ស្រ្តីខ្មែរម្នាក់ដែលរងគ្រោះពីការជួញដូរផ្លូវភេទទៅប្រទេសចិន មិនទាន់អាចត្រឡប់មកកម្ពុជាវិញនៅឡើយបន្ទាប់ពីត្រូវបានជួយសង្គ្រោះ ប៉ុន្តែម្តាយរបស់នាងប្រាប់ថា នាងត្រូវឆ្លងកាត់ការឃុំខ្លួនរយៈពេល៣ខែសិន ដោយសារនាងបានឆ្លងដែនដោយខុសច្បាប់។
កាលពីដើមខែធ្នូ ឆ្នាំ២០២០ ស្រ្តីខ្មែរដែលបានឆ្លងដែនទៅកាន់ប្រទេសចិនក្នុងវ័យ១៧ឆ្នាំ តាមការអូសទាញរបស់មេខ្យល់ថាស្វែងរកការងារល្អនៅប្រទេសចិន ត្រូវបានជួយសង្គ្រោះទៅកាន់ស្ថានីយប៉ូលិសក្នុងតំបន់ បន្ទាប់ពីនាងបង្ហោះសារដង្ហោយរកជំនួញពីអ្នកប្រើប្រាស់បណ្តាញសង្គម។
ម្តាយស្រ្តីរងគ្រោះដែលធ្លាប់បម្រើការរត់តុក្នុងហាងកាហ្វេមួយក្នុងខេត្តក្រចេះ ប្រាប់ VOD ឱ្យដឹងនៅថ្ងៃសុក្រសប្តាហ៍មុនថា គាត់បាត់ការទាក់ទងជាមួយកូនស្រីតាំងពីនាងត្រូវបានជួយសង្គ្រោះមក ប៉ុន្តែមានអង្គការមួយប្រាប់គាត់ថា នាងមិនទាន់អាចត្រឡប់មកវិញនៅឡើយ។
ម្តាយស្រ្តីខ្មែរនោះនិយាយថា៖ «ចាស៎! គេថាគេឃុំទុក៣ខែ ដោយសារយើងទៅខុសច្បាប់»។
គាត់បន្ថែមថា៖ «ទូរសព្ទក៏គេអត់ឱ្យកាន់ដែរ គេឃុំយើងទុករបៀបដូចថាគេដាក់គុកយើងអញ្ចឹងណា! ព្រោះយើងទៅខុសច្បាប់»។
មន្រ្តីកម្មវិធីរបស់អង្គការធ្វើការលើបញ្ហាជួញដូរមនុស្សមួយដែលសុំមិនបញ្ចេញឈ្មោះ ឱ្យដឹងថា អាជ្ញាធរចិនកំពុងដាក់ជនរងគ្រោះឱ្យស្នាក់នៅមណ្ឌលរក្សាជនអន្តោប្រវេសន៍ជាបណ្តោះអាសន្នជាមុនសិន មុននឹងអនុញ្ញាតឱ្យបញ្ជូនខ្លួនត្រឡប់មកប្រទេសកំណើតវិញ។
ប្រភពដដែលបន្ថែមថា ជាទូទៅរយៈពេលរក្សាទុកមាន៣ខែឬឆាប់ជាងនេះ ប្រសិនបើជនរងគ្រោះសហការក្នុងការផ្តល់ព័ត៌មានដល់អាជ្ញាធរបានល្អ។
មន្រ្តីដដែលប្រាប់ថា៖ «អាហ្នឹងគេរៀបចំ គឺរៀបចំដោយប៉ូលិសដែរ តែវាមិនធ្ងន់ដូចជាអ្នកទោសទេ។ បទនេះពីបទដែលគាត់រស់នៅស្រុកចិនខុសច្បាប់ អញ្ចឹងគេដាក់នៅមណ្ឌលមួយទៅ»។
អ្នកនាំពាក្យក្រសួងការបរទេសកម្ពុជា លោក កុយ គួង ប្រាប់ VOD តាមសារ Telegram នៅថ្ងៃចន្ទម្សិលមិញថា ជនរងគ្រោះកំពុងត្រូវបានដាក់ឱ្យនៅមណ្ឌលគាំពារជនរងគ្រោះដោយការជួញដូរ ប៉ុន្តែលោកបដិសេធចំពោះរយៈពេលនៃការដាក់ឱ្យស្នាក់នៅទីនោះ។
លោក កុយ គួង ប្រាប់ថា៖ «ចំពោះរយៈពេលនៃការរក្សាទុកនៅស្នាក់ការអន្តោប្រវេសន៍ឬមណ្ឌលគាំពារជនរងគ្រោះ [មិនមែនជាការឃុំខ្លួនទេ] គឺមិនមានកាលកំណត់ដូចការលើកឡើងខាងលើនោះទេ។ ចំពោះរយៈពេល គឺអាស្រ័យទៅលើស្ថានភាពជាក់ស្តែងនៃករណីនីមួយៗ»។
មន្រ្តីអ្នកនាំពាក្យរូបនេះបន្ថែមថា ស្ថានទូតចេញលិខិតធ្វើដំណើរបណ្តោះអាសន្នឱ្យរួចហើយ និងកំពុងសម្របសម្រួលជាមួយអាជ្ញាធរចិន ដើម្បីបញ្ជូនគាត់ត្រឡប់មកកម្ពុជាវិញឆាប់ៗខាងមុខនេះ។
មន្ដ្រីកម្មវិធីការពារសិទ្ធិពលករចំណាកស្រុកនៃអង្គការសង់ត្រាល់ លោក ឌី ថេហូយ៉ា លើកឡើងថា ប្រទេសគោលដៅនៃការជួញដូរនីមួយៗចាត់វិធានការទៅលើជនបរទេសរស់នៅក្នុងប្រទេសរបស់គេទៅតាមនីតិវិធី និងឯកសារផ្លូវការដែលពួកគេអាចស្រាវជ្រាវរកបាន។
លោក ហូយ៉ា មានប្រសាសន៍ថា៖ «បើគាត់អត់មានឯកសារ Passport [លិខិតឆ្លងដែន] ឬលិខិតស្របច្បាប់អីផ្សេងៗទេ អាហ្នឹងគេចាត់ទុកថាជាការចូលប្រទេសគេដោយខុសច្បាប់។ អញ្ចឹងហើយគេមិនបានមើលទៅលើថា គាត់ហ្នឹងទៅដោយស្ម័គ្រចិត្តឬចាញ់បោកគេយ៉ាងម៉េចយ៉ាងម៉ានោះទេ។ ជាទូទៅប្រទេសគោលដៅច្រើនតែអញ្ចឹង»។
យ៉ាងណា លោកថា ក្នុងនាមជាមន្រ្តីអង្គការការពារសិទ្ធិពលករចំណាកស្រុក លោកមិនគាំទ្រចំពោះចំណាត់ការរបស់អាជ្ញាធរប្រទេសគោលដៅដែលកំណត់អត្តសញ្ញាណជនរងគ្រោះថាជាជនល្មើសឆ្លងដែនខុសច្បាប់ដោយផ្អែកលើឯកសារដែលពួកគេមាននោះទេ ប៉ុន្តែគួរតែស្រាវជ្រាវរកឱ្យឃើញមេខ្យល់និងអ្នកពាក់ព័ន្ធការជួញដូរទៅវិញទេ ទើបជាការល្អប្រសើរ។
ទាក់ទងនឹងបញ្ហានេះ លោក កុយ គួង លើកឡើងថា អាជ្ញាធរចិនតែងមានការយោគយល់ច្រើនចំពោះពលរដ្ឋខ្មែរដែលចាញ់បោកមេខ្យល់នាំឆ្លងដែនដោយខុសច្បាប់និងស្នាក់នៅខុសច្បាប់ក្នុងប្រទេសចិន ដោយសម្អាងថា ពលរដ្ឋខ្មែរទាំងនោះជាជនត្រូវបានសង្ស័យថារងគ្រោះឬចាត់ទុកថាជាជនរងគ្រោះ៕