មន្ត្រីសុខាភិបាលឱ្យដឹងថា លទ្ធផលតេស្តសំណាករបស់ម្ចាស់កសិដ្ឋាននិងកម្មករម្នាក់ដែលចិញ្ចឹមសត្វមាន់ទាមានផ្ទុកជំងឺផ្តាសាយបក្សី (H5N1) នៅខេត្តបាត់ដំបង បង្ហាញថាអវិជ្ជមាន។
កាលពីអំឡុងថ្ងៃទី៥ ដល់ថ្ងៃទី៧ ខែមករា ឆ្នាំ២០២១នេះ មានករណីផ្ទុះជំងឺផ្តាសាយបក្សី (H5N1) ទៅលើសត្វមាន់ ទាកាប៉ា និងក្ងាន ជាង១ ៤០០ក្បាល នៅក្នុងកសិដ្ឋានចិញ្ចឹមសត្វលក្ខណៈគ្រួសារមួយកន្លែងក្នុងភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង។
ក្រោយហេតុការណ៍នេះ មន្ត្រីសុខាភិបាលបានយកសំណាកម្ចាស់កសិដ្ឋាននិងអ្នកពាក់ព័ន្ធមួយចំនួន ដើម្បីធ្វើតេស្តរកវីរុសផ្តាសាយបក្សីនេះ។
ប្រធាននាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល លោក លី សូវ៉ាន់ មានប្រសាសន៍ប្រាប់វីអូឌីតាមប្រព័ន្ធតេឡេក្រាមនៅថ្ងៃសុក្រនេះថា លទ្ធផលសំណាករបស់ម្ចាស់កសិដ្ឋាននិងអ្នកពាក់ព័ន្ធនោះ គឺអវិជ្ជមានទាំងអស់ ដែលមានន័យថា មិនមានករណីឆ្លងវីរុសផ្តាសាយបក្សី (H5N1) ពីសត្វទៅមនុស្សទេ។
លោកបានបញ្ជាក់ថា៖ «លទ្ធផល [អ្នកដែលបានធ្វើតេស្ត] អវិជ្ជមានទាំងអស់»។
អនុប្រធានមន្ទីរសុខាភិបាលខេត្តបាត់ដំបង លោក អ៊ុក វិទ្យា មានប្រសាសន៍ថា ក្រោយហេតុការណ៍ផ្ទុះជំងឺផ្តាសាយបក្សីនៅភូមិព្រែកតាច្រែង មន្ត្រីសុខាភិបាលបានយកសំណាកមនុស្ស២នាក់ដែលជាម្ចាស់កសិដ្ឋានចិញ្ចឹមសត្វមាន់ ដើម្បីធ្វើតេស្តរកវីរុស H5N1 ដោយលទ្ធផលអវិជ្ជមានទាំងអស់។
លោកថា៖ «យកតែ២នាក់ដែលប៉ះពាល់ផ្ទាល់នៅកន្លែងចិញ្ចឹមហ្នឹង ព្រោះអត់មានអ្នកណានៅក្បែរហ្នឹងទេ»។
ចំណែកប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង លោក ឈឹម វជិរា មានប្រសាសន៍ថា ជំងឺផ្តាសាយបក្សី លើសត្វមាន់ ទា និងក្ងាន នៅភូមិព្រែកតាច្រែងនេះ ពុំមានការឆ្លងរីករាលដាលទៅភូមិដទៃទេ ខណៈមន្ត្រីជំនាញនិងអាជ្ញាធរដែនដី បាននិងកំពុងទប់ស្កាត់និងអនុវត្តវិធានការសុវត្ថិភាព។
លោកថា៖ «តំបន់កន្លែងគាត់ចិញ្ចឹម គឺចម្ការ ហើយចម្ការគាត់នៅដាច់ដោយឡែក [នៅឆ្ងាយពីភូមិ] អត់មានឆ្លងទេ ព្រោះរបងបិទជិត»។
លោកបន្ថែមថា៖ «យើងនៅតែឱ្យមន្ដ្រីរបស់យើងបន្ដតាមដានមើលតំបន់ក្នុងរង្វង់១០គីឡូម៉ែត្រនៅជុំវិញហ្នឹង រយៈពេលមួយខែ ប្រសិនបើអត់មានបញ្ហាអីទេ អាហ្នឹងយើងនឹងរំសាយតំបន់ហ្នឹងជាតំបន់ដែលស្អាតវិញ [តំបន់ដែលលែងផ្ទុះជំងឺផ្តាសាយបក្សី]»។
កាលពីថ្ងៃទី១២ ខែមករា ឆ្នាំ២០២១ ក្រសួងកសិកម្ម រុក្ខាប្រមាញ់ និងនេសាទ បានសម្រេចដាក់ភូមិព្រែកតាច្រែង ជាតំបន់ផ្ទុះជំងឺគ្រុនផ្តាសាយបក្សី ដោយផ្អាកជាបណ្តោះអាសន្នលើការទិញលក់ និងការដឹកជញ្ជូនសត្វបក្សីគ្រប់ប្រភេទចេញចូលក្នុងរង្វង់៣គីឡូម៉ែត្រ និងត្រូវត្រួតពិនិត្យឃ្លាំមើលចលនាបក្សីជាប្រចាំក្នុងរង្វង់កាំប្រវែង១០គីឡូម៉ែត្រ ពីចំណុចផ្ចិតនៃតំបន់ផ្ទុះទៅតាមវិធានបសុពេទ្យ។
បើតាមក្រសួងសុខាភិបាល ជំងឺផ្តាសាយបក្សីបានកើតឡើងដំបូងបំផុតលើសត្វបក្សីនៅកម្ពុជា នៅឆ្នាំ២០០៣ និងកើតលើមនុស្សនៅដើមឆ្នាំ២០០៤។ ពីឆ្នាំ២០០៤ ដល់ឆ្នាំ២០១៥ ក្រសួងរកឃើញជំងឺផ្តាសាយបក្សីឆ្លងទៅមនុស្សចំនួន៥៦ករណី ក្នុងនោះ ៣៧ករណី បានស្លាប់។
ក្រសួងបន្តថា ចាប់ពីឆ្នាំ២០១៥ រហូតមកដល់ឆ្នាំ២០២០ ក្រសួងពុំបានរកឃើញជំងឺផ្តាសាយបក្សីនេះឆ្លងមកមនុស្សទៀតឡើយ៕