មេដឹកនាំសហជីពមួយរូបបានរងការព្រមានពីរដ្ឋាភិបាល បន្ទាប់ពីក្រុមកម្មករប្រមូលសំរាមរបស់ក្រុមហ៊ុនស៊ីនទ្រី បន្តធ្វើកូដកម្មរយៈពេលជិតមួយសប្ដាហ៍កន្លងមកនេះ ដែលបណ្ដាលឱ្យសំរាមរាប់ម៉ឺនតោនកកស្ទះគរនៅតាមគេហដ្ឋាននិងតាមដងវិថីនានាក្នុងរាជធានីភ្នំពេញ។
ក្រុមកម្មករជិត២ពាន់នាក់របស់ក្រុមហ៊ុនប្រមូលសំរាមស៊ីនទ្រី បានផ្ទុះការតវ៉ាតាំងពីថ្ងៃសុក្រសប្ដាហ៍មុនហូតមកដល់ថ្ងៃព្រហស្បតិ៍នេះ ដើម្បីទាមទារទៅថៅកែទូទាត់អត្ថប្រយោជន៍៥ចំណុចមានប្រាក់អតីតភាពការងារ ប្រាក់ជំងឺចិត្ត ប្រាក់ជួសឱ្យការជូនដំណឹងមុន ប្រាក់ដំណាច់ឆ្នាំដែលនៅសល់ និងប្រាក់ខែខុងក្រោយ បន្ទាប់ពីការគ្រប់គ្រងសំរាមនៅរាជធានីភ្នំពេញ កំពុងឈានទៅរកការបែងចែកឡើងវិញជាមួយក្រុមហ៊ុនថ្មីចំនួន២ទៀត។
ក្នុងលិខិតព្រមានចេញនៅថ្ងៃនេះ ក្រសួងការងារ និងបណ្ដុះបណ្ដាលវិជ្ជាជីវៈ បានចោទថា ប្រធានសហព័ន្ធសហជីពកម្មករនិយោជិតវិស័យទេសចរណ៍កម្ពុជា លោក ទូច កុសល បានដឹកនាំកម្មករប្រមូលសំរាមធ្វើកូដកម្មខុសច្បាប់ ធ្វើសកម្មភាពផ្ទុយពីលក្ខន្តិកៈរបស់សហជីព និងដឹកនាំកម្មករធ្វើសកម្មភាពខុសច្បាប់ផ្សេងៗទៀត។
ក្រសួងការងារ បានព្រមានរំលោយសហជីពនេះចោលនិងចាត់វិធានផ្សេងៗទៀតតាមច្បាប់ ប្រសិនបើលោក ទូច កុសល ពុំមានការកែប្រែនិងផ្គើនចំពោះការព្រមាននេះ។
ប្រាប់វីអូឌីនៅថ្ងៃនេះ មេដឹកនាំសហជីពរូបនេះ បានបង្ហាញការខកចិត្តចំពោះការព្រមានពីក្រសួងការងារ ហើយចាត់ទុកការចោទប្រកាន់លើរូបលោកថា «គ្មានមូលដ្ឋាន ឬការស្រាវជ្រាវ និងភស្តុតាងច្បាស់លាស់»។
លោក ទូច កុសល ប្រាប់ថា៖ «ខ្ញុំចង់ប្រាប់ទៅក្រសួងការងារផងដែរថា មុននឹងចេញលិខិតអី គួរតែស្រាវជ្រាវឱ្យគ្រប់ជ្រុងជ្រោយ និងរកភស្តុតាងឱ្យច្បាស់លាស់មុនចោទខ្ញុំ ហើយដល់ពេលអត់មានអីផង មកចោទខ្ញុំស្មានៗព្រាវៗអ៊ីចឹង គឺខ្ញុំពិបាកទទួលយកណាស់។ បើខ្ញុំបានប្រព្រឹត្តដូចការចោទប្រកាន់ អត់ខឹងទេ»។
អគ្គលេខាធិការនៃសហជីពវិស័យទេសចរណ៍នៃក្រុមហ៊ុនស៊ីនទ្រី លោក ម៉ី ផាន ប្រាប់វីអូឌីថា ក្រុមកម្មករសម្រេចបន្តការតវ៉ានៅថ្ងៃនេះទៀត គឺដោយសារពួកគេចង់ឱ្យថៅកែទូទាត់អត្ថប្រយោជន៍ទាំងអស់ជូនកម្មករ មុនការបែងចែកពួកគេទៅបម្រើការងារនៅក្រុមថ្មី។
លោកបន្តថា ក្រុមកម្មករបារម្ភខ្លាចបាត់បង់អត្ថប្រយោជន៍ ក្រោយពេលពួកគេត្រូវបានបែងចែកទៅបម្រើការងារនៅក្រុមហ៊ុនថ្មី។
លោក ម៉ី ផាន ប្រាប់ថា៖ «អ្វីដែលពួកគាត់ទទួលបានសព្វថ្ងៃហ្នឹង [ប្រាក់ខែ] ពួកគាត់ប្រឹងធ្វើទាំងយប់ទាំងថ្ងៃ ហាលថ្ងៃហាលភ្លៀង គាត់មានការលំបាក ហើយប្រាក់ខែតិចតួច។ អ៊ីចឹង បើខាងសាលាក្រុងរើសកម្មករជំនួសគាត់ ហើយគេលែងទទួលគាត់ គាត់ថា គាត់នឹងទៅរកការងារថ្មីធ្វើទៀត ប៉ុន្តែគាត់សុំឱ្យទូទាត់អត្ថប្រយោជន៍តាមច្បាប់ការងារជូនពួកគាត់»។
អភិបាលសាលារាជធានីភ្នំពេញ លោក ឃួង ស្រេង ប្រាប់ទៅក្រុមកម្មករកាលពីម្សិលមិញថា រាជធានីភ្នំពេញបានដេញថ្លៃជ្រើសរើសក្រុមហ៊ុនចំនួន៣ សម្រាប់ធ្វើសកម្មភាពប្រមូលសំរាមនៅទីក្រុងភ្នំពេញនាពេលខាងមុខ និងត្រូវបែងចែកកម្លាំងកម្មករឱ្យទៅបម្រើការងារតាមក្រុមហ៊ុននីមួយៗនោះ។
អភិបាលរាជធានីភ្នំពេញរូបនេះ អះអាងថា ពេលដែលកម្មករបែងចែកទៅបម្រើការងារតាមក្រុមហ៊ុនប្រមូលសំរាមថ្មីនោះ អត្ថប្រយោជន៍របស់ពួកគេរក្សានៅដដែល។
លោក ឃួង ស្រេង ប្រាប់ថា៖ «សូមបញ្ជាក់ខ្លីជូនបងប្អូនថា អត្ថប្រយោជន៍ទាំងឡាយទាំងពួងរបស់បងប្អូន ត្រូវរក្សាទុកនិងផ្តល់ជូនបងប្អូនទៅតាមផ្លូវច្បាប់ដែលបានកំណត់ដោយក្រសួងការងារ»។
កាលពីថ្ងៃទី២២ ខែតុលាឆ្នាំមុន លោក ហ៊ុន សែន បានប្រកាសដកសិទ្ធិប្រមូលសំរាមពីក្រុមហ៊ុនស៊ីនទ្រី ផ្ទេរមកឱ្យសាលារាជធានីភ្នំពេញគ្រប់គ្រងជាបណ្ដោះអាសន្ន ដោយអះអាងថា ដើម្បីជំរុញការធ្វើកំណែទម្រង់ពីការសម្អាតទីក្រុង។ លោក ហ៊ុន សែន បញ្ជាក់ថា រដ្ឋត្រូវគ្រប់គ្រងទាំងសម្ភារនិងបុគ្គលិកទាំងអស់របស់ក្រុមហ៊ុន៕