មន្ត្រីជាន់ខ្ពស់ក្រសួងបរិស្ថាន អះអាងថា បទល្មើសទន្ទ្រានយកដីព្រៃតំបន់ការពារធ្វើកម្មសិទ្ធិខុសច្បាប់មានការកើនឡើង ខណៈបទល្មើសកាប់និងដឹកជញ្ជូនឈើទ្រង់ទ្រាយធំនៅតំបន់អភិរក្ស ត្រូវបានលុបបំបាត់។
ប្រាប់អ្នកសារព័ត៌មានក្នុងសន្និបាតបូកសរុបលទ្ធផលការងារបរិស្ថានឆ្នាំ២០២០ នៅទីស្តីការក្រសួងនៅថ្ងៃអង្គារនេះ អ្នកនាំពាក្យក្រសួងបរិស្ថាន លោក នេត្រ ភក្ត្រា មានប្រសាសន៍ថា បច្ចុប្បន្ន សកម្មភាពកាប់និងដឹកជញ្ជូនឈើទ្រង់ទ្រាយធំក្នុងតំបន់ការពារ ពុំមានទៀតឡើយ ប៉ុន្តែក្រសួងបរិស្ថានបានរកឃើញថា បទល្មើសទន្ទ្រានកាន់កាប់ដីព្រៃខុសច្បាប់មានការកើនឡើង ដោយសារតម្លៃដីកើនខ្ពស់និងតម្រូវការដីសម្រាប់ធ្វើការអភិវឌ្ឍផ្សេងៗមានការកើនឡើងដែរ។
លោក នេត្រ ភក្ត្រា ឱ្យដឹងថា ក្រសួងបរិស្ថានកំពុងដំណើរការដោះស្រាយជម្លោះដីធ្លីក្នុងតំបន់ការពារធម្មជាតិមួយចំនួន ដើម្បីឈានទៅរកការកំណត់ព្រំនិងដាក់វិធានការការពារ។
លោក នេត្រ ភក្ត្រា ថ្លែងថា៖ «នេះជាវិធានការមួយដែលយើងយល់ថា មានប្រសិទ្ធភាពក្នុងការទប់ស្កាត់ការទន្ទ្រានដីព្រៃដោយខុសច្បាប់ ពីព្រោះបច្ចុប្បន្ននេះ អ្វីដែលយើងជួបបញ្ហាប្រឈមស្ថានភាពបទល្មើស ក្រៅពីការលួចកាប់និងដឹកឈើខុសច្បាប់ដែលមានខ្នាតទ្រង់ទ្រាយតូច ប៉ុន្តែយើងឃើញមានបទល្មើសទន្ទ្រានកាន់កាប់ដីព្រៃខុសច្បាប់មានការកើនឡើង ដោយសារតម្លៃដីមានការកើនឡើង តម្រូវការដីសម្រាប់ការអភិវឌ្ឍធ្វើកសិកម្ម និងកសិឧស្សាហកម្ម និងធ្វើអ្វីផ្សេងៗ មានការកើនឡើង»។
លោក នេត្រ ភក្ត្រា បន្ថែមថា យោងតាមរបាយការណ៍នៅឆ្នាំ១៩៦៤ គម្របព្រៃឈើនៅកម្ពុជាមានទំហំដល់ទៅ៧៣ភាគរយនៃផ្ទៃប្រទេសកម្ពុជាទាំងមូល ប៉ុន្តែគម្របព្រៃឈើបានថយមកនៅត្រឹម៤៦,៨៦ភាគរយនៅត្រឹមឆ្នាំ២០១៨កន្លងមកនេះ ដែលស្មើនឹងប្រមាណ៨លាន៥សែនហិកតានៅទូទាំងប្រទេស។ លោកបន្ថែមថា គម្របព្រៃឈើនៅកម្ពុជាដែលបានបាត់បង់ បានក្លាយទៅជាដីចម្ការនិងដីលំនៅឋានរបស់ប្រជាពលរដ្ឋ។
ប្រធានព្រៃសហគមន៍សង្ឃរុក្ខវ័ន្ត ព្រះតេជគុណ ប៊ុន សាលួត មានសង្ឃដីកាថា ដើម្បីការពារដីព្រៃសហគមន៍និងតំបន់ការពារធម្មជាតិបានយូរអង្វែងនិងមានប្រសិទ្ធភាព លុះត្រាតែមានការកំណត់ព្រំច្បាស់លាស់ ហើយបានការចូលរួមការពារពិតប្រាកដពីអាជ្ញាធរមូលដ្ឋាននិងអាជ្ញាធរពាក់ព័ន្ធផ្សេងទៀត។
ព្រះតេជគុណ ប៊ុន សាលួត មានសង្ឃដីកាឱ្យដឹងថា កន្លងទៅ ដីព្រៃសហគមន៍ដែលព្រះអង្គកំពុងការពារ ក៏រងការទន្ទ្រានចូលកាន់កាប់ពីប្រជាពលរដ្ឋដែរ ប៉ុន្តែប៉ុន្មានឆ្នាំចុងក្រោយនេះ ព្រះអង្គបានកាយដីកំណត់ព្រំច្បាស់លាស់ ហើយមានការចូលរួមការពារពីអាជ្ញាធរពាក់ព័ន្ធ និងផ្សព្វផ្សាយឱ្យប្រជាពលរដ្ឋបានយល់ដឹងពីសារៈប្រយោជន៍ព្រៃឈើ ទើបកាត់បន្ថយទំនាស់និងគ្មានការរុករានដីព្រៃបន្តទៀត។
ព្រះតេជគុណ ប៊ុន សាលួត មានសង្ឃដីកាថា៖ «ដើម្បីកុំឱ្យមានបញ្ហា កុំឱ្យទំនាស់កើតឡើងបាន គឺមានតែមួយវិធីតែមួយគាត់ គឺយើងកំណត់និងកាយព្រំ។ មានតែកាយព្រំមួយគត់ដែលយើងកាត់បន្ថយទំនាស់បានច្រើនបំផុត ហើយព្រៃឈើនេះអាចគ្រប់គ្រងបាន»។
ក្នុងសន្និបាតបូកសរុបលទ្ធផលការងារបរិស្ថានឆ្នាំ២០២០នៅព្រឹកមិញនេះ រដ្ឋមន្ត្រីក្រសួងបរិស្ថាន លោក សាយ សំអាល់ បានប្រាប់ឱ្យមន្ត្រីក្រោមឱវាទបន្តខិតខំការពារនិងអភិរក្សធនធានធម្មជាតិដោយពន្លឿនការងារបោះបង្គោលព្រំ ចុះបញ្ជីដីរដ្ឋនៅតំបន់ការពារធម្មជាតិទាំងអស់ ដើម្បីធានាពីការគ្រប់គ្រងតំបន់ការពារធម្មជាតិឱ្យមានប្រសិទ្ធភាព។
លោក សាយ សំអាល់ ថ្លែងថា៖ «ត្រូវចូលរួមយ៉ាងសកម្មជាមួយអគ្គអប់រំ ដើម្បីតាមដានសិក្សាស្រាវជ្រាវចំពោះការប្រែប្រួលគម្របព្រៃឈើរបស់យើង តាមរយៈផ្កាយរណបដែលបានធ្វើ ដើម្បីយកជាគោលកុំឱ្យអ្នកនេះថាអញ្ចេះ អ្នកនោះថាអញ្ចុះ។ ថាតើគម្របព្រៃរបស់កម្ពុជាក្នុងក្របខណ្ឌតំបន់អភិរក្សមានប៉ុន្មាន? ក្រៅតំបន់អភិរក្សមានប៉ុន្មាន? កំណត់ឱ្យបានច្បាស់លាស់ យើងត្រូវចូលរួមឱ្យសកម្ម»។
រដ្ឋលេខាធិការក្រសួងបរិស្ថាន លោក ផៃ ប៊ុនជឿន មានប្រសាសន៍ថា តំបន់ការពារធម្មជាតិបច្ចុប្បន្ន បានកើនដល់៦៥កន្លែង គ្របដណ្តប់លើផ្ទៃដីទំហំប្រមាណ៧,២លានហិកតា ឬស្មើនឹង៤១ភាគរយនៃផ្ទៃដីប្រទេសកម្ពុជាទាំងមូល៕