ចិនបានថ្កោលទោសសហរដ្ឋអាមេរិកថា កំពុងតែប្រើប្រាស់ច្បាប់ប្រទេសខ្លួនឯងមករំលោភបំពានដែនអធិបតេយ្យភាពរបស់កម្ពុជា ក្នុងករណីអាមេរិកដាក់ទណ្ឌកម្មលើក្រុមហ៊ុន Union Development Group (UDG)ដែលកំពុងអភិវឌ្ឍន៍នៅខេត្តកោះកុង។
ប្រតិកម្មរបស់ចិនធ្វើឡើងនេះគឺ១ថ្ងៃបន្ទាប់ពីសហរដ្ឋអាមេរិកបានប្រកាសដាក់ទណ្ឌកម្មលើក្រុមហ៊ុន UDG ដោយចោទថា មានការរំលោភយកដីធ្លីពលរដ្ឋខ្មែរ និង រំលោភសិទ្ធិមនុស្ស។
លិខិតរបស់ស្ថានទូតចិនប្រចាំនៅកម្ពុជាផ្សព្វផ្សាយនៅថ្ងៃពុធម្សិលមិញលើកឡើងថា ក្រុមហ៊ុន UDG ធ្វើសកម្មភាពអភិវឌ្ឍន៍នៅក្នុងខេត្តកោះកុងដោយស្របច្បាប់និងមានការអនុញ្ញាតពីរដ្ឋាភិបាលកម្ពុជា។
ស្ថានទូតចិនចាត់ទុកដាក់ថា អាមេរិកកំពុងតែកៀបសង្កត់លើសហគ្រាសចិន និង បំពានដែនអធិបតេយ្យភាពរបស់កម្ពុជា។
ស្ថានទូតចិន៖«ការកៀបសង្កត់របស់សហរដ្ឋអាមេរិកលើសហគ្រាសស្របច្បាប់របស់ចិននៅក្នុងប្រទេសកម្ពុជា មិនត្រឹមតែធ្វើឱ្យប៉ះពាល់ដល់អត្ថប្រយោជន៍សហគ្រាសសិទ្ធិស្របច្បាប់នោះទេ ហើយរឹតតែជាការរំលោភបំពានទាំងស្រុងលើអធិបតេយ្យភាពរបស់ប្រទេសកម្ពុជាផងដែរ»។
តំបន់សាកល្បងការវិនិយោគអភិវឌ្ឍចម្រុះនិងគម្រោងពិសេសតំបន់ទេសចរណ៍លំហែកាយ «តារាសាគរ»នៅក្នុងខេត្តកោះកុងជាគម្រោងរបស់ក្រុមហ៊ុន UDG ជាក្រុមហ៊ុនក្រោមសម្ព័ន្ធ Tianjin Union Group ដែលជាសហគ្រាសឯកជនរបស់ចិន៕