កម្មករ-កម្មការិនីប្រហែល១ពាន់នាក់ បម្រើការងារនៅរោងចក្រ យីងហ៊ី ខេមបូឌា ហ្គាមេន ខូលអិលធីឌី (YING FE Cambodia GARMENT Co.,LTD) ស្ថិតក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ បានប្រមូលផ្តុំគ្នាតវ៉ាមុខរោងចក្រ នៅថ្ងៃព្រហស្បតិ៍នេះ ដើម្បីទាមទារទៅថៅកែឱ្យបើកប្រាក់រំឭកអតីតភាពការងារជូនពួកគេ។
កម្មការិនីផ្នែកដេរ បម្រើការងារនៅរោងចក្រ យីងហ៊ី រយៈពេល៣ឆ្នាំ អ្នកស្រី ជិន រតនា ប្រាប់វីអូឌីនៅកន្លែងប្រមូលផ្តុំថា ពួកគេដែលជាកម្មករប្រមាណ១ពាន់នាក់តវ៉ានៅថ្ងៃនេះដោយសារថៅកែនៅជំពាក់ប្រាក់រំឭកអតីតភាពការងារឆ្នាំ២០២០ និងបានសុំពន្យារពេល១ឆ្នាំទៀត ដោយសន្យាបើកជូនកម្មករនៅឆ្នាំ២០២២ ប៉ុន្តែក្រុមកម្មករមិនព្រម ទើបផ្ទុះការតវ៉ាតែម្តង។
កម្មការិនីរូបនេះអះអាងថា ចាប់តាំងពីកម្ពុជាមានករណីឆ្លងរាលដាលជំងឺកូវីដ១៩មក រោងចក្រនេះធ្លាប់បានព្យួរការងារកម្មករម្តងកាលពីអំឡុងខែមេសា ឆ្នាំ២០២០ ក្រោយមកក៏បានដំណើរអាជីវកម្មរហូតមកដល់បច្ចុប្បន្ននេះ។
អ្នកស្រីបន្ថែមថា៖ «បើថៅកែនៅតែមិនបើកលុយអតីតភាពការងារហ្នឹងឱ្យពួកខ្ញុំទេ ពួកខ្ញុំនៅតែបន្តការតវ៉ាទៀត ពីព្រោះអ្វីដែលពួកខ្ញុំតវ៉ានេះ វាអត់មានអីច្រើនចំណុចទេ។ តវ៉ាចង់បានតែប្រាក់អតីតភាពហ្នឹងទេ ចង់ឱ្យគាត់បើកឱ្យកម្មករទៀងពេលមកវិញ ព្រោះកាលឆ្នាំ២០២០ គាត់ធ្លាប់សន្យាជាមួយពួកខ្ញុំថា បើកឱ្យកម្មករនៅដើមឆ្នាំ២០២១នេះ ឱ្យគ្រប់ទាំងអស់»។
លោក គង់ ចាន់វី អះអាងជាតំណាងកម្មករ បាននិយាយថា ក្រុមកម្មករទទូចឱ្យថៅកែទូរទាត់ប្រាក់រំឭកអតីតភាពការងារឱ្យពួកគេនៅដើមឆ្នាំនេះតាមការសន្យា ដោយសារតែកម្មករស្ត្រីមានផ្ទៃពោះមួយចំនួនត្រូវការប្រាក់សម្រាប់ចាយវាយពេលសម្រាកមាតុភាព ខណៈកម្មករខ្លះទៀតបារម្ភខ្លាចមិនទទួលបានប្រាក់នេះពេលពួកគេលាឈប់ពីការងារ។
លោកបន្ថែមថា៖ «ក្រុមកម្មករគាត់អត់ព្រម ដោយសារតែមានកម្មករមួយចំនួន គាត់ត្រូវដាក់ពាក្យលាឈប់ពីការងារ អ្នកពោះធំ [មានផ្ទៃពោះ] ត្រូវការលុយពេលគាត់សម្រាកមាតុភាព អ្នកខ្លះគាត់ឈឺត្រូវការលុយបន្ទាន់ អ៊ីចឹងគាត់ត្រូវការលុយហ្នឹង ដើម្បីដោះស្រាយបន្ទាន់ […] បើសិនរោងចក្រមានផលលំបាក អត់មានការងារធ្វើ អាហ្នឹងកម្មករយល់តាមហ្នឹង ប្រាក់អតីតភាព គេពន្យារបាន ប៉ុន្តែសម្រាប់រោងចក្រខ្ញុំនេះ ដំណើរការ មានការងារធ្វើរហូត»។
ប្រធានរដ្ឋបាលរោងចក្រ យីងហ៊ី លោក លី ឌី មានប្រសាសន៍ថា មូលហេតុដែលថៅកែមិនអាចទូរទាត់ប្រាក់អតីតភាពការងារជូនកម្មករជាកញ្ចប់បាន ដោយសាររោងចក្រអនុវត្តទៅតាមច្បាប់និងសេចក្តីប្រកាសរបស់រដ្ឋាភិបាល ដែលពន្យារពេលបើកប្រាក់នេះដល់ឆ្នាំ២០២២។
ប៉ុន្តែយ៉ាងណា លោកថា ដើម្បីជួយសម្របសម្រួលដល់កម្មករ ម្ចាស់រោងចក្របានសម្រេចបើកប្រាក់អតីតភាពការងារចំនួន១៥ថ្ងៃ ទៅដល់កម្មករនៅក្នុងខែកក្កដា ឆ្នាំ២០២១។
លោកបន្ថែមថា៖ «ខាងក្រុមហ៊ុនបានខិតខំព្យាយាមសម្រេចលើសពីផ្លូវច្បាប់ ដើម្បីឱ្យបងប្អូនកម្មករទាំងអស់គាត់ចូលធ្វើការងារវិញនៅម៉ោង១គត់នៅក្នុងថ្ងៃរសៀលនេះដែរ ប៉ុន្តែជាអកុសល បងប្អូនកម្មករកម្មការិនី ពួកគាត់មិនឯកភាពចូលធ្វើការងារវិញឡើយ»។
វីអូឌី មិនអាចសុំការអត្ថាធិប្បាយជុំវិញករណីនេះពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានទេ នៅរសៀលនេះ។
បើយោងតាមសេចក្តីជូនដំណឹងរបស់ក្រសួងការងារ កាលពីថ្ងៃទី២៣ ខែធ្នូ ឆ្នាំ២០២០ ស្តីពី វិធានការបន្ថែមជុំទី៧ ដើម្បីគ្រប់គ្រងផលប៉ះពាល់លើវិស័យសំខាន់ៗនៃសេដ្ឋកិច្ចកម្ពុជា និងការស្ដារឡើងវិញក្រោយវិបត្តិជំងឺកូវីដ១៩នោះ រដ្ឋាភិបាលបានសម្រេចបន្តអនុញ្ញាតឱ្យរោងចក្រ សហគ្រាស និងអាជីវកម្មគ្រប់វិស័យ ពន្យារពេលទូរទាត់ប្រាក់រំឭកអតីតភាពការងារមុនឆ្នាំ២០១៩ អតីតភាពការងារសម្រាប់ឆ្នាំ២០២០ និងឆ្នាំ២០២១ ទៅធ្វើនៅឆ្នាំ២០២២វិញ។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ការបន្តពន្យារពេលបើកប្រាក់អតីតភាពជូនកម្មករនេះ នឹងធ្វើឱ្យកម្មករខាតបង់ផលប្រយោជន៍។ លោកថា តាមផ្លូវច្បាប់ កម្មករត្រូវទទួលបានការទូរទាត់ប្រាក់នេះ ប៉ុន្តែត្រូវបានរាំងស្ទះដោយសារតែសេចក្តីជូនដំណឹងរបស់ក្រសួង ក្រោមហេតុផលវិបត្តិកូវីដ១៩។
លោកបន្ថែមថា៖ «កម្មករខូចប្រយោជន៍ច្រើនណាស់ បើគាត់ត្រូវមានកំហុសធ្ងន់ត្រូវគេបញ្ឈប់ ក៏គេអត់ឱ្យដែរ ហើយការពន្យារយូរបែបហ្នឹង ជួនកាលគាត់ឈប់ពីកន្លែងហ្នឹងទៅកន្លែងផ្សេងទៀត គាត់ត្រូវបាត់ផលប្រយោជន៍ហ្នឹងហើយ ម្នាក់៤ទៅ៥រយដុល្លារ ម្នាក់ទៅ១ពាន់ទៅ២ពាន់ដុល្លារ គឺគាត់បាត់លុយហើយ។ ច្បាប់បានអនុញ្ញាតឱ្យបើកហើយ តែការលើកពេលរបស់ក្រសួង វាគ្រាន់តែវិធានការសម្រួលដល់និយោជកទេ ប៉ុន្តែសម្រួលរហូតធ្វើឱ្យកម្មករមិនទទួលបានផលប្រយោជន៍ហ្នឹង ក៏មិនល្អដែរ»។
កាលពីថ្ងៃទី១២ ខែមករា ឆ្នាំ២០២១នេះ កម្មករ-កម្មការិនីរាប់ពាន់នាក់ បម្រើការងារនៅរោងចក្រកាត់ដេរសម្លៀកបំពាក់ តៃអ៊ីហ្ស៊ី អ៊ីនធឺណាសិនណល ខូ.អិល.ធី.ឌី (TAI EASY INTERNATIONAL CO.,LTD) ស្ថិតក្នុងស្រុកក្រគរ ខេត្តពោធិ៍សាត់ ក៏បានតវ៉ាបិទផ្លូវជាតិលេខ៥ ប្រមាណ៣០នាទីដែរ ដើម្បីទាមទារឱ្យថៅកែបើកប្រាក់អតីតភាពការងារនិងប្រាក់ដំណាច់ឆ្នាំជូនពួកគាត់៕
