អ្នកជំនាញសិទ្ធិមនុស្សអង្គការសហប្រជាជាតិ អ្នកស្រី Mary Lawlor បានលើកឡើងថា ការលើកស្ទួយនិងការពារសិទ្ធិមនុស្សតាមមធ្យោបាយសន្តិវិធី មិនមែនជាបទល្មើសនោះទេ។
អ្នកស្រី Mary Lawlor ដែលជាអ្នករាយការណ៍ពិសេសរបស់អង្គការសហប្រជាជាតិស្ដីពីស្ថានភាពរបស់អ្នកការពារសិទ្ធិមនុស្ស បានលើកឡើងបែបនេះនៅក្នុងសេចក្ដីថ្លែងការណ៍របស់អ្នកស្រី ដែលបង្ហាញក្ដីបារម្ភចំពោះការបង្ក្រាបរបស់អាជ្ញាធររដ្ឋាភិបាលកម្ពុជា ទៅលើសកម្មជនការពារសិទ្ធិមនុស្សច្រើននាក់នៅក្នុងរយៈពេលបីបួនខែចុងក្រោយនេះ។
អ្នកស្រី Mary Lawlor ថ្លែងក្នុងសេចក្ដីថ្លែងការណ៍នោះថា៖ «ខ្ញុំបានពិនិត្យឡើងវិញនូវវីដេអូដែលអាចរកបានជាសាធារណៈ ដែលកម្លាំងសន្តិសុខបានប្រើប្រាស់កម្លាំងហួសប្រមាណ ដើម្បីហាមឃាត់អ្នកការពារសិទ្ធិមនុស្ស ដែលភាគច្រើនជាស្ត្រី មិនឱ្យប្រើប្រាស់សិទ្ធិរបស់ពួកគេក្នុងការជួបជុំដោយសន្តិវិធី»។
អ្នកស្រី Lawlor បន្ថែមថា៖ «ការលើកស្ទួយនិងការការពារសិទ្ធិមនុស្សតាមរយៈមធ្យោបាយសន្តិវិធី មិនមែនជាបទល្មើសនោះទេ»។
បើតាមអ្នកជំនាញសិទ្ធិមនុស្សអង្គការសហប្រជាជាតិរូបនេះ អ្នកការពារសិទ្ធិមនុស្សយ៉ាងហោចណាស់១២រូបហើយ ត្រូវបានអាជ្ញាធរគំរាមកំហែង ចាប់ខ្លួន និងដាក់ឃុំនៅក្នុងរយៈពេល៣ខែចុងក្រោយនេះ។
អតីតប្រធានសមាគមគ្រូបង្រៀនឯករាជ្យ និងជាអតីតសមាជិកដឹកនាំនៃគណៈកម្មាធិការជាតិរៀបចំការបោះឆ្នោត លោក រ៉ុង ឈុន ត្រូវបានសមត្ថកិច្ចចាប់ខ្លួនកាលពីយប់ថ្ងៃទី៣១ ខែកក្កដាកន្លងមកនេះ ជុំវិញការថ្លែងរបស់លោកថា ពលរដ្ឋនៅខេត្តត្បូងឃ្មុំបាត់បង់ដីស្រែចម្ការរបស់ពួកគេដោយសារការបោះបង្គោលព្រំដែនកម្ពុជា-វៀតណាមនៅក្នុងខេត្តនេះ។
អ្នកស្រី Lawlor ថ្លែងបន្តថា៖ «អ្នកការពារសិទ្ធិមនុស្សមិនគួរត្រូវបានដាក់ទោសព្រហ្មទណ្ឌចំពោះកិច្ចខិតខំប្រឹងប្រែងប្រកបដោយសេចក្ដីក្លាហានរបស់ពួកគេ ដើម្បីការពារសិទ្ធិអ្នកដទៃឡើយ»។
អ្នកស្រី Lawlor បន្ថែមថា៖ «ខ្ញុំកាន់តែមានកង្វល់ចំពោះលំនាំដដែលៗនៃការឃុំខ្លួនអ្នកការពារសិទ្ធិមនុស្សដែលបានធ្វើការតស៊ូមតិប្រឆាំងនឹងការឃុំខ្លួន ឬការរំលោភបំពានលើអ្នកការពារសិទ្ធិមនុស្សដូចគ្នា»៕
