អាជ្ញាធរខណ្ឌដង្កោ បានអះអាងនៅថ្ងៃនេះថា ទឹកស្ទឹងព្រែកត្នោតបានស្រកចុះខ្លាំង ប៉ុន្តែកម្រិតទឹកភ្លៀងដែលបានហូរជន់លិចផ្ទះសម្បែងពលរដ្ឋនៅក្នុងខណ្ឌមួយនេះ បានថមថយក្នុងកម្រិតយឺតៗ។
អភិបាលរងខណ្ឌដង្កោ លោក ជ គឹមស៊ ប្រាប់ថា ទឹកស្ទឹងព្រែកត្នោតស្រកខ្លាំង ហើយប្រជាពលរដ្ឋមួយចំនួននចូលទៅរស់នៅក្នុងលំនៅឋានពួកគាត់វិញហើយ ប៉ុន្តែលោកថា សង្កាត់ខ្លះក្នុងខណ្ឌនេះនៅតែបន្តរងការលិចលង់ខ្លាំងនៅឡើយ។
លោក ជ គឹមស៊ ប្រាប់វីអូឌីថា៖ «ទឹកស្រកខ្លាំងមែនទែន ស្រកទឹកស្ទឹងខ្លាំង តែទឹកដែលចូលទៅលិចផ្ទះ ស្រកយឺត។ ទឹកវាចូលទៅលិចផ្ទះ ចូលបាន តែចេញមកវិញ ស្រកយឺត។ ស្ទឹងស្រកមែន តែទឹកភ្លៀងច្រាលមកភាគខាងលើ ហូរមកពីភាគខាងលិចខណ្ឌពោធិ៍សែនជ័យ ខណ្ឌកំបូល ធ្លាក់មកសង្កាត់ព្រៃស សង្កាត់ពងទឹក សង្កាត់ព្រៃវែង [ខណ្ឌដង្កោ] លិចខ្លាំងមែនទែន ទឹកល្ហល្ហាចដូចបឹងអ៊ីចឹង»។
បើតាមលោក ជ គឹមស៊ កំណាត់ផ្លូវលេខ២១៧ ចន្លោះពីព្រែកជ្រៃទៅរង្វង់មូលកួរស្រូវ មិនទាន់អាចដំណើរការបាននៅឡើយទេ ដោយទឹកកំពុងជន់លិច។
អភិបាលរាជធានីភ្នំពេញ លោក ឃួង ស្រេង មានប្រសាសន៍ថា គិតមកដល់ថ្ងៃចន្ទ ទី១៩ ខែតុលានេះ មានពលរដ្ឋប្រមាណ៣០០គ្រួសារ កំពុងរស់នៅក្នុងទីតាំងដែលរៀបចំឡើងដោយគណៈបញ្ជាការឯកភាពរាជធានីភ្នំពេញ។
លោក ឃួង ស្រេង ប្រាប់ថា៖ «ទីតាំងទី១ ព្រែកជ្រៃ ប្រហែល៦៥គ្រួសារ និងទីតាំងទី២ ពិភពថ្មីកួរស្រូវ២ ប្រហែលជាង២០០គ្រួសារ សរុបប្រហែលជាង៣០០គ្រួសារហ្នឹង! ខ្ញុំហ៊ានថា យើងគ្រប់គ្រងបានល្អណាស់ ទាំងពេទ្យ ទាំងបន្ទប់ទឹក កន្លែងដេកពួនអីហ្នឹង»។
បើតាមលោក ឃួង ស្រេង ទឹកជំនន់ស្ទឹងព្រែកត្នោតបានបង្កផលប៉ះពាល់ដល់ប្រជាពលរដ្ឋប្រមាណជាង៥០០០គ្រួសារក្នុងខណ្ឌដង្កោ ក្នុងនោះពលរដ្ឋប្រមាណជាង៣ពាន់គ្រួសារ ត្រូវបានជម្លៀសមកកាន់កន្លែងមានសុវត្ថិភាព៕
