ក្រុមមន្ត្រីបានឱ្យដឹងនៅរសៀលថ្ងៃចន្ទនេះថា ជំនន់ទឹកភ្លៀងនៅតាមបណ្តារាជធានី-ខេត្តមួយចំនួនបានស្រកបណ្តើរៗហើយ ប៉ុន្តែទឹកនៅបន្តជន់លិចខ្លាំងនៅតំបន់ខ្លះក្នុងខេត្តបន្ទាយមានជ័យនិងស្ទឹងត្រែង ដោយសារទឹកហូរមកពីប្រទេសថៃនិងឡាវ។
អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា មានប្រសាសន៍ថា ទឹកជំនន់ដែលធ្លាក់ពីប្រទេសថៃដែលកំពុងជន់លិចខ្លាំងនៅក្រុងប៉ោយប៉ែត និងបន្តធ្លាក់ទៅជន់លិចនៅស្រុកស្វាយចេក និងស្រុកថ្មពួក ខេត្តបន្ទាយមានជ័យ។
អ្នកនាំពាក្យរូបនេះបន្តថា ចំណែកប្រទេសឡាវក៏បានបើកទំនប់មួយផងដែរ ដែលបណ្តាលឱ្យទឹកជន់លិចនៅតំបន់សងខាងនៃដងទន្លេស្រែពក ក្នុងខេត្តស្ទឹងត្រែងផងដែរ។ ប៉ុន្តែលោកថា សម្រាប់រាជធានី-ខេត្តដែលធ្លាប់រងការជន់លិចដោយជំនន់ទឹកភ្លៀងក្នុងរយៈពេលប៉ុន្មានថ្ងៃកន្លងមកនេះ បានស្រកចុះខ្លះហើយ។
លោកបន្ថែមថា៖ «ខេត្តផ្សេងៗទៀតមិនអីទេ បានធូរស្រាលច្រើនហើយ។ សូម្បីតែភ្នំពេញក៏ទឹកស្រកជាង១ម៉ែត្រហើយ»។
អភិបាលក្រុងប៉ោយប៉ែត លោក គៀត ហ៊ុល ប្រាប់វីអូឌីថា ស្ថានភាពទឹកជំនន់ធ្លាក់ពីប្រទេសថៃ បានកំពុងបង្កឱ្យមានការជន់លិចខ្លាំងនៅក្នុងក្រុងប៉ោយប៉ែតនិងតំបន់មួយចំនួនទៀត។ លោកបន្តថា អាជ្ញាធរពាក់ព័ន្ធកំពុងជួយជម្លៀសពលរដ្ឋចេញពីភូមិដែលកំពុងលិចទឹកទៅទីទួលសុវត្ថិភាព។
លោក គៀត ហ៊ុល បញ្ជាក់ថា កម្ពស់ទឹកបានហក់ឡើងខ្ពស់រហូតចង់លិចស្ពានមិត្តភាពកម្ពុជា-ថៃ និងប៉ែកខាងត្បូងក្រុងប៉ោយប៉ែតស្ទើរលិចទាំងស្រុង។
លោកបន្ថែមថា៖ «យើងមិនទាន់បញ្ជាក់ឬគ្រប់គ្រងចំនួនប្រជាពលរដ្ឋដែលជួយសង្គ្រោះបាននៅឡើយទេ។ ឥលូវកងទ័ពនិងកម្លាំងគ្រប់ប្រភេទកំពុងដុតដៃដុតជើងជួយសង្គ្រោះប្រជាពលរដ្ឋទៅទីទួលសុវត្ថិភាព»។
មន្ត្រីលេខាធិការដ្ឋានគ្រោះមហន្តរាយនៃរដ្ឋបាលខេត្តបន្ទាយមានជ័យ លោក ឈុន ប៊ុនថា អះអាងថា ទឹកដែលកំពុងជន់លិចនៅខេត្តនេះ មួយផ្នែកជាជំនន់ទឹកភ្លៀង និងមួយផ្នែកទៀតហូរធ្លាក់ចេញពីទំនប់មួយនៅខេត្តស្រះកែវ ប្រទេសថៃ ហើយហូរចូលមកប្រទេសកម្ពុជាតាមច្រកប៉ោយប៉ែត ដែលបណ្តាលឱ្យប្រជាពលរដ្ឋរស់នៅជាប់ព្រំដែនកម្ពុជា-ថៃ រងការជន់លិច។
លោកបន្តថា មុនទឹកធ្លាក់ចូលដល់កម្ពុជា គឺអាជ្ញាធរថៃបានជូនដំណឹងមុនចំនួន៣ថ្ងៃ ហើយអាជ្ញាធរខ្មែរបានជូនដំណឹងបន្តទៅប្រជាពលរដ្ឋដែរ ប៉ុន្តែអ្នកភូមិមិនព្រមឡើងមកទីទួលសុវត្ថិភាព ដោយសារមើលឃើញទឹកធ្លាក់មកតាមប្រឡាយនៅតិចនៅឡើយ។
លោកបន្ថែមថា៖ «អាជ្ញាធរយើងនៅតែព្រួយបារម្ភ ពីព្រោះកម្ពស់ទឹកនៅតែបន្តឡើង ហើយវាអាចបង្កផលប៉ះពាល់ច្រើនដល់សុខភាពប្រជាជននិងការខូចខាតហេដ្ឋារចនាសម្ព័ន្ធផ្សេងៗ»។
បើតាមលោក ឈុន ប៊ុនថា ចាប់ពីថ្ងៃទី១ ខែកញ្ញា ដល់ថ្ងៃទី១៩ ខែតុលា ឆ្នាំ២០២០ គ្រោះទឹកជំនន់បានសម្លាប់ប្រជាជននៅខេត្តបន្ទាយមានចំនួន១៥នាក់ ក្នុងនោះបាត់ខ្លួនម្នាក់។
ចំណែកអភិបាលរាជធានីភ្នំពេញ លោក ឃួង ស្រេង មានប្រសាសន៍ថា ទឹកជំនន់ស្ទឹងព្រែកត្នោតបានបង្កផលប៉ះពាល់ដល់ប្រជាពលរដ្ឋប្រមាណជាង៥ ០០០គ្រួសារក្នុងខណ្ឌដង្កោ ក្នុងនោះ ពលរដ្ឋប្រមាណជាង៣ពាន់គ្រួសារ ត្រូវបានជម្លៀសមកកាន់កន្លែងមានសុវត្ថិភាព។
អភិបាលរងខណ្ឌដង្កោ លោក ជ គឹមស៊ ប្រាប់ថា ទឹកស្ទឹងព្រែកត្នោតស្រកខ្លាំង ហើយប្រជាពលរដ្ឋមួយចំនួនចូលទៅរស់នៅក្នុងលំនៅឋានពួកគាត់វិញហើយ ប៉ុន្តែលោកថា សង្កាត់ខ្លះក្នុងខណ្ឌនេះ នៅតែបន្តរងការលិចលង់ខ្លាំងនៅឡើយ។
លោក ជ គឹមស៊ ប្រាប់វីអូឌីថា៖ «ទឹកស្រកខ្លាំងមែនទែន ស្រកទឹកស្ទឹងខ្លាំង តែទឹកដែលចូលទៅលិចផ្ទះ ស្រកយឺត។ ទឹកវាចូលទៅលិចផ្ទះ ចូលបាន តែចេញមកវិញ ស្រកយឺត។ ស្ទឹងស្រកមែន តែទឹកភ្លៀងច្រាលមកភាគខាងលើ ហូរមកពីភាគខាងលិចខណ្ឌពោធិ៍សែនជ័យ ខណ្ឌកំបូល ធ្លាក់មកសង្កាត់ព្រៃស សង្កាត់ពងទឹក សង្កាត់ព្រៃវែង [ខណ្ឌដង្កោ] លិចខ្លាំងមែនទែន ទឹកល្ហល្ហាចដូចបឹងអ៊ីចឹង»។
បើតាមលោក ជ គឹមស៊ កំណាត់ផ្លូវលេខ២១៧ ចន្លោះពីព្រែកជ្រៃទៅរង្វង់មូលកួរស្រូវ មិនទាន់អាចដំណើរការបាននៅឡើយទេ ដោយទឹកកំពុងជន់លិច។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ ឱ្យដឹងថា គិតចាប់ពីថ្ងៃទី១ ខែកញ្ញា ដល់ព្រឹកថ្ងៃទី១៩ ខែតុលា ជំនន់ទឹកភ្លៀងបានប៉ះពាល់ដល់១៩រាជធានី-ខេត្ត និងប៉ះពាល់ប្រជាជន៧៨ ០៥៦គ្រួសារ ស្មើប្រមាណជាង៣១ម៉ឺននាក់។
របាយការណ៍ដដែលបញ្ជាក់ថា ប្រជាជន៩ ៣៤៩គ្រួសារ ត្រូវបានជម្លៀសចេញទៅកាន់ទីទួលសុវត្ថិភាព ខណៈនៅទូទាំងប្រទេសមានមនុស្សស្លាប់កើនឡើងដល់២៥នាក់ ផ្ទះជាង៧ម៉ឺន៣ពាន់ខ្នង បានរងផលប៉ះពាល់ និងខូចខាត៥៦ខ្នង។ ក្រៅពីនោះ សាលារៀនប្រមាណ៥៦៨កន្លែង ស្រូវប្រមាណជាង២១ម៉ឺនហិកតា និងដំណាំរួមផ្សំជិត៨ម៉ឺនហិកតា ក៏ត្រូវបានទឹកជន់លិចផងដែរ៕