កម្ពុជាចាត់ទុកការដែលអ្នកជំនាញសិទ្ធិមនុស្សអង្គការសហប្រជាជាតិ (UN) អំពាវនាវឱ្យបញ្ឈប់ជាបន្ទាន់នូវការឃុំខ្លួនជាប្រព័ន្ធទៅលើអ្នកការពារសិទ្ធិមនុស្ស ក្នុងរយៈពេល៣ខែចុងក្រោយនេះ ថាជាការលើកឡើងបែបលម្អៀងនិងគ្មានមូលដ្ឋានច្បាស់លាស់។
ប្រតិកម្មរបស់រដ្ឋាភិបាលនេះ ធ្វើឡើងក្រោយពីអ្នករាយការណ៍ពិសេសស្តីពីស្ថានភាពអ្នកការពារសិទ្ធិមនុស្សអង្គការសហប្រជាជាតិ លោកស្រី Mary Lawlor កាលពីថ្ងៃទី១៦ ខែវិច្ឆិកា បានលើកឡើងក្នុងសេចក្តីថ្លែងកាណ៍ពីទីក្រុងហ្សឺណែវ ប្រទេសស្វីស មកថា គាត់មានកង្វល់ចំពោះរបាយការណ៍ដែលអាចជឿទុកចិត្តបានថា មានអ្នកការពារសិទិ្ធមនុស្សយ៉ាងហោចណាស់ចំនួន២១នាក់ បានទទួលរងនូវការគំរាមកំហែង ការចាប់ខ្លួន និងការឃុំខ្លួនដោយបំពាន ក្នុងរយៈពេលបីខែកន្លងមកនេះ។
លោកស្រីបន្តថា កម្លាំងសន្តិសុខរបស់កម្ពុជាបានប្រើប្រាស់កម្លាំងហួសប្រមាណ ដើម្បីហាមឃាត់អ្នកការពារសិទ្ធិមនុស្ស ដែលភាគច្រើនជាស្ត្រី មិនឱ្យប្រើប្រាស់សិទ្ធិរបស់ពួកគេក្នុងការជួបប្រជុំដោយសន្តិវិធី។ លោកស្រីគូសបញ្ជាក់ថា ការលើកស្ទួយនិងការការពារសិទ្ធិមនុស្ស តាមរយៈមធ្យោបាយសន្តិវិធី មិនមែនជាបទល្មើសទេ ហើយថា លំនាំនេះត្រូវតែបញ្ចប់។
អ្នកជំនាញសិទ្ធិមនុស្សរបស់ UN រូបនេះ បានជំរុញអាជ្ញាធរកម្ពុជាបញ្ឈប់នូវវិធីសាស្ត្រដ៏គ្រោះថ្នាក់នេះទៅលើអ្នកការពារសិទ្ធិមនុស្ស និងជួយសម្រួលដល់សេរីភាពក្នុងការបញ្ចេញមតិនិងការជួបប្រជុំ ដើម្បីជាប្រយោជន៍ដល់សមាជិកគ្រប់រូបនៃសង្គមនៅប្រទេសកម្ពុជា។
លោកស្រី Lawlor បានគូសបញ្ជាក់ថា៖ «អំពាវនាវឱ្យបញ្ឈប់ជាបន្ទាន់នូវការឃុំខ្លួនជាប្រព័ន្ធនិងការផ្តន្ទាទោសព្រហ្មទណ្ឌដល់អ្នកការពារសិទ្ធិមនុស្ស ព្រមទាំងការប្រើប្រាស់កម្លាំងហួសប្រមាណប្រឆាំងនឹងពួកគេ»។
ភ្លាមៗនេះ ស្ថានបេសកកម្មអចិន្ត្រៃយ៍កម្ពុជា ប្រចាំអង្គការសហប្រជាជាតិនិងអង្គការអន្តរជាតិនានានៅទីក្រុងហ្ស៊ឺណែវ បានចេញសេចក្តីថ្លែងការណ៍ នៅថ្ងៃទី១៦ ខែវិច្ឆិកា ដោយបង្ហាញពីការខកចិត្តចំពោះការលើកឡើងរបស់លោកស្រី Lawlor នេះ។
តំណាងរដ្ឋាភិបាលកម្ពុជា បាននិយាយថា សេចក្តីថ្លែងការណ៍របស់លោកស្រី Lawlor មិនបានផ្ទៀងផ្ទាត់ព័ត៌មានដែលទទួលបានជាមួយប្រភពរដ្ឋាភិបាលទេ និងមានភាពលម្អៀងធ្វើឱ្យមានការខូចខាត។
ភាគីកម្ពុជាបានអះអាងទៀតថា ស្ថានបេសកកម្មកម្ពុជាបានបំភ្លឺនូវហេតុការណ៍ពិតនៃសភាពការណ៍អស់ទាំងនោះជូនដល់នីតិវិធីពិសេសជាច្រើនលើក និងបានឆ្លើយតបយ៉ាងលម្អិតទៅនឹងការសាកសួរជាលាយលក្ខណ៍អក្សរផងដែរ។
តំណាងរដ្ឋាភិបាលកម្ពុជា បានគូសបញ្ជាក់ថា៖ «ការប្រមូលផ្តុំដោយសន្តិវិធីដែលសហការជាមួយអាជ្ញាធរ និងប្រកាន់ខ្ជាប់នូវវិធានការសន្តិសុខនិងសុវត្ថិភាព គឺជាការអនុវត្តសេរីភាពដែលស្របតាមរដ្ឋធម្មនុញ្ញនិងស្របតាមច្បាប់។ ផ្ទុយទៅវិញ ការប្រមូលផ្តុំក្នុងគោលបំណងដាក់សម្ពាធលើប្រព័ន្ធតុលាការ គឺជាបទល្មើស ដែលមានចែងក្នុងមាត្រា៥២២ នៃក្រមព្រហ្មទណ្ឌរបស់ប្រទេសកម្ពុជា»។
អ្នកនាំពាក្យក្រសួងយុត្តិធម៌កម្ពុជា លោក ជិន ម៉ាលីន ក៏បានច្រានចោលដូចគ្នានេះដែរ ចំពោះការលើកឡើងរបស់អ្នកជំនាញសិទ្ធិមនុស្ស UN រូបនេះ ដោយលោកថា មិនមានមូលដ្ឋានគ្រប់គ្រាន់និងគ្រប់ជ្រុងជ្រោយ ក្នុងការសន្និដ្ឋាននិងវាយតម្លៃពីស្ថានភាពអ្នកការពារសិទ្ធិមនុស្សនៅកម្ពុជានោះទេ។
អ្នកនាំពាក្យរូបនេះសរសេរក្នុងទំព័រហ្វេសប៊ុករបស់លោកថា៖ «រដ្ឋាភិបាលនិងសមត្ថកិច្ចមិនបានធ្វើទុក្ខបុកម្នេញលើអ្នកការពារសិទ្ធិមនុស្សនោះទេ គឺមានតែវិធានការច្បាប់ចំពោះអ្នកដែលប្រព្រឹត្តបទល្មើសតែប៉ុណ្ណោះ»។
នាយករងអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា កម្ពុជាជារដ្ឋភាគីរបស់អង្គការសហប្រជាជាតិ មានកាតព្វកិច្ចគោរពសិទ្ធិមនុស្សតបតាមបទដ្ឋានអន្តរជាតិ និងជាប្រទេសហត្ថលេខីផ្តល់សច្ចាប័នលើកត្តិកាសញ្ញាអន្តរជាតិស្តីពីសិទ្ធិពលរដ្ឋនិងសិទ្ធិនយោបាយផងដែរ។
ករណីនេះ លោកថា កម្ពុជាគួរពិនិត្យនិងពិចារណាឡើងវិញ ក្នុងការកែលម្អស្ថានភាពសិទ្ធិមនុស្ស ខណៈការចាប់ខ្លួនអ្នកប្រមូលផ្តុំនិងអ្នកតវ៉ាដោយសន្តិវិធីកន្លងមក ត្រូវបានគេមើលឃើញថា ជាការបំពានទៅលើសេរីភាពជាមូលដ្ឋានរបស់ពលរដ្ឋ។
លោក អំ សំអាត បានថ្លែងថា៖ «ក្នុងនាមរដ្ឋជាភាគី យើង [កម្ពុជា] គួរតែពិនិត្យមើលឡើងវិញដែរ ពីព្រោះការអនុវត្តច្បាប់ ប្រសិនបើការអនុវត្តច្បាប់ខ្លះ វាអាចនឹងបំពានទៅលើបទដ្ឋានអន្តរជាតិស្តីពីសិទ្ធិមនុស្សឬក៏ប៉ះពាល់ ដែលមិនស្របទៅតាមរដ្ឋធម្មនុញ្ញ អាជ្ញាធរនិងរដ្ឋាភិបាលគួរតែពិចារណាកែសម្រួលឡើងវិញផងដែរ»។
អ្នកឃ្លាំមើលសិទ្ធិមនុស្សរូបនេះមានប្រសាសន៍ទៀតថា កម្ពុជាអាចនឹងបន្តខាតបង់ច្រើនជាងនេះ ប្រសិនបើមិនមានការស្តារស្ថានភាពសិទ្ធិមនុស្សនិងប្រជាធិបតេយ្យឡើងវិញទេនោះ។
អ្នកវិភាគបញ្ហាសង្គម លោកបណ្ឌិត សេង សារី មានប្រសាសន៍ថា ការព្រួយបារម្ភរបស់អ្នកជំនាញសិទ្ធិមនុស្សអង្គការសហប្រជាជាតិ ទំនងជាមិនមានឥទ្ធិពលដល់ការសម្រេចចិត្តរបស់រដ្ឋាភិបាលទេ។ ប៉ុន្តែលោកថា រដ្ឋាភិបាលគួរតែវិលចូលគន្លងប្រជាធិបតេយ្យវិញ ដើម្បីរក្សាអត្ថប្រយោជន៍ជាតិ។
លោកថា៖ «ជាគំនិតរបស់ខ្ញុំ វាដល់ពេលវេលាមួយដែលកម្ពុជាត្រូវធ្វើតម្លាភាពនៃការគ្រប់គ្រងរបស់ខ្លួន ជាពិសេសធ្វើតុល្យភាពនៃគន្លងប្រជាធិបតេយ្យឡើងវិញ ដោយសារតែស្ថានការណ៍នយោបាយនៅក្រៅប្រទេសក៏មានការប្រែប្រួល ជាពិសេសយើងឃើញថា ឥទ្ធិពលនៃការបោះឆ្នោតនៅអាមេរិកនេះ ប្រសិនបើករណី[គណបក្ស]ប្រជាធិបតេយ្យឈ្នះហ្នឹង ប្រាកដជាមានផលប៉ះពាល់នយោបាយទាំងនៅក្នុងតំបន់ ក៏ដូចជានយោបាយនៅក្នុងប្រទេសកម្ពុជា»។
ទោះយ៉ាងណា តំណាងរដ្ឋាភិបាលប្រចាំនៅអង្គការសហប្រជាជាតិ អះអាងថា រដ្ឋាភិបាលកម្ពុជា នៅតែប្តេជ្ញាចិត្តបន្តធានាអនុវត្តសិទ្ធិនិងសេរីភាពទាំងអស់ដែលមានចែងក្នុងរដ្ឋធម្មនុញ្ញនិងនៅក្នុងក្រមខណ្ឌនីតិរដ្ឋ ដើម្បីជាឧត្តមប្រយោជន៍របស់ពលរដ្ឋទាំងអស់ដែលគោរពច្បាប់ មិនមែនសម្រាប់តែក្រុមជាក់លាក់ណាមួយនោះឡើយ៕
