រដ្ឋមន្ត្រីក្រសួងសាធារណការ និងដឹកជញ្ជូន បានអះអាងថា ផ្លូវល្បឿនលឿនភ្នំពេញ-ព្រះសីហនុ ត្រៀមដាក់ឱ្យប្រើប្រាស់សាកល្បងនៅខែកក្កដា ឆ្នាំ២០២២ និងសម្ពោធដាក់ឱ្យប្រើប្រាស់ជាផ្លូវការក្នុងពេលវេលាសមស្របណាមួយនៅពេលបន្ទាប់។
ថ្លែងប្រាប់អ្នកសារព័ត៌មានកាលពីម្សិលមិញ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល មានប្រសាសន៍ថា គម្រោងផ្លូវល្បឿនលឿនភ្នំពេញ-ព្រះសីហនុ គឺសម្រេចលទ្ធផលការងារបាន ៩០,៩៥% ហើយ គិតត្រឹមថ្ងៃទី២២ ខែមេសា ឆ្នាំ២០២២។
ផ្លូវល្បឿនលឿននេះបានតភ្ជាប់ពីភូមិ១ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ ដែលមានប្រវែង១៨៧,០៥គីឡូម៉ែត្រ ហើយឆ្លងកាត់រាជធានីភ្នំពេញ និងខេត្តចំនួន៤ រួមមាន ខេត្តកណ្ដាល កំពង់ស្ពឺ កោះកុង និងខេត្តព្រះសីហនុ។
លោក ស៊ុន ចាន់ថុល លើកឡើងទៀតថា ផ្លូវល្បឿនលឿននេះនឹងអាចកាត់បន្ថយការចំណាយនិងពេលវេលា ព្រមទាំងអាចកាត់បន្ថយចរាចរណ៍លើផ្លូវជាតិលេខ៤ ថែមទៀតផង។
លោក ស៊ុន ចាន់ថុល បានប្រៀបធៀបផ្លូវល្បឿនលឿនភ្នំពេញ-ព្រះសីហនុ ទៅនឹងការសាងសង់ផ្លូវល្បឿនលឿនរបស់ប្រទេសកូរ៉េខាងត្បូង សេអ៊ូល-ប៊ូសាន ដោយថា ក្រោយពីកូរ៉េបានសាងសង់ផ្លូវល្បឿនលឿននោះហើយ គឺមានការរីកចម្រើនកាន់តែខ្លាំង។
លោកបន្ថែមទៀតថា៖ «សង្ឃឹមថាក្រុងព្រះសីហនុមានការរីកចម្រើនកាន់តែរហ័សថែមទៀត»។
ចំពោះតម្លៃក្នុងការប្រើប្រាស់ផ្លូវល្បឿនលឿននេះវិញ រដ្ឋមន្ត្រីក្រសួងសាធារណការដដែល ថាមិនទាន់សម្រេចច្បាស់លាស់នោះទេ។
លោកមានប្រសាសន៍ថា៖ «បើថ្លៃពេកក៏គេមិនជិះដែរ គេទៅជិះផ្លូវដែលមិនយកលុយ បើយកថោកពេក មិនអាចប្រមូលដើមទុនបានទេ»។
យ៉ាងណាមិញ លោកក៏បានលើកឡើងនូវតម្លៃស្តង់ដារអន្តរជាតិ ដោយគេគិតក្នុងតម្លៃ១០សេន ឬស្មើប្រមាណ៤០០រៀលក្នុងមួយគីឡូម៉ែត្រ ប៉ុន្តែលោកថា សម្រាប់កម្ពុជានឹងគិតតម្លៃក្រោម១០សេន។
លើសពីនេះទៅទៀត លោកបញ្ជាក់ថា រដ្ឋាភិបាលនឹងបើកឱ្យប្រើប្រាស់ដោយមិនគិតថ្លៃមួយរយៈពេលខ្លីសិន រួចនឹងឡើងថ្លៃបន្តិចម្ដងៗ ដោយប្រើប្រព័ន្ធផ្សព្វផ្សាយ ដើម្បីប្រាប់របៀបប្រើប្រាស់ផ្លូវល្បឿនលឿននេះ។ លោកនិយាយដែរថា ផ្លូវនេះអាចបើកល្បឿនប្រហែល១២០គីឡូម៉ែត្រក្នុងមួយម៉ោង។ ចំណែកម៉ូតូធុនតូច ឬរ៉ឺម៉កកង់បី នឹងមិនអាចប្រើប្រាស់ផ្លូវនេះបានទេ ដោយសារខុសស្តង់ដារ។
តាមរបាយការណ៍ក្រសួងសាធារណការ និងដឹកជញ្ជូន បានឱ្យដឹងថា ផ្លូវល្បឿនលឿនភ្នំពេញ-ព្រះសីហនុ ចាប់ផ្ដើមការដ្ឋានសាងសង់កាលពីថ្ងៃទី២២ ខែមីនា ឆ្នាំ២០១៩ ហើយគ្រោងនឹងបញ្ចប់នៅថ្ងៃទី៣១ ខែឧសភា ឆ្នាំ២០២៣ ដោយប្រើរយៈពេលសាងសង់៤៨ខែ ដែលចំណាយថវិកាប្រមាណ២ ០១៩លានដុល្លារសហរដ្ឋអាមេរិក៕
