្ធបញ្ហាអំពើពុករលួយជាប្រព័ន្ធមួយដែលរៀបចំដោយអ្នកមានជំនាញមានវិជ្ជាជីវៈ ដោយពួកគេបានកែប្រែពីរឿងខុសច្បាប់ឱ្យទៅជារឿងត្រូវច្បាប់វិញ។ អ៊ីចឹងអ្វីដែលពួកខ្ញុំសំណូមពរទៅក្រសួងយុត្តិធម៌ គឺសុំឱ្យមោឃភាពដីកាចាត់ចែងបណ្តោះអាសន្នរបស់ចៅក្រមហ្នឹងតែម្តង»។
ពលរដ្ឋម្នាក់ទៀត លោក ឈៀវ ពណ្ណារិទ្ធ និយាយថា គ្រួសារលោកកំពុងរស់នៅនិងអាស្រ័យផលលើដីដែលមានទទឹងទំហំ១៥ម៉ែត្រនិងបណ្តោយ៣០ម៉ែត្រ ដោយមានដាំដំណាំហូបផ្លែផ្សេងៗ។
លោកអះអាងថា គ្រួសារលោក ក៏ដូចជាប្រជាពលរដ្ឋផ្សេងទៀត បានចូលរស់នៅនិងអាស្រ័យលើដីនោះតាំងពីឆ្នាំ១៩៩៥ ជាបន្តបន្ទាប់រហូតមក ប៉ុន្តែនៅឆ្នាំ២០២០ បែរជាក្រុមហ៊ុន ហ្វូហាយ អះអាងថា ដីតំបន់នោះជារបស់ខ្លួនទៅវិញ។
លោកបន្ថែមថា៖ «តែអត់ដី យើងអត់កន្លែងរស់នៅ អត់ដីបង្កបង្កើនផល មិនដឹងជាទៅរស់នៅណា បើយើងមានដីតែប៉ុណ្ណឹងទេ! អ៊ីចឹងហើយបានយើងខិតខំដាក់លិខិតសុំទៅអាជ្ញាធរឱ្យគេជួយដោះស្រាយ»។
អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ថា លោកមិនទាន់ឃើញលិខិតរបស់ពលរដ្ឋនៅឡើយទេ ប៉ុន្តែលោកថា តាមនីតិវិធីច្បាប់ ខាងក្រសួងយុត្តិធម៌ពុំមានសមត្ថកិច្ចទៅមោឃភាពលើសេចក្តីសម្រេចរបស់តុលាការនោះទេ។
លោកបន្ថែមថា៖ «តាមនីតិវិធីច្បាប់ ក្រសួងយុត្តិធម៌មិនមានសមត្ថកិច្ចណាទៅអន្តរាគមន៍ឬក៏មោឃភាពការសម្រេចរបស់តុលាការបានទេ។ បើយើងមិនពេញចិត្តនឹងសេចក្តីសម្រេចរបស់តុលាការ យើងត្រូវធ្វើការប្តឹងទាស់ឬប្តឹងបន្តតាមនីតិវិធីរបស់តុលាការដែលមានជាធរមាន»។
កាលពីថ្ងៃទី៣ ខែធ្នូ ឆ្នាំ២០២០ រដ្ឋាភិបាលបានចេញអនុក្រឹត្យមួយដោយកាត់ដីជាង២៥ហិកតា ពីគម្របព្រៃឈើឆ្នាំ២០០២ ប្រគល់ឱ្យក្រុមហ៊ុន ហ្វូហាយ ធ្វើជាកម្មសិទ្ធិ។
វីអូឌី មិនទាន់អាចទំនាក់ទំនងសុំការឆ្លើយតបពីភាគីក្រុមហ៊ុន ហ្វូហាយ បានទេ នៅថ្ងៃព្រហស្បតិ៍នេះ។
ប្រធានគណៈកម្មការសហគមន៍រងគ្រោះដីធ្លី និងជាប្រធានក្រុមប្រឹក្សានៅសមាគមសម្ព័ន្ធសហគមន៍កសិករកម្ពុជាប្រចាំខេត្តព្រះសីហនុ លោក យូរ វាសនា មានប្រសាសន៍ថា វិវាទដីធ្លីនៅក្នុងខេត្តព្រះសីហនុ ពុំមានការថយចុះ និងពុំមានការដោះស្រាយណាមួយបានល្អប្រសើរជូនពលរដ្ឋនៅឡើយ ជាពិសេសនៅតំបន់គម្របព្រៃឈើឆ្នាំ២០០២។
លោកបន្ថែមថា៖ «ពេល [អាជ្ញាធរ] ទៅ មិនមានការដោះស្រាយជូនពលរដ្ឋជាក់ស្តែងទេ ហាក់ដូចជាងាកទៅរកអ្នកមានលុយមានអំណាច។ តួយ៉ាង បណ្ណកម្មសិទ្ធិទាំងអស់ដែលកើតឡើងពីឆ្នាំ១៩៩៤ ដល់ឆ្នាំ២០០២ គឺស្ថិតនៅក្នុងគម្របព្រៃឈើឆ្នាំ២០០២។ តើមន្ត្រីរបស់ក្រសួងរៀបចំដែនដី បង្កើតឡើងដូចម្តេច? ហើយអ្នកដែលរងគ្រោះពិតប្រាកដ គឺពលរដ្ឋដែលរស់នៅទីនោះជាក់ស្តែង ហើយអ្នកមិនរស់នៅជាក់ស្តែង តែគាត់មានលុយមានអំណាច គាត់ធ្វើប្លង់បាន។ ចំណែកពលរដ្ឋរស់នៅជាក់ស្តែង បែរជាចោទគាត់ថា រស់នៅលើដីរដ្ឋខុសច្បាប់ទៅវិញ»៕
