ក្រុមកម្មករដែលធ្វើការនៅក្រុមហ៊ុនប្រមូលសំរាម ស៊ីនទ្រី សម្រេចចូលធ្វើការវិញនៅល្ងាចនេះ បន្ទាប់ពីក្រុមហ៊ុនសន្យាផ្តល់ប្រាក់អត្ថប្រយោជន៍ផ្សេងៗជូនកម្មករតាមការទាមទារ។
កម្មករជាង២ពាន់នាក់របស់ក្រុមហ៊ុន ស៊ីនទ្រី បាននាំគ្នាតវ៉ាមិនចូលធ្វើការតាំងពីថ្ងៃទី២ ខែតុលា មកដល់ថ្ងៃនេះ ដើម្បីទាមទារទៅថៅកែទូរទាត់ប្រាក់អត្ថប្រយោជន៍៥ចំណុច រួមមាន ប្រាក់អតីតភាពការងារ ប្រាក់ជំងឺចិត្ត ប្រាក់ជួសឱ្យការជូនដំណឹងមុន ប្រាក់ដំណាច់ឆ្នាំដែលនៅសល់ និងប្រាក់ខែចុងក្រោយ។
ប្រធានសហជីពកម្មករនិយោជិតវិស័យទេសចរណ៍កម្ពុជាប្រចាំក្រុមហ៊ុន ស៊ីនទ្រី លោក កៅ សុវ៉ាត ប្រាប់វីអូឌីថា នៅថ្ងៃពុធនេះ តំណាងកម្មករបានជួបចរចារកដំណោះស្រាយជាមួយតំណាងក្រុមហ៊ុននិងតំណាងអាជ្ញាធរ។
លោកអះអាងថា ការជួបចរចាគ្នាលើកនេះ ខាងភាគីក្រុមហ៊ុនបានសន្យាទូរទាត់ប្រាក់អត្ថប្រយោជន៍ផ្សេងៗជូនកម្មករតាមការទាមទារនៅខែកុម្ភៈ ឆ្នាំ២០២១ ហើយក្រុមកម្មករឯកភាពនិងសម្រេចចូលធ្វើការងារវិញនៅល្ងាចនេះ។
លោកបន្ថែមថា៖ «លក្ខខណ្ឌកម្មករសម្រេចចូលធ្វើការងារវិញ គឺក្រុមហ៊ុនបានព្រមព្រៀងផ្តល់ជូនកម្មករតាមការទាមទារ៥ចំណុចហ្នឹង ក្រុមហ៊ុនសន្យាផ្តល់ឱ្យកម្មករនៅសប្តាហ៍ទី២ខែកុម្ភៈ ហើយកម្មករក៏ឯកភាពត្រូវគ្នាហើយ»។
កម្មករផ្នែកបើកបររថយន្តដឹកសំរាម លោក សែង សន និយាយថា លោកពេញចិត្តចំពោះដំណោះស្រាយនេះ ហើយលោកនឹងចូលធ្វើការងារវិញ ប្រសិនបើការសន្យាទូរទាត់អត្ថប្រយោជន៍មានការបញ្ជាក់ច្បាស់លាស់និងដឹងឮពីអាជ្ញាធរពាក់ព័ន្ធ។
លោកថា៖ «ចំពោះខ្ញុំ ប្រសិនជាគេទូរទាត់ឱ្យ៥ចំណុចហ្នឹង ហើយច្បាស់លាស់ថាបានក្នុងខែ២ហ្នឹង គឺខ្ញុំអូខេហើយ តែសម្រាប់បងប្អូនយើងគាត់គិចម៉េចជាសិទ្ធិរបស់គាត់ទេ»។
បើយោងតាមកំណត់ហេតុ ក្រោយការជួបប្រជុំរកដំណោះស្រាយវិវាទការងាររបស់កម្មករនៅក្រុមហ៊ុន ស៊ីនទ្រី នៅថ្ងៃទី១៤ ខែតុលានេះ បានឱ្យដឹងថា ភាគីក្រុមហ៊ុនបានឯកភាពនិងបញ្ចប់កិច្ចសន្យាការងារជាមួយកម្មករនៅថ្ងៃទី៣១ ខែមករា ឆ្នាំ២០២១ ហើយដោះស្រាយដោយបើកប្រាក់អត្ថប្រយោជន៍ផ្សេងៗជូនកម្មករឱ្យស្របទៅតាមច្បាប់ស្តីពីការងារ។
ក្នុងកំណត់ហេតុនោះបញ្ជាក់ថា ប្រាក់ដំណាច់និងអត្ថប្រយោជន៍ផ្សេងៗដែលបានពេលបញ្ចប់កិច្ចសន្យាការងារនោះ នឹងបើកជូនកម្មករយ៉ាងយូរនៅសប្តាហ៍ទី២ ខែកុម្ភៈ ឆ្នាំ២០២១ ហើយរដ្ឋបាលរាជធានីភ្នំពេញជាអ្នកធានាចំនួនទឹកប្រាក់ដែលត្រូវទូរទាត់នោះ ដោយកាត់យកពីកញ្ចប់ប្រាក់សំណង សម្រាប់រំលត់កិច្ចព្រមព្រៀងជាមួយក្រុមហ៊ុន ស៊ីនទ្រី។
កំណត់ហេតុដដែលបន្ថែមទៀតថា ក្រុមហ៊ុនមិនកាត់ប្រាក់ឈ្នួលកម្មករអំឡុងពេលធ្វើកូដកម្ម ចាប់ពីថ្ងៃទី២ ដល់ថ្ងៃទី៧ ខែតុលាទេ ប៉ុន្តែលើកលែងថ្ងៃអាទិត្យ គឺក្រុមហ៊ុនមិនទូរទាត់ឱ្យឡើយ។ ដោយឡែក ការធ្វើកូដកម្មចាប់ពីថ្ងៃទី៨ ដល់ថ្ងៃទី១៤ ខែតុលានេះ ក្រុមហ៊ុនមិនផ្តល់ប្រាក់ឈ្នួលជូនឡើយ ដោយសារកម្មករធ្វើកូដកម្មខុសច្បាប់។
ពាក់ព័ន្ធកម្មករប្រមូលសំរាមធ្វើកូដកម្មនេះ សាលាដំបូងរាជធានីភ្នំពេញ កាលពីថ្ងៃទី១២ ខែតុលា ឆ្នាំ២០២០ ក៏បានចេញដីកាបង្គាប់ឱ្យក្រុមកម្មករទាំងអស់របស់ក្រុមហ៊ុនប្រមូលសំរាម ស៊ីនទ្រី បញ្ឈប់ការធ្វើកូដកម្មនិងត្រូវចូលបំពេញការងារវិញ ដោយចាត់ទុកថា កម្មករប្រមូលសំរាមទាំងនោះធ្វើកូដកម្មខុសនីតិវិធីច្បាប់៕
