គណបក្សភ្លើងទៀនបានទទូចទៅស្ថាប័នព្រឹទ្ធសភា ឱ្យបដិសេធនូវសំណើធ្វើវិសោធនកម្មមាត្រាមួយចំនួននៅក្នុងរដ្ឋធម្មនុញ្ញ និងច្បាប់ធម្មនុញ្ញបន្ថែម ក្រោយស្ថាប័នរដ្ឋសភាបានអនុម័តជាផ្លូវការលើសំណើធ្វើវិសោធនកម្មនោះកាលពីពេលថ្មីៗនេះ ដោយពួកគេយល់ថា ការធ្វើវិសោធនកម្មនេះ ផ្ទុយពីគោលការណ៍ប្រជាធិបតេយ្យ សេរី ពហុបក្ស និងការពារអំណាចមនុស្សមួយក្រុមប៉ុណ្ណោះ។
ក្នុងសេចក្តីថ្លែងការណ៍របស់គណបក្សភ្លើងទៀន ក្នុងសប្តាហ៍នេះបានឱ្យដឹងថា ការវិសោធនកម្មរដ្ឋធម្មនុញ្ញលើកទី១០ និងច្បាប់ធម្មនុញ្ញបន្ថែម ដែលរដ្ឋសភាយល់ព្រមអនុម័តកាលពីថ្ងៃទី២៨ ខែកក្កដា មានចំនួន៨មាត្រានោះ មិនគួរធ្វើវិសោធនកម្មយ៉ាងតក់ក្រហល់បែបនេះឡើយ។ បក្សក្រៅរដ្ឋាភិបាលនេះបន្តថា ការធ្វើវិសោធនកម្មរដ្ឋធម្មនុញ្ញនោះ នឹងនាំឱ្យផ្ទុយពីគោលការណ៍លទ្ធិប្រជាធិបតេយ្យ សេរីពហុបក្ស និងការពារអំណាចមនុស្សមួយក្រុមតែប៉ុណ្ណោះ។ ករណីនេះ គណបក្សភ្លើងទៀន ទទូចទៅព្រឹទ្ធសភាមិនត្រូវទទួលយកសំណើនៃការធ្វើវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែមនោះឡើយ។
លិខិតមានខ្លឹមសារថា ៖ «គណបក្សភ្លើងទៀន អំពាវនាវយ៉ាងទទូចដល់ព្រឹទ្ធសភា កុំទទួលយកសេចក្តីព្រាងច្បាប់ ស្ដីពីការធ្វើវិសោធនកម្មរដ្ឋធម្មនុញ្ញនៃព្រះរាជណាចក្រកម្ពុជា ដែលរដ្ឋសភាបានអនុម័ត នាព្រឹកថ្ងៃទី២៨ កក្កដា ឆ្នាំ២០២២ នេះ ទៅពិនិត្យនិងពិភាក្សាជាដាច់ខាត»។
លិខិតដដែលមានខ្លឹមសារថា ៖ «[សេចក្តីព្រាងច្បាប់ស្ដីពីការធ្វើវិសោធនកម្មរដ្ឋធម្មនុញ្ញ]ពុំបានបម្រើផលប្រយោជន៍ប្រជាពលរដ្ឋខ្មែរឡើយ។ ផ្ទុយទៅវិញ គឺដើម្បីតែការពារអំណាច ឱ្យមនុស្សមួយក្រុមនិងបក្ខពួករបស់គេតែប៉ុណ្ណោះ»។
វីអូឌីពុំអាចទាក់ទងអ្នកនាំពាក្យគណបក្សភ្លើងទៀន លោក ថាច់ សេដ្ឋា ដើម្បីសុំការបញ្ជាក់បន្ថែមបានទេនៅថ្ងៃនេះ។
អ្នកនាំពាក្យព្រឹទ្ធសភា លោក ម៉ម ប៊ុននាង មានប្រសាសន៍កាលពីម្សិលមិញថា ព្រឹទ្ធសភាមិនទាន់ទទួលបានសេចក្តីព្រាងវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែមពីរដ្ឋសភានៅឡើយទេ។ ប៉ុន្តែលោកថា សេចក្តីព្រាងច្បាប់នោះទំនងជាបញ្ជូនមកដល់ព្រឹទ្ធសភានៅដើមសប្តាហ៍ក្រោយនេះ។
ករណីនេះ លោកថា នៅពេលព្រឹទ្ធសភាទទួលបានសេចក្តីព្រាងវិសោធនកម្មនោះ ក្រុមការងារជំនាញនឹងយកទៅប្រជុំនៅគណៈកម្មាធិការអចិន្ត្រៃយិ៍ព្រឹទ្ធសភា នៅថ្ងៃទី៤ ខែសីហា ឆ្នាំ២០២២ខាងមុខនេះ ដើម្បីពិនិត្យនិងសម្រេច។
លោកមានប្រសាសន៍ថា៖ «នៅថ្ងៃ៤ ខែសីហា បានប្រជុំគណៈកម្មាធិការអចិន្ត្រៃយិ៍នៃព្រឹទ្ធសភា ហើយនឹងសម្រេចដាក់ច្បាប់ហ្នឹងចូលទៅក្នុងរបៀបវារៈពេញអង្គ។ អីចឹងពេលនោះចាំខ្ញុំជម្រាបថ្ងៃ៤ ពេលល្ងាច»។
នាយកប្រតិបត្តិអង្គការអភិវឌ្ឍន៍ផ្នត់គំនិត លោក សេក សុជាតិ មានប្រសាសន៍ថា ការស្នើសុំរបស់បក្សប្រឆាំងទៅកាន់ព្រឹទ្ធសភាមិនទទួលបានផលវិជ្ជមាននោះទេ ពីព្រោះរាល់ការស្នើសុំវិសោធនកម្ម និងកែមាត្រាច្បាប់មួយចំនួនកន្លងមក ស្ថាប័នព្រឹទ្ធសភាតែងតែទទួលយកតាមការស្នើសុំរបស់រដ្ឋាភិបាលនិងស្ថាប័នរដ្ឋសភាជានិច្ច។
នាយកអង្គការរូបនេះបញ្ជាក់ថា ក្រោយពេលធ្វើវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែមនេះ នឹងមានគុណសម្បត្តិ និងគុណវិបត្តិ ចំពោះគណបក្សកាន់អំណាចនិងគណបក្សប្រឆាំង។
លោកមានប្រសាសន៍ថា៖ «គណបក្សកាន់អំណាចធ្វើវិសោធនកម្មនេះវាមានផលប្រយោជន៍ពីរ។ ទី១ អាចរក្សាលំនឹងនៅក្នុងគណបក្សកាន់អំណាច ដើម្បីឆ្ពោះទៅកាន់គោលដៅដែលគេបានរៀបចំទុក ហើយទី ២បង្ហាញឱ្យឃើញនូវភាពអសកម្ម ឬអសមត្ថភាពរបស់មន្ត្រីគណបក្សនយោបាយក្រៅរដ្ឋាភិបាល ដែលមិនមានសមត្ថភាពក្នុងការតស៊ូមតិ ជាពិសេសប៉ះពាល់ដល់អ្នកប្រជាធិបតេយ្យ ប៉ះពាល់ដល់គណបក្សនយោបាយដទៃ»។
កាលពីថ្ងៃ២៨ ខែកក្កដា រដ្ឋសភា បានអនុម័តទាំងស្រុងលើសេចក្តីព្រាងច្បាប់វិសោធនកម្មរដ្ឋធម្មនុញ្ញ ស្តីពីការកែប្រែមាត្រា ១៩ថ្មី(មួយ) មាត្រា៨៩ មាត្រា៩៨ មាត្រា១០២ថ្មី មាត្រា១១៩ថ្មី(មួយ) និងមាត្រា១២៥ថ្មី នៃរដ្ឋធម្មនុញ្ញ និងមាត្រា៣ថ្មី និងមាត្រា៤ថ្មី នៃច្បាប់ធម្មនុញ្ញបន្ថែម ដោយសំឡេង១០៥ លើ១០៦សំឡេង។
អ្វីដែលគួរឱ្យកត់សំគាល់ទៀតនៅពេលនេះ ស្ថាប័នរដ្ឋមួយចំនួន រួមទាំងស្ថាប័នកងទ័ព តុលាការផង បានចេញញត្តិយ៉ាងព្រោងព្រាត ដោយប្រកាសគាំទ្រពេញទំហឹង ចំពោះការធ្វើវិសោធនកម្មរដ្ឋធម្មនុញ្ញលើកទី១០នេះ។
យ៉ាងណា មុនពេលស្ថាប័នរដ្ឋសភា អនុម័តលើសេចក្ដីព្រាងច្បាប់វិសោធនកម្មរដ្ឋធម្មនុញ្ញលើកទី១០នោះ គណបក្សភ្លើងទៀន គណបក្សប្រជាធិបតេយ្យមូលដ្ឋាន គណបក្សឆន្ទៈខ្មែរ និងគណបក្សកែទម្រង់កម្ពុជា ព្រមទាំងក្រុមអង្គការសង្គមស៊ីវិលចំនួន១០៤ស្ថាប័ន បានស្នើរដ្ឋសភាកុំឱ្យអនុម័តលើសំណើរបស់រដ្ឋាភិបាលនេះ ដោយពួកគេបារម្ភថា ការស្នើកែប្រែមាត្រានៃរដ្ឋធម្មនុញ្ញ និងច្បាប់ធម្មនុញ្ញបន្ថែមទាំងនោះ នឹងកាត់បន្ថយអំណាចសភា ហើយប៉ះពាល់ធ្ងន់ធ្ងរដល់ប្រព័ន្ធសភានិយមអាស្រ័យរដ្ឋធម្មនុញ្ញនៅកម្ពុជា៕